Gyɛlɛmaya 27:1-22
27 Mɔɔ Dwuda Belemgbunli Dwosaya ara Gyɛhɔyakem bɔle ye tumililɛ bo la, edwɛkɛ ɛhye vi Gyihova ɛkɛ rale Gyɛlɛmaya ɛkɛ:
2 “Mɔɔ Gyihova ɛha ɛhile me la ɛne, ‘Yɛ gyɛnvayile nee nwoma mɔɔ bɛfa bɛsosɔ nu la na fa to ɛ kɔme zo.
3 Na fa wula menli mɔɔ bɛzoa bɛ bɛmaa bɛra Dwuda Belemgbunli Zɛdikaya anwo ɛkɛ wɔ Gyɛlusalɛm la asa anu na maa bɛva bɛhɔmaa Yidɔm+ belemgbunli ne, Mowabe+ belemgbunli ne, Amɔnoma+ belemgbunli ne, Taya+ belemgbunli ne yɛɛ Saedɛn+ belemgbunli ne.
4 Maa bɛva nrɛlaleɛ ɛhye bɛhɔmaa bɛ menle mɔ:
“‘“Mɔɔ ɛlɔne Gyihova, Yizilayɛ Nyamenle ne ɛha la ɛne; mɔɔ bɛha bɛhile bɛ menle mɔ la ɛne,
5 ‘Medame a menvale me tumi kpole ne nee me sa mɔɔ mendenrɛle nu la membɔle azɛlɛ ne, alesama nee nane mɔɔ wɔ azɛlɛ ne azo la a; na mefa memaa awie biala mɔɔ mekulo* la.+
6 Na meva azɛlɛ ɛhye amuala mewula me sonvolɛ Nɛbukadenɛza,+ Babelɔn belemgbunli ne asa anu; nane anwo ɛzulolɛ kɔsɔɔti mɔɔ wɔ ɛbɔ nu bɔbɔ la, meva bɛ memaa ye kɛ bɛzonle ye.
7 Maanle maanle kɔsɔɔti bɛazonle ye nee ɔ ra yɛɛ ye anlɔnra kɔkpula kɛ ye azɛlɛ ne mekɛ kɛdwu,+ mekɛ mɔɔ maanle dɔɔnwo nee arelemgbunli mgbole bava ye ayɛ bɛ akɛlɛ la.’+
8 “‘“‘Saa maanle bie anzɛɛ belemgbunlililɛ bie anzonle Babelɔn Belemgbunli Nɛbukadenɛza na yeanva ɔ kɔme yeanwula Babelɔn belemgbunli ne gyɛnvayile ne abo a, mebava konle dadeɛ,+ ɛhɔne nee ewulenzane meahwe maanle zɔhane anzo kɔkpula kɛ mebalua ɔ nwo zo meabɔ ɔ bo zo la,’ Gyihova a se a.
9 “‘“‘Yemɔti bɛmmatie bɛ ngapezoma, bɛ menli mɔɔ ka kenle bie edwɛkɛ, bɛ menli mɔɔ ka ɛlalɛ, bɛ ngonyiama nee bɛ silikyevoma mɔɔ bɛlɛka bɛahile bɛ kɛ: “Bɛnrɛzonle Babelɔn belemgbunli ne” la.
10 Bɛlɛka adalɛ ngapezo bɛahile bɛ, amaa bɛava bɛ bɛavi bɛ azɛlɛ ne azo bɛahɔ moamoa na meabɔ bɛ asande meamaa bɛ bo zo abɔ.
11 “‘“‘Noko maanle mɔɔ kɛva ɔ kɔme kɛwula Babelɔn belemgbunli ne gyɛnvayile ne abo na ɔkɛzonle ye la, mebamaa yealie ɔ menle wɔ ye azɛlɛ ne azo,’ Gyihova a se a, ‘ɔbayɛ egyinli wɔ zo na yeadɛnla zo.’”’”
