Gyɛlɛmaya 43:1-13
43 Mekɛ mɔɔ Gyɛlɛmaya hanle edwɛkɛ ɛhye mɔ amuala mɔɔ vi Gyihova bɛ Nyamenle ne ɛkɛ hilele menli ne kɔsɔɔti, edwɛkɛkpɔkɛ ko biala mɔɔ Gyihova bɛ Nyamenle ne vale zoanle ye kɛ ɔha ɔhile bɛ ɔwiele la,
2 Hohyaya ara Azalaya, Kalia ara Dwoheenan+ nee mrenyia anwomemaazoma* ne amuala hanle hilele Gyɛlɛmaya kɛ: “Mɔɔ ɛlɛka la le adalɛ! Gyihova yɛ Nyamenle ne ɛtɛsoanle wɔ kɛ ɛraha kɛ, ‘Bɛmmakɔ Yigyibiti bɛkɔtɛnla ɛkɛ.’
3 Emomu Nelaya ara Bɛlɛke+ a ɛmaa wɔha ɛhye wɔtia yɛ a, amaa bɛava yɛ bɛawula Kaledeama asa anu, na bɛahu yɛ anzɛɛ bɛava yɛ bɛahɔ akɛlɛzonlenlɛ nu wɔ Babelɔn.”+
4 Ɔti Kalia ara Dwoheenan nee ɛlɔnema mgbanyinli ne mɔ amuala nee menli ne kɔsɔɔti andie Gyihova ane andɛnla Dwuda azɛlɛ zo.
5 Emomu Kalia ara Dwoheenan nee ɛlɔnema mgbanyinli ne mɔ amuala vale Dwudama mɔɔ ɛha la amuala mɔɔ vi maanle maanle mɔɔ bɛbɔle bɛ asande bɛhɔguale nu na bɛzia bɛra kɛ bɛbadɛnla Dwuda azɛlɛ ne azo la amuala hɔle.+
6 Bɛvale mrenyia, mraalɛ, ngakula, belemgbunli ne amra mraalɛ ne mɔ nee awie biala* mɔɔ sinzavolɛma kpanyinli Nɛbuzaladan+ vale ye gyakyile Hyeefan+ ara Ahaekam+ ara Gɛdalaya+ la, yɛɛ ngapezonli Gyɛlɛmaya nee Nelaya ara Bɛlɛke.
7 Na bɛhɔle Yigyibiti azɛlɛ ne azo ɔluakɛ bɛandie Gyihova ane, bɛhɔle too bɛhɔdwule Tapanehizi.+
8 Akee Gyihova edwɛkɛ rale Gyɛlɛmaya ɛkɛ wɔ Tapanehizi kɛ:
9 “Sesa awolɛ mgbole, na fa kɔvea belekese bama ne mɔɔ wɔ Falo sua ne mɔɔ wɔ Tapanehizi anuhɔlɛ ne la anu, na fa ndɛtɛlɛ keda zo wɔ mrenyia mɔɔ bɛle Dwuuma la anye zo.
10 Na ka kile bɛ kɛ, ‘Mɔɔ ɛlɔne Gyihova, Yizilayɛ Nyamenle ne ɛha la ɛne: “Nea, melɛsoa meamaa bɛahɔvɛlɛ me sonvolɛ Babelɔn Belemgbunli Nɛbukadenɛza bɛara,+ na mebava ye belemgbunli ebia ne meazie awolɛ ɛhye mɔ mɔɔ meva mevea la azo, na ɔbadɛlɛ ye belemgbunlililɛ ɛdanlɛsua ne anu wɔ zo.+
11 Na ɔbarateta Yigyibiti azɛlɛ ne.+ Mɔɔ fɛta anwonyane la bawu anwonyane nu, yɛɛ mɔɔ fɛta akɛlɛzonlenlɛ la bahɔ akɛlɛzonlenlɛ nu, yɛɛ mɔɔ fɛta konle dadeɛ la bawu konle dadeɛ nloa.+
12 Na mebava senle meado Yigyibiti nyamenle ne mɔ azua ne mɔ anu,+ ɔbayela bɛ na yeava bɛ yeahɔ akɛlɛzonlenlɛ nu. Ɔbava Yigyibiti azɛlɛ ne yeaheda kɛ mɔɔ mboaneneavolɛ fa ye ɛdanlɛ keda la, na ɔbavi ɛkɛ yeahɔ anzodwolɛ nu.
13 Na ɔbabubu Bɛte-hyimɛhye* mpila ne mɔ* mɔɔ wɔ Yigyibiti azɛlɛ ne azo la anu azinli azinli na yeava senle yeayela Yigyibiti nyamenle ne mɔ azua* ne mɔ.”’”
Ɔbodwɛkɛ
^ Hibulu edwɛkɛkpɔkɛ ne eza kile akɛnrasesebɛ mɔɔ ɛnle kpalɛ mɔɔ bɛfa bɛyɛ debie anzɛɛ awie mɔɔ yɛ debie mɔɔ ɔnlɛ adenle ɔnyɛ la.
^ Anzɛɛ “ɛkɛla biala.”
^ Anzɛɛ “Sɛnzɛne Ne Sua (Ɛzonlenlɛsua),” ɛhye kile, Hɛleɔpɔlese.
^ Anzɛɛ “awolɛ mpila ndendenle mɔɔ le ngakyedeɛ.”
^ Anzɛɛ “ɛzonlenlɛ azua.”
