Samoɛle Mɔɔ Limoa 4:1-22
4 Na Samoɛle edwɛkɛ ne dwule Yizilayɛma kɔsɔɔti ɛkɛ.
Akee Yizilayɛma hɔle kɛ bɛ nee Filisitiama kaho; bɛyɛle bɛ azokoɛleɛ ne wɔ Ɛbɛnizɛ anwo, na Filisitiama yɛle bɛ azokoɛleɛ ne wɔ Efɛke.
2 Filisitiama hyehyɛle bɛ nwo kɛ bɛ nee Yizilayɛma kaho, na konle ne anu yɛle se na Filisitiama lile Yizilayɛma anwo zo konim na bɛhunle menli 4,000 wɔ konle ne anu.
3 Mɔɔ menli ne ziale rale azokoɛleɛ ɛkɛ ne la, Yizilayɛ mgbanyima ne mɔ bizale kɛ: “Duzu ati a Gyihova ɛmaa Filisitiama ɛli yɛ nwo zo konim ɛnɛ a?*+ Bɛmaa yɛhɔva Gyihova ngyekyeleɛ ɛlɛka ne yɛvi Hyaelo yɛrɛla,+ amaa yeaboka yɛ nwo na yealie yɛ yeavi yɛ kpɔvolɛma asa anu.”
4 Ɔti menli ne zoanle maanle bɛhɔle Hyaelo na bɛhɔvale ɛlɔne Gyihova, mɔɔ de kyɛlɔbe ne mɔ azo* la+ ngyekyeleɛ ɛlɛka ne bɛrale. Ɛnee Yilae amra nwiɔ ne, Hɔfenae nee Fenɛhaze+ noko wɔ nɔhalɛ Nyamenle ne ngyekyeleɛ ɛlɛka ne anwo wɔ ɛkɛ.
5 Mɔɔ Gyihova ngyekyeleɛ ɛlɛka ne dwule azokoɛleɛ ɛkɛ ne ala la, Yizilayɛma kɔsɔɔti wudole kpole maanle azɛlɛ ne kpusule.
6 Mɔɔ Filisitiama dele ɛwudolɛ ne la, bɛbizale kɛ: “Duzu ati a bɛlɛwudo kpole zɛhae wɔ Hibuluma azokoɛleɛ ne a?” Akee bɛdele kɛ Gyihova Ɛlɛka ne ɛradwu azokoɛleɛ ɛkɛ ne.
7 Filisitiama ahonle dule na bɛhanle kɛ: “Nyamenle ɛra azokoɛleɛ ɛkɛ ne!”+ Ɔti bɛhanle kɛ: “Edwɛkɛ ɛdo yɛ, ɔluakɛ debie zɛhae bie ɛtɛsile ɛlɛ!
8 Edwɛkɛ ɛdo yɛ! Nwane a balie yɛ avi Nyamenle bedevinli ɛhye asa anu a? Nyamenle ɛhye a hunle Yigyibitima dɔɔnwo wɔ fienemgbole ne anu la.+
9 Bɛmɛ Filisitiama, bɛnyia akɛnrasesebɛ na bɛhile kɛ bɛle mrenyia, amaa bɛanzonle Hibuluma kɛ mɔɔ bɛsonle bɛ la.+ Bɛhile kɛ bɛle mrenyia na bɛho!”
10 Yemɔti Filisitiama honle na bɛlile Yizilayɛma anwo zo konim,+ na ko biala nriandile hɔle ye ɛdanlɛsua nu. Bɛhunle menli dɔɔnwo kpalɛ. Yizilayɛ sogyama mɔɔ dua aze la 30,000 wule.
