Yizikeɛle 14:1-23
14 Na Yizilayɛ mgbanyima bie mɔ radɛnlanle aze wɔ me nyunlu ɛkɛ.+
2 Akee Gyihova nee me dendɛle kɛ:
3 “Sonla ra, menli ɛhye mɔ ɛbɔ kpɔkɛ kɛ bɛdi bɛ kyibadeɛ ananze* ne mɔ anzi, yɛɛ bɛva azedolɛ bolɛ mɔɔ maa menli yɛ ɛtane la bɛzie ɛkɛ. Asoo ɔwɔ kɛ memaa adenle memaa bɛbiza me edwɛkɛ ɔ?+
4 Akee ɛ nee bɛ ɛdendɛ na ka kile bɛ kɛ, ‘Mɔɔ Tumivolɛ Awulae Gyihova ɛha la ɛne: “Saa Yizilayɛnli bie bɔ kpɔkɛ kɛ ɔdi ye kyibadeɛ ananze ne mɔ anzi na ɔfa azedolɛ bolɛ mɔɔ maa menli yɛ ɛtane la ɔsie ɛkɛ na akee ɔbabiza edwɛkɛ wɔ ngapezonli bie ɛkɛ a, medame Gyihova mebabua ye kɛnlɛma kɛ mɔɔ ye kyibadeɛ ananze ne mɔ dɔɔnwo ne de la.
5 Na mebamaa Yizilayɛma ahonle adu* ɔluakɛ bɛ muala bɛhwe bɛ nwo bɛvi me nwo na bɛhɔli bɛ kyibadeɛ ananze ne mɔ anzi.”’+
6 “Ɔti ka kile Yizilayɛma kɛ, ‘Mɔɔ Tumivolɛ Awulae Gyihova ɛha la ɛne: “Bɛzia bɛ nzi na bɛhwe bɛ nwo bɛvi bɛ kyibadeɛ ananze ne mɔ anwo na bɛhakyi bɛ nye bɛvi bɛ bɛkyi nyɛleɛ ne mɔ kɔsɔɔti anwo.+
7 Na saa Yizilayɛnli anzɛɛ ɛyɛvolɛ biala mɔɔ de Yizilayɛ la twe ɔ nwo fi me nwo na ɔbɔ kpɔkɛ kɛ ɔdi ye kyibadeɛ ananze ne mɔ anzi na ɔfa azedolɛ bolɛ mɔɔ maa menli yɛ ɛtane la ɔsie ɛkɛ na akee ɔbabiza edwɛkɛ wɔ me ngapezonli ɛkɛ a,+ medame Gyihova, medame mumua ne mebabua ye.
8 Mebadu me nye meazie sonla zɔhane anwo na meamaa yeayɛ kɔkɔbɔlɛ nwo sɛkɛlɛneɛ nee ɛrɛlɛdendɛ, na meaye ye meavi me menli ne anu;+ na bɛbanwu kɛ medame a mele Gyihova a.”’
9 “‘Noko saa bɛyɛ ngapezonli bie koasea na ɔmaa mualɛ a, ɛnee medame Gyihova a meyɛ ngapezonli zɔhane koasea a.+ Akee mebadende me sa wɔ ɔ nwo zo na meabɔ ɔ bo zo wɔ me menli Yizilayɛma anu.
10 Bɛbazoa bɛ fɔlɛlilɛ; ahenle mɔɔ hɔbizale edwɛkɛ ne la fɔlɛlilɛ ne bayɛ kɛ ngapezonli ne fɔlɛlilɛ ne ala la,
11 amaa Yizilayɛma andwe bɛ nwo anvi me nwo bieko na bɛagyakyi bɛ mɛladonlɛ ne mɔ mɔɔ bɛfa bɛgua bɛ nwo evinli la kɔsɔɔti. Na bɛbayɛ me menli na medame noko meayɛ bɛ Nyamenle,’+ Tumivolɛ Awulae Gyihova a se a.”
12 Na Gyihova nee me dendɛle bieko kɛ:
13 “Sonla ra, saa maanle bie anli nɔhalɛ na ɔyɛ ɛtane ɔtia me a, mebadende me sa wɔ ɔ nwo zo na meazɛkye ɛleka mɔɔ ɔfa ye aleɛ ɔsie* la,+ na mebazoa ɛhɔne wɔ ɔ nwo zo+ na meabɔ sonla nee nane bo zo wɔ zo.”+
14 “‘Saa menli nsa ɛhye mɔ—Nowa,+ Daneɛle+ yɛɛ Dwobu+—wɔ ɛkɛ ne bɔbɔ a, anrɛɛ bɛ tenleneyɛlɛ ti, bɛbahola bɛalie bɛdabɛ bɛ nwo* ala,’+ Tumivolɛ Awulae Gyihova a se a.”
