Nɔmbɛse 20:1-29
20 Siane ne mɔɔ limoa la anu, Yizilayɛma kɔsɔɔti rale Zen fienemgbole ne anu, na menli ne dɛnlanle Keedɛhye.+ Ɛkɛ ne a Meleam+ wule na bɛziele ye a.
2 Ɛnee menli ne ɛnnyia nzule,+ na bɛboɔboale bɛ nloa bɛdwazole bɛtiale Mosisi nee Aalɔn.
3 Menli ne nee Mosisi lile butule+ na bɛhanle kɛ: “Saa yɛwule wɔ mekɛ mɔɔ yɛ mediema ne mɔ wule Gyihova anyunlu la a, anrɛɛ ɔle kpalɛ!
4 Duzu ati a bɛva Gyihova menli ne bɛra fienemgbole ye anu kɛ yɛ nee yɛ nyɛmoa ɛrawu ɛgua ɛke ɛ?+
5 Duzu ati a bɛye yɛ bɛvi Yigyibiti bɛra munzule ɛleka ɛhye a?+ Ɔnle ɛleka mɔɔ bɛdua ma nee feege nee vanye yɛɛ pɔmegelanate a, yɛɛ yɛnnyia nzule yɛnno.”+
6 Akee Mosisi nee Aalɔn vile menli ne anyunlu na bɛrale nyianu ɛdanlɛsua ne anuhɔlɛ na bɛbutubutule bɛ nyunlu aze, na Gyihova anyunlunyia ne dale bɛ nwo zo.+
7 Akee Gyihova zele Mosisi kɛ:
8 “Fa kpɔma ne na ɛ nee ɛ diema Aalɔn ɛboɔboa menli ne anloa na tendɛ kile bodane ne wɔ bɛ nyunlu ɛkɛ ne na nzule vi nu bara, na wɔanyia nzule wɔavi bodane ne anu wɔamaa menli ne nee bɛ nyɛmoa anlo.”+
9 Ɔti Mosisi vale kpɔma ne wɔ Gyihova anyunlu+ kɛ mɔɔ ɔhanle ɔhilele ye la.
10 Akee Mosisi nee Aalɔn vɛlɛle menli ne maanle bɛrayiale bodane ne anyunlu na ɔzele bɛ kɛ: “Bɛmɛ atuadelɛma, bɛdie! Yɛmaa nzule ɛvi bodane ɛhye anu ɛrɛla ɛmaa bɛ ɔ?”+
11 Akee Mosisi maanle ɔ sa zo na ɔvale ye kpɔma ne ɔbɔle bodane ne fane nwiɔ, na nzule dɔɔnwo vi nu rale, na menli ne nee bɛ nyɛmoa nlonle bie.+
12 Nzinlii Gyihova zele Mosisi nee Aalɔn kɛ: “Kɛmɔ bɛannyia diedi wɔ me nu na bɛanyɛ me nwuanzanwuanza wɔ Yizilayɛma anyunlu la ati, bɛnrɛva menli ɛhye mɔ bɛnrɛhɔ azɛlɛ ne mɔɔ mebava meamaa bɛ la azo.”+
13 Mɛleba* nzule ne+ ɛne, ɛleka mɔɔ Yizilayɛma nee Gyihova lile butule na ɔyɛle ɔ nwo nwuanzanwuanza wɔ bɛ avinli la.
14 Akee Mosisi zoanle menli maanle bɛvile Keedɛhye bɛhɔzele Yidɔm belemgbunli ne+ kɛ: “Edwɛkɛ mɔɔ ɛ diema Yizilayɛ+ ɛha la ɛne, ‘Ɛdawɔ ɛze amaneɛ kɔsɔɔti mɔɔ yɛnwu ye la.
