Lɛvitikɔso 3:1-17
3 “‘Saa ɔfa ɛnlankɛ yeabɔ anzodwolɛ afɔle+ a, nyinli o, belɛ o, ɔwɔ kɛ ɔfa nane mɔɔ te kpɔkɛ la ɔba Gyihova anyunlu.
2 Ɔwɔ kɛ ɔfa ɔ sa ɔto ye afɔlebɔdeɛ ne ati zo na bɛku ye wɔ nyianu ɛdanlɛsua ne anuhɔlɛ ne; na Aalɔn amra ɛsɔfo ne mɔ bava ye mogya ne akponde afɔlemokyea ne anwo amuala.
3 Ɔbava ye anzodwolɛ afɔlebɔdeɛ ne bie yeara kɛ afɔle mɔɔ bɛva senle bɛbɔ bɛmaa Gyihova:+ ɔ kunlu ninyɛne ne anwo ɛnlome ne,+ anyalɛ ne anwo ɛnlome ne amuala,
4 yɛɛ kilenzia nwiɔ ne mɔɔ kɔne ɔ nze zo la nee nwolɛ ɛnlome ne. Eza ɔbaye ɛbolɛ ne anwo ɛnlome ne yeaboka kilenzia ne anwo.+
5 Aalɔn amra mrenyia ne mɔ bayela ye wɔ afɔlemokyea ne azo aboka ɛyelalɛ afɔlebɔdeɛ ne mɔɔ gua ɛyɛne ne azo wɔ senle ne anu la anwo;+ ɔle afɔlebɔlɛ evuanlɛ mɔɔ Gyihova anye die nwolɛ*+ mɔɔ bɛva senle bɛbɔ a.
6 “‘Saa ɔfa boane yeabɔ anzodwolɛ afɔle yeamaa Gyihova a, ɔbava nyinli anzɛɛ belɛ mɔɔ te kpɔkɛ la.+
7 Saa ɔfa boaneralɛ nyinli yeara kɛ ye afɔlebɔdeɛ a, ɛnee ɔbava yeara Gyihova anyunlu.
8 Ɔbava ɔ sa yeado ye afɔlebɔdeɛ ne ati zo, na bɛahu ye wɔ nyianu ɛdanlɛsua ne anyunlu. Aalɔn amra mrenyia ne mɔ bakponde ye mogya ne wɔ afɔlemokyea ne anwo amuala.
9 Ɔbava anzodwolɛ afɔlebɔdeɛ ne anu ɛnlome ne yeara kɛ afɔle mɔɔ bɛva senle bɛbɔ bɛmaa Gyihova la.+ Ɔbaye ɔ dua ne mɔɔ ɛlɔ mɔɔ kɔne ɔ nzi bowule ne azo la amuala, ɔ kunlu ninyɛne ne anwo ɛnlome ne, anyalɛ ne anwo ɛnlome ne amuala,
10 yɛɛ kilenzia nwiɔ ne mɔɔ kɔne ɔ nze zo la nee nwolɛ ɛnlome ne. Eza ɔbaye ɛbolɛ ne anwo ɛnlome ne yeaboka kilenzia ne anwo.+
11 Na ɛsɔfo ne bayela ye wɔ afɔlemokyea ne azo kɛ aleɛ,* ɔle afɔle mɔɔ bɛva senle bɛbɔ bɛmaa Gyihova.+
12 “‘Saa abɔnkye a ɔfa yeabɔ afɔle a, ɛnee ɔbava yeara Gyihova anyunlu.
13 Ɔbava ɔ sa yeado ɔ ti zo, na bɛahu ye wɔ nyianu ɛdanlɛsua ne anyunlu, na ɔwɔ kɛ Aalɔn amra mrenyia ne mɔ kponde ye mogya ne wɔ afɔlemokyea ne anwo amuala.
14 Afɔlebɔdeɛ ne foa mɔɔ ɔbava yeara kɛ afɔle mɔɔ bɛva senle bɛbɔ bɛmaa Gyihova la a le ɔ kunlu ninyɛne ne anwo ɛnlome ne, anyalɛ ne anwo ɛnlome ne amuala,+
15 yɛɛ kilenzia nwiɔ ne mɔɔ kɔne ɔ nze zo la nee nwolɛ ɛnlome ne. Eza ɔbaye ɛbolɛ ne anwo ɛnlome ne yeaboka kilenzia ne anwo.
16 Ɛsɔfo ne bayela ye wɔ afɔlemokyea ne azo kɛ aleɛ,* ɔle afɔlebɔlɛ evuanlɛ mɔɔ ɔ nye die nwolɛ* mɔɔ bɛva senle bɛbɔ la. Ɛnlome ne amuala le Gyihova ɛdeɛ.+
17 “‘Ɔle mɛla mɔɔ wɔ ɛkɛ ne dahuu wɔ bɛ awolɛndoazo kɔsɔɔti anu wɔ ɛleka biala mɔɔ bɛkɛdɛnla la: Ɔnle kɛ bɛdi ɛnlome anzɛɛ mogya biala+ fee.’”
Ɔbodwɛkɛ
^ Hibulu aneɛ nu, “akunlu dwo nwolɛ.”
^ Hibulu aneɛ nu, “paano,” ɛhye kile, kɛ ɔle Nyamenle kyɛfoa ɛdeɛ wɔ anzodwolɛ afɔlebɔlɛ ne anu.
^ Hibulu aneɛ nu, “paano,” ɛhye kile, kɛ ɔle Nyamenle kyɛfoa ɛdeɛ wɔ anzodwolɛ afɔlebɔlɛ ne anu.
^ Hibulu aneɛ nu, “ɔ kunlu dwo nwolɛ.”
