Lɛvitikɔso 13:1-59
13 Gyihova doale zo zele Mosisi nee Aalɔn kɛ:
2 “Saa debie nwu awie, ɔ nwo yɛ kabonra, anzɛɛ debie gua ɔ nwo* na ɔbahola yeayɛ kokobɛ*+ wɔ ɔ nwo a, ɔwɔ kɛ bɛfa ye bɛkɔ ɛsɔfo Aalɔn anzɛɛ ɔ mra ɛsɔfo ne mɔ ko ɛkɛ.+
3 Ɛsɔfo ne banlea ewule ne mɔɔ ɛgua ɔ nwo la. Saa ɛkɛ ne enrinli ne ɛyɛ fufule na ewule ne ɛdidi ɛhɔ nwonane ne anu a, ɛnee kokobɛ ɔ. Ɛsɔfo ne banlea na yeaha kɛ ɔ nwo ɛnde.
4 Noko saa deɛ mɔɔ ɛgua ɔ nwo la ɛyɛ fufule na ɔtɛdidile ɔtɛkɔle nwonane ne anu yɛɛ enrinli ne ɛtɛyɛle fufule a, ɛsɔfo ne bamaa ɔ ngome yeadɛnla kenle nsuu.+
5 Ɛsɔfo ne banleɛnlea ɔ nwo wɔ kenle nsuu ne azo, na saa ɔda ali kɛ ewule ne ɛhɔ yɛɛ ɔtɛtɛlɛle a, ɛsɔfo ne bamaa ɔ ngome yeadɛnla kenle nsuu bieko.
6 “Kenle nsuu ne azo, ɛsɔfo ne banleɛnlea ɔ nwo bieko, na saa ewule ne ɛlɛkɔ na ɔtɛtɛlɛle a, ɛsɔfo ne baha kɛ ɔ nwo te;+ kabonra ala ɔ. Ahenle bakpo ye adɛladeɛ na ɔ nwo ade.
7 Noko saa ɔkɔ ɛsɔfo ne anyunlu na ɔka kɛ ɔ nwo ɛde na nzinlii kabonra* ne tɛlɛ a, ɛnee ɔwɔ kɛ ɔkɔ ɛsɔfo ne anyunlu bieko.
8 Ɛsɔfo ne banlea ewule ne, na saa yedɛlɛ a, ɛsɔfo ne baha kɛ ɔ nwo ɛnde. Kokobɛ ɔ.+
9 “Saa kokobɛ gua awie a, ɔwɔ kɛ bɛfa ye bɛkɔ ɛsɔfo ne ɛkɛ,
10 ɛsɔfo ne banlea.+ Saa debie fufule bie ɛnwu ye na yemaa ɛkɛ ne enrinli ne ɛyɛ fufule na ɔkpuke ɔyɛ hanlɛ a,+
11 ɛnee ɔle kokobɛ mɔɔ ɔbahyɛ, na ɛsɔfo ne baha kɛ ɔ nwo ɛnde. Ɔngyia kɛ ɔmaa ɔ ngome ɔtɛnla,+ ɔluakɛ ɔ nwo ɛnde.
12 Na saa kokobɛ ne gua ɔ nwo amuala, ɔvi ɔ ti zo kɔdwu ɔ gyakɛ abo mɔɔ ɛsɔfo ne kola nwu ye la,
13 na ɛsɔfo ne ɛnlea ye na yenwu kɛ kokobɛ ne ɛgua ɔ nwo amuala a, akee ɔbaha kɛ wuliravolɛ ne anwo te.* Ɔ muala ɛyɛ fufule, na ɔ nwo te.
14 Noko saa ɔtu hanlɛ a, ɔ nwo ɛnde.
15 Saa ɛsɔfo ne nwu hanlɛ ne a, ɔbaha kɛ ɔ nwo ɛnde.+ Hanlɛ ne anwo ɛnde. Ɔle kokobɛ.+
16 Noko hanlɛ ne eza yɛ fufule a, ɛnee ɔwɔ kɛ ɔkɔ ɛsɔfo ne ɛkɛ.
17 Ɛsɔfo ne banlea ye,+ na saa ewule ne ɛyɛ fufule a, ɛsɔfo ne baha kɛ wuliravolɛ ne anwo te. Ɔ nwo ɛde.
