Ayezaya 21:1-17
21 Nrɛlaleɛ mɔɔ tia ɛnweanloa fienemgbole ne* la ɛne:+
Ɔlɛba kɛ ahumu mɔɔ vi nyiakɛ la,Ɔvi fienemgbole nu lɔ, ɔvi azɛlɛ mɔɔ zolɛ yɛ ɛzulolɛ la azo ɔlɛba.+
2 Bɛye ɛnyelɛzodeɛnwunlɛ bie mɔɔ yɛ ɛzulolɛ la bɛhile me:
Mɛlɛbɛla sonla ne ɛlɛbɔ adalɛ ɛbɛla,Yɛɛ sɛkyevolɛ ne ɛlɛsɛkye ninyɛne.
O Yilam, kɔho! O Medea,+ kɔteta ye!
Mebamaa amaneɛ mɔɔ ɔlɛmaa menli anwu ye la amuala ara awieleɛ.+
3 Ɛhye ati a melɛdi nyane kpole la.*+
Melɛte nyane,Kɛ raalɛ mɔɔ ɛvo awolɛ zo la.
Me nwo ɛbubu me yemɔti mende edwɛkɛ;Me adwenle ɛyɛ basaa yemɔti mennwu ɛhwee.
4 Me ahonle ɛlɛsi; ɛzulolɛ ɛha me.
Aledwolɛ ne mɔɔ me nwo lɔle ye la maa me nwo woso me.
5 Bɛva ɛkponle bɛzie ɛkɛ na bɛva mbia bɛziezie nwo!
Bɛli na bɛnlo!+
Bɛmɛ mgbanyima, bɛdwazo bɛkpokpa enyinlike ne!
6 Ɔluakɛ edwɛkɛ mɔɔ Gyihova ɛha ɛhile me la ɛne:
“Kɔ na kɔva awie maa ɔzinza na ɔha mɔɔ ɔbanwu ye la.”
7 Na ɔnwunle konle ehwili mɔɔ mgbɔnwɔ ɛlɛtwe ye,Konle ehwili mɔɔ asoaso ɛlɛtwe ye,Konle ehwili mɔɔ afunlumu ɛlɛtwe ye la.
Ɔguale ɔ nye aze ɔnleanle ye kpalɛ.
8 Akee ɔdeanle nu kɛ awenade la kɛ:
“O Gyihova, megyi ɛzinzalɛ arane ne azo alehyenlɛ biala,Yɛɛ megyi me ɛzinzalɛ ɛleka ne nɔɔzo biala.+
9 Nea mɔɔ ɛlɛba la:
Menli dede konle ehwili mɔɔ mgbɔnwɔ ɛlɛtwe bɛ la anu!”+
Akee ɔdeanle nu na ɔhanle kɛ:
“Yedɔ aze! Babelɔn ɛdɔ aze!+
Ye nyamenle ne mɔ ananze ne mɔ amuala ɛbubu ɛgua aze!”+
10 O me menli mɔɔ bɛwoso bɛ kɛ ma,Me ma ɛwosolɛ ɛleka ma,*+Meha mɔɔ mede mevi ɛlɔne Gyihova, Yizilayɛ Nyamenle ne ɛkɛ la mehile bɛ.
11 Nrɛlaleɛ mɔɔ tia Dumaa* la ɛne:
Awie ɛlɛfɛlɛ me avi Siyɛ kɛ:+
“Sinzavolɛ, na nɔe ye ɛ?
Sinzavolɛ, na nɔe ye ɛ?”
12 Sinzavolɛ ne hanle kɛ:
“Aleɛ ɛlɛkye na eza aleɛ badwo.
Saa bɛbabiza a, bɛbiza.
Bɛzia bɛrɛla!”
13 Nrɛlaleɛ mɔɔ tia ɛsɛlɛ ne la ɛne:
O Didan adendulɛma,Bɛbala ɛsɛlɛ zo kpɔkɛ nu nɔɔzo.+
14 Bɛmɛ mɔɔ bɛde Tima azɛlɛ zo,+Bɛva nzule bɛrayia awie mɔɔ nzuhɔne ɛlɛku ye la,Na bɛva aleɛ bɛrɛlɛ awie mɔɔ ɛlɛnriandi la.
15 Ɔluakɛ bɛnriandi bɛvi dadeɛ nloa, bɛvi konle dadeɛ mɔɔ bɛhwe la anloa,Bɛnriandi bɛvi ɛda mɔɔ bɛkpo, nee konle mɔɔ anu yɛ se la anloa.
16 Edwɛkɛ mɔɔ Gyihova ɛha ɛhile me la ɛne: “Wɔ ɛvolɛ ko mɔɔ le kɛ ɛkpanli ɛvolɛ la* anu, Kidaa anyunlunyia ne amuala+ bara awieleɛ.
17 Kidaa kovolɛma mɔɔ to ɛda mɔɔ baha la bayɛ ekyi bie, ɔluakɛ Gyihova, Yizilayɛ Nyamenle ne a ɛha a.”
Ɔbodwɛkɛ
^ Ɔbahola yeayɛ ɛleka mɔɔ ɛnee tete Babelonia wɔ la.
^ Hibulu aneɛ nu, “me nze nu ɛlɛfofo me.”
^ Hibulu aneɛ nu, “ralɛ nrenyia.”
^ Ɔ bo kile “Koonwuyɛlɛ.”
^ Anzɛɛ “mɔɔ bɛdia ye kɛ mɔɔ ɛkpanli tia ye ɛvolɛ la”; ɛhye kile, ɛvolɛ ko pɛpɛɛpɛ.