12 Menganle edwɛkɛ ko ne ala mengilele Dwuda Belemgbunli Zɛdikaya+ noko kɛ: “Bɛva bɛ kɔme bɛhɔwula Babelɔn belemgbunli ne gyɛnvayile ne abo na bɛzonle ye nee ye menli ne, na bɛbadɛnla ngoane nu.+
13 Duzu ati a ɛ nee wɔ menli ne tɛnla ɛkɛ ne too konle dadeɛ,+ ɛhɔne+ yɛɛ ewulenzane+ ahuhu bɛ kɛ mɔɔ Gyihova ɛha ye wɔ maanle mɔɔ ɛnrɛzonle Babelɔn belemgbunli ne la anwo la ɛ?
14 Bɛmmatie ngapezoma mɔɔ ɛlɛka ahile bɛ kɛ, ‘Bɛnrɛzonle Babelɔn belemgbunli ne’ la edwɛkɛ,+ ɔluakɛ bɛlɛka adalɛ ngapezo bɛahile bɛ.+
15 Kɛ Gyihova se la ɛne, “Metɛsoanle bɛ, noko bɛlɛka adalɛ ngapezo wɔ me duma nu amaa meabɔ bɛ asande na meabɔ bɛ bo zo, bɛdabɛ nee ngapezoma mɔɔ ɛlɛka ngapezo ahile bɛ la.”+
16 Na menganle mengilele ɛsɔfoma ne nee menli ɛhye mɔ amuala kɛ: “Mɔɔ Gyihova ɛha la ɛne, ‘Bɛmmatie bɛ ngapezoma mɔɔ ɛlɛka ngapezo ahile bɛ kɛ: “Nea! Ɔnrɛhyɛ bɛbava Gyihova sua nu ahyɛnze ne mɔ bɛavi Babelɔn bɛara!” la edwɛkɛ,+ ɔluakɛ bɛlɛka adalɛ ngapezo bɛahile bɛ.+
17 Bɛmmatie bɛ. Bɛzonle Babelɔn belemgbunli ne na bɛbadɛnla ngoane nu.+ Duzu ati a ɔwɔ kɛ suakpole ɛhye bɔ a?
18 Noko saa bɛle ngapezoma yɛɛ saa Gyihova edwɛkɛ ne wɔ bɛ ɛkɛ a, ɛnee mesɛlɛ bɛ, bɛmaa bɛzɛlɛ ɛlɔne Gyihova kɛ ɔmmamaa bɛfa Gyihova sua ne anu ahyɛnze ne mɔ mɔɔ ɛha nee mɔɔ wɔ Dwuda belemgbunli ne sua nu* ɛkɛ ne yɛɛ mɔɔ wɔ Gyɛlusalɛm la bɛkɔ Babelɔn.’
19 “Ɔluakɛ mɔɔ ɛlɔne Gyihova ɛha ye wɔ mpila ne mɔ,+ Angola Kpole ne,*+ ehwili ne mɔ+ nee ahyɛnze mɔɔ ɛha suakpole ɛhye azo la anwo la ɛne,
20 ninyɛne mɔɔ Babelɔn Belemgbunli Nɛbukadenɛza gyakyile bɛ ɛkɛ wɔ mekɛ mɔɔ ɔvale Gyɛhɔyakem ara Gyɛkonaya, Dwuda belemgbunli ne nee menli titili mɔɔ wɔ Dwuda nee Gyɛlusalɛm ɔvile Gyɛlusalɛm ɔhɔle akɛlɛzonlenlɛ nu wɔ Babelɔn la;+
21 ɛhɛe, mɔɔ ɛlɔne Gyihova, Yizilayɛ Nyamenle ne ɛha ye wɔ ahyɛnze mɔɔ hale Gyihova sua nu ɛkɛ, wɔ Dwuda belemgbunli ne sua nu* ɛkɛ ne yɛɛ Gyɛlusalɛm anwo la ɛne:
22 ‘“Bɛbava bɛahɔ Babelɔn,+ na bɛava bɛahɔzie lɔ kɔkpula kenle mɔɔ mebahɔva la,” Gyihova a se a. “Akee mebava meazia meara ɛke.”’”+
Ɔbodwɛkɛ
^ Hibulu aneɛ nu, “awie mɔɔ fɛta wɔ me nye zo.”
^ Anzɛɛ “suakunlu.”
^ Ɛhye kile, kɔbele Nyevile ne mɔɔ wɔ ɛzonlenlɛsua ne anu la.
^ Anzɛɛ “suakunlu.”
