Dwɔn Edwɛkpa 8:12-59
8 12 Akee Gyisɛse zele bɛ bieko kɛ: “Mame a mele ewiade wienyi ne a.+ Awie biala mɔɔ kɛdoa me la ɛnrɛlua awozinli nu ɛlɛ, emomu ɔbanyia wienyi ne+ mɔɔ maa ngoane la.”
13 Yemɔti Falasiima ne zele ye kɛ: “Ɛdi ɛ nwo daselɛ; wɔ daselɛlilɛ ne ɛnle nɔhalɛ.”
14 Gyisɛse buale bɛ kɛ: “Saa medi me nwo daselɛ bɔbɔ a, me daselɛlilɛ ne le nɔhalɛ ɔluakɛ meze ɛleka mɔɔ mevi membale a, yɛɛ meze ɛleka mɔɔ melɛkɔ la.+ Noko bɛmɛ, bɛnze ɛleka mɔɔ mevi membale nee ɛleka mɔɔ melɛkɔ la.
15 Bɛnea sonla nyunlu na bɛabua ndɛne;+ mame membua awie biala ndɛne.
16 Na saa mebua ndɛne bɔbɔ a, me ndɛnebualɛ le nɔhalɛ, ɔluakɛ tɛ me ngome a melua a, Selɛ ne mɔɔ zoanle me la boka me nwo.+
17 Eza bɛhɛlɛ ye wɔ bɛ Mɛla ne anu kɛ: ‘Menli nwiɔ daselɛlilɛ le nɔhalɛ.’+
18 Medi me nwo daselɛ, yɛɛ Selɛ ne mɔɔ zoanle me la noko di me nwo daselɛ.”+
19 Akee bɛzele ye kɛ: “Ɛ Ze ne wɔ ni?” Gyisɛse buale bɛ kɛ: “Bɛnze me, yɛɛ bɛnze me Ze.+ Saa bɛze me a, anrɛɛ bɛbanwu me Ze ne noko.”+
20 Ɔhanle ɛhye mɔ wɔ ɛleka mɔɔ ezukoa nlɛka ne mɔ+ gyigyi wɔ mekɛ mɔɔ ɔlɛkilehile wɔ ɛzonlenlɛsua ne anu la. Noko awie biala angola angye ye ɔluakɛ ɛnee ye mekɛ ɛtɛdwule.+
21 Yemɔti ɔhanle ye bieko ɔhilele bɛ kɛ: “Melɛkɔ, na bɛbakpondɛ me, noko bɛbawu wɔ bɛ ɛtane nu.+ Ɛleka mɔɔ melɛkɔ la, bɛnrɛhola bɛnrɛra ɛkɛ.”+
22 Akee Dwuuma ne bɔle ɔ bo hanle kɛ: “Ɛnee ɔkahu ɔ nwo ɔ? Ɔluakɛ ɔse, ‘Ɛleka mɔɔ melɛkɔ la, bɛnrɛhola bɛnrɛra ɛkɛ.’”
23 Ɔdoale zo ɔzele bɛ kɛ: “Bɛmɛ bɛvi azɛlɛ ye azo; mame mevi anwuma.+ Bɛvi ewiade ɛhye anu; na mame menvi ewiade ɛhye anu.
24 Ɛhye ati a menzele bɛ kɛ: Bɛbawu wɔ bɛ ɛtane ne mɔ anu la. Ɔluakɛ saa bɛnlie bɛnli kɛ mame a mele ahenle mɔɔ bara la a, bɛbawu wɔ bɛ ɛtane ne mɔ anu.”