15 “‘Anzɛɛ fa ye kɛ memaa nane anwo ɛzulolɛ ɛrava azɛlɛ ne azo na bɛhu zolɛ menli dɔɔnwo* na bɛmaa azɛlɛ ne ɛdɔ mgbane mɔɔ awie biala ɛnze ɛkɛ ɔlua nane anwo ɛzulolɛ ne mɔ ati.+
16 Mekɛ ala mɔɔ mede aze la,’ Tumivolɛ Awulae Gyihova a se a, ‘saa menli nsa ɛhye mɔ bɔbɔ wɔ ɛkɛ a, bɛnrɛhola bɛnrɛlie bɛ mra mrenyia anzɛɛ bɛ mra mraalɛ ngoane; anrɛɛ bɛbalie bɛdabɛ bɛ nwo ala, na azɛlɛ ne badɔ mgbane.’”
17 “‘Anzɛɛ fa ye kɛ meva konle dadeɛ mera azɛlɛ ne azo+ na meha kɛ: “Konle dadeɛ ɛva azɛlɛ ne azo” na ɔbɔ sonla nee nane mɔɔ wɔ zo la amuala abo zo,+
18 saa bɔbɔ menli nsa ɛhye mɔ wɔ ɛkɛ a, mekɛ ala mɔɔ mede aze la,’ Tumivolɛ Awulae Gyihova a se a, ‘bɛnrɛhola bɛnrɛlie bɛ mra mrenyia anzɛɛ bɛ mra mraalɛ ngoane; anrɛɛ bɛbalie bɛdabɛ bɛ nwo ala.’”
19 “‘Anzɛɛ fa ye kɛ meva ewulenzane mera azɛlɛ zɔhane azo+ na mewola me ɛya ne megua zo kɛ meka mogya dɔɔnwo meagua meabɔ sonla nee nane bo zo wɔ zo,
20 saa bɔbɔ Nowa,+ Daneɛle+ yɛɛ Dwobu+ wɔ ɛkɛ a, mekɛ ala mɔɔ mede aze la,’ Tumivolɛ Awulae Gyihova a se a, ‘bɛnrɛhola bɛnrɛlie bɛ mra mrenyia anzɛɛ bɛ mra mraalɛ ngoane; anrɛɛ bɛ tenleneyɛlɛ ti bɛbalie bɛdabɛ bɛ nwo ala.’”+
21 “Ɔluakɛ mɔɔ Tumivolɛ Awulae Gyihova ɛha la ɛne: ‘Saa mesoa me anzohwenlɛ nna* ne mɔ+—konle dadeɛ, ɛhɔne, nane anwo ɛzulolɛ nee ewulenzane+—meba Gyɛlusalɛm anwo zo kɛ mebɔ sonla nee nane bo zo wɔ zo a,+ mɔɔ bazi la ɛne.
22 Noko, bɛ nuhua bie mɔ mɔɔ bɛbaha la bɛavi ɛsalɛ, na bɛbava bɛ bɛavi ɛkɛ,+ bɛ mra mrenyia nee bɛ mra mraalɛ kɔsɔɔti. Bɛbara bɛ nwo ɛkɛ, na saa bɛnwu bɛ ndenle nee bɛ nyɛleɛ ne mɔ a, munzule ne mɔɔ menvale membale Gyɛlusalɛm anwo zo nee debie biala mɔɔ menvale menyɛle ye la bamaa bɛ rɛle akyekye.’”
23 “‘Saa bɛnwu bɛ ndenle nee bɛ nyɛleɛ a bɛbakyekye bɛ rɛle, na bɛbanwu kɛ mɔɔ menvale menyɛle ye la meanyɛ ye mgbane,’+ Tumivolɛ Awulae Gyihova a se a.”
Ɔbodwɛkɛ
^ Ɔbayɛ kɛ Hibulu edwɛkɛkpɔkɛ ɛhye nee edwɛkɛkpɔkɛ mɔɔ kile “nane ebinli” la le ko na ɔle edwɛkɛ mɔɔ ɛngile ɛbulɛ.
^ Hibulu aneɛ nu, “Mebama ɛzulolɛ azɔ Yizilayɛma ahonle.”
^ Hibulu aneɛ nu, “mebabubu wɔ mbaka mɔɔ ɛkendɛhenda paano wɔ zo la anu.” Ɔkola ɔkile mbaka mɔɔ bɛkendɛhenda paano mɔɔ bɛfa bɛazie wɔ zo la.”
^ Anzɛɛ “bɛ ɛkɛla.”
^ Anzɛɛ “bɛhu ɔ mra ne mɔ.”
^ Anzɛɛ “me ndɛnebualɛ ɛzɛkyelɛ nna.”
