Gyɛlɛmaya 52:1-34
52 Zɛdikaya+ lile ɛvolɛ 21 la yɛɛ ɔrayɛle belemgbunli a, na ɔlile tumi ɛvolɛ 11 wɔ Gyɛlusalɛm. Ye mame a le Hamutale, Gyɛlɛmaya mɔɔ vi Lebena la ara raalɛ ne.+
2 Ɔhɔle zo ɔyɛle mɔɔ le ɛtane wɔ Gyihova anye zo, kɛ mɔɔ Gyɛhɔyakem yɛle ala la.+
3 Ɔluakɛ ɛnee Gyihova ɛva ɛya la ati a ninyɛne ɛhye mɔ sisile Gyɛlusalɛm nee Dwuda too ɔyele bɛ ɔvile ɔ nye zo a.+ Na Zɛdikaya dele Babelɔn belemgbunli ne anwo atua.+
4 Wɔ Zɛdikaya tumililɛ ɛvolɛ mɔɔ tɔ zolɛ ngɔnla, wɔ siane bulu ne anu, wɔ siane ne kenle mɔɔ tɔ zolɛ bulu la azo, Babelɔn Belemgbunli Nɛbukadenɛza nee ye ɛlɔnema ne amuala rale Gyɛlusalɛm anwo zo. Bɛyɛle bɛ azokoɛleɛ wɔ ɛkɛ na bɛliele bane bɛbɛngale ye bɛyiale.+
5 Na bɛbɛngale suakpole ne bɛyiale too ɔhɔdwule Belemgbunli Zɛdikaya ɛvolɛ 11 ne azo.
6 Wɔ siane nna ne anu, siane ne kenle ngɔnla ne azo,+ ɛhɔne ne yɛle kpole wɔ suakpole ne azo, na menli ne annyia aleɛ wɔ azɛlɛ ne azo.+
7 Akee bɛbule suakpole ne bane ne bɛwolole nu, na sogyama ne mɔ amuala nriandile vile suakpole ne azo nɔe ne na bɛhɔvale anlenkɛ kpole ne mɔɔ wɔ bane nwiɔ ne avinli mɔɔ bikye belemgbunli tola ne la anu, ɛnee Kaledeama ne ɛbɛnga suakpole ne ɛyia; na bɛdoale zo wɔ Alaba adenle ne azo.+
8 Noko Kaledea ɛlɔnema ne voanle belemgbunli ne, na bɛhɔdole Zɛdikaya+ wɔ Gyɛleko azɛlɛ sɛsɛ ne azo, na ye ɛlɔnema mɔɔ wɔ ɔ nwo ɛkɛ ne la amuala bɔle asande.
9 Akee bɛvale belemgbunli ne bɛhɔmaanle Babelɔn belemgbunli ne wɔ Relebela mɔɔ wɔ Heemate azɛlɛ zo la, na ɔbuale ye ndɛne.
10 Na Babelɔn belemgbunli ne hunle Zɛdikaya amra mrenyia ne mɔ wɔ ɔ nye zo ɛkɛ ne, na ɔhunle Dwuda mgbanyima ne mɔ amuala noko wɔ Relebela.
11 Akee Babelɔn belemgbunli ne bobɔle Zɛdikaya anye+ na ɔvale kɔbele kyeenyi ɔguale ye, ɔvale ye ɔhɔle Babelɔn ɔhɔdole ye efiade hɔkpulale kenle mɔɔ ɔwule la.
12 Wɔ siane nnu ne anu, siane ne kenle mɔɔ tɔ zo bulu, mɔɔ le Belemgbunli Nɛbukadenɛza, Babelɔn belemgbunli ne ɛvolɛ 19 ne azo la, sinzavolɛma kpanyinli Nɛbuzaladan mɔɔ ɔle Babelɔn belemgbunli ne sonvolɛ la rale Gyɛlusalɛm.+
13 Ɔyelale Gyihova sua ne,+ belemgbunli sua* ne yɛɛ Gyɛlusalɛm azua kɔsɔɔti; eza ɔyelale sua kpole biala.