25 Yemɔti bɛbɔle ɔ bo bɛbizale ye kɛ: “Ɛdawɔ a le nwane?” Gyisɛse buale bɛ kɛ: “Duzu ati a me nee bɛ ɛlɛtendɛ bɔbɔ a?
26 Melɛ ninyɛne dɔɔnwo mɔɔ ɔwɔ kɛ meka nwolɛ edwɛkɛ na mebua nwolɛ ndɛne a. Nɔhalɛ nu, Mɔɔ zoanle me la le nɔhalɛ, na mɔɔ mendele menvile ye ɛkɛ ne la a melɛka meahile ewiade ne a.”+
27 Bɛande ɔ bo kɛ Selɛ ne anwo edwɛkɛ a ɛnee ɔlɛka yeahile bɛ a.
28 Akee Gyisɛse hanle kɛ: “Saa bɛkenda sonla Ra ne wɔ baka zo a,+ yɛɛ bɛbanwu kɛ medame a mele ahenle ne mɔɔ bara la a,+ na membɔ me ti anu menyɛ debie;+ emomu meka mɔɔ Selɛ ne hilehilele me la ala.
29 Na Mɔɔ zoanle me la nee me lua; yeamkpo me, ɔluakɛ meyɛ mɔɔ sɔ ɔ nye la dahuu.”+
30 Mɔɔ ɔlɛka edwɛkɛ ɛhye la, menli dɔɔnwo liele ye lile.
31 Akee Gyisɛse doale zo zele Dwuuma mɔɔ liele ye lile la kɛ: “Saa bɛdi me edwɛkɛ zo dahuu a, ɛnee bɛle me ɛdoavolɛma amgba,
32 na bɛbanwu nɔhalɛ ne,+ na nɔhalɛ ne bamaa bɛanyia fanwodi.”+
33 Bɛbuale ye kɛ: “Yɛle Ebileham amra na yɛtɛyɛle awie biala ngɛkɛlɛ ɛlɛ. Na kɛ ɔyɛ mɔɔ ɛse, ‘Bɛbanyia fanwodi’ ɛ?”
34 Gyisɛse buale bɛ kɛ: “Meka nɔhalɛ ne meahile bɛ, awie biala mɔɔ yɛ ɛtane la le ɛtane akɛlɛ.+
35 Bieko, akɛlɛ ɛndɛnla sua nu ɛkɛ ne dahuu; ralɛ a tɛnla sua nu ɛkɛ ne dahuu a.
36 Yemɔti saa Ralɛ ne maa bɛ fanwodi a, bɛbanyia fanwodi amgba.
37 Meze kɛ bɛle Ebileham abozoamra. Noko bɛlɛkpondɛ me bɛahu me, ɔluakɛ bɛnlie me ngilehilelɛ ne bɛndo nu.
38 Meka ninyɛne mɔɔ menwunle ye wɔ mekɛ mɔɔ mewɔ me Ze anwo lɔ la,+ yɛɛ bɛdabɛ noko bɛyɛ ninyɛne mɔɔ bɛde bɛvi bɛ ze ne ɛkɛ ne la.”
39 Bɛbuale ye kɛ: “Yɛ papa a le Ebileham.” Gyisɛse zele bɛ kɛ: “Saa bɛle Ebileham amra a,+ anrɛɛ bɛbayɛ gyima mɔɔ Ebileham yɛle la bie.
40 Noko kɛkala bɛlɛkpondɛ me bɛahu me, medame mɔɔ meha nɔhalɛ ne mɔɔ mendele ye wɔ Nyamenle ɛkɛ ne mehile bɛ la.+ Ebileham anyɛ ɛhye.
41 Bɛ ze ne gyima a bɛlɛyɛ a.” Bɛzele ye kɛ: “Bɛanwo yɛ adwɔmanebɔlɛ* nu; yɛ Ze kokye, yemɔ a le Nyamenle.”
42 Gyisɛse zele bɛ kɛ: “Saa bɛ Ze a le Nyamenle a, anrɛɛ bɛbahulo me edwɛkɛ,+ ɔluakɛ mevi Nyamenle anwo lɔ a membale na mewɔ ɛke a. Meamba me ti anwo adenle, emomu Ɔdaye a ɔzoanle me a.+
