Ayezaya 50:1-11
50 Edwɛkɛ mɔɔ Gyihova ɛha la ɛne:
“Bɛ mame ewolebɔlɛ kɛlata ne+ mɔɔ menvale menvoanle ye la wɔ ni?
Anzɛɛ menli mɔɔ metua bɛ kakɛ la anu boni a mendɔnenle bɛ memaanle ye a?
Nea! Bɛ ɛtane ne mɔ ati+ a mendɔnenle bɛ a,Yɛɛ bɛ mɛladonlɛ ti a menvoanle bɛ mame a.+
2 Duzu ati a akee membale la awie biala ɛnle ɛke ɛ?
Kɛmɔti a menvɛlɛle la awie biala anlie zo ɛ?+
Asoo me sa le ezinra somaa mɔɔ ɔngola ɔnlie bɛ,Anzɛɛ menlɛ tumi mɔɔ mefa medie bɛ ɔ?+
Nea! Metendɛ a nyevile sesa;+Memaa azule kakyi ɛsɛlɛ.+
Nuhua fɛlɛ ɛnnyia nzule la ati, bɛkpɔlɔ,Na nzuhɔne ti, bɛwu.
3 Mefa awozinli mekeda anwuma,+Na memaa bɛkeda ɛrele.”
4 Tumivolɛ Awulae Gyihova ɛmaa me ɛtafinlimalɛ mɔɔ bɛtete ye kpalɛ la,*+Amaa meanwu kɛzi mebaha edwɛkɛ kpalɛ meahile mɔɔ ɛvɛ la.*+
Nwonlomɔ biala ɔtunwue me;Ɔbuke me nzo ɔmaa metie edwɛkɛ kɛ menli mɔɔ bɛhilehile bɛ la.+
5 Tumivolɛ Awulae Gyihova ɛbuke me nzo,Na meande atua.+
Meammaa me nzo anyɛ se.+
6 Mengakyile me nzi memaanle menli mɔɔ bo me laNa menvale me nvoka memaanle menli mɔɔ tudu nwolɛ enrinli la.*
Meanva me nyunlu meanvea anyiemgba nee nyɛlɛ.+
7 Tumivolɛ Awulae Gyihova baboa me.+
Yemɔti me nyunlu ɛnrɛgua aze.
Ɛhye ati meyɛ me nyunlu kɛ bolɛ ɛsesebɛ,+Na meze kɛ menrɛbɔ anyiemgba.
8 Ahenle mɔɔ bua me benle la ɛbikye.
Nwane a bahola abɔ me somolɛ* a?+
Ɔdwazo ɔmaa yɛbɔ ye zo.
Nwane a lɛ me nwo edwɛkɛ a?
Maa ɔbikye me.
9 Nea! Tumivolɛ Awulae Gyihova baboa me.
Nwane a babua me fɔlɛ a?
Nea! Bɛ muala bɛbatete kɛ tɛladeɛ.
Ngɛkɛba bali bɛ bɔkɔɔ.
10 Bɛ nuhua boni a sulo GyihovaNa ɔtie ye sonvolɛ ne ane a?+
Nwane a ɛlua awozinli nu mɔɔ wienyi biala ɛnle ɛkɛ a?
Maa ɔva ɔ rɛle ɔwula Gyihova duma ne anu na ɔdudu ɔhisa ye Nyamenle ne.*
11 “Nea! Bɛdabɛ mɔɔ bɛlɛwuda senle,Bɛamaa yeadudu la amuala,Bɛlua bɛ senle ne wienyi ne anu,Wɔ senle ne mɔɔ ɛlɛtudu la anu.
Debie mɔɔ bɛbanyia bɛavi me sa nu la ɛne:
Bɛbadeda aze wɔ nyane kpole nu.
Ɔbodwɛkɛ
^ Hibulu aneɛ nu, “ɛmaa me menli mɔɔ bɛhilehile bɛ la ɛtafinlimalɛ.”
^ Anzɛɛ ɔkola ɔkile, “meamaa mɔɔ ɛvɛ la anwosesebɛ la.”
^ Anzɛɛ “tudu me kɛsa la.”
^ Anzɛɛ “bahola ɔ nee me adwudwu.”
^ Anzɛɛ “na ɔva ɔ nwo ɔdo ye Nyamenle ne anwo zo.”
