Ayezaya 13:1-22
13 Nrɛlaleɛ mɔɔ tia Babelɔn+ mɔɔ Emɔzo ara Ayezaya+ nwunle ye wɔ ɛnyelɛzodeɛnwunlɛ nu la ɛne:
2 “Maa sɛkɛlɛneɛ zo+ wɔ boka mɔɔ ɛhwee ɛnle zo la azo.
Tea nu fɛlɛ bɛ, nwɔha ɛ sa,Amaa bɛara menli titili ne mɔ nlenkɛ ne mɔ anloa.
3 Meha edwɛkɛ mehile menli mɔɔ mekpa bɛ* la.+
Mevɛlɛ me kovolɛma kɛ bɛla me ɛya ne ali,Me menli mɔɔ fa fɛlɛkolilɛ tu bɛ nwo la.
4 Bɛdie! Menli ekpunli bie wɔ awoka ne mɔ azo;Bɛyɛ dede kɛ menli dɔɔnwo la!
Bɛdie! Arelemgbunlililɛ mɔɔ ɛlɛyɛ begyebegye,Maanle maanle mɔɔ bɛboɔboa bɛ nloa la!+
Ɛlɔne Gyihova ɛlɛboɔboa ɛlɔne nloa yeamaa bɛahɔ konle.+
5 Bɛvi azɛlɛ ye azo moamoa,+Bɛvi anwuma ako abo nehane bɛlɛba,Gyihova nee ye ɛya akodeɛ ne mɔ,Ɛlɛba arazɛkye azɛlɛ ye amuala.+
6 Bɛzu bɛye awolɛ ɔluakɛ Gyihova kenle ne ɛbikye!
Ɔbara kɛ ɛzɛkyelɛ mɔɔ vi Tumivolɛ Bedevinli ne ɛkɛ ne la.+
7 Ɛhye ati, ɛsalɛ biala anu bado,Na awie biala ahonle badu.+
8 Ɛzulolɛ ɛha menli ne.+
Bɛza ketee yɛɛ bɛdi nyane,Kɛ raalɛ mɔɔ ɛvo awolɛ zo la.
Bɛfa ɛzulolɛ bɛneɛnlea bɛ nyunlu ngoko,Nyanelilɛ ɛmaa bɛ nyunlu ɛyɛ basaa.
9 Nea! Gyihova kenle ne ɛlɛba,Ɔle ɛya nee ɛya wuluwulu kenle, ɔnrɛze anwunvɔne,Ɔbamaa azɛlɛ ne azo ayɛ ɛzulolɛ,+Na yeazɛkye ɛtanevolɛma mɔɔ wɔ azɛlɛ ne azo la yeavi zo.
10 Ɔluakɛ anwuma nwɔlɔra nee bɛ nwɔlɔra ekpunli* ne mɔ+Ɛnrɛda;Sɛnzɛne ne ɛlɛfinde a, ɔbalu,Yɛɛ siane ne ɛnrɛda.
11 Mebamaa azɛlɛ ne abu ye ɛtane nwo mgbonda,+Na amumuyɛma abu bɛ ɛtane nwo mgbonda.
Mebamaa anwomemaazoma* adubɛnwo ne ara awieleɛ,Yɛɛ mebabɛlɛ atisesebɛma anwomemaazo ne aze.+
12 Mebamaa sonla nwo ahyia adɛla nvutuke tagyee,+Yɛɛ mebamaa alesama anwo ahyia adɛla Ofɛ nvutuke.+
13 Ɛhye ati, mebamaa anwuma awoso,Na azɛlɛ ne akpusu avi ɔ bo zo ne+Ɔlua ɛlɔne Gyihova ɛya ne ati, wɔ ye ɛya wuluwulu kenle ne anu.
14 Awie biala bayɛ kɛ kɛtɛboɛ mɔɔ bɛdoa ye yɛɛ mboane mɔɔ bɛnlɛ awie ɛmboɔboa bɛ nloa la,Ko biala bazia ahɔ ɔdaye ye menli ɛkɛ;Ko biala bazia ahɔ ɔdaye ye azɛlɛ zo.+
15 Awie biala mɔɔ bɛbanwu ye la, bɛbava debie bɛawɔ ye,Yɛɛ awie biala mɔɔ bɛbahye ye la bawu dadeɛ nloa.+
16 Bɛbatete bɛ mra nu nzokanzoka wɔ bɛ nye zo,+Bɛbasesa bɛ azua nu ninyɛne,Yɛɛ bɛbahye bɛ ye mɔ mialera nu bɛ nee bɛ ala.
17 Bɛnlea, melɛmaa Medeama ara bɛ nwo zo,+Bɛmɛ bɛnva dwɛtɛ fufule bɛnyɛ ɛhweeYɛɛ bɛ nye ɛnlie nvutuke nwo.
18 Bɛ ɛda ne mɔ batete mgbavolɛ nu nzokanzoka;+Bɛ kunlu mralɛ anwo ɛnrɛyɛ bɛ alɔbɔlɛYɛɛ bɛnrɛze ngakula anwunvɔne.
19 Na Babelɔn mɔɔ lɛ anyunlunyia kpole* tɛla belemgbunlililɛ biala,+Mɔɔ Kaledeama fa ye kɛnlɛma ne tu bɛ nwo la,+Bayɛ kɛ Sodɔm nee Gomɔla wɔ mekɛ mɔɔ Nyamenle zɛkyele bɛ la.+
20 Awie ɛnrɛdɛnla zolɛ bieko,Yɛɛ ɔnrɛyɛ ɛleka mɔɔ bɛbadɛnla wɔ awolɛndoazo kɔsɔɔti anu.+
Arelabenli biala ɛnrɛzi ye ɛdanlɛsua wɔ ɛkɛ,Yɛɛ mboaneneavolɛma ɛnrɛmaa bɛ mboane ɛnrɛla ɛkɛ.
21 Ɛsɛlɛ zo nane ngakyile bala ɛkɛ;Kpadule bayi bɛ azua nu.
Soholo bava ɛkɛ ne ayɛ bɛ dabelɛ,+Yɛɛ ɛbɔ nu mbɔnkye* bawuluwulu wɔ ɛkɛ.
22 Nane mɔɔ kpo la bazu wɔ ye tawa ne mɔ azo,Yɛɛ ɛzonlɛ bakpo wɔ ye arelemgbunli azua ngɛnlɛma ne mɔ anu.
Ye mekɛ ɛbikye, na bɛnrɛmaa ɔnrɛdɛnla ɛkɛ ne ɔnrɛhyɛ.”+
Ɔbodwɛkɛ
^ Hibulu aneɛ nu, “me menli mɔɔ mede bɛ nwo la.”
^ Hibulu aneɛ nu, “nee bɛ Kisele,” ɔbayɛ Orelayɔn nee nwɔlɔra ekpunli gyɛne
^ Hibulu edwɛkɛkpɔkɛ ne eza kile akɛnrasesebɛ mɔɔ ɛnle kpalɛ mɔɔ bɛfa bɛyɛ debie anzɛɛ awie mɔɔ yɛ debie mɔɔ ɔnlɛ adenle ɔnyɛ la.
^ Anzɛɛ “mɔɔ le kɛnlɛma.”
^ Anzɛɛ ɔkola ɔkile, “Yɛɛ sunsum ɛtane mɔɔ le kɛ mbɔnkye la.”