18 “Saa nyila nwu awie na ɔkɔ,
19 na debie fufule bie nwu ɔ bo zo ne anzɛɛ debie anyunlu kɔkɔlɛ nee fufule gua ɔ bo zo ne a, ɔwɔ kɛ ɔfa ɔ nwo ɔkɔkile ɛsɔfo ne.
20 Ɛsɔfo ne banlea,+ na saa ɔda ali kɛ yedidi yehɔ nwonane ne anu na ɛkɛ ne enrinli ne ɛyɛ fufule a, ɛsɔfo ne baha kɛ ɔ nwo ɛnde. Kokobɛ a ɛvinde nyila ne anu a.
21 Noko saa ɛsɔfo ne nea na yeannwu enrinli fufule biala wɔ ɛkɛ na ɔtɛdidile ɔtɛkɔle nwonane ne anu na ɔlɛkɔ a, ɛsɔfo ne bamaa ɔ ngome yeadɛnla kenle nsuu.+
22 Na saa yedɛlɛ ɛdeɛ a, ɛnee ɛsɔfo ne baha kɛ ɔ nwo ɛnde. Ɔle ewule.
23 Noko saa deɛ mɔɔ ɛgua ɔ nwo la ka ɛkɛ ne ala na yeandɛlɛ a, ɛnee debie a ɛnwu nyila ne abo zo a, na ɛsɔfo ne baha kɛ ɔ nwo te.+
24 “Saa senle yela awie na ɔyɛ hanlɛ na hanlɛ ne mɔɔ ɛtɛkɔle la anyunlu yɛ kɔkɔlɛ nee fufule anzɛɛ fufule a,
25 ɛsɔfo ne banlea. Saa ɛkɛ ne enrinli ne ɛyɛ fufule na ɔda ali kɛ yedidi yehɔ nwonane ne anu a, ɛnee kokobɛ a ɛvinde hanlɛ ne anu a, na ɛsɔfo ne baha kɛ ɔ nwo ɛnde. Ewule kokobɛ ɔ.
26 Noko saa ɛsɔfo ne nea na yeannwu enrinli fufule wɔ ɛkɛ yɛɛ ɔtɛdidile ɔtɛkɔle nwonane ne anu na ɔlɛkɔ a, ɛnee ɛsɔfo ne bamaa ɔ ngome yeadɛnla kenle nsuu.+
27 Ɛsɔfo ne banleɛnlea ɔ nwo wɔ kenle nsuu ne azo, na saa ewule ne ɛdɛlɛ a, ɛsɔfo ne baha kɛ ɔ nwo ɛnde. Ewule kokobɛ ɔ.
28 Noko saa ewule ne ka ɛkɛ ne ala yɛɛ yeandɛlɛ na ɔlɛkɔ a, ɛnee hanlɛ ne ala a ɛnwu a, na ɛsɔfo ne baha kɛ ɔ nwo te, ɔluakɛ hanlɛ ne a ɛnwu a.
29 “Saa ewule bie tɔ nrenyia anzɛɛ raalɛ ati zo anzɛɛ ɔ kɛsa anwo a,
30 ɛsɔfo ne banlea ewule ne.+ Saa ɔda ali kɛ yedidi yehɔ nwonane ne anu na ɛkɛ ne enrinli ne ɛyɛ yɛlo na yeha ekyi bie a, ɛsɔfo ne baha kɛ ahenle anwo ɛnde; ewule ɛdɔ ɔ ti zo anzɛɛ ɔ kɛsa anwo. Kokobɛ ɛgua ɔ ti zo anzɛɛ ɔ kɛsa anwo.
31 Noko saa ɛsɔfo ne nwu kɛ ewule ne ɛtɛdidile ɛtɛkɔle nwonane ne anu yɛɛ enrinli bile biala ɛnle ɛkɛ a, ɔwɔ kɛ ɛsɔfo ne maa ahenle mɔɔ ewule ne ɛha ye la angome tɛnla kenle nsuu.+
32 Ɛsɔfo ne banlea ewule ne wɔ kenle nsuu ne azo, na saa ewule ne ɛtɛtɛlɛle yɛɛ ɛkɛ ne enrinli ne ɛtɛyɛle yɛlo na ewule ne ɛtɛdidile ɛtɛkɔle nwonane ne anu a,
33 ɔwɔ kɛ ahenle kpa ɔ ti nee ɔ kɛsa, noko ɔbagyakyi ɛleka mɔɔ ewule ne wɔ la. Ɛsɔfo ne bamaa ahenle mɔɔ ewule ne ɛha ye la angome adɛnla kenle nsuu.
