Edwɛne 19:1-14
Kɔmaa edwɛndolɛma kpanyinli ne. Devidi ayɛlɛyelɛ edwɛne.
19 Anwuma bɔ Nyamenle anyunlunyia ne nolo;+Anwomanyunlu bɔ ɔ sa anloa gyima ne nolo.+
2 Alehyenlɛ biala bɛka edwɛkɛ,Yɛɛ aledwolɛ biala bɛmaa ndelebɛbo da ali.
3 Bɛndendɛ, yɛɛ bɛnga edwɛkɛ;Bɛnde bɛ ne.
4 Noko bɛ ne* dwule azɛlɛ ye azo amuala,Yɛɛ bɛ edwɛkɛ ne dwule ewiade ɛleka biala.+
Yezi ɛdanlɛsua yemaa sɛnzɛne ne wɔ anwuma;
5 Ɔle kɛ atɔfolɛ nrenyia mɔɔ vi ye suakunlu ɛlɛfinde la;Ɔdi fɛlɛko kɛ katakyie mɔɔ nriandi dua ye adenle nu la.
6 Ɔtudu ɔfi anwuma ne ati lɔ,Na ɔdua ye adenle nu ɔkɔdwu ɔ bo;+Na debie biala ɛngola ɛnvea mɔɔ ye wuluwulu ne ɛnga ye a.
7 Gyihova mɛla di munli,+ ɔmaa anwosesebɛ.+
Gyihova ngakyelɛ le nɔhalɛ,+ ɔmaa mɔɔ ɛnlɛ anwubielɛ la nwu nrɛlɛbɛ.+
8 Gyihova adehilelɛ tenrɛ, ɔmaa ahonle di fɛlɛko;+Gyihova mɛla nwo te, ɔmaa sonla nyia ndelebɛbo.+
9 Gyihova ɛzulolɛ nwo te,+ ɔwɔ ɛkɛ ne dahuu.
Gyihova ndɛnebualɛ le nɔhalɛ, bɛ muala bɛtenrɛ.+
10 Bɛsonle bolɛ bɛtɛla nvutuke,Bɛtɛla nvutuke tagyee bɔbɔ,+Na bɛyɛ fɛ bɛtɛla wolɛ,+ wolɛ mɔɔ vi wolɛ ndɛlamoa nu pepe la.
11 Bɛbɔ wɔ sonvolɛ kɔkɔ;+Zolɛlilɛ maa bɛnyia ahatualɛ kpole.+
12 Nwane a kola nwu ɔdaye ye nvonleɛ a?+
Te me nwo wɔ ɛtane mɔɔ menze la anwo.
13 Na twe wɔ sonvolɛ fi anwomemaazo* nyɛleɛ nwo;+Mmamaa bɛfo me nwo zo.+
Amaa me nwo annyia ngehanleɛ,*+Na meahwe me nwo meavi ɛtane mgbole nwo.*
14 O Gyihova, me Bodane+ nee me Dievolɛ,+Maa ɛ nye ɛlie+ me nloa anu edwɛkɛ nee me ahonle nu nzuzulɛ nwo.
Ɔbodwɛkɛ
^ Anzɛɛ ɔkola ɔkile, “ɛzuzunyɛma.”
^ Hibulu edwɛkɛkpɔkɛ ne eza kile akɛnrasesebɛ mɔɔ ɛnle kpalɛ mɔɔ bɛfa bɛyɛ debie, anzɛɛ awie mɔɔ yɛ debie mɔɔ ɔnlɛ adenle ɔnyɛ la.
^ Hibulu aneɛ nu, “Akee mebali munli.”
^ Anzɛɛ “mɛladonlɛ dɔɔnwo anwo.”
