Ditilɔnomi 31:1-30
31 Akee Mosisi hɔhanle edwɛkɛ ɛhye hilele Yizilayɛma kɔsɔɔti,
2 ɔhanle ɔhilele bɛ kɛ: “Ɛnɛ, meli ɛvolɛ 120.+ Menrɛhola menrɛli bɛ nyunlu bieko,* ɔluakɛ Gyihova ɛha ɛhile me kɛ, ‘Ɛnrɛpɛ Dwɔdan ɛhye.’+
3 Gyihova bɛ Nyamenle ne a le awie mɔɔ baze ali bɛ nyunlu a, na ɔdaye mumua ne ɔbazɛkye maanle maanle ɛhye mɔ na bɛavoa bɛ.+ Dwɔhyua a bali bɛ nyunlu ahɔ a,+ kɛ mɔɔ Gyihova ɛha la.
4 Gyihova bayɛ bɛ kɛ mɔɔ ɔyɛle Amɔlema Arelemgbunli Saehɔn+ nee Ɔɔgo+ nee bɛ azɛlɛ ne mɔɔ ɔzɛkyele bɛ la.+
5 Gyihova bali bɛ nwo zo konim amaa bɛ, na ɔwɔ kɛ bɛyɛ bɛ kɛ mɔɔ mɛla ne kɔsɔɔti mɔɔ meva memaa bɛ la kile la.+
6 Bɛnyia akɛnrasesebɛ na bɛmaa bɛ nwo ɛyɛ se.+ Bɛmmasulo yɛɛ bɛmmamaa bɛ ahonle tu wɔ bɛ nyunlu+ ɔluakɛ Gyihova bɛ Nyamenle ne a nee bɛ lua a. Ɔnrɛgyakyi bɛ yɛɛ ɔnrɛkpo bɛ ɛlɛ.”+
7 Akee Mosisi vɛlɛle Dwɔhyua na ɔzele ye wɔ Yizilayɛma kɔsɔɔti anyunlu kɛ: “Nyia akɛnrasesebɛ na maa ɛ nwo ɛyɛ se,+ ɔluakɛ ɛdawɔ a ɛbava menli ɛhye mɔ wɔahɔ azɛlɛ ne mɔɔ Gyihova hanle ndane kɛ ɔbava yeamaa bɛ nenyia mɔ la azo a, na wɔava wɔamaa bɛ kɛ bɛ agyapadeɛ.+
8 Gyihova a bali ɛ nyunlu a, na ɔ nee wɔ balua.+ Ɔnrɛgyakyi wɔ yɛɛ ɔnrɛkpo wɔ ɛlɛ. Mmasulo yɛɛ mmamaa wɔ ahonle tu.”+
9 Akee Mosisi hɛlɛle Mɛla ɛhye+ na ɔvale ɔmaanle Livae ɛsɔfo ne mɔ, mɔɔ bɛsoa Gyihova ngyekyeleɛ ɛlɛka ne la nee Yizilayɛ mgbanyima kɔsɔɔti.
10 Mosisi zele bɛ kɛ: “Ɛvolɛ nsuu biala awieleɛ, ɛvolɛ mɔɔ bɛfa kakɛ bɛkyɛ la dwu,+ wɔ Kpɔda Bo Ɛdɛnlanlɛ* Ɛvoyia ne anu,+
11 mekɛ mɔɔ Yizilayɛma kɔsɔɔti kɛra Gyihova bɛ Nyamenle ne anyunlu+ wɔ ɛleka mɔɔ ɔkɛhile la a, ɔwɔ kɛ bɛkenga Mɛla ɛhye bɛmaa Yizilayɛma kɔsɔɔti te.+
12 Boɔboa menli ne anloa,+ mrenyia, mraalɛ, ngakula* nee nyɛvolɛ mɔɔ wɔ bɛ azuamgbole* ne mɔ azo la amaa bɛadie na bɛazukoa na bɛazulo Gyihova bɛ Nyamenle ne na bɛanlea bɛali edwɛkɛ mɔɔ wɔ Mɛla ɛhye anu la kɔsɔɔti azo.
13 Akee bɛ mra mɔɔ bɛnze Mɛla ɛhye la badie+ na bɛazukoa kɛ bɛbazulo Gyihova bɛ Nyamenle ne, wɔ mekɛ tendenle mɔɔ bɛbadɛnla azɛlɛ ne mɔɔ bɛlɛpɛ Dwɔdan ne bɛahɔdɛnla zolɛ la azo la.”+
14 Akee Gyihova zele Mosisi kɛ: “Nea! Wɔ ewule mekɛ ɛlɛbikye.+ Fɛlɛ Dwɔhyua na bɛhɔgyinla nyianu ɛdanlɛsua ne anwo, amaa meakpa ye meamaa yeali bɛ nyunlu.”+ Ɔti Mosisi nee Dwɔhyua hɔgyinlanle nyianu ɛdanlɛsua ne anwo.
