Samoɛle Mɔɔ Limoa 21:1-15
21 Nzinlii, Devidi hɔle ɛsɔfo Ahemɛlɛke anwo lɔ wɔ Nɔɔbo.+ Mɔɔ Ahemɛlɛke yiale Devidi la, ɔ nwo wosole ye na ɔbizale ye kɛ: “Duzu ati a ɛ ngomekye ɛlua na awie ɛmboka ɛ nwo ɛ?”+
2 Devidi buale ɛsɔfo Ahemɛlɛke kɛ: “Belemgbunli ne ɛha ɛhile me kɛ mengɔnyɛ debie, noko ɔse, ‘Mmamaa awie biala te ɛzoanlɛ ne mɔɔ melɛsoa wɔ nee adehilelɛ mɔɔ meva memaa wɔ la anwo bie.’ Me nee me mgbavolɛ ne mɔ yɛle ngyehyɛleɛ kɛ yɛbayia ɛleka bie.
3 Saa ɛlɛ paano nnu anzɛɛ debie gyɛne biala wɔ ɛkɛ a, fa maa me.”
4 Noko ɛsɔfo ne buale Devidi kɛ: “Menlɛ paano gyɛne biala wɔ ɛkɛ, kɛ paano nwuanzanwuanza ne ala+—mɔɔ hyia la a le kɛ saa mgbavolɛ ne mɔ ɛtɛfale bɛ nwo ɛtɛkanle mraalɛ ɛdeɛ a.”*+
5 Devidi buale ɛsɔfo ne kɛ: “Yɛtɛfale yɛ nwo yɛtɛkanle mraalɛ kɛ mekɛ gyɛne mɔɔ ɛnee mekɔ konle ala la.+ Saa bɛsoa yɛ ɛleka gyɛne biala a mgbavolɛ ne mɔ yɛ bɛ nwo nwuanzanwuanza a, ɛnee nea kɛzi bɛbayɛ bɛ nwo nwuanzanwuanza ɛnɛ la!”
6 Ɔti ɛsɔfo ne vale paano nwuanzanwuanza ne+ maanle ye, ɔluakɛ ɛnee paano biala ɛnle ɛkɛ ne kɛ paano ne mɔɔ bɛfa bɛkile la ala, ɛnee bɛye bɛvi Gyihova anyunlu na bɛva fofolɛ bɛgua ɔ bo zo ne wɔ kenle mɔɔ bɛyele la.
7 Kenle zɔhane, ɛnee Sɔɔlo azonvolɛ ne mɔ ko wɔ ɛkɛ, ɛnee bɛmaa yeha Gyihova anyunlu ɛkɛ. Bɛfɛlɛ ye Dowɛge,+ ɔle Yidɔmenli+ mɔɔ le Sɔɔlo mboaneneavolɛ kpanyinli.
8 Akee Devidi zele Ahemɛlɛke kɛ: “Ɛlɛ atwɛ anzɛɛ konle dadeɛ wɔ ɛ nwo ɛke ɔ? Meanva me konle dadeɛ anzɛɛ me akodeɛ ne, ɔluakɛ ɛnee ɔwɔ kɛ mekɔ belemgbunli ɛzoanlɛ ne ndɛndɛ.”
9 Ɛsɔfo ne hanle kɛ: “Filisitianli Golayate+ mɔɔ ɛhunle ye wɔ Yilaa Bɔnza ne anu+ la konle dadeɛ ne a wɔ ɛke a, bɛva ɛdanlɛ bɛkyekye nwo na ɔwɔ yifɔdo ne+ anzi. Saa ɛkulo kɛ ɛfa a, ɛnee fa, ɔluakɛ yemɔ ala a wɔ ɛke a.” Devidi hanle kɛ: “Konle dadeɛ biala nee ye ɛnzɛ. Fa maa me.”
10 Kenle zɔhane Devidi dwazole na ɔdoale zo ɔnriandile+ Sɔɔlo na ɔhɔdwule Gate+ Belemgbunli Ekehye anwo lɔ.
11 Ekehye azonvolɛ ne mɔ zele ye kɛ: “Tɛ Devidi, azɛlɛ ne azo belemgbunli ne ɛne? Tɛ ɔdaye a bɛzile agole na bɛdole ɔ nwo edwɛne bɛhanle kɛ,‘Sɔɔlo ɛhu apenle apenle,Na Devidi ɛhu apenle apenle bulu bulu’ la ɔ?”+
12 Devidi vale edwɛkɛ ɛhye ziele ye ahonle nu, na ɔzulole+ Gate Belemgbunli Ekehye kpole.
13 Yemɔti ɔyɛle ɔ nwo kɛ yezɛ+ wɔ bɛ nyunlu ɛkɛ na ɔbɔle ɛzɛlɛ ɛbɛla wɔ bɛ avinli.* Ɔhɛlɛhɛlɛle anlenkɛ kpole ne nlenkɛ ne mɔ anwo na ɔmaanle ɔ nloa nyɛlɛ hwinle guale ɔ kɛsa anu.
14 Akee Ekehye zele ye azonvolɛ ne mɔ kɛ: “Bɛnwu kɛ nrenyia ɛhye ɛzɛ! Duzu ati a bɛva ye bɛrɛlɛ me a?
15 Mehyia ɛzɛlɛma nwo la ati a bɛva sonla ɛhye bɛra kɛ ɔrabɔ ɛzɛlɛ ɛbɛla ɔhile me ɔ? Ɔwɔ kɛ nrenyia ɛhye ba me sua nu ɔ?”
