Ndɛnebuavolɛma 20:1-48
-
Bɛvale konle bɛdoale Bɛngyamanema (1-48)
20 Akee Yizilayɛma kɔsɔɔti, ɔvi Dan+ mɔɔ kɔ Biyɛ-hyiba yɛɛ Geleade azɛlɛ zo+ la bɔle nu* rayiale Gyihova anyunlu wɔ Mezepa.+
2 Ɔti menli ne mgbanyima ne mɔ nee Yizilayɛ mbusua ne mɔ kɔsɔɔti rale Nyamenle menli ne ayia ne bie—sogyama 400,000 mɔɔ dua aze mɔɔ bɛdedɛ konle dadeɛ la.+
3 Bɛngyamanema dele kɛ Yizilayɛma ɛhɔ Mezepa.
Akee Yizilayɛma hanle kɛ: “Bɛha bɛhile yɛ, kɛ ɔyɛle mɔɔ amumuyɛ debie zɛhae zile ɛ?”+
4 Ɔti Livae nrenyia ne,+ mɔɔ le raalɛ ne mɔɔ bɛhunle ye la ahu ne hanle kɛ: “Me nee me nwewe* ne hɔle Gebeya+ mɔɔ wɔ Bɛngyaman la kɛ yɛkala ɛkɛ ne nɔe ne.
5 Na menli* mɔɔ wɔ Gebeya la dwazole rale me nwo zo nɔsolɛ nu na bɛbɛngale sua ne bɛyiale. Bɛyɛle bɛ adwenle kɛ bɛku me, noko bɛ nee me nwewe ne lale too ɔwule.+
6 Yemɔti menvale me nwewe ne funli ne na mempepɛle nuhua azinli menvale mengɔle Yizilayɛ azɛlɛ ne ɛleka biala,+ ɔluakɛ bɛbɔ ɛbɛla mɔɔ yɛ nyiane nee anyiemgba la wɔ Yizilayɛ.
7 Bɛmɛ Yizilayɛma kɔsɔɔti, bɛhile bɛ adwenle na bɛdu nwolɛ folɛ.”+
8 Akee menli ne amuala bɔle nu dwazole* na bɛhanle kɛ: “Yɛ nuhua ko biala ɛnrɛhɔ ye ɛdanlɛsua nu anzɛɛ ɛnrɛzia ɛnrɛhɔ ye sua nu.
9 Mɔɔ yɛbava yɛayɛ Gebeya la ɛne: Yɛbagua ma* na yɛahɔ ɔ nwo zo.+
10 Yɛbaye mrenyia 10 yɛavi mrenyia 100 mɔɔ wɔ Yizilayɛ mbusua kɔsɔɔti anu la anu, na yɛaye 100 yɛavi menli 1,000 anu na yɛaye 1,000 yɛavi menli 10,000 anu na bɛava aleɛ bɛahɔmaa ɛlɔne ne amaa bɛahɔ Gebeya mɔɔ wɔ Bɛngyaman la anwo zo, ɔlua anyiemgba ɛbɛla mɔɔ bɛbɔ wɔ Yizilayɛ la ati.”
11 Ɔti mrenyia mɔɔ wɔ Yizilayɛ la kɔsɔɔti boɔboale bɛ nloa yɛle ko* na bɛhonle bɛtiale suakpole ne.
12 Akee Yizilayɛ mbusua ne mɔ zoanle menli maanle bɛhɔle Bɛngyamanema ɛkɛ na bɛhanle kɛ: “Amumuyɛ debie boni a ɛzi wɔ bɛ avinli la a?
13 Bɛye sonlamgbanema ne mɔ mɔɔ wɔ Gebeya+ la bɛmaa yɛ amaa yɛahu bɛ na yɛadu ɛtane bo wɔ Yizilayɛ.”+ Noko Bɛngyamanema andie bɛ mediema Yizilayɛma.
14 Akee Bɛngyamanema boɔboale bɛ nloa vile azuamgbole ne mɔ azo hɔle Gebeya kɛ bɛkɔ na bɛ nee Yizilayɛma ahɔho.
15 Kenle zɔhane, Bɛngyamanema boɔboale mrenyia 26,000 mɔɔ bɛdedɛ konle dadeɛ la anloa vile bɛ azuamgbole ne mɔ azo bɛrabokale menli 700 ne mɔɔ bɛkpale bɛ bɛvile Gebeya la anwo.
16 Wɔ ɛlɔne ɛhye anu, mrenyia 700 mɔɔ bɛkpale bɛ la asa le bɛne. Mrenyia ɛhye mɔ anu ko biala kola to bolɛ bɔ enrinli ko mɔɔ henda ɛkɛ mɔɔ ɔnvo a.
17 Saa ɛye Bɛngyamanema ɛsie ahane a, Yizilayɛma boɔboale mrenyia 400,000 mɔɔ dedɛ konle dadeɛ la anloa,+ na ɛnee bɛ nuhua ko biala ze konle nye zo.