15 Akee Gyihova luale amungu pila nu rale, na amungu pila ne ragyinlanle ɛdanlɛsua ne anuhɔlɛ.+
16 Akee Gyihova zele Mosisi kɛ: “Nea! Ɔka ekyii ɛwu,* na menli ɛhye babɔ ɔ bo kɛ bɛ nee nyamenle gyɛne mɔɔ ɛbɛnga bɛ ɛyia wɔ azɛlɛ ne mɔɔ bɛlɛkɔ zolɛ la azo la babɔ sunsum nu tuutuu.+ Bɛbakpo me+ na bɛnrɛli me ngyekyeleɛ ne mɔɔ me nee bɛ ɛyɛ la azo.+
17 Mekɛ zɔhane mebava bɛ nwo ɛya kpole+ na meakpo bɛ+ na meava me nyunlu meavea bɛ+ kɔkpula kɛ bɛbazɛkye bɛ la. Akee munzule nee ngyegyelɛ dɔɔnwo ba bɛ nwo zo a,+ bɛbaha kɛ, ‘Asoo tɛ yɛ Nyamenle ne mɔɔ ɛnle yɛ avinli la ati a munzule ɛhye mɔ ɛra yɛ nwo zo a?’+
18 Noko mebava me nyunlu meavea wɔ kenle zɔhane ɔlua amumuyɛ mɔɔ bɛyɛ na bɛhɔzonle nyamenle gyɛne la ati.+
19 “Akee bɛhɛlɛ edwɛne ɛhye+ na bɛhile Yizilayɛma.+ Bɛmaa bɛzukoa* amaa edwɛne ɛhye ayɛ daselɛ amaa Yizilayɛma.+
20 Saa mefa bɛ meba azɛlɛ ne mɔɔ meha ndane kɛ mebava meamaa bɛ nenyia mɔ+—azɛlɛ mɔɔ meleke nee wolɛ se zolɛ+—na bɛdi na bɛ ko yi na bɛkpazi* a,+ bɛbahakyi bɛ nwo bɛahɔzonle nyamenle gyɛne, na bɛnrɛbu me yɛɛ bɛnrɛli me ngyekyeleɛ ne azo.+
21 Saa munzule nee ngyegyelɛ dɔɔnwo ba bɛ nwo zo a,+ edwɛne ɛhye bayɛ daselɛ amaa bɛ (ɔnle kɛ bɛ bo zo amra arɛle fi), ɔluakɛ meze adwenle mɔɔ bɛnyia ye dɛba+ kolaa na meava bɛ meara azɛlɛ ne mɔɔ menganle nwolɛ ndane la azo.”
22 Ɔti Mosisi hɛlɛle edwɛne ɛhye wɔ kenle zɔhane na ɔhilele Yizilayɛma.
23 Akee ɔyele* Nɛn ara Dwɔhyua+ na ɔzele ye kɛ: “Nyia akɛnrasesebɛ na maa ɛ nwo ɛyɛ se,+ ɔluakɛ ɛdawɔ a ɛbava Yizilayɛma wɔahɔ azɛlɛ ne mɔɔ menganle ndane kɛ mebava meamaa bɛ la azo a,+ na me nee wɔ balua.”
24 Mosisi hɛlɛle edwɛkɛ mɔɔ wɔ Mɛla buluku ne anu la kɔsɔɔti wiele ala la,+
25 Mosisi zele Livaema mɔɔ soa Gyihova ngyekyeleɛ ɛlɛka ne la kɛ:
26 “Bɛva Mɛla buluku ɛhye+ bɛhɔdo Gyihova bɛ Nyamenle ne ngyekyeleɛ ɛlɛka ne anwo ɛkɛ,+ na ɔbayɛ daselɛ yeamaa bɛ.
27 Ɔluakɛ meze bɛ atuadelɛ+ nee bɛ anzosesebɛyɛlɛ+ ne* kpalɛ. Saa bɛdele atua bɛtiale Gyihova wɔ mekɛ mɔɔ mede aze wɔ bɛ nwo ɛke la a, ɛnee akee mɔɔ mekɛwu la!
28 Bɛboɔboa bɛ mbusua mgbanyima ne mɔ nee bɛ menli titili ne mɔ kɔsɔɔti anloa bɛmaa me, na bɛmaa menga edwɛkɛ ɛhye mɔ mengile bɛ, na memaa anwuma nee aze* ɛli bɛ daselɛ.+
29 Ɔluakɛ meze kɛ saa mewu a, bɛbayɛ ninyɛndane+ na bɛahwe bɛ nwo bɛavi adenle ne mɔɔ mengilele bɛ la azo. Na awieleɛ ne munzule bado bɛ,+ ɔluakɛ bɛbayɛ mɔɔ le ɛtane wɔ Gyihova anye zo la na bɛava bɛ sa anloa gyima bɛaha ye ɛya.”
30 Akee Mosisi gengale edwɛkɛ mɔɔ wɔ edwɛne ne anu la hilele Yizilayɛma* amuala ɔvi ye mɔlebɛbo kɔdwu ye awieleɛ:+
Ɔbodwɛkɛ
^ Hibulu aneɛ nu, “menrɛli akɔneaba.”
^ Anzɛɛ “Kpɔda Mɔɔ Ɔngyɛ Na Bɛadudu.”
^ Hibulu aneɛ nu, “ngakula ngyikyi.”
^ Hibulu aneɛ nu, “nlenkɛ mgbole.”
^ Hibulu aneɛ nu, “ɛ nee wɔ papa mɔ kɔda.”
^ Hibulu aneɛ nu, “Bɛva bɛwula bɛ nloa anu.”
^ Hibulu aneɛ nu, “bɛyɛ mbelane.”
^ Ɔda ali kɛ Nyamenle ɔ.
^ Hibulu aneɛ nu, “bɛ kɔme mɔɔ bɛyɛ ye ketee la.”
^ Anzɛɛ “azɛlɛ ye.”
^ Anzɛɛ “Yizilayɛ asafo ne.”
