Gyɛlɛmaya 20:1-18
20 Mekɛ mɔɔ Gyɛlɛmaya ka ngapezo ne la, ɛnee Yemɛ ara Pahyɛ mɔɔ le ɛsɔfo na ɔdaye a ɔnea Gyihova sua ne azo la ɛlɛtie.
2 Na Pahyɛ bole ngapezonli Gyɛlɛmaya na ɔkyekyele ye ɔbɔle baka nu+ wɔ Bɛngyaman Sɔlɔ Anlenkɛ Kpole ne mɔɔ wɔ Gyihova sua nu ɛkɛ ne la anwo.
3 Noko aleɛ hyenle mɔɔ Pahyɛ zanyinle Gyɛlɛmaya vile baka ne anwo la, Gyɛlɛmaya zele ye kɛ:
“Gyihova ɛnrɛvɛlɛ wɔ Pahyɛ, emomu ɔbavɛlɛ wɔ Ɛzulolɛ Wɔ Ɛleka Biala.+
4 Ɔluakɛ mɔɔ Gyihova ɛha la ɛne, ‘Mebamaa ɛ nwo aha ɛzulolɛ amaa ɛdawɔ ɛ nwo nee ɛ gɔnwo mɔ amuala, na bɛbawu bɛ kpɔvolɛma konle dadeɛ nloa wɔ ɛ nye zo;+ na mebava Dwuda amuala meawula Babelɔn belemgbunli ne asa anu, na ɔbava bɛ yeahɔ akɛlɛzonlenlɛ nu wɔ Babelɔn na yeava konle dadeɛ yeahu bɛ.+
5 Na mebava suakpole ɛhye azo anwonyia kɔsɔɔti, ye ninyɛne kɔsɔɔti, ye ninyɛne mɔɔ sonle bolɛ la kɔsɔɔti nee Dwuda arelemgbunli agyapadeɛ kɔsɔɔti, meawula bɛ kpɔvolɛma asa anu.+ Bɛbave, bɛbaza bɛ bɛalie bɛ ninyɛne na bɛava bɛahɔ Babelɔn.+
6 Na wɔmɔ Pahyɛ, ɛ nee wɔ sua nu amra amuala, bɛbahɔ akɛlɛzonlenlɛ nu. Bɛbava wɔ bɛahɔ Babelɔn na nehane a ɛbawu a, na bɛbazie wɔ nee ɛ gɔnwo mɔ amuala wɔ lɔ, ɔluakɛ wɔha adalɛ ngapezo wɔhile bɛ.’”+
7 O Gyihova, wɔyɛ me koasea,* na meannwu ye.
Wɔhile kɛ ɛ nwo yɛ se tɛla me, na wɔli konim.+
Bɛsele me alehyenlɛ biala;Awie biala golo me nwo.+
8 Ɔluakɛ mekɛ biala mɔɔ metendɛ la, metea nu na mebɔ nolo kɛ,“Basabasayɛlɛ nee ɛzɛkyelɛ!”
Ɔluakɛ Gyihova edwɛkɛ ne ɛmaa meyɛ aholoba ɛbɔlɛ nee agolobɛnwo debie alehyenlɛ biala.+
9 Ɔti menganle kɛ: “Menrɛbɔ ye duma,Yɛɛ menrɛdendɛ wɔ ye duma nu bieko.”+
Noko ɔyɛle me ahonle nu kɛ senle mɔɔ ɛlɛsɔ na bɛva bɛwula me mbowule nu la,Na menvɛle;Meangola meanli ye me kunlu bieko.+
10 Na mendele edwɛkɛ ɛtane dɔɔnwo;Ɛzulolɛ bɔle me yiale.+
“Bɛdendɛ bɛtia ye; bɛmaa yɛdendɛ yɛtia ye!”
Awie biala mɔɔ ka anzodwolɛ edwɛkɛ kile me la kpondɛ me azedɔlɛ:+
“Bie a awie babɛlɛbɛla ye,Na yɛbahola yɛali konim na yɛali ye nzenralɛ.”
11 Noko ɛnee Gyihova gyi me nzi kɛ katakyie mɔɔ anwo yɛ ɛzulolɛ la.+
Ɛhye ati, bɛdabɛ mɔɔ bɛyɛ me kpɔdekpɔde la badu agua mɔɔ bɛnrɛhola me a.+
Bɛ nyunlu bagua aze kpole, ɔluakɛ ɔnrɛwie bɛ boɛ.
Bɛ rɛle ɛnrɛvi bɛ anyiemgba ɛbɔlɛ ne ɛlɛ.+
12 Noko wɔmɔ, O ɛlɔne Gyihova, ɛneɛnlea tenlenema anu;Ɛnwu sonla ti anu* nee sonla ahonle nu.+
Maa menwu kɛ wɔli bɛ nzenralɛ,+Ɔluakɛ wɔmɔ a meva me edwɛkɛ mewula ɛ sa nu a.+
13 Bɛdo edwɛne bɛmaa Gyihova! Bɛye Gyihova ayɛlɛ!
Ɔluakɛ yelie ehyiavolɛma yevi amumuyɛma asa anu.
14 Munzule ɛha kenle mɔɔ bɛwole me la!
Mmayila kenle mɔɔ me mame wole me la!+
15 Munzule ɛha sonla ne mɔɔ hanle edwɛkpa hilele me papa kɛ:
“Bɛwo ralɛ nrenyia bɛmaa wɔ, kakula nrenyia!”
Na ɔmaanle ɔ nye liele kpole la.
16 Maa sonla zɔhane ɛyɛ kɛ azuamgbole mɔɔ Gyihova butule bɛ nye aze na yeanyɛ ye nyane la.
Maa ɔde ɛzunlɛ nwonlomɔ nee aweɛne ne ewiazo henlema.
17 Duzu ati a yeangu me wɔ ɛkolɛ nu,Amaa me mame ayɛ me azieNa meanga ɔ kunlu ɛ?+
18 Duzu ati a menvile ɛkolɛ nu membaleAmaa meanwu ngyegyelɛ nee alɔbɔlɛ,Na me awieleɛ ayɛ anyiemgba ɛ?+
Ɔbodwɛkɛ
^ Anzɛɛ “wɔbɛlɛbɛla me.”
^ Anzɛɛ “nganeɛdelɛ mɔɔ vea ye nu la anu.” Hibulu aneɛ nu, “kilenzia.”
