Gyɛlɛmaya 26:1-24
26 Mɔɔ Dwuda Belemgbunli Dwosaya ara Gyɛhɔyakem+ bɔle ye belemgbunlililɛ bo la, edwɛkɛ ɛhye vi Gyihova ɛkɛ rale:
2 “Mɔɔ Gyihova ɛha la ɛne, ‘Kɔgyinla Gyihova sua nu alienwo ɛkɛ ne na tendɛ kile menli mɔɔ vi Dwuda azuamgbole zo ɛlɛba arazonle* wɔ Gyihova sua nu ɛkɛ ne la amuala. Ka edwɛkɛ biala mɔɔ meha mehile wɔ la kile bɛ; mmaye edwɛkɛkpɔkɛ ko bɔbɔ ɛfi nu.
3 Bie a bɛbadie na awie biala azia ɔ nzi avi ye adenle ɛtane ne azo, na meahakyi me adwenle* wɔ munzule ne mɔɔ mezuzu nwo kɛ mefa meara bɛ nwo zo ɔlua bɛ ninyɛndane ne ati la anwo.+
4 Ka kile bɛ kɛ: “Mɔɔ Gyihova ɛha la ɛne, ‘Saa bɛandie me, bɛanli me mɛla* mɔɔ meva memaa bɛ la azo,
5 na saa bɛandie me azonvolɛ ngapezoma mɔɔ menzoanle bɛ fane dɔɔnwo* wɔ bɛ nwo ɛkɛ la edwɛkɛ a,+
6 yemɔ mebamaa sua ɛhye ayɛ kɛ Hyaelo+ la, na meamaa maanle maanle mɔɔ wɔ azɛlɛ ye kɔsɔɔti azo la ava suakpole ɛhye ayɛ bɛdabɛ mɔɔ bɛwa bɛ amonle la anwo ndonwo.’”’”+
7 Na ɛsɔfoma nee ngapezoma nee menli ne amuala dele kɛ Gyɛlɛmaya ɛlɛka edwɛkɛ ɛhye wɔ Gyihova sua nu ɛkɛ.+
8 Ɔti mɔɔ Gyɛlɛmaya hanle edwɛkɛ biala mɔɔ Gyihova se ɔha ɔhile menli ne amuala ɔwiele la, akee ɛsɔfoma nee ngapezoma nee menli ne kɔsɔɔti hyele ye na bɛhanle kɛ: “Ɛdawɔ wɔwu wɔwie.
9 Duzu ati a wɔha ngapezo wɔ Gyihova duma nu kɛ, ‘Sua ɛhye bayɛ kɛ Hyaelo, yɛɛ bɛbazɛkye suakpole ɛhye bɔkɔɔ na awie ɛnrɛdɛnla zolɛ bieko a’?” Na menli ne kɔsɔɔti bɔle yiale Gyɛlɛmaya wɔ Gyihova sua nu ɛkɛ.
10 Mɔɔ Dwuda mgbanyima dele edwɛkɛ ɛhye mɔ la, bɛvi belemgbunli sua nu ɛkɛ bɛrale Gyihova sua nu ɛkɛ na bɛdɛnlanle Gyihova sua ne anlenkɛ fofolɛ ne anloa.+
11 Ɛsɔfoma nee ngapezoma ne hanle hilele mgbanyima ne mɔ nee menli ne amuala kɛ: “Nrenyia ɛhye fɛta ewule anzohwenlɛ,+ ɔluakɛ yeha ngapezo yetia suakpole ɛhye, kɛ mɔɔ bɛdabɛ mumua ne bɛde ye bɛ nzo nu la.”+
12 Akee Gyɛlɛmaya hanle hilele mgbanyima ne mɔ amuala nee menli ne amuala kɛ: “Gyihova a zoanle me kɛ menga ngapezo yɛɛ edwɛkɛ biala mɔɔ bɛde la mentia sua ɛhye nee suakpole ye a.+
13 Ɔti kɛkala, bɛhakyi bɛ ndenle nee bɛ nyɛleɛ na bɛdie Gyihova bɛ Nyamenle ne ane, na Gyihova bahakyi ye adwenle wɔ munzule ne mɔɔ yeha kɛ ɔbava yeara bɛ nwo zo la anwo.+
