Nɔmbɛse 6:1-27
6 Gyihova zele Mosisi bieko kɛ:
2 “Ka kile Yizilayɛma kɛ, ‘Saa nrenyia anzɛɛ raalɛ bɔ ɛwɔkɛ titili kɛ ɔbayɛ Nazalaenli*+ yeamaa Gyihova a,
3 ɔwɔ kɛ ɔtwe ɔ nwo ɔfi nwanye nee nza biala anwo. Ɔnle kɛ ɔno nwanye mɔɔ nyinyia anzɛɛ nza biala mɔɔ nyinyia la.+ Ɔnle kɛ ɔno debie biala mɔɔ bɛva vanye ma bɛyɛ la, yɛɛ ɔnle kɛ ɔdi vanye ma amolɛ anzɛɛ welera.
4 Mekɛ ala mɔɔ ɔle Nazalaenli la, ɔnle kɛ ɔdi debie biala mɔɔ bɛva vanye ma bɛyɛ la, vanye ma amunli anzɛɛ ye abonle ne bɔbɔ.
5 “‘Mekɛ ala mɔɔ ye Nazalaenli ɛwɔkɛ ne tɛbɔ ɛkɛ la, ɔnle kɛ biledi* ka ɔ ti.+ Ɔwɔ kɛ ɔmaa ɔ ti enrinli ne fi na ɔyɛ nwuanzanwuanza kɔkpula kɛ mekɛ mɔɔ yedu ɔ nwo yemaa Gyihova la bara awieleɛ.
6 Mekɛ mɔɔ yedu ɔ nwo yemaa Gyihova la amuala anu, ɔnle kɛ ɔkɔ* funli* nwo.
7 Saa ye papa anzɛɛ ye mame anzɛɛ ɔ diema nrenyia anzɛɛ ɔ diema raalɛ bɔbɔ wu a, ɔnle kɛ ɔmaa ɔgua ɔ nwo evinli,+ ɔluakɛ sɛkɛlɛneɛ mɔɔ kile kɛ ɔle Nazalaenli ɔmaa ye Nyamenle ne la wɔ ɔ ti zo.
8 “‘Mekɛ ala mɔɔ ɔle Nazalaenli la, ɔle nwuanzanwuanza ɔmaa Gyihova.
9 Noko saa arɛlevilɛ nu ala awie wu ɔ nwo ɛkɛ+ na ɔmaa ye enrinli ne mɔɔ kile kɛ yedu ɔ nwo yemaa Nyamenle la* anwo gua evinli a, ɔwɔ kɛ ɔkpa ɔ ti enrinli ne+ wɔ kenle mɔɔ ɔbade ɔ nwo la. Ɔwɔ kɛ ɔkpa ye enrinli ne wɔ kenle nsuu ne azo.
10 Kenle mɔtwɛ ne azo, ɔwɔ kɛ ɔfa abubule nwiɔ anzɛɛ mɔlɔnoma mralɛ nwiɔ ɔkɔmaa ɛsɔfo ne wɔ nyianu ɛdanlɛsua ne anuhɔlɛ.
11 Ɛsɔfo ne bava ko abɔ ɛtane afɔle na yeava ko noko yeabɔ ɛyelalɛ afɔle na yeali ɛtane mɔɔ ɔyɛle wɔ funli ne anwo la ati mgbɔdalɛ yeamaa ye.+ Akee ɔwɔ kɛ ɔte ɔ ti enrinli ne anwo wɔ kenle ko ne ala.
12 Eza ɔwɔ kɛ ɔtu ɔ nwo ɔmaa Gyihova bieko kɛ Nazalaenli la, na ɔfa boaneralɛ nyinli mɔɔ ɛli ɛvolɛ ko la ɔbabɔ fɔlɛlilɛ afɔle. Noko bɛnrɛdia mekɛ ne mɔɔ ɛpɛ nu la, ɔluakɛ ɔguale Nazalaenli mɔɔ ɛnee ɔde la anwo evinli.
13 “‘Mɛla mɔɔ wɔ ɛkɛ ne maa Nazalaenli la ɛne: Saa mekɛ mɔɔ ɔfa yeayɛ Nazalaenli la wie a,+ bɛbava ye bɛahɔ nyianu ɛdanlɛsua ne anuhɔlɛ.