43 Duzu ati a bɛnde mɔɔ melɛka la abo ɛ? Ɔluakɛ bɛngola bɛndie me edwɛkɛ.
44 Bɛvi bɛ ze Abɔnsam ɛkɛ, na bɛkulo kɛ bɛyɛ mɔɔ bɛ ze ne kulo la.+ Mɔɔ ɔbɔ ɔ bo amuala la* ɛnee ɔle kodiawu,+ na yeandɛnla nɔhalɛ ne anu ɔluakɛ nɔhalɛ ɛnle ye nu. Saa ɔbɔ adalɛ a, ɛnee ɔle ye subane ɔluakɛ ɔle adalɛ nee adalɛ kɔsɔɔti bɛ ze.+
45 Noko, kɛmɔ mame meka nɔhalɛ ne mekile bɛ la ati, bɛnlie me bɛnli.
46 Nwane a kɛhola kɛha ye nɔhalɛ nu kɛ mele ɛtanevolɛ a? Saa meka nɔhalɛ a, duzu ati a bɛnlie me bɛnli ɛ?
47 Mɔɔ vi Nyamenle ɛkɛ la tie Nyamenle edwɛkɛ ne.+ Ɛhye ati a bɛndie la, ɔluakɛ bɛnvi Nyamenle ɛkɛ.”+
48 Dwuuma ne buale ye kɛ: “Saa yɛka kɛ, ‘Ɛle Samɛleanli+ na sunsum ɛtane wɔ ɛ nwo’ a, ɔnle nɔhalɛ ɔ?”+
49 Gyisɛse buale bɛ kɛ: “Sunsum ɛtane ɛnle me nwo, emomu medi me Ze eni, na bɛmɛ bɛnli me eni.
50 Noko memkpondɛ anyunlunyia memmaa me nwo;+ Awie wɔ ɛkɛ ne mɔɔ ɔlɛkpondɛ yeamaa me na yeabua ndɛne a.
51 Meka nɔhalɛ ne meahile bɛ, saa awie di me edwɛkɛ zo a, ɔnrɛwu ɛlɛ.”+
52 Dwuuma ne zele ye kɛ: “Akee yɛnwu kɛ sunsum ɛtane wɔ ɛ nwo. Ebileham wule, yɛɛ ngapezoma ne wule, noko wɔmɔ ɛse, ‘Saa awie di me edwɛkɛ zo a, ɔnrɛwu ɛlɛ.’
53 Asoo ɛle sonlakpole ɛtɛla yɛ papa Ebileham mɔɔ wule la? Ngapezoma ne noko wule. Ɛdwenle kɛ ɛle nwane?”
54 Gyisɛse buale kɛ: “Saa mewula me nwo anyunlunyia a, me anyunlunyia ne le mgbane. Me Ze mɔɔ bɛse ɔle bɛ Nyamenle la a wula me anyunlunyia a.+
55 Noko bɛnze ye,+ na mame meze ye.+ Na saa meka kɛ menze ye a, mebayɛ adalɛ kɛ bɛdabɛ la. Noko meze ye yɛɛ medi ye edwɛkɛ zo.
56 Bɛ papa Ebileham lile fɛlɛko kpole kɛ ɔkɛnwu me mekɛ ne, yɛɛ ɔnwunle ye na ɔlile fɛlɛko.”+
57 Akee Dwuuma ne zele ye kɛ: “Ɛtɛdile ɛvolɛ 50 bɔbɔ, noko ɛse ɛnwunle Ebileham?”
58 Gyisɛse zele bɛ kɛ: “Meka nɔhalɛ ne meahile bɛ, mɔɔ bɛkawo Ebileham la, ɛnee mewɔ ɛkɛ.”+
59 Yemɔti bɛsesale awolɛ kɛ bɛto bɛazi ye, noko Gyisɛse veale ɔ nwo na ɔvile ɛzonlenlɛsua ne anu ɔhɔle.
Ɔbodwɛkɛ
^ Anzɛɛ “adwɔmane ɛbɛla.” Giliki, por·nei′a. Nea Edwɛkɛbohilelɛ.
^ Anzɛɛ “ɔvi mɔlebɛbo ne.”
