Kɔmaa Felepaema 2:1-30
2 Yemɔti, saa Kelaese anu anwosesebɛmaanlɛ bie wɔ ɛkɛ a, saa ɛlɔlɛ nu arɛlekyekyelɛ bie wɔ ɛkɛ a, saa sunsum nu agɔnwolɛvalɛ* bie wɔ ɛkɛ a, saa ɛlɔlɛ nee ahunluyelɛyelalɛ bie wɔ ɛkɛ a,
2 bɛnyia adwenle ko na bɛnyia ɛlɔlɛ ko, bɛyɛ ko wɔ debie biala anu, bɛnyia nzuzulɛ ko na bɛmaa me fɛlɛkolilɛ ne ɛli munli.+
3 Bɛmmafa manzonlehwenlɛ+ anzɛɛ anwomemaazo bɛyɛ debie biala,+ emomu bɛbɛlɛ bɛ nwo aze* na bɛbu bɛ gɔnwo mɔ bɛdɛla bɛ nwo,+
4 bɛmmadwenle bɛ ngomekye bɛ boɛyɛlɛ nwo,+ emomu bɛdwenle awie mɔ noko ɛdeɛ nwo.+
5 Bɛnyia adwenle ɛhye mɔɔ ɛnee Kelaese Gyisɛse noko lɛ la bie,+
6 yemɔ bɔbɔ mɔɔ ɛnee ɔle kɛ Nyamenle la,+ yeandwenle nwo yeampele kɛ ɔ nee Nyamenle kɛzɛ.+
7 Kyɛkyɛ, emomu ɔgyakyile debie biala mɔɔ ɔlɛ la, ɔyɛle ɔ nwo akɛlɛ+ na ɔrale kɛ sonla.+
8 Mɔɔ tɛla ɛhye la, mekɛ mɔɔ ɔrale kɛ sonla la, ɔbɛlɛle ɔ nwo aze na ɔyɛle tieyɛ ɔhɔle ewule nu,+ ɛhɛe, ɔwule amaneɛnwunlɛ baka* zo.+
9 Ɛhye ati, Nyamenle kpogyale ye zo na ɔmaanle ye dibilɛ kpole kpalɛ+ na ɔlole ye ɔmaanle ye duma mɔɔ tɛla duma biala la,+
10 yemɔti ɔwɔ kɛ awie biala koto wɔ Gyisɛse duma nu—bɛdabɛ mɔɔ bɛwɔ anwuma nee azɛlɛ ye azo nee azɛlɛ bo la amuala+—
11 na ɔwɔ kɛ awie biala ka ye baguase kɛ Gyisɛse Kelaese le Awulae+ ɔfa ɔwula Nyamenle Selɛ ne anyunlunyia.
12 Zɔhane ati, me kulovolɛma, kɛ mɔɔ dahuu bɛyɛ tieyɛ la, tɛ mekɛ mɔɔ mewɔ bɛ nwo lɔ la angome emomu kɛkala bɔbɔ mɔɔ menle bɛ nwo lɔ la, bɛhɔ zo bɛva ɛzulolɛ nee anwowosolɛ bɛyɛ bɛ ngoanelielɛ nwo gyima.
13 Na kɛmɔ ɔsɔ Nyamenle anye la ati, ɔlɛyɛ gyima wɔ bɛ nu amaa bɛanyia ɛhulolɛ ne yɛɛ anwosesebɛ ne na bɛahola bɛayɛ.
14 Bɛmmatendɛ bɛ nzo abo+ yɛɛ bɛmmasu kpolera wɔ debie biala ɛyɛlɛ nu,+
15 amaa bɛayɛ menli mɔɔ edwɛkɛ ɛnle bɛ nwo na bɛnze nwolɛ bie, kɛ Nyamenle amra+ mɔɔ ɛtane ɛnle bɛ nwo wɔ awolɛndoazo ɛhye mɔɔ yɛ ɛtane na ɔnyɛ mɔɔ le kpalɛ la anu,+ na bɛlɛta wɔ bɛ avinli kɛ ahɛnlaneɛ wɔ ewiade la,+
16 na bɛzɔ ngoane edwɛkɛ ne anu boɛ.+ Amaa meanyia debie meagyinla zo meali fɛlɛko wɔ Kelaese kenle ne, na meanwu kɛ meanzu ɛnriandilɛ ne mgbane anzɛɛ meanyɛ gyima ɛsesebɛ mgbane.