14 Na Kaledea ɛlɔnema kɔsɔɔti mɔɔ boka sinzavolɛma kpanyinli ne anwo la bubule bane ne mɔɔ ɛbɛnga Gyɛlusalɛm ɛyia la guale aze.+
15 Sinzavolɛma kpanyinli Nɛbuzaladan vale koahweabanema nee menli mɔɔ hale mɔɔ bɛgyakyile bɛ wɔ suakpole ne azo la ɔhɔle akɛlɛzonlenlɛ nu. Eza ɔvale menli mɔɔ ɛva bɛ nwo ɛhɔmaa Babelɔn belemgbunli ne nee dwinvolɛma mɔɔ ɛbe mɔɔ hale la ɔhɔle.+
16 Noko sinzavolɛma kpanyinli Nɛbuzaladan gyakyile ehyiavolɛma kpalɛ kpalɛ ne mɔ bie wɔ azɛlɛ ne azo kɛ bɛyɛ vanye egyinli nee mialera nu gyima.+
17 Na Kaledeama ne bubule kɔbele mpila ne mɔ+ mɔɔ wɔ Gyihova sua nu ɛkɛ ne la nee ehwili ne mɔ+ nee kɔbele Angola Kpole* ne+ mɔɔ wɔ Gyihova sua nu ɛkɛ ne la anu, na bɛvale kɔbele ne amuala bɛhɔle Babelɔn.+
18 Eza bɛvale ahyɛnze mɔɔ bɛfa bɛfula nzonle, sofi, ninyɛne mɔɔ bɛfa bɛnua senle, ahyɛnze,+ ahanrɛlɛ+ nee kɔbele ahyɛnze mɔɔ bɛfa bɛyɛ gyima wɔ ɛzonlenlɛsua ne anu la amuala.
19 Sinzavolɛma kpanyinli ne vale ahyɛnze mgbole,+ senlevalɛ ahyɛnze, ahyɛnze ngyikyi, ahyɛnze mɔɔ bɛfa bɛfula nzonle, kɛnlaneɛ mbaka,+ ahanrɛlɛ nee ahyɛnze mɔɔ bɛva nvutuke tagyee nee dwɛtɛ fufule bɛyɛ la hɔle.+
20 Na kɔbele mɔɔ bɛvale bɛyɛle ninyɛne ɛhye mɔ amuala la, mpila nwiɔ ne, Angola Kpole* ne, nlankɛ nyinli 12 ne+ mɔɔ Angola Kpole ne gyi bɛ nwo zo la nee ehwili ne mɔ mɔɔ Belemgbunli Sɔlɔmɔn yɛle mɔɔ bɛwɔ Gyihova sua nu ɛkɛ ne la, bɛangola ye suzu.
21 Mpila ne mɔ ɛdeɛ, ɛnee pila ko biala anwumahɔlɛ le kubit 18, ɛzuzunyɛma mɔɔ le kubit 12 la a bɛnga ye yia a;+ ye kɔbele ne ɛzamo* le sɛntemita kɛyɛ nsuu,* na ɛnee tokule la nu.
22 Na ɛnee ɔ ti ne le kɔbele; na tile ko biala anwumahɔlɛ le kubit nnu;+ na avonle ne nee pɔmegelanate ne mɔ mɔɔ gua tile ne anwo amuala la, bɛvale kɔbele a bɛyɛle ye kɔsɔɔti a. Zɔhane ala a pila ne mɔɔ tɔ zo nwiɔ la nee pɔmegelanate ne mɔ noko de a.