34 “Ɛsɔfo ne banlea ewule ne bieko wɔ kenle nsuu ne azo, na saa ewule ne mɔɔ wɔ ɔ ti zo nee ɔ kɛsa anwo la ɛtɛtɛlɛle yɛɛ ɔtɛdidile ɔtɛkɔle nwonane ne anu a, ɛnee ɛsɔfo ne baha kɛ ɔ nwo te, na ɔwɔ kɛ ɔkpo ye adɛladeɛ na ɔ nwo te.
35 Na saa bɛka kɛ ɔ nwo te na nzinlii ewule ne tɛlɛ a,
36 ɛsɔfo ne banleɛnlea ɔ nwo, na saa ewule ne ɛdɛlɛ a, ɔngyia kɛ ɔnea kɛ ɔkɛnwu enrinli yɛlo; ahenle zɔhane anwo ɛnde.
37 Noko saa ɔnea na ɔnwu kɛ ewule ne ɛtɛtɛlɛle na enrinli bile ɛfifi ɛkɛ ne a, ɛnee ewule ne ɛhɔ. Ɔ nwo te, na ɛsɔfo ne baha kɛ ɔ nwo te.+
38 “Saa debie fufule bie gua nrenyia anzɛɛ raalɛ nwo a,
39 ɛsɔfo ne banlea.+ Saa deɛ mɔɔ ɛgua ɔ nwo la ɛnle fufule kpalɛ a, ɛnee azenra ala a ɛgua ɔ nwo a. Ahenle anwo te.
40 “Saa nrenyia bie ati zo enrinli tu na ɔ ti zo yɛ kpawee a, ɔ nwo te.
41 Saa ɔ nwoma zo enrinli ne tu na ɛkɛ ne yɛ kpawee a, ɔ nwo te.
42 Noko saa hanlɛ mɔɔ anyunlu le kɔkɔlɛ nee fufule la finde ɔ ti zo anzɛɛ ɔ nwoma azo ɛleka mɔɔ ɛkpa la a, ɛnee kokobɛ a ɛlɛfinde ɔ ti zo anzɛɛ ɔ nwoma azo a.
43 Ɛsɔfo ne banlea ye, na saa ɔnwu kɛ ewule ne ɛmaa debie fufule nee kɔkɔlɛ ɛvinde ɔ ti zo nee ɔ nwoma azo ɛleka mɔɔ ɛkpa la, na ɔzɔho kɛ kokobɛ ɛgua ye a,
44 ɔle kokobɛvolɛ. Ɔ nwo ɛnde, na ɔwɔ kɛ ɛsɔfo ne ka kɛ ɔ nwo ɛnde ɔlua ewule ne mɔɔ wɔ ɔ ti zo la ati.
45 Ɔwɔ kɛ awie mɔɔ kokobɛ ɛgua ye la wula adɛladeɛ mɔɔ ɛtete na ɔyɛ ɔ ti zo sesakaa, na ɔkeda ɔ nloa azo enrinli ne azo na ɔtea nu kɛ, ‘Me nwo ɛnde o, me nwo ɛnde!’
46 Mekɛ ala mɔɔ ewule ne wɔ ɔ nwo la, ɔ nwo ɛnde. Kɛmɔ ɔ nwo ɛnde la ati, ɔwɔ kɛ ɔ ngomekye ɔtɛnla. Ɔbadɛnla azokoɛleɛ ne anzi lɔ.+
47 “Saa kokobɛ gua tɛladeɛ nu, saa boane enrinli tɛladeɛ anzɛɛ lenen tɛladeɛ o,
48 saa ɔgua tɛladeɛ ne nyɛma ne mɔ anu o, nwoma nu anzɛɛ debie mɔɔ bɛva nwoma bɛyɛ la anu,
49 na debie mɔɔ anye le yɛlo nee amunli anzɛɛ kɔkɔlɛ la vi ewule ne anu ka tɛladeɛ ne, nwoma ne, nyɛma ne mɔ, anzɛɛ debie biala mɔɔ bɛva nwoma bɛyɛ la anu a, ɛnee kokobɛ ɔ, ɔwɔ kɛ bɛfa bɛkile ɛsɔfo ne.
