Lɛvitikɔso 6:1-30
6 Gyihova doale zo zele Mosisi kɛ:
2 “Saa awie* yɛ ɛtane na yeanli nɔhalɛ yeammaa Gyihova,+ na ɔbɛlɛbɛla ɔ gɔnwo wɔ debie mɔɔ yeva yemaa ye kɛ ɔnlea zo,+ anzɛɛ yeva yewula ɔ sa nu la anwo, anzɛɛ ɔwua ɔ gɔnwo, anzɛɛ ɔsisi ye,
3 anzɛɛ ɔnwu debie mɔɔ ɛminli na ɔbɔ nwolɛ adalɛ, anzɛɛ ɔyɛ ɛtane ɛhye mɔ bie na ɔka nwolɛ ndane adalɛ a,+ mɔɔ ɔwɔ kɛ ɔyɛ la ɛne:
4 Saa ɔyɛ ɛtane na ɔdi nwolɛ fɔlɛ a, ɔwɔ kɛ ɔfa deɛ ne mɔɔ ɔwuale, ɔsisile awie ɔliele, deɛ ne mɔɔ bɛvale bɛwulale ɔ sa nu, anzɛɛ deɛ ne mɔɔ minlinle na ɔnwunle ye la ɔsia ɔkɔ,
5 anzɛɛ debie biala mɔɔ ɔhanle nwolɛ ndane adalɛ la, ɔwɔ kɛ ɔtua nwolɛ kakɛ ne amuala+ na ɔfa ye bolɛ ne ngyɛnu nnu anu ko ɔboka nwo. Ɔbava yeamaa ɔ menle wɔ kenle mɔɔ ye fɔlɛlilɛ ne bala ali la.
6 Na ɔbava boane nyinli mɔɔ te kpɔkɛ mɔɔ bɛli ye bolɛ la yearɛlɛ Gyihova kɛ ye fɔlɛlilɛ afɔlebɔdeɛ,+ na ɛsɔfo ne ava abɔ fɔlɛlilɛ afɔle.
7 Ɛsɔfo ne bali ɔ ti mgbɔdalɛ wɔ Gyihova anyunlu, na debie biala mɔɔ yeyɛ mɔɔ ɔdi nwolɛ fɔlɛ la, bɛbava bɛahyɛ ye.”+
8 Gyihova doale zo zele Mosisi kɛ:
9 “Ka kile Aalɔn nee ɔ mra mrenyia ne mɔ kɛ, ‘Ɛyelalɛ afɔlebɔlɛ ne+ anwo mɛla ɛne: Ɔwɔ kɛ ɛyelalɛ afɔlebɔdeɛ ne da afɔlemokyea ne senle ne azo nɔe ne too aleɛ kye, yɛɛ ɔwɔ kɛ senle ne kɔ zo sɔ wɔ afɔlemokyea ne azo.
10 Ɛsɔfo ne bawula ye lenen tɛladeɛ ne,+ na yeawula ye lenen nika*+ ne yeaheda ɔ nwo. Akee ɔbavula ɛyelalɛ afɔlebɔdeɛ ne mɔɔ senle ne ɛyela ye wɔ afɔlemokyea ne azo la nzonle* ne+ na yeava yeagua afɔlemokyea ne foa ko.
11 Akee ɔbaye ye adɛladeɛ ne mɔ+ na yeawula adɛladeɛ fofolɛ na yeava nzonle ne yeahɔ azokoɛleɛ ne anzi ɛleka mɔɔ le bɔkɔbɔkɔ la.+
12 Ɔwɔ kɛ senle ne kɔ zo sɔ wɔ afɔlemokyea ne azo. Ɔnle kɛ ɔnu. Ɔwɔ kɛ ɛsɔfo ne fa ɛyɛne+ gua zo nwonlomɔ biala na ɔfa ɛyelalɛ afɔlebɔdeɛ ne ɔto zo, na ɔkpu anzodwolɛ afɔlebɔdeɛ ne ɛnlome ne wɔ zolɛ.+
13 Ɔwɔ kɛ senle ne sɔ wɔ afɔlemokyea ne azo dahuu. Ɔnle kɛ ɔnu.
14 “‘Ma afɔlebɔlɛ ne anwo mɛla ɛne:+ Aalɔn amra mrenyia ne mɔ bava ara Gyihova anyunlu wɔ afɔlemokyea ne anyunlu.
15 Bɛ nuhua ko bavula esamo motoo ne mɔɔ nwole wɔ nu mɔɔ bɛfa bɛabɔ ma afɔle ne la ɔ sa ko nee ɛyɛlɛvuanlɛ ne mɔɔ boka ma afɔlebɔdeɛ ne anwo la amuala, na yeakpu ye wɔ afɔlemokyea ne azo kɛ ngakyelɛ afɔlebɔdeɛ* yeamaa Gyihova, afɔlebɔlɛ evuanlɛ mɔɔ ɔ nye die nwolɛ.*+
16 Aalɔn nee ɔ mra mrenyia ne mɔ bali mɔɔ ɛha la.+ Bɛbali ye kɛ paano mɔɔ mgbɔvonle ɛnle nu wɔ ɛleka mɔɔ le nwuanzanwuanza la. Bɛbali ye wɔ nyianu ɛdanlɛsua ne alienwo ɛkɛ.+
17 Ɔnle kɛ bɛfa mgbɔvonle biala bɛwula nuhua+ na bɛado. Meva memaa bɛ kɛ bɛ kyɛfoa ɛdeɛ wɔ afɔle mɔɔ bɛva senle bɛbɔ bɛmaa me la anu.+ Ɔle debie nwuanzanwuanza kpalɛ+ kɛ ɛtane afɔlebɔlɛ nee ɛyelalɛ afɔlebɔlɛ ne la.