14 Na mame, mewɔ bɛ sa nu. Debie biala mɔɔ bɛsuzu kɛ ɔle kpalɛ na ɔtenrɛ wɔ bɛ nye zo la, bɛva bɛyɛ me.
15 Bɛnwu ye kɛ saa bɛku me a, bɛdabɛ nee suakpole ɛhye yɛɛ zolɛ menli ne bali fɔlɛ kɛ bɛhu awie mɔɔ ɛnze nwolɛ bie la, ɔluakɛ nɔhalɛ nu, Gyihova a zoanle me wɔ bɛ nwo ɛkɛ ne kɛ membanga edwɛkɛ ɛhye mɔ amuala mengile bɛ a.”
16 Akee mgbanyima ne mɔ nee menli ne kɔsɔɔti hanle hilele ɛsɔfoma nee ngapezoma ne kɛ: “Nrenyia ɛhye ɛnfɛta ewule anzohwenlɛ, ɔluakɛ Gyihova yɛ Nyamenle ne duma nu a yedendɛ yehile yɛ a.”
17 Eza azɛlɛ ne azo mgbanyima ne mɔ bie dwazole na bɛzele menli mɔɔ ɛyia la kɔsɔɔti kɛ:
18 Maeka+ mɔɔ vi Molɛhyɛte la hanle ngapezo wɔ Dwuda Belemgbunli Hɛzikaya+ mekɛ zo, na ɔhanle ɔhilele Dwudama amuala kɛ, ‘Mɔɔ ɛlɔne Gyihova ɛha la ɛne:
“Bɛbazo Zayɔn kɛ mɔɔ bɛso ɛya la,Bɛbagologolo Gyɛlusalɛm bɛagua,+Na Sua ne boka ne* bayɛ kɛ ɛhoayelɛ nu ɛzonlenlɛ ɛleka ne mɔ* la.”’+
19 “Asoo Dwuda Belemgbunli Hɛzikaya nee Dwudama amuala hunle ye? Asoo yeanzulo Gyihova yɛɛ yeambodo Gyihova ɔ? Yemɔti ɔmaanle Gyihova hakyile ye adwenle wɔ munzule ne mɔɔ ɔhanle kɛ ɔbava yeara bɛ nwo zo la anwo.+ Ɔti yɛkpondɛ yɛahwe munzule kpole yɛara yɛ nwo zo.
20 “Nrenyia bie noko hanle ngapezo wɔ Gyihova duma nu, Hyɛmaya ara Yulaegya mɔɔ vi Keleate-gyialem+ la, ɔhanle ngapezo ɔtiale suakpole ɛhye nee azɛlɛ ye, ɛnee ye edwɛkɛ ne le kɛ Gyɛlɛmaya ɛdeɛ ne la.
21 Belemgbunli Gyɛhɔyakem+ nee ye katakyiema nee mgbanyima ne mɔ kɔsɔɔti dele ye edwɛkɛ ne, na ɛnee belemgbunli ne kulo kɛ ɔku ye.+ Mɔɔ Yulaegya dele nwolɛ bie la, ɛkɛ ne ala ɛzulolɛ hanle ye na ɔnriandile ɔhɔle Yigyibiti.
22 Akee Belemgbunli Gyɛhɔyakem zoanle Akebɔ ara Ɛleneetan+ nee mrenyia bie mɔ ɔmaanle bɛhɔle Yigyibiti.
23 Bɛhɔvale Yulaegya bɛvile Yigyibiti bɛrɛlɛle Belemgbunli Gyɛhɔyakem, na ɔvale konle dadeɛ ɔhunle ye+ na bɛvuandinle ye funli ne bɛdole maanle azie ne azo.”
24 Noko Hyeefan+ ara Ahaekam+ boale Gyɛlɛmaya, ɔti bɛanye ye bɛammaa menli ne bɛammaa bɛangu ye.+
Ɔbodwɛkɛ
^ Anzɛɛ “arabɔ bɛ ti aze.”
^ Anzɛɛ “meanlu me nwo.”
^ Anzɛɛ “adehilelɛ.”
^ Hibulu aneɛ nu, “medwazo ndɛ na mesoa bɛ.”
^ Anzɛɛ “ɛzonlenlɛsua ne boka ne.”
^ Hibulu aneɛ nu, “ɛleka mɔɔ wɔ anwuma la.”
