Gyɛlɛmaya 28:1-17
-
Gyɛlɛmaya nee adalɛ ngapezonli Hananaya (1-17)
28 Wɔ ɛvolɛ zɔhane ala anu, mɔɔ Dwuda Belemgbunli Zɛdikaya+ bɔle ye tumililɛ bo la, ye ɛvolɛ nna ne anu, wɔ siane nnu ne anu, ngapezonli Hananaya, Azɛ mɔɔ vi Gebɛyɔn+ la ara ne hanle hilele me wɔ ɛsɔfoma nee menli ne kɔsɔɔti anyunlu wɔ Gyihova sua nu ɛkɛ ne kɛ:
2 “Mɔɔ ɛlɔne Gyihova, Yizilayɛ Nyamenle ne ɛha la ɛne, ‘Mebabubu Babelɔn belemgbunli ne gyɛnvayile ne anu.+
3 Wɔ ɛvolɛ nwiɔ anu, mebava Gyihova sua nu ahyɛnze ne mɔ mɔɔ Babelɔn Belemgbunli Nɛbukadenɛza vale vile ɛke hɔle Babelɔn la kɔsɔɔti meazia meara ɛke.’”+
4 “‘Na mebava Gyɛhɔyakem+ ara Gyɛkonaya,+ Dwuda belemgbunli ne nee Dwudama mɔɔ bɛvale bɛ bɛhɔle akɛlɛzonlenlɛ nu wɔ Babelɔn+ la kɔsɔɔti meazia meara ɛke,’ Gyihova a se a, ‘ɔluakɛ mebabubu Babelɔn belemgbunli ne gyɛnvayile ne anu.’”
5 Akee ngapezonli Gyɛlɛmaya dendɛle hilele ngapezonli Hananaya wɔ ɛsɔfoma ne nee menli mɔɔ ɛnee gyi Gyihova sua nu ɛkɛ ne la amuala anyunlu ɛkɛ ne.
6 Ngapezonli Gyɛlɛmaya hanle kɛ: “Amen!* Gyihova ɛyɛ ye zɔhane! Gyihova ɛmaa wɔ edwɛkɛ ne mɔɔ wɔha kɛ bɛbava Gyihova sua nu ahyɛnze ne mɔ nee menli mɔɔ bɛva bɛ bɛhɔ akɛlɛzonlenlɛ nu wɔ Babelɔn la kɔsɔɔti bara la ɛrɛla nu!*
7 Noko, mesɛlɛ wɔ, tie edwɛkɛ ɛhye mɔɔ melɛka meagua ɛ nzo nu nee menli ne kɔsɔɔti anzo nu la.
8 Ɔvi tete ne ngapezoma mɔɔ limoa medame nee ɛdawɔ yɛ nyunlu la hanle ngapezo kɛ konle, munzule nee ewulenzane* bara azɛlɛ dɔɔnwo azo nee arelemgbunlililɛ mgbole nwo zo.
9 Saa ngapezonli bie ka anzodwolɛ edwɛkɛ na edwɛkɛ ne ba nu a,* ɔmaa bɛnwu ye kɛ Gyihova a zoanle ngapezonli zɔhane amgba a.”
10 Akee ngapezonli Hananaya yele gyɛnvayile ne vile ngapezonli Gyɛlɛmaya akɔme zo na ɔbubule nu.+
11 Na Hananaya hanle ye wɔ menli ne kɔsɔɔti anyunlu ɛkɛ ne kɛ: “Mɔɔ Gyihova ɛha la ɛne, ‘Zɔhane ala a wɔ ɛvolɛ nwiɔ anu, mebabubu Babelɔn Belemgbunli Nɛbukadenɛza gyɛnvayile ne anu meavi maanle maanle kɔsɔɔti akɔme zo a.’”+ Na ngapezonli Gyɛlɛmaya hɔle ye ɛleka bie.
12 Mɔɔ ngapezonli Hananaya bubule gyɛnvayile ne mɔɔ la ngapezonli Gyɛlɛmaya akɔme zo anu wiele la, Gyihova edwɛkɛ ɛhye rale Gyɛlɛmaya ɛkɛ:
13 “Kɔ na kɔha kile Hananaya kɛ, ‘Mɔɔ Gyihova ɛha la ɛne: “Wɔbubu mbaka gyɛnvayile nu,+ noko mbulalɛ gyɛnvayile a ɛbayɛ wɔazie bɛ bo zo a.”
14 Ɔluakɛ mɔɔ ɛlɔne Gyihova, Yizilayɛ Nyamenle ne ɛha la ɛne: “Mebava bulalɛ gyɛnvayile meado maanle ɛhye mɔ kɔsɔɔti akɔme zo meamaa bɛazonle Babelɔn Belemgbunli Nɛbukadenɛza, na ɔwɔ kɛ bɛsonle ye.+ Mebava nane anwo ɛzulolɛ mɔɔ wɔ ɛbɔ nu bɔbɔ la meamaa ye.”’”+
15 Akee ngapezonli Gyɛlɛmaya hanle hilele ngapezonli Hananaya+ kɛ: “Mesɛlɛ wɔ tie, O Hananaya! Gyihova ɛtɛsoanle wɔ, noko wɔmaa menli ɛhye mɔ ɛva bɛ nwo ɛdo adalɛ edwɛkɛ zo.+
16 Ɛhye ati mɔɔ Gyihova ɛha la ɛne, ‘Nea! Mebaye wɔ meavi azɛlɛ ye azo. Ɛvolɛ ɛhye anu ala, ɛbawu, ɔluakɛ wɔzi menli adua wɔmaa bɛde atua bɛtia Gyihova.’”+
17 Ɔti ngapezonli Hananaya wule ɛvolɛ zɔhane anu, wɔ ye siane nsuu ne azo.