23 Pɔmegelanate mɔɔ wɔ nwolɛ la le 96; pɔmegelanate mɔɔ wɔ avonle ne anwo la amuala le 100.+
24 Sinzavolɛma kpanyinli ne eza vale ɛsɔfo kpanyinli Sɛlaya,+ ye boavolɛ Zɛfanaya+ nee nlenkɛ sinzavolɛma nsa ne hɔle.+
25 Eza ɔvale suakunlu kpanyinli ko mɔɔ ɛnee nea ɛlɔnema ne anwo zo la ɔvile suakpole ne azo, menli nsuu mɔɔ bɛbikye belemgbunli ne kpalɛ mɔɔ bɛnwunle bɛ wɔ suakpole ne azo, nee ɛlɔnema kpanyinli ne kɛlɛhɛlɛvolɛ ne mɔɔ boɔboa menli mɔɔ wɔ azɛlɛ ne azo la anloa, yɛɛ menli mɔɔ ɛnlɛ bie mɔɔ bɛde azɛlɛ ne azo mɔɔ ɔnwunle bɛ wɔ suakpole ne azo la anu 60 na ɔ nee bɛ hɔle.
26 Sinzavolɛma kpanyinli Nɛbuzaladan vale bɛ hɔmaanle Babelɔn belemgbunli ne wɔ Relebela.
27 Babelɔn belemgbunli ne hunle bɛ wɔ Relebela+ mɔɔ wɔ Heemate azɛlɛ zo la. Ɔti Dwuda vile ye azɛlɛ zo hɔle akɛlɛzonlenlɛ nu.+
28 Menli mɔɔ Nɛbukadenɛza vale bɛ hɔle akɛlɛzonlenlɛ nu la ɛne: wɔ ɛvolɛ mɔɔ tɔ zo nsuu la anu, Dwuuma 3,023.+
29 Wɔ Nɛbukadenɛza ɛvolɛ mɔɔ tɔ zo 18 ne la anu,+ bɛvale menli* 832 bɛvile Gyɛlusalɛm.
30 Wɔ Nɛbukadenɛza ɛvolɛ mɔɔ tɔ zo 23 ne la anu, sinzavolɛma kpanyinli Nɛbuzaladan vale Dwuuma hɔle akɛlɛzonlenlɛ nu, menli* 745.+
Menli* mɔɔ bɛvale bɛ bɛhɔle akɛlɛzonlenlɛ nu la amuala le 4,600.
31 Mɔɔ bɛvale Dwuda Belemgbunli Gyɛhɔyakɛn bɛhɔle akɛlɛzonlenlɛ nu la,+ ye ɛvolɛ 37 ne anu, wɔ siane 12 ne anu, siane ne kenle 25 ne azo, ɛvolɛ ne mɔɔ Babelɔn Belemgbunli Yivele-mɛlodake rayɛle belemgbunli la anu, ɔyele Dwuda Belemgbunli Gyɛhɔyakɛn ɔvile efiade na ɔgyakyile ye.*+
32 Ɔdendɛle kɛnlɛma ɔhilele ye na ɔkpogyale ye belemgbunli ebia ne zo ɔdɛlale arelemgbunli mɔɔ ɛha mɔɔ bɛboka ɔ nwo wɔ Babelɔn la.
33 Ɔti Gyɛhɔyakɛn yele ye efiade adɛladeɛ ne mɔ guale, na ɔlile aleɛ wɔ ɔ nyunlu dahuu wɔ ye ngoane mekɛ kɔsɔɔti anu.
34 Babelɔn belemgbunli ne maanle bɛmaanle ye aleɛ dahuu, alehyenlɛ biala nee ye ɛdeɛ, wɔ ye ngoane mekɛ kɔsɔɔti anu, hɔkpulale kenle mɔɔ ɔwule la.
Ɔbodwɛkɛ
^ Anzɛɛ “suakunlu.”
^ Hibulu aneɛ nu, “kɔbele Nyevile.”
^ Hibulu aneɛ nu, “Kɔbele Nyevile.”
^ Anzɛɛ “sinlinyunlu.”
^ Anzɛɛ “ɛkɛla.”
^ Anzɛɛ “ɛkɛla.”
^ Anzɛɛ “Ɛkɛla.”
^ Hibulu aneɛ nu, “ɔkpogyale ɔ ti zo.”
