Gyɛlɛmaya 42:1-22
42 Akee ɛlɔnema mgbanyinli ne mɔ amuala nee Kalia ara Dwoheenan,+ Hohyaya ara Gyɛzanaya yɛɛ menli ne amuala, ɔvi mɔɔ le ekyi kɔdwu mɔɔ le kpole la anwo zo hwenle bikyele
2 ngapezonli Gyɛlɛmaya na bɛhanle kɛ: “Yɛsɛlɛ wɔ, tie yɛ modolɛ, na sɛlɛ Gyihova wɔ Nyamenle ne maa yɛdayɛ ekyi ne mɔɔ yɛha la amuala, ɔluakɛ menli ɛwolaa ne ekyi bie ala a ɛha a,+ kɛ mɔɔ ɛkola ɛnwu ye la.
3 Maa Gyihova wɔ Nyamenle ne ɛhile yɛ adenle mɔɔ ɔwɔ kɛ yɛfa zo, nee debie mɔɔ ɔwɔ kɛ yɛyɛ la.”
4 Ngapezonli Gyɛlɛmaya buale bɛ kɛ: “Mede mɔɔ bɛha la, na mebazɛlɛ Gyihova bɛ Nyamenle ne meamaa bɛ kɛ mɔɔ bɛbiza la; na edwɛkɛ biala mɔɔ Gyihova bava abua bɛ la, mebaha meahile bɛ. Menrɛva edwɛkɛkpɔkɛ ko bɔbɔ menrɛvea bɛ.”
5 Bɛbuale Gyɛlɛmaya kɛ: “Saa Gyihova wɔ Nyamenle ne dua ɛ nwo zo ka edwɛkɛ kile yɛ na yɛanyɛ ye pɛpɛɛpɛ a, Gyihova ɛyɛ dasevolɛ nɔhavo nee nɔhalɛnli ɛtia yɛ.
6 Saa ɔle kpalɛ o, ɛtane o, yɛbadie Gyihova yɛ Nyamenle ne mɔɔ yɛlɛsoa wɔ wɔ ɔ nwo ɛkɛ ne la ane, amaa yeawie yɛ boɛ ɔluakɛ yɛtie Gyihova yɛ Nyamenle ne ane.”
7 Ye kenle bulu anzi, Gyihova edwɛkɛ rale Gyɛlɛmaya ɛkɛ.
8 Ɔti ɔmaanle bɛhɔvɛlɛle Kalia ara Dwoheenan nee ɛlɔnema mgbanyinli ne mɔ mɔɔ boka ɔ nwo la amuala yɛɛ menli ne amuala, ɔvi mɔɔ le ekyi kɔdwu mɔɔ le kpole la anwo zo.+
9 Ɔzele bɛ kɛ: “Mɔɔ Gyihova, Yizilayɛ Nyamenle ne, mɔɔ bɛzoanle me kɛ menva bɛ modolɛ mengɔndo ɔ nyunlu la ɛha la ɛne:
10 ‘Saa bɛkɔ zo bɛtɛnla azɛlɛ ɛhye azo amgba a, mebamaa bɛakpazi na menrɛbubu bɛ menrɛgua aze, na mebalua bɛ na menrɛdudu bɛ, ɔluakɛ mebanlu me nwo* wɔ munzule ne mɔɔ memaa yedo bɛ la anwo.+
11 Bɛmmasulo Babelɔn belemgbunli ne mɔɔ bɛsulo ye la.’+
“‘Bɛmmasulo ye,’ Gyihova a se a, ‘ɔluakɛ me nee bɛ lua kɛ medie bɛ na meaye bɛ meavi ɔ sa nu.
12 Na mebaze bɛ anwunvɔne,+ na ɔdaye noko ɔbaze bɛ anwunvɔne na yeava bɛ yeazia yeara bɛdabɛ bɛ azɛlɛ ne azo.
13 “‘Noko saa bɛka kɛ, “Kyɛkyɛ, yɛnrɛdɛnla azɛlɛ ɛhye azo!” na bɛandie Gyihova bɛ Nyamenle ne ane
14 na bɛka kɛ, “Kyɛkyɛ, emomu yɛbahɔ Yigyibiti azɛlɛ zo,+ ɛleka mɔɔ yɛnrɛnwu konle anzɛɛ yɛnrɛde aweɛne ndendenle ne anzɛɛ yɛnrɛhyia aleɛ nwo; nehane a yɛbadɛnla a,”
15 ɛnee bɛdie Gyihova edwɛkɛ, O Dwudama mɔɔ ɛha. Mɔɔ ɛlɔne Gyihova, Yizilayɛ Nyamenle ne ɛha la ɛne: “Saa amgba bɛbɔ kpɔkɛ kɛ bɛkɔ Yigyibiti na bɛkɔtɛnla ɛkɛ ne a,
16 yemɔ konle dadeɛ ne mɔɔ bɛsulo ye la badoa bɛ wɔ Yigyibiti azɛlɛ zo, na ɛhɔne ne mɔɔ bɛsulo ye la bali bɛ nzi ahɔ Yigyibiti, na nehane a bɛbawu a.+
17 Na mrenyia mɔɔ bɛbɔ kpɔkɛ kɛ bɛkɔ Yigyibiti bɛahɔdɛnla nehane la amuala bɛawu konle dadeɛ nloa, ɛhɔne nu nee ewulenzane nu. Na munzule ne mɔɔ mebava meara bɛ nwo zo la, bɛ nuhua ko bɔbɔ ɛnrɛvi nu anzɛɛ ɛnrɛha.”’
18 “Ɔluakɛ mɔɔ ɛlɔne Gyihova, Yizilayɛ Nyamenle ne ɛha la ɛne: ‘Kɛ mɔɔ menwolale me ɛya ne nee me ɛya kpole ne menguale Gyɛlusalɛmma anwo zo la,+ zɔhane ala a saa bɛkɔ Yigyibiti a mebawola me ɛya kpole ne meagua bɛ nwo zo a, na menli bawa bɛ amonle, bɛbahakyi debie ɛzulolɛ bie, munzule bado bɛ, na bɛagua bɛ nyunlu aze,*+ na bɛnrɛnwu ɛke bieko.’
19 “Gyihova ɛdendɛ ɛtia bɛ, O Dwudama mɔɔ ɛha. Bɛmmakɔ Yigyibiti. Bɛnwu ye wienyi kɛ mebɔ bɛ kɔkɔ wɔ ɛnɛ kenle ye
20 kɛ bɛ nvonleɛ bamaa bɛ ngoane* avi bɛ sa. Ɔluakɛ bɛzoanle me wɔ Gyihova bɛ Nyamenle ne anwo ɛkɛ ne kɛ, ‘Sɛlɛ Gyihova yɛ Nyamenle ne maa yɛ, na ka debie biala mɔɔ Gyihova yɛ Nyamenle ne baha la kile yɛ na yɛbayɛ.’+
21 Na meha mehile bɛ ɛnɛ, noko bɛnrɛdie Gyihova bɛ Nyamenle ne ane anzɛɛ bɛnrɛyɛ debie biala mɔɔ ɔzoanle me kɛ menga mengile bɛ la.+
22 Ɛhye ati, bɛnwu ye wienyi kɛ konle dadeɛ nloa, ɛhɔne nu yɛɛ ewulenzane nu a bɛbawu wɔ ɛleka mɔɔ bɛkulo kɛ bɛkɔtɛnla la a.”+