18 Bɛhɔle Bɛtɛle kɛ bɛkabiza adehilelɛ bɛavi Nyamenle ɛkɛ.+ Akee Yizilayɛma bizale kɛ: “Yɛ nuhua boni a ɔwɔ kɛ ɔdimoa ɔmaa yɛko yɛtia Bɛngyamanema a?” Gyihova buale kɛ: “Dwuda a ɔwɔ kɛ ɔdimoa a.”
19 Ɛhye anzi Yizilayɛma dwazole nwonlomɔ ne na bɛhɔyɛle bɛ azokoɛleɛ kɛ bɛkɔ Gebeya anwo zo.
20 Akee Yizilayɛma hɔle kɛ bɛ nee Bɛngyamanema kaho; bɛhyehyɛle bɛ nwo bɛvale konle ne bɛhɔyiale bɛ wɔ Gebeya.
21 Ɔti Bɛngyamanema vi Gebeya rahunle Yizilayɛma 22,000 wɔ kenle zɔhane.
22 Noko Yizilayɛ ɛlɔne ne lale akɛnrasesebɛ ali na bɛhyehyɛle bɛ nwo bɛmaanle konle ne bieko wɔ ɛleka ko ne ala kɛ mɔɔ bɛyɛle ye wɔ kenle mɔɔ limoa la.
23 Akee Yizilayɛma hɔzunle wɔ Gyihova anyunlu too nɔsolɛ nu na bɛbizale Gyihova kɛ: “Yɛzia yɛ nee yɛ mediema Bɛngyamanema ɛhɔho bieko ɔ?”+ Na Gyihova hanle kɛ: “Bɛhɔ bɛ nwo zo.”
24 Ɔti Yizilayɛma hwenle bikyele Bɛngyamanema wɔ kenle mɔɔ tɔ zolɛ nwiɔ la azo.
25 Na Bɛngyamanema vi Gebeya rayiale bɛ wɔ kenle mɔɔ tɔ zolɛ nwiɔ la azo na eza bɛhunle Yizilayɛ mrenyia 18,000+ mɔɔ bɛ muala bɛdedɛ konle dadeɛ la.
26 Ɔti Yizilayɛma kɔsɔɔti hɔle Bɛtɛle. Bɛdɛnlɛdɛnlanle ɛkɛ ne na bɛzunle wɔ Gyihova anyunlu;+ bɛhyele ɛhɔne+ wɔ kenle zɔhane too nɔsolɛ nu na bɛbɔle ɛyelalɛ afɔle+ nee anzodwolɛ afɔle+ wɔ Gyihova anyunlu.
27 Ɛhye anzi, Yizilayɛma bizale adehilelɛ vile Gyihova ɛkɛ,+ ɔluakɛ ɛnee nɔhalɛ Nyamenle ne ngyekyeleɛ ɛlɛka ne wɔ ɛkɛ ne wɔ mekɛ zɔhane.
28 Ɛnee Aalɔn ara Ɛlieza ara Fenɛhaze+ a ɛlɛsonle wɔ* ngyekyeleɛ ɛlɛka ne anyunlu wɔ zɔhane mekɛ ne a. Bɛbizale kɛ: “Ɔwɔ kɛ yɛ nee yɛ mediema Bɛngyamanema kɔko bieko anzɛɛ yɛgyakyi ɔ?”+ Gyihova buale kɛ: “Bɛhɔ, ɔluakɛ ɛhyema mebava bɛ meawula bɛ sa nu.”
29 Akee Yizilayɛma maanle menli hɔbule ziale+ Gebeya anwo amuala.
30 Yizilayɛma hɔle Bɛngyamanema anwo zo wɔ kenle ne mɔɔ tɔ zolɛ nsa la azo, na bɛboɔboale bɛ nloa kɛ bɛ nee Gebeyama kaho kɛ mɔɔ bɛyɛ ye dɛba la.+
31 Mekɛ mɔɔ Bɛngyamanema ne vindele kɛ bɛkayia ɛlɔne ne la, bɛhwenle bɛ bɛvile suakpole ne azo.+ Akee kɛ mɔɔ bɛyɛ ye dɛba la, bɛbɔle ɔ bo bɛhunle mrenyia mɔɔ lua ademgbole ne mɔ mɔɔ ko kɔ Bɛtɛle na ko kɔ Gebeya la azo la bie mɔ, bɛhunle Yizilayɛ mrenyia kɛyɛ 30 bɛguale ɛkɛ.+
32 Ɔti Bɛngyamanema ne hanle kɛ: “Bɛlɛte bɛagua yɛ nyunlu kɛ mɔɔ bɛyɛle ye dɛba la.”+ Noko Yizilayɛma hanle kɛ: “Yɛbazia yɛ nzi na yɛahwe bɛ yɛavi sua ne azo yɛahɔ ademgbole ne mɔ azo.”
33 Ɔti Yizilayɛma vi ɛleka mɔɔ bɛwɔ la vindele na bɛboɔboale bɛ nloa bɛmaanle konle ne wɔ Beeyale-teemaa; mekɛ zɔhane, Yizilayɛma mɔɔ hɔbule ziale Gebeya anwo amuala la vindele.
