Gyɛlɛmaya 33:1-26
33 Gyihova edwɛkɛ rale Gyɛlɛmaya ɛkɛ ye fane nwiɔ ne azo wɔ mekɛ mɔɔ ɛnee ɔtɛda efiade wɔ Sinzavolɛma Sua nu+ ɛkɛ ne la kɛ:
2 “Mɔɔ Gyihova Mɔɔ bɔle azɛlɛ ne, Gyihova mɔɔ ɔyɛle na ɔvale ɔziele ɛkɛ ne kpundii; mɔɔ ye duma a le Gyihova la, ɛha la ɛne,
3 ‘Fɛlɛ me, na mebalie wɔ zo na meaha ninyɛne mgbole nee ninyɛne mɔɔ ɛnde ɔ bo na ɛnze la meahile wɔ.’”+
4 “Ɔluakɛ mɔɔ Gyihova, Yizilayɛ Nyamenle ne ɛha ye wɔ azua mɔɔ wɔ suakpole ɛhye azo nee Dwuda arelemgbunli azua mɔɔ ɛnwea* mɔɔ bɛhuohuanle nee konle dadeɛ ne ati, bɛbule bɛ bɛguale aze,+
5 nee bɛdabɛ mɔɔ bɛlɛba bɛ nee Kaledeama araho, bɛamaa bɛdabɛ mɔɔ mehu bɛ wɔ me ɛya nee me ɛya kpole ne anu la avunli ayi ɛke tɛkɛɛ yɛɛ bɛdabɛ mɔɔ bɛ ɛtane ti meye me nye mevi suakpole ɛhye anwo la ɛne:
6 ‘Nea melɛmaa ɔ nwo adɔ ye na yeade kpɔkɛ,+ na mebayɛ bɛ ayile na meamaa bɛ anzodwolɛ dɔɔnwo na meala nɔhalɛ ali meahile bɛ.+
7 Na mebava Dwudama mɔɔ bɛhɔ akɛlɛzonlenlɛ nu nee Yizilayɛma mɔɔ bɛhɔ akɛlɛzonlenlɛ nu la meazia meara,+ na meamaa bɛ nwo ayɛ se kɛ mɔɔ menyɛle ye mɔlebɛbo ne la.+
8 Na meade bɛ nwo meavi ɛtane mɔɔ bɛyɛ bɛtia me la anwo fɔlɛlilɛ kɔsɔɔti anwo,+ na meava bɛ ɛtane nee bɛ mɛladonlɛ mɔɔ tia me la anwo fɔlɛlilɛ kɔsɔɔti meahyɛ bɛ.+
9 Na suakpole ne duma bamaa meali fɛlɛko na ɔbayɛ ayɛlɛyelɛ nee anyunlunyia yeamaa me wɔ maanle maanle mɔɔ wɔ azɛlɛ ye azo mɔɔ bɛbade kpalɛ mɔɔ meyɛ memaa bɛ la kɔsɔɔti anyunlu.+ Ɔlua debie kpalɛ nee anzodwolɛ mɔɔ mebamaa yeanyia la ati, bɛ ahonle badu na bɛ nwo awoso bɛ.’”+
10 “Mɔɔ Gyihova ɛha la ɛne: ‘Ɛke mɔɔ bɛbaha kɛ yedɔ mgbane, sonla anzɛɛ ayɛmoa ɛnle ɛkɛ, wɔ Dwuda azuamgbole ne mɔ nee Gyɛlusalɛm awɔdenle ne mɔ azo mɔɔ ɛhwee ɛnle zo, mɔɔ sonla anzɛɛ ayɛmoa anzɛɛ awie biala ɛnde ɛkɛ la, eza bɛbade
11 anyelielɛ ɛnelɛ nee fɛlɛkolilɛ ɛnelɛ,+ atɔfolɛ nrenyia ane nee atɔfolɛ raalɛ ane, bɛdabɛ mɔɔ bɛbaha kɛ: “Bɛyɛ ɛlɔne Gyihova mo, ɔluakɛ Gyihova le kpalɛ;+ ye ɛlɔlɛ kpundii ne wɔ ɛkɛ ne dahuu”’ la ane!+
“‘Bɛbava moyɛlɛ afɔlebɔdeɛ bɛara Gyihova sua nu,+ ɔluakɛ mebava menli mɔɔ wɔ akɛlɛzonlenlɛ nu la meazia meara azɛlɛ ne azo kɛ ye dɛba ne la,’ Gyihova a se a.”