18 Nrenyia biala mɔɔ boka Aalɔn abozoamra anwo la bali bie.+ Ɔle bɛ kyɛfoa mɔɔ wɔ ɛkɛ dahuu mɔɔ bɛbaye bɛavi afɔle mɔɔ bɛva senle bɛbɔ bɛmaa Gyihova la anu wɔ bɛ awolɛndoazo kɔsɔɔti anu a.+ Debie biala mɔɔ anwo baha ye* la bayɛ nwuanzanwuanza.’”
19 Gyihova zele Mosisi bieko kɛ:
20 “Afɔle mɔɔ Aalɔn nee ɔ mra mrenyia ne mɔ babɔ amaa Gyihova wɔ kenle mɔɔ bɛbakpokpa ye+ la ɛne: bɛbava esamo motoo yifa ngyɛnu bulu anu ko*+ bɛabɔ ma afɔle dahuu,+ bɛbava foa ko bɛabɔ afɔle nwonlomɔ na bɛava foa ko ne bɛabɔ afɔle nɔsolɛ.
21 Bɛbava nwole bɛafete na bɛado ye wɔ kyɛnze ɛdɛbaa nu.+ Bɛbabubu ye ngyikyi ngyikyi na bɛava nwole bɛafɔtɔ ye kpalɛ na bɛava ma afɔlebɔdeɛ ne mɔɔ bɛdo la bɛara kɛ debie evuanlɛ mɔɔ Gyihova anye die nwolɛ* la.
22 Ɔ mra ne mɔ ko mɔɔ bɛbakpokpa ye kɛ ɛsɔfo bɛamaa yeali ye agya+ la babɔ afɔle ne. Ɔle mɛla mɔɔ wɔ ɛkɛ ne dahuu: Bɛbakpu afɔlebɔdeɛ ne amuala bɛamaa Gyihova.
23 Ɔwɔ kɛ bɛyela ma afɔle biala mɔɔ ɛsɔfo ne babɔ la amuala. Ɔnle kɛ bɛdi.”
24 Gyihova zele Mosisi bieko kɛ:
25 “Ka kile Aalɔn nee ɔ mra mrenyia ne mɔ kɛ, ‘Ɛtane afɔlebɔlɛ+ ne anwo mɛla ɛne: Ɛleka mɔɔ bɛbahu ɛyelalɛ afɔlebɔdeɛ ne la,+ ɛkɛ ne a ɔwɔ kɛ bɛku ɛtane afɔlebɔdeɛ ne wɔ Gyihova anyunlu a. Ɔle debie nwuanzanwuanza kpalɛ.
26 Ɛsɔfo ne mɔɔ babɔ afɔle ne la a bali a.+ Ɔbali ye wɔ ɛleka mɔɔ le nwuanzanwuanza la, wɔ nyianu ɛdanlɛsua ne alienwo ɛkɛ.+
27 “‘Debie biala mɔɔ anwo kɛha ye nane ne la bayɛ nwuanzanwuanza, na saa awie fa ye mogya ne bie kponde ye tɛladeɛ nu a, ɔwɔ kɛ bɛkpo deɛ ne mɔɔ mogya ne kpondenle nu la wɔ ɛleka mɔɔ le nwuanzanwuanza la.
28 Buakɛ mɔɔ bɛkɛdo ye nu la, ɔwɔ kɛ bɛbɔ ye. Noko saa bɛto ye wɔ kɔbele kyɛnze nu a, ɛnee ɔwɔ kɛ bɛtwi kyɛnze ne anu na bɛfa nzule bɛwowo nu.
29 “‘Nrenyia biala mɔɔ boka ɛsɔfo ne mɔ anwo la bali bie.+ Ɔle debie nwuanzanwuanza kpalɛ.+
30 Noko saa bɛbɔ ɛtane afɔle na bɛfa ye mogya ne bie bɛba nyianu ɛdanlɛsua ne anu kɛ bɛfa bɛali mgbɔdalɛ wɔ nwuanzanwuanza ɛleka ne+ a, ɔnle kɛ bɛdi bie. Ɔwɔ kɛ bɛfa senle bɛyela ye.
Ɔbodwɛkɛ
^ Anzɛɛ “ɛkɛla bie.”
^ Anzɛɛ “ɛnlome nzonle,” ɛhye kile, nzonle mɔɔ nane mɔɔ bɛva bɛbɔ afɔle la ɛnlome ɛfonla ye la.
^ Anzɛɛ “aze adɛladeɛ.”
^ Anzɛɛ “foa mɔɔ gyi ɛkɛ ne maa afɔlebɔlɛ ne amuala.”
^ Hibulu aneɛ nu, “ɔ kunlu dwo nwolɛ.”
^ Anzɛɛ “afɔlebɔdeɛ ne.”
^ Hibulu aneɛ nu, “akunlu dwo nwolɛ.”