15 Yɛ papa mɔ hɔle Yigyibiti+ na yɛdɛnlanle Yigyibiti ɛvolɛ* dɔɔnwo,+ na Yigyibitima hilele yɛdayɛ nee yɛ papa mɔ nyane.+
16 Akee yɛzunle yɛvɛlɛle Gyihova,+ na ɔdiele yɛ na ɔzoanle anwumabɔvolɛ+ ɔmaanle ɔrayele yɛ ɔvile Yigyibiti, na kɛkala yɛradwu Keedɛhye, suakpole mɔɔ wɔ wɔ azɛlɛ ne ɛweɛne zo la.
17 Yɛsɛlɛ wɔ, maa yɛlua wɔ azɛlɛ ne azo. Yɛnrɛlua wɔ ɛya anzɛɛ vanye egyinli biala anu, yɛɛ yɛnrɛnlo wɔ bula biala anu nzule. Yɛbalua Belemgbunli Adenle ne azo, yɛnrɛmakyi fema zo anzɛɛ bɛne zo kɔkpula kɛ yɛbapɛ nu wɔ wɔ azɛlɛ ne azo la.’”+
18 Noko Yidɔm belemgbunli ne zele ye kɛ: “Mmafa yɛ azɛlɛ ne azo. Saa ɛfa ɛkɛ a, mebava konle dadeɛ mearayia wɔ.”
19 Na Yizilayɛma zele ye kɛ: “Yɛbava ademgbole ne azo yɛapɛ nu, na saa yɛdayɛ anzɛɛ yɛ nyɛmoa no wɔ nzule a, yɛbadua.+ Wɔ azɛlɛ ne azo ala a yɛkulo kɛ yɛdua a.”+
20 Noko ɔhanle ɔzile zolɛ kɛ: “Mmafa ɛkɛ.”+ Na Yidɔm belemgbunli ne vale menli dɔɔnwo nee ɛlɔne* mɔɔ anwo yɛ se la rayiale ye.
21 Yemɔti Yidɔm belemgbunli ne ammaa Yizilayɛ anlua ye azɛlɛ ne azo; ɛhye ati Yizilayɛ vile ɔ nwo ɛkɛ ne hɔle.+
22 Yizilayɛma amuala vile Keedɛhye na bɛrale Hɔɔ Boka+ ne anwo.
23 Akee Gyihova zele Mosisi nee Aalɔn wɔ Hɔɔ Boka ne mɔɔ wɔ Yidɔm azɛlɛ ne ɛweɛne zo la anwo kɛ:
24 “Bɛbazie Aalɔn kɛ ye menli ne la.*+ Ɔnrɛhɔ azɛlɛ ne mɔɔ mebava meamaa Yizilayɛma la azo, ɔluakɛ bɛ mu nwiɔ bɛdele atua wɔ Mɛleba nzule ne anwo edwɛkɛ ne mɔɔ menganle la anwo.+
25 Fa Aalɔn nee ɔ ra Ɛlieza bɛla Hɔɔ Boka ne azo.
26 Yeye Aalɔn ɛsɔfo adɛladeɛ+ ne fa wula ɔ ra Ɛlieza,+ na Aalɔn bawu wɔ ɛkɛ.”*
27 Yemɔti Mosisi yɛle mɔɔ Gyihova hanle la, na bɛvole Hɔɔ Boka ne wɔ Yizilayɛma kɔsɔɔti anye zo.
28 Akee Mosisi yeyele Aalɔn ɛsɔfo adɛladeɛ ne na ɔvale ɔwulale ɔ ra Ɛlieza. Na Aalɔn wule wɔ boka ne azo.+ Akee Mosisi nee Ɛlieza vi boka ne azo dwule aze.
29 Mɔɔ menli ne amuala nwunle kɛ Aalɔn ɛwu la, Yizilayɛma amuala zunle Aalɔn too kenle 30.+
Ɔbodwɛkɛ
^ Ɔ bo kile “Butulelilɛ.”
^ Hibulu aneɛ nu, “kenle.”
^ Hibulu aneɛ nu, “ɛsalɛ.”
^ Edwɛkɛ ɛhye kile kɛ ɔbawu.
^ Anzɛɛ “bawu ɛkɛ na bɛava ye bɛahɔboka ye menli ne anwo.”