50 Ɛsɔfo ne banlea ewule ne na yeava deɛ ne mɔɔ ewule ne ɛha nu la yeazie kenle nsuu.+
51 Saa ɔnea ewule ne wɔ kenle nsuu ne azo, na ɔnwu kɛ yedɛlɛ wɔ tɛladeɛ ne, nyɛma ne mɔ, nwoma ne anzɛɛ debie mɔɔ bɛva nwoma bɛyɛ la anu a, ewule ne le kokobɛ nzane, na nwolɛ ɛnde.+
52 Ɔwɔ kɛ ɔyela tɛladeɛ ne anzɛɛ nyɛma ne mɔ anzɛɛ debie biala mɔɔ bɛva nwoma bɛyɛ na ewule ne ɛgua nu la, ɔluakɛ ɔle kokobɛ nzane. Ɔwɔ kɛ bɛfa senle bɛyela ye.
53 “Noko saa ɛsɔfo ne nea na ewule ne ɛtɛtɛlɛle wɔ tɛladeɛ ne anzɛɛ nyɛma ne mɔ anzɛɛ debie biala mɔɔ bɛva nwoma bɛyɛ la anu a,
54 ɛsɔfo ne bamaa bɛakpo deɛ ne mɔɔ ewule ne ɛgua nu la na yeava yeazie kenle nsuu bieko.
55 Saa bɛkpo deɛ ne mɔɔ ewule ne ɛgua nu la bɔkɔɔ bɛwie a, ɛsɔfo ne banlea. Saa ewule ne mɔɔ ɛgua nu la anye ɛtɛkakyile na ɔtɛtɛlɛle bɔbɔ a, nwolɛ ɛnde. Ɔwɔ kɛ bɛfa senle bɛyela ye, ɔluakɛ ewule ne ɛdidi ɛhɔ ɔ kunlu anzɛɛ ɔ nzi.
56 “Noko saa bɛkpo ye bɔkɔɔ bɛwie na ɛsɔfo ne nea na ewule ne ɛlɛkɔ a, ɔbade ɛkɛ ne ɛdeɛ ne yeavi tɛladeɛ ne anzɛɛ nwoma ne anzɛɛ nyɛma ne mɔ anu.
57 Noko saa ewule ne finde tɛladeɛ ne anzɛɛ nyɛma ne mɔ anzɛɛ debie biala mɔɔ bɛva nwoma bɛyɛ la ɛleka gyɛne a, ɛnee ɔlɛtɛlɛ, na ɔwɔ kɛ bɛfa senle bɛyela ye.+
58 Na saa bɛkpo tɛladeɛ ne anzɛɛ nyɛma ne mɔ anzɛɛ debie biala mɔɔ bɛva nwoma bɛyɛ la na ewule ne fi nu a, ɛnee ɔwɔ kɛ bɛkpo ye bieko na nwolɛ te.
59 “Ewule kokobɛ mɔɔ gua boane enrinli anzɛɛ lenen tɛladeɛ, anzɛɛ nyɛma mɔɔ bɛva bɛnwo tɛladeɛ, anzɛɛ debie biala mɔɔ bɛva nwoma bɛyɛ la anu la anwo mɛla mɔɔ bɛgyinla zo bɛkile kɛ deɛ ne anwo te anzɛɛ nwolɛ ɛnde la ɛne.”
Ɔbodwɛkɛ
^ Hibulu aneɛ nu, “ye nwonane nu.”
^ Hibulu edwɛkɛkpɔkɛ mɔɔ bɛhile ɔ bo “kokobɛ” la kile ninyɛne dɔɔnwo na bie a le ewule ngakyile mɔɔ sane mɔɔ gua bɛ nwo la. Ewule bie mɔ mɔɔ gua adɛladeɛ nee azua nu la noko boka nwo.
^ Anzɛɛ “ewule.”
^ Anzɛɛ “ɛnle nzane.”