11 Bɛvale Nyamenle ngyekyeleɛ ɛlɛka ne noko, na Yilae amra nwiɔ ne, Hɔfenae nee Fenɛhaze wule.+
12 Bɛngyamanenli bie vi konle ne anloa nriandile na ɔradwule Hyaelo kenle ko ne, ɛnee yesuosua ye adɛladeɛ nu na yeva ndɛtɛlɛ yegua ɔ ti zo.+
13 Mɔɔ nrenyia ne radwule la, ɛnee Yilae de ebia zo wɔ adenle ne anloa na ɔ nye gyi adenle zo, ɔluakɛ ɛnee ɔlɛdwenle nɔhalɛ Nyamenle ne Ɛlɛka ne anwo.+ Nrenyia ne hɔbɔle amaneɛ wɔ sua ne azo, na sua ne azo amra amuala deɛdeanle nu.
14 Mɔɔ Yilae dele dede ne la, ɔbizale kɛ: “Dede ɛhye abo kile duzu?” Nrenyia ne nriandile ndɛndɛ na ɔrabɔle Yilae amaneɛ.
15 (Ɛnee Yilae ɛli ɛvolɛ 98, yɛɛ ɔ nye gua zo noko ɔnnwu debie.)+
16 Nrenyia ne zele Yilae kɛ: “Medame a mevi konle ne anloa mera a! Ɛnɛ ala a mevi konle ne anloa menriandi a.” Na ɔbizale ye kɛ: “Me ra, duzu a zile a?”
17 Ɔti ahenle mɔɔ rabɔle amaneɛ ne la hanle kɛ: “Yizilayɛma ɛnriandi ɛvi Filisitiama anyunlu, na menli ne ɛli bɛ nwo zo konim kpole;+ ɛ mra nwiɔ ne, Hɔfenae nee Fenɛhaze noko ɛwu,+ yɛɛ bɛva nɔhalɛ Nyamenle ne Ɛlɛka ne bɛhɔ.”+
18 Mɔɔ ɔhanle nɔhalɛ Nyamenle ne Ɛlɛka ne anwo edwɛkɛ ala la, Yilae vi ye ebia ne mɔɔ ɔde zo wɔ anlenkɛ kpole ne anwo la azo ɔdɔle alɛnranyunlu, ɔ kɔme bule na ɔwule, ɔluakɛ ɛnee yeyɛ kpanyinli yɛɛ ye nuhua yɛ ɛlomboɛ. Ɔbuale Yizilayɛma ndɛne ɛvolɛ 40.
19 Ɛnee ye ase, ɔ ra Fenɛhaze aye ne ɛlɛnrenzɛ na ɔka ekyii ɔwo. Mɔɔ ɔdele kɛ bɛva nɔhalɛ Nyamenle ne Ɛlɛka ne na ye ase nee ɔ hu ɛwu la, ɔ ko hanle ye arɛlevilɛ nu na ɔwole.
20 Mɔɔ ɔlɛwu la, raalɛ ne mɔɔ gyi ɔ nwo ɛkɛ la hanle kɛ: “Mmasulo ɔluakɛ wɔwo ralɛ nrenyia.” Yeambua yɛɛ yeanva ye adwenle yeangɔ zo.*
21 Noko ɔdonle kakula ne Yekabɔdo,*+ na ɔhanle kɛ: “Anyunlunyia ɛvi Yizilayɛ ɛhɔ akɛlɛzonlenlɛ nu,”+ nɔhalɛ Nyamenle ne Ɛlɛka ne mɔɔ bɛva bɛhɔ nee mɔɔ ɛdo ye ase nee ɔ hu la ati a ɔhanle ye zɔ a.+
22 Ɔhanle kɛ: “Anyunlunyia ɛvi Yizilayɛ ɛhɔ akɛlɛzonlenlɛ nu, ɔluakɛ bɛva nɔhalɛ Nyamenle ne Ɛlɛka ne bɛhɔ.”+
Ɔbodwɛkɛ
^ Hibulu aneɛ nu, “Duzu ati a Gyihova ɛli yɛ nwo zo konim a?”
^ Anzɛɛ ɔkola ɔkile, “ne mɔ avinli.”
^ Anzɛɛ “yeanva ye ahonle yeanzie zo.”
^ Ɔ bo kile “Anyunlunyia Ne Hale Ni?”
