Dwɔn Edwɛkpa 18:1-40
18 Mɔɔ Gyisɛse hanle ɛhye wiele la, ɔ nee ye ɛdoavolɛma ne hɔle tola bie mɔɔ wɔ Kedelɔn Bɔnza ne* anzi lɔ la anu.+
2 Ɛnee Dwudase mɔɔ yele ye maanle la noko ze ɛleka zɔhane, ɔluakɛ ɛnee Gyisɛse nee ye ɛdoavolɛma ne ta kɔ ɛkɛ.
3 Yemɔti Dwudase nee sogyama ekpunli nee ɛsɔfo mgbanyinli nee Falasiima ne sinzavolɛma ne mɔ mɔɔ bɛdedɛ tɛkɛ nee ahɛnlaneɛ yɛɛ akodeɛ la rale ɛkɛ.+
4 Na kɛmɔ ɛnee Gyisɛse ze ninyɛne mɔɔ bazi la amuala la ati, ɔrale ɔ nyunlu na ɔbizale bɛ kɛ: “Nwane a bɛkpondɛ ye a?”
5 Bɛbuale ye kɛ: “Gyisɛse mɔɔ vi Nazalɛte la.”+ Ɔzele bɛ kɛ: “Medame ɛne.” Ɛnee Dwudase mɔɔ yele ye maanle la noko gyi bɛ nwo ɛkɛ.+
6 Noko, mɔɔ Gyisɛse zele bɛ kɛ, “Medame ɛne” la, bɛhɔle bɛ nzi na bɛdule bɛguale aze.+
7 Yemɔti ɔbizale bɛ bieko kɛ: “Nwane a bɛkpondɛ ye a?” Bɛhanle kɛ: “Gyisɛse mɔɔ vi Nazalɛte la.”
8 Gyisɛse buale kɛ: “Meha mehile bɛ kɛ medame ɛne. Ɔti saa medame a bɛkpondɛ me a, ɛnee bɛmaa menli ɛhye mɔ ɛhɔ.”
9 Ɛhye bamaa mɔɔ ɔhanle la ara nu kɛ: “Bɛdabɛ mɔɔ ɛvale bɛ ɛmaanle me la, meamminli bɛ nuhua ko bɔbɔ.”+
10 Akee Saemɔn Pita mɔɔ ɛnee lɛ dadeɛ wɔ ɔ nwo la hwenle na ɔvale ɔpɛle ɛsɔfo kpanyinli ne akɛlɛ ne anzo fema ne.+ Bɛfɛlɛ akɛlɛ ne Malekɛse.
11 Gyisɛse akee zele Pita kɛ: “Fa wɔ dadeɛ ne wula ye boa ne anu.+ Asoo ɔnle kɛ meno kanrɛlɛ ne mɔɔ Selɛ ne ɛva ɛmaa me la anu ɔ?”+
12 Akee sogyama ne nee sogya kpanyinli ne yɛɛ Dwuuma sinzavolɛma ne mɔ hyele Gyisɛse na bɛkyekyele ye.
13 Bɛlimoale bɛvale ye bɛhɔle Anase ɛkɛ, ɔluakɛ ɛnee ɔle Keeyafase mɔɔ ɛnee le ɛsɔfo kpanyinli wɔ zɔhane ɛvolɛ ne anu la aye ne papa.+
14 Keeyafase ɛhye a dule Dwuuma ne folɛ kɛ ɔle kpalɛ ɔmaa bɛ kɛ sonla ko kɛwu kɛmaa menli ne la.+
15 Ɛnee Saemɔn Pita nee ɛdoavolɛ ko noko li Gyisɛse anzi.+ Ɛsɔfo kpanyinli ne ze ɛdoavolɛ zɔhane, na ɔlile Gyisɛse anzi ɔhɔle ɛsɔfo kpanyinli ne alienwo ɛkɛ,
16 noko ɛnee Pita gyi anlenkɛ ne anzi wɔ alienwo. Ɔti ɛdoavolɛ ko ne mɔɔ ɛsɔfo kpanyinli ne ze ye la vindele na ɔ nee ahenle mɔɔ de anlenkɛ ne anloa la hɔdendɛle na ɔmaanle Pita wolole.
17 Akee sonvolɛ bɛlɛra ne mɔɔ nea anlenkɛ ne anloa la zele Pita kɛ: “Ɛle nrenyia ɛhye ɛdoavolɛma ne anu ko, ɔnle zɔ ɔ?” Ɔhanle kɛ: “Kyɛkyɛ, memboka bɛ nwo.”+
18 Ɛnee ngɛkɛlɛ ne mɔ nee sinzavolɛma ne gyigyi senle bie mɔɔ bɛva emunlike bɛwuda la anwo bɛlɛte, ɔluakɛ ɛnee maanle nu yɛ ɛyɛlɛ. Ɛnee Pita noko gyi bɛ nwo ɛkɛ ne ɔlɛte senle ne bie.
19 Yemɔti ɛsɔfo kpanyinli ne bizale Gyisɛse edwɛkɛ mɔɔ fale ye ɛdoavolɛma ne nee ye ngilehilelɛ ne anwo la.
20 Gyisɛse buale ye kɛ: “Metendɛ wɔ menli ne kɔsɔɔti anyunlu. Mekɛ biala mekilehile wɔ nyianusua nu nee ɛzonlenlɛsua ne anu,+ ɛleka mɔɔ Dwuuma kɔsɔɔti yia la, na meanga edwɛkɛ biala wɔ fealeranu.
