Gyɛlɛmaya 41:1-18
41 Wɔ siane nsuu ne anu, Ɛlehyama ara Nɛtanaya ara Yehyemɛle+ mɔɔ vi dehelɛ abusua ne* anu na ɔle belemgbunli ne menli titili ne mɔ anu ko la, nee menli bulu bie rale Ahaekam ara Gɛdalaya anwo ɛkɛ wɔ Mezepa.+ Na mɔɔ bɛ muala bɛlɛdi debie wɔ Mezepa la,
2 Nɛtanaya ara Yehyemɛle nee menli bulu ne mɔɔ boka ɔ nwo la dwazole na bɛhwenle konle dadeɛ bɛhunle Hyeefan ara Ahaekam ara Gɛdalaya. Ɔti ɔhunle ahenle mɔɔ Babelɔn belemgbunli ne ɛva ye ɛzie ɛkɛ ne kɛ ɔnlea azɛlɛ ne azo la.
3 Eza Yehyemɛle hunle Dwuuma mɔɔ wɔ Gɛdalaya anwo ɛkɛ wɔ Mezepa la, nee Kaledea ɛlɔnema mɔɔ wɔ ɛkɛ ne la amuala.
4 Mɔɔ bɛhunle Gɛdalaya la, ye alehyenlɛ nu mɔɔ ɛnee awie biala ɛtɛtele la,
5 mrenyia 80 vi Hyikɛm,+ Hyaelo+ yɛɛ Samɛlea+ rale. Ɛnee bɛkpa bɛ kɛsa, bɛsuosua bɛ adɛladeɛ nu, bɛbodɛboda* bɛ nwo,+ na bɛlɛ ma afɔlebɔdeɛ nee ɛyɛlɛvuanlɛ+ wɔ bɛ sa nu kɛ bɛfa bɛahɔ Gyihova sua ne anu.
6 Ɔti Nɛtanaya ara Yehyemɛle vile Mezepa hɔyiale bɛ, ɔlɛkɔ la amuala ɛnee ɔlɛsu. Mɔɔ ɔyiale bɛ la, ɔzele bɛ kɛ: “Bɛrɛla Ahaekam ara Gɛdalaya anwo ɛkɛ.”
7 Noko mɔɔ bɛdwule suakpole ne azo la, Nɛtanaya ara Yehyemɛle nee ye menli ne hunle bɛ na bɛvuandinle bɛ bɛguale bula ne anu.
8 Noko bɛ nuhua mrenyia bulu hanle hilele Yehyemɛle kɛ: “Mmaku yɛ ɔluakɛ yɛva hwiiti, baale, nwole yɛɛ wolɛ dɔɔnwo yɛvea ɛbɔ nu.” Ɔti yeangu bɛ yeamboka bɛ mediema ne mɔ anwo.
9 Na Yehyemɛle vuandinle menli mɔɔ ɔhunle bɛ la avunli ɔguale bula kpole ne, mɔɔ Yizilayɛ Belemgbunli Beeyahya ati Belemgbunli Esa dule la anu.+ Bula ɛhye a Nɛtanaya ara Yehyemɛle vale menli mɔɔ ɔhunle bɛ la avunli ɔyile ye tɛkɛɛ a.
10 Yehyemɛle vale menli mɔɔ ɛha Mezepa la amuala,+ mɔɔ belemgbunli ne amra mraalɛ ne mɔ nee menli mɔɔ hale Mezepa amuala boka nwo, mɔɔ sinzavolɛma kpanyinli Nɛbuzaladan ɛva bɛ ɛwula Ahaekam ara Gɛdalaya+ asa anu kɛ ɔnlea bɛ nwo zo la kɛ ngɛkɛlɛ. Nɛtanaya ara Yehyemɛle vale bɛ kɛ ngɛkɛlɛ kɛ ɔ nee bɛ pɛ nu ahɔ Amɔnoma anu.+
11 Mɔɔ Kalia ara Dwoheenan+ nee ɛlɔnema mgbanyinli ne mɔ mɔɔ boka ɔ nwo kɔsɔɔti dele ɛtane mɔɔ Nɛtanaya ara Yehyemɛle ɛyɛ la amuala la,
12 bɛvale menli ne amuala bɛhɔle kɛ bɛ nee Nɛtanaya ara Yehyemɛle kaho, na bɛhɔdole ye wɔ Gebɛyɔn azule kpole ne anloa.
13 Mekɛ mɔɔ menli mɔɔ wɔ Yehyemɛle anwo ɛkɛ ne amuala nwunle Kalia ara Dwoheenan nee ɛlɔnema mgbanyinli ne mɔ amuala mɔɔ boka ɔ nwo la, bɛlile fɛlɛko.
14 Akee menli mɔɔ Yehyemɛle vale bɛ vile Mezepa+ kɛ ɔ nee bɛ kɔ akɛlɛzonlenlɛ nu la hakyile bɛ nye na bɛ nee Kalia ara Dwoheenan ziale.
15 Noko Nɛtanaya ara Yehyemɛle nee mrenyia mɔɔ boka ɔ nwo la anu mɔtwɛ nriandile Dwoheenan na bɛhɔle Amɔnoma anu.
16 Kalia ara Dwoheenan nee ɛlɔnema mgbanyinli mɔɔ boka ɔ nwo la amuala vale menli mɔɔ ɛha mɔɔ bɛvi Mezepa la bɛ nee bɛ hɔle, bɛdabɛ mɔɔ bɛliele bɛ bɛvile Nɛtanaya ara Yehyemɛle mɔɔ ɔhunle Ahaekam ara Gɛdalaya+ asa anu la. Bɛvale mrenyia, ɛlɔnema, mraalɛ, ngakula nee suakunlu mgbanyima ne mɔ bɛvile Gebɛyɔn bɛziale bɛrale.
17 Ɔti bɛhɔdɛnlanle Kemeham azokoɛleɛ ne mɔɔ bikye Bɛtelɛhɛm la,+ bɛnyianle adwenle kɛ bɛkɔ Yigyibiti+
18 ɔlua Kaledeama ati. Ɔluakɛ ɛnee bɛsulo bɛ, ɔboalekɛ ɛnee Nɛtanaya ara Yehyemɛle ɛhu Ahaekam ara Gɛdalaya mɔɔ Babelɔn belemgbunli ne ɛye ye kɛ ɔnlea azɛlɛ ne azo la.+