12 “Mɔɔ ɛlɔne Gyihova ɛha la ɛne: ‘Wɔ azɛlɛ ɛhye mɔɔ ɛdɔ mgbane, mɔɔ sonla anzɛɛ ayɛmoa ɛnle ɛkɛ nee ye azuamgbole kɔsɔɔti azo la, bɛbanyia adidileka wɔ ɛkɛ ne bieko bɛamaa mboaneneavolɛma na bɛ mboane ekpunli alie bɛ menle.’+
13 “‘Mboaneneavolɛma bɛadia bɛ mboane wɔ azuamgbole mɔɔ wɔ maanle ne anu awoka ne mɔ azo, azuamgbole mɔɔ wɔ awoka ne mɔ abo, azuamgbole mɔɔ wɔ maanle ne nyiakɛ, azuamgbole mɔɔ wɔ Bɛngyaman azɛlɛ zo, azuamgbole mɔɔ wɔ ɛleka mɔɔ zuozua Gyɛlusalɛm+ nee Dwuda azuamgbole ne mɔ azo+ bieko,’ Gyihova a se a.”
14 “‘Nea! Mekɛ ɛlɛba,’ Gyihova a se a, ‘mɔɔ mebamaa ɛwɔkɛ kpalɛ mɔɔ membɔle Yizilayɛma nee Dwudama la ara nu a.+
15 Mekɛ zɔhane mebamaa Devidi anyia koliagya* tenlenenli bie+ na ɔbabua ndɛne pɛlepɛle nu na yeamaa tenleneyɛlɛ ahɔ zo wɔ azɛlɛ ne azo.+
16 Wɔ mekɛ zɔhane bɛbalie Dwuda,+ na Gyɛlusalɛm badɛnla aze ɔ nwo adɔ ye.+ Na kɛ bɛbavɛlɛ ye la ɛne: Gyihova Le Yɛ Tenleneyɛlɛ.’”+
17 “Mɔɔ Gyihova ɛha la ɛne: ‘Devidi abozoamra ne anu bie ɛnrɛvi Yizilayɛ belemgbunli ebia ne azo ɛlɛ,+
18 yɛɛ Livae ɛsɔfoma ne ɛnrɛhyia awie mɔɔ ɔbagyinla me nyunlu yeabɔ ɛyelalɛ afɔle, yeayela ma afɔlebɔdeɛ na yeabɔ afɔle gyɛne la anwo ɛlɛ.’”
19 Na Gyihova edwɛkɛ ne rale Gyɛlɛmaya ɛkɛ ne bieko kɛ:
20 “Mɔɔ Gyihova ɛha la ɛne, ‘Saa bɛbahola bɛazɛkye ngyekyeleɛ mɔɔ me nee alehyenlɛ ɛyɛ nee ngyekyeleɛ mɔɔ me nee aledwolɛ ɛyɛ, mɔɔ aleɛ ɛnrɛhye yɛɛ aleɛ ɛnrɛdwo wɔ ye mekɛ nu a,+
21 yɛɛ ngyekyeleɛ mɔɔ me nee me sonvolɛ Devidi ɛyɛ la bazɛkye,+ mɔɔ ɔnrɛnyia ralɛ ɛnrɛdɛnla ye belemgbunli ebia ne azo ɛnrɛli belemgbunli a,+ yɛɛ zɔhane ala a ngyekyeleɛ mɔɔ me nee me azonvolɛ Livae ɛsɔfoma ne ɛyɛ la noko de a.+
22 Kɛ mɔɔ bɛnrɛhola bɛnrɛdia anwuma ɛlɔne na bɛnrɛhola bɛnrɛzuzu ɛnweazo ɛnwea la, zɔhane ala a mebamaa me sonvolɛ Devidi abozoamra nee Livaema mɔɔ bɛlɛsonle me la anwo azo a.’”
23 Na Gyihova edwɛkɛ rale Gyɛlɛmaya ɛkɛ ne bieko kɛ:
24 “Asoo ɛtɛtele mɔɔ menli ɛhye mɔ ɛlɛka la kɛ, ‘Gyihova bakpo mbusua nwiɔ ne mɔɔ ɔkpale bɛ la’ ɔ? Bɛmbu me menli ne yɛɛ bɛmbu bɛ kɛ bɛle maanle bieko.
25 “Mɔɔ Gyihova ɛha la ɛne: ‘Nɔhalɛ nu, kɛ mɔɔ memaa ngyekyeleɛ mɔɔ me nee alehyenlɛ nee aledwolɛ ɛyɛ+ nee mɛla mɔɔ meli memaa anwuma nee aze* ɛgyinla kpundii la,+
26 zɔhane ala a menrɛkpo Gyekɔbo nee me sonvolɛ Devidi abozoamra ɛlɛ a, mebava tumivolɛma meavi ɔ bo zo amra anu meamaa bɛanlea Ebileham, Ayezeke yɛɛ Gyekɔbo abozoamra anwo zo. Ɔluakɛ mebaboɔboa bɛ menli mɔɔ wɔ akɛlɛzonlenlɛ nu la anloa bieko+ na meanwu bɛ anwunvɔne.’”+