17 Noko, saa bɛwola me bɛgua kɛ nza mɔɔ bɛva bɛbɔ afɔle+ bɛmaa ɛzonlenlɛ nwuanzanwuanza* mɔɔ bɛ diedi ɛmaa bɛra nu la bɔbɔ a, me nye die yɛɛ me nee bɛ yɛ muala yɛdi fɛlɛko.
18 Zɔhane ala a ɔwɔ kɛ bɛdabɛ noko bɛ nye die na bɛ nee me di fɛlɛko a.
19 Kɛkala, me nye la kɛ saa ɔyɛ Awulae Gyisɛse ɛhulolɛ a ɔnrɛhyɛ biala na meazoa Timote+ wɔ bɛ nwo lɔ, amaa saa mete bɛ nganeɛ a yeamaa me anwosesebɛ.
20 Ɔluakɛ menlɛ awie biala mɔɔ ye subane le kɛ ɔdaye mɔɔ dwenle bɛ nwo kpalɛ a.
21 Ɔluakɛ bɛdabɛ mɔɔ bɛha la amuala ɛlɛkpondɛ mɔɔ hyia bɛ la, na tɛ mɔɔ hyia Gyisɛse Kelaese la ɔ.
22 Noko bɛze kɛzi ɔlale ɔ nwo ali kɛ ɔfɛta, na ɔ nee me zonlenle kɛ kakula+ nee ye papa ɔmaanle edwɛkpa ne dɛlɛle la.
23 Ɛhye ati, ɔdaye a me nye la kɛ saa menwu kɛzi ninyɛne bahɔ zo amaa me ala a mebazoa ye a.
24 Nɔhalɛ nu, melɛ anwodozo wɔ Awulae anu kɛ ɔnrɛhyɛ medame mumua ne mebara lɔ.+
25 Noko kɛkala, menwu kɛ ɔhyia kɛ mesoa Ɛpafulodaetɛse, me diema nee me gɔnwo mɔɔ me nee ye yɛ gyima nee me gɔnwo sogyanli, mɔɔ bɛdule ye kɛ ɔrazonle me la wɔ bɛ nwo lɔ,+
26 ɔluakɛ ɔ nwo ɛlɛdɔ bɛ muala na ɔlɛdi nyane kɛ bɛdele kɛ ɔ nwo dole ye la.
27 Amgba ɔ nwo dole ye mɔɔ anrɛɛ ɔwu a; noko Nyamenle nwunle ye anwunvɔne, nɔhalɛ nu, tɛ ɔ ngome, emomu medame noko, anrɛɛ me nyanelilɛ ne kɛbo zolɛ.
28 Zɔhane ati, melɛsoa ye meamaa yeara bɛ nwo lɔ ndɛndɛ, amaa saa bɛnwu ye a bɛali fɛlɛko bieko na medame noko me adwenleadwenle ne azo ade.
29 Yemɔti bɛva fɛlɛkolilɛ bɛlie ye kɛ mɔɔ bɛdie Awulae ɛdoavolɛma ne amuala la, na bɛbu menli mɔɔ le zɛhae la kɛ bɛsonle bolɛ kpalɛ,+
30 ɔluakɛ Kelaese gyima* ne ati ɔhale ekyii na yeawu, ɔvale ye ngoane* ɔdole esiane nu amaa yeagyinla bɛ gyakɛ anu yeazonle me kɛmɔ bɛnle ɛke la ati.+
Ɔbodwɛkɛ
^ Giliki aneɛ nu, “bɛ gɔnwo mɔ anwo ɛdwenlenlɛ.”
^ Anzɛɛ “bɛnyia mɛlɛbɛnwoaze adwenle.”
^ Nea Edwɛkɛbohilelɛ.
^ Anzɛɛ “ɛzonlenlɛ gyima.”
^ Anzɛɛ ɔkola ɔkile, “Awulae gyima.”
^ Anzɛɛ “ɛkɛla.”