34 Yemɔti mrenyia 10,000 ne mɔɔ bɛkpale bɛ bɛvile Yizilayɛma amuala anu la ragyinlanle Gebeya anyunlu, na konle ne anu yɛle se. Noko ɛnee Bɛngyamanema ɛnze kɛ esiane ɛlɛba arado bɛ.
35 Gyihova lile Bɛngyamanema anwo zo konim+ wɔ Yizilayɛma anyunlu, na kenle ko zɔhane Yizilayɛma hunle Bɛngyamanema 25,100 mɔɔ bɛ muala bɛdedɛ konle dadeɛ la.+
36 Noko Bɛngyamanema zuzule kɛ bɛbali Yizilayɛma anwo zo konim wɔ mekɛ mɔɔ bɛnriandile bɛvile Bɛngyamanema anyunlu la,+ noko Yizilayɛma nriandile ɔluakɛ ɛnee bɛlɛ anwodozo wɔ menli mɔɔ ɛlɛdi busia wɔ Gebeya anwo la anu.+
37 Busiama ne yɛle ye ndɛndɛ na bɛhɔle Gebeyama anwo zo. Akee bɛdele bɛkpondenle suakpole ne azo na bɛvale konle dadeɛ bɛhunle bɛ muala.
38 Mrenyia mɔɔ wɔ Yizilayɛ la yɛle ngyehyɛleɛ kɛ mrenyia mɔɔ hɔlile busia wɔ sua ne azo la bado senle wɔ ɛkɛ bɛamaa yeakpu esike bɛava bɛayɛ sɛkɛlɛneɛ.
39 Mekɛ mɔɔ Yizilayɛma ziale bɛ nzi la, Bɛngyamanema bɔle ɔ bo hunle Yizilayɛ mrenyia kɛyɛ 30+ na bɛhanle kɛ: “Ɔda ali wienyi kɛ eza bɛlɛte bɛagua yɛ nyunlu bieko kɛ mɔɔ konle ne mɔɔ limoa la yɛle la.”+
40 Noko esike sɛkɛlɛneɛ ne bɔle ɔ bo kɛ ɔfo yeahɔ anwuma wɔ suakpole ne azo kɛ esike pila. Mekɛ mɔɔ Bɛngyamanema dole bɛ nye bɛ nzi la, bɛnwunle kɛ senle mɔɔ la suakpole ne azo la ɛlɛsɔ ahɔ anwomanyunlu.
41 Akee Yizilayɛma hakyile bɛ nye, na ɛzulolɛ hanle Bɛngyamanema ɔluakɛ bɛnwunle kɛ esiane ɛdo bɛ.
42 Bɛziale bɛ nzi bɛvile Yizilayɛma anyunlu bɛhɔle fienemgbole ne anu, noko bɛvale konle ne bɛdoale bɛ; mrenyia mɔɔ vi suakpole ne azo ɛlɛba la hɔbokale bɛ nwo maanle bɛhunle bɛ.
43 Bɛbɔle Bɛngyamanema anwo bɛyiale na bɛdoale bɛ ndinlizo. Bɛlile bɛ nwo zo konim wɔ Gebeya anyunlu ɛkɛ, wɔ aduduleɛ afoa nu.
44 Yemɔti Bɛngyamanema 18,000 mɔɔ bɛle konle nu katakyiema la amuala wule.+
45 Bɛngyamanema ziale bɛ nzi na bɛnriandile bɛhɔle Relemɔn bodane ne azo+ wɔ fienemgbole ne anu, na Yizilayɛma hunle bɛ nuhua* 5,000 wɔ ademgbole ne mɔ azo, na bɛdoale bɛ too bɛhɔdwule Gaedɔm; ɔti bɛhunle bɛ nuhua 2,000 bɛbokale nwolɛ.
46 Bɛngyamanema mɔɔ wule kenle zɔhane la dodo le 25,000, bɛle mrenyia mɔɔ dedɛ konle dadeɛ+ na bɛle konle nu katakyiema la.
47 Noko bɛ nuhua 600 nriandile hɔle Relemɔn bodane ne azo wɔ fienemgbole ne anu, na bɛdɛnlanle Relemɔn bodane ne azo too siane nna.
48 Yizilayɛma ziale hɔle Bɛngyamanema anwo zo na bɛvale konle dadeɛ bɛhunle menli nee nyɛmoa mɔɔ ɛha suakpole ne azo la amuala. Eza bɛdole senle wɔ azua mɔɔ bɛnwunle bɛ wɔ adenle nu la amuala azo.
Ɔbodwɛkɛ
^ Hibulu aneɛ nu, “yɛle kɛ sonla ko.”
^ Anzɛɛ ɔkola ɔkile, “azɛlɛ menlema.”
^ Hibulu aneɛ nu, “dwazole kɛ sonla ko.”
^ Nea Edwɛkɛbohilelɛ.
^ Hibulu aneɛ nu, “kɛ sonla ko.”
^ Hibulu aneɛ nu, “gyi.”
^ Hibulu aneɛ nu, “sesale bɛ bo zo.”