14 Ɔbava ye afɔlebɔdeɛ yearɛlɛ Gyihova wɔ ɛkɛ ne: ɔbava boaneralɛ nyinli mɔɔ ɛli ɛvolɛ ko na ɔte kpɔkɛ la yeara kɛ ɛyelalɛ afɔlebɔdeɛ,+ ɔbava boaneralɛ belɛ mɔɔ ɛli ɛvolɛ ko la yeara kɛ ɛtane afɔlebɔdeɛ,+ ɔbava boane nyinli mɔɔ te kpɔkɛ la yeara kɛ anzodwolɛ afɔlebɔdeɛ,+
15 paano mɔɔ mgbɔvonle ɛnle nu mɔɔ bɛva nwole bɛfete na bɛbɔ ye kɛ ngɛba la kɛndɛne ko, paano ndɛbandɛba mɔɔ mgbɔvonle ɛnle nu mɔɔ bɛva nwole bɛha ɔ nyunlu la yɛɛ nwolɛ ma afɔlebɔdeɛ+ nee nza afɔlebɔdeɛ.+
16 Ɛsɔfo ne bava ahɔ Gyihova anyunlu na yeabɔ ye ɛtane afɔle nee ye ɛyelalɛ afɔle ne.
17 Ɔbava boane nyinli ne nee paano mɔɔ mgbɔvonle ɛnle nu la kɛndɛne ko ne yeabɔ anzodwolɛ afɔle yeamaa Gyihova, na yeabɔ ye ma+ nee ye nza afɔle ne.
18 “‘Akee Nazalaenli ne bakpa ɔ ti enrinli ne+ wɔ nyianu ɛdanlɛsua ne anuhɔlɛ, na ɔbava ɔ ti enrinli ne mɔɔ ɔmaanle ɔvile wɔ mekɛ mɔɔ ɔle Nazalaenli la yeagua senle ne mɔɔ wɔ anzodwolɛ afɔlebɔdeɛ ne abo la anu.
19 Saa Nazalaenli ne maa bɛkpa sɛkɛlɛneɛ mɔɔ kile kɛ ɔle Nazalaenli la bɛwie a, ɛsɔfo ne baye boane nyinli ne awane ko mɔɔ bɛdo,+ paano mɔɔ mgbɔvonle ɛnle nu mɔɔ bɛbɔ ye kɛ ngɛba la ko avi kɛndɛne ne anu yɛɛ paano ndɛbandɛba mɔɔ mgbɔvonle ɛnle nu la ko, na yeava yeagua ɔ sa nu.
20 Akee ɛsɔfo ne bado ye ehono kɛ ehono afɔlebɔlɛ wɔ Gyihova anyunlu.+ Ɔ nee ehono afɔlebɔdeɛ ne akɛnra ne yɛɛ ɔ gyakɛ ne mɔɔ bɛva bɛyɛ ndoboa la le debie nwuanzanwuanza maa ɛsɔfo ne.+ Akee Nazalaenli ne bahola anlo nwanye.
21 “‘Nazalaenli+ mɔɔ kɛbɔ ɛwɔkɛ la anwo mɛla ɛne: Saa ɔbɔ ɛwɔkɛ na ɔbahola yeabɔ afɔle yeamaa Gyihova yeamaa yeadɛla mɔɔ ɔwɔ kɛ Nazalaema bɔ la a, ɛnee ɔwɔ kɛ ɔdi ye ɛwɔkɛ ne azo kɛ mɔɔ Nazalaema mɛla ne kile la.’”
22 Akee Gyihova zele Mosisi kɛ:
23 “Ka kile Aalɔn nee ɔ mra mrenyia ne mɔ kɛ, ‘Kɛ ɔwɔ kɛ bɛyila+ Yizilayɛma la ɛne. Bɛha bɛhile bɛ kɛ:
24 “Gyihova ɛyila bɛ+ na ɔbɔ bɛ nwo bane.
25 Gyihova ɛmaa ɔ nyunlu wienyi ne ɛda bɛ nwo zo+ na ɔlo bɛ.
26 Gyihova ɛkpogya ɔ nye zo ɛnlea bɛ na ɔmaa bɛ anzodwolɛ.”’+
27 Na bɛva me duma bɛdo Yizilayɛma anwo zo,+ na menyila bɛ.”+
Ɔbodwɛkɛ
^ Hibulu edwɛkɛkpɔkɛ na·zir′, abo kile “Awie Mɔɔ Bɛye Ye Bɛzie Ahane; Awie Mɔɔ Ɛyila Ɔ Nwo Zo; Awie Mɔɔ Bɛdu Ye Bɛzie Ɛkɛ.”
^ Anzɛɛ “dadeɛ dɛma.”
^ Anzɛɛ “ɔbikye.”
^ Anzɛɛ “ɛkɛla mɔɔ ɛwu.” Nea Edwɛkɛbohilelɛ.
^ Anzɛɛ “ɔmaa ye enrinli ne mɔɔ kile kɛ ɔle Nazalaenli la.”