21 Duzu ati a ɛlɛbiza me edwɛkɛ ɛhye a? Biza bɛdabɛ mɔɔ bɛdele mɔɔ menganle mengilele bɛ la. Nea! Bɛze mɔɔ menganle la.”
22 Mɔɔ ɔhanle ɛhye la, sinzavolɛma ne mɔɔ gyigyi ɛkɛ ne la anu ko pɛle Gyisɛse anye zo+ na ɔhanle kɛ: “Asoo kɛ ɔwɔ kɛ ɛbua ɛsɔfo kpanyinli ne la ɛne?”
23 Gyisɛse buale ye kɛ: “Saa mɔɔ meha la ɛnle kpalɛ a, ka kile me;* noko saa mɔɔ menganle la le zɔ a, ɛnee duzu ati a ɛbɔle me a?”
24 Akee Anase maanle bɛkyekyele ye bɛvale ye bɛhɔmaanle ɛsɔfo kpanyinli Keeyafase.+
25 Ɛnee Saemɔn Pita gyi ɛkɛ ɔlɛte senle. Na bɛzele ye kɛ: “Ɛdawɔ noko ɛboka ye ɛdoavolɛma ne anwo, ɔnle zɔ ɔ?” Yeanlie yeando nu na ɔhanle kɛ: “Kyɛkyɛ, memboka bɛ nwo.”+
26 Ɛsɔfo kpanyinli ne ngɛkɛlɛ ne mɔ ko mɔɔ ɔ nwo sonla a le nrenyia ne mɔɔ Pita pɛle ɔ nzo+ ne la hanle kɛ: “Menwunle wɔ wɔ tola ne anu, ɔnle zɔ ɔ?”
27 Noko eza Pita anlie ando nu, na ɛkɛ ne ala akɔlɛ bɔle.+
28 Akee bɛvale Gyisɛse bɛvile Keeyafase ɛkɛ bɛhɔle amɛnlado ne sua nu.+ Ɛnee ɔle nwonlomɔ mangyee. Noko bɛdabɛ mumua ne bɛanwolo amɛnlado ne sua nu ɛkɛ amaa bɛ nwo angua evinli+ na bɛahola bɛali Akpabɛnwo ne.
29 Yemɔti Paelɛte vindele rale bɛ nwo ɛkɛ na ɔbizale bɛ kɛ: “Ɛtane boni a nrenyia ɛhye ɛyɛ a?”
30 Bɛbuale ye kɛ: “Saa nrenyia ɛhye ɛnle ɛtanevolɛ* a, anrɛɛ yɛanva ye yɛambɛlɛ wɔ.”
31 Ɔti Paelɛte zele bɛ kɛ: “Bɛdabɛ bɛva ye bɛhɔ na bɛhɔli ye edwɛkɛ kɛ mɔɔ bɛ mɛla ne kile la.”+ Dwuuma ne zele ye kɛ: “Mɛla ɛmmaa adenle kɛ yɛkɛhu awie.”+
32 Ɛhye zile amaa edwɛkɛ ne mɔɔ Gyisɛse hanle ye wɔ ewule holɛ ko mɔɔ ɔbawu anwo la ara nu.+
33 Yemɔti Paelɛte hɔle amɛnlado ne sua nu ɛkɛ ne bieko na ɔzele Gyisɛse kɛ: “Wɔmɔ a ɛle Dwuuma Belemgbunli ne la ɔ?”+
34 Gyisɛse buale kɛ: “Ɛdawɔ mumua ne a ɛlɛbiza ɛhye a, anzɛɛ awie mɔ a ɛha me nwo edwɛkɛ ɛhile wɔ a?”
35 Paelɛte buale kɛ: “Ɛnea a mele Dwuunli ɔ? Ɛdawɔ mumua ne wɔ maanlema nee ɛsɔfo mgbanyima ne mɔ yɛɛ ɛva wɔ ɛrɛlɛ me a. Duzu a ɛyɛle a?”
36 Gyisɛse buale kɛ:+ “Me Belemgbunlililɛ ɛnvi ewiade ɛhye anu.+ Saa me Belemgbunlililɛ vi ewiade ɛhye anu a, anrɛɛ me sonvolɛma kɛho na bɛanye me bɛammaa Dwuuma.+ Noko kɛ mɔɔ ɔde la, me Belemgbunlililɛ ɛnvi ewiade ɛhye anu.”
37 Ɔti Paelɛte zele ye kɛ: “Se ɛnee ɛle belemgbunli?” Gyisɛse buale kɛ: “Yemɔ a ɛdawɔ mumua ne wɔha kɛ mele belemgbunli la.+ Ɔluakɛ ɛhye ati a bɛwole me a, na ɛhye ati a mera ewiade ye anu a, amaa meali nɔhalɛ ne anwo daselɛ.+ Awie biala mɔɔ wɔ nɔhalɛ ne afoa la tie me ne.”
38 Paelɛte zele ye kɛ: “Duzu a le nɔhalɛ?”
Mɔɔ ɔhanle ɛhye ɔwiele la, eza ɔhɔle Dwuuma ne anwo ɛkɛ na ɔzele bɛ kɛ: “Mennwu nvonleɛ biala wɔ ɔ nwo.+
39 Bieko, ɔle bɛ amaamuo kɛ ɔwɔ kɛ meye sonla ko memaa bɛ wɔ Akpabɛnwo ne anu.+ Yemɔti bɛkulo kɛ meye Dwuuma Belemgbunli ne memaa bɛ ɔ?”
40 Bɛdeɛdeanle nu bieko kɛ: “Tɛ nrenyia ɛhye ɔ, emomu Balabase!” Ɛnee Balabase le awule.+
