Ɛzoanvolɛma Gyima 20:1-38
20 Mɔɔ basabasayɛlɛ ne anloa hanle aze la, Pɔɔlo maanle bɛhɔvɛlɛle ɛdoavolɛma ne, na mɔɔ ɔmaanle bɛ anwosesebɛ na ɔ nee bɛ lile nrɛlaleɛ la, ɔhɔle Masidonea.
2 Mɔɔ ɔhɔvale maanzinli zɔhane mɔ anu na ɔhanle edwɛkɛ dɔɔnwo ɔmaanle ɛdoavolɛma ne anwosesebɛ la, ɔhɔdwule Gilisi.
3 Ɔlile siane nsa wɔ ɛkɛ, na ɔyɛle kɛ ɔkɔ Selea noko kɛmɔ Dwuuma ne bɔle kpɔkɛ kɛ bɛku ye la ati,+ ɔyɛle ye adwenle kɛ ɔbazia yeahɔva Masidonea.
4 Pelɛse mɔɔ vi Bɛlia la ara Sopatɛ, Alesetaakɛse+ nee Sɛkɛndɛse mɔɔ bɛle Tɛsalonaekama, Geeyɛse mɔɔ vi Dɛbi, Timote+ yɛɛ Tekekɛse+ nee Tulofemɛse+ mɔɔ bɛvi Ehyea maanzinli nu la nee ye a hɔle a.
5 Menli ɛhye mɔ limoale yɛ nyunlu hɔhendɛle yɛ wɔ Tulowase;
6 na Paano Mɔɔ Mgbɔvonle Ɛnle Nu+ la mekɛ ne anzi, yɛvale nyevile zo yɛvile Felepae na ye kenle nnu ne azo yɛhɔdole bɛ wɔ Tulowase, na yɛlile kenle nsuu wɔ ɛkɛ.
7 Dapɛne ne anu kenle mɔɔ limoa mɔɔ yɛyiale nu kɛ yɛdi debie la, Pɔɔlo bɔle ɔ bo dendɛle hilele bɛ, ɔluakɛ ɛnee aleɛ kye a ɔbahɔ; na ɔdendɛle dedee nɔɔzo bulu nee nwiɔ.
8 Ɔti ɛnee ahɛnlaneɛ dɔɔnwo wɔ ɛbolɔnsam ne azo sua ne mɔɔ yɛwɔ nu la anu.
9 Ɛnee kpavolɛ bie mɔɔ bɛfɛlɛ ye Yutekɛse la de nvɛnzɛlɛ ne anloa na mekɛ mɔɔ Pɔɔlo ɛlɛtendɛ la, nafelɛ vale ye na ɔlale, ɔvi ɛbolɔnsam ndazo nsa ne azo ɔdɔle aze na mɔɔ bɛhɔmaanle ye zo la ɛnee yewu.
10 Noko Pɔɔlo dwule aze hɔbutule ɔ nwo zo na ɔbɛlale ye+ ɔhanle kɛ: “Bɛmmayɛ dede, ɔluakɛ ɔtɛwule.”+
11 Akee ɔvole ɛbolɔnsam ne azo na ɔvale aleɛ* ne ɔlile. Ɔhɔle zo ɔdendɛle ɔhilele bɛ too alehyenlɛ, na akee ɔhɔle.
12 Yemɔti bɛvale kakula ne bɛhɔle na bɛ rɛle kyekyele kpole kɛ bɛdwazo ye a.
13 Akee yɛvale meli na yɛlimoale yɛhɔle Asɔso, ɛleka mɔɔ yɛyɛle yɛ adwenle kɛ yɛbava Pɔɔlo la, ɔluakɛ ɔhanle ɔhilele yɛ kɛ yɛyɛ ye zɔ, ɛnee yeyɛ ye adwenle kɛ ɔbadia yeahɔ ɛkɛ.
14 Yemɔti mɔɔ ɔ nee yɛ yiale Asɔso la, yɛvale ye na yɛhɔle Metelin.
15 Na aleɛ hyenle mɔɔ yɛdule yɛvile ɛkɛ la yɛhɔle Kayɔso, aleɛ hyenle bieko la yɛgyinlanle Seemɔso ekyii, na ye alehyenlɛ nu yɛhɔle Maelitɛse.
16 Pɔɔlo bɔle kpɔkɛ kɛ ɔnrɛgyinla Ɛfɛsɛse+ amaa yeanzɛkye mekɛ wɔ Ehyea maanzinli ne anu, ɔluakɛ ɛnee ɔkulo kɛ ɔka ɔ nwo ɔkɔ Gyɛlusalɛm,+ na saa ɔkɛyɛ boɛ a yeahɔdwu ɛkɛ ne wɔ Pɛntekɔso Ɛvoyia kenle ne.
17 Noko mɔɔ ɔwɔ Maelitɛse la, ɔdole nrɛlaleɛ kɛ bɛhɔ Ɛfɛsɛse bɛhɔvɛlɛ asafo ne anu mgbanyima ne mɔ.
18 Mɔɔ bɛrale ɔ nwo ɛkɛ ne la, ɔzele bɛ kɛ: “Bɛdabɛ bɛze kɛzi ɔvi mekɛ mɔɔ limoa mɔɔ membale Ehyea maanzinli ne anu la membɔle me ɛbɛla wɔ bɛ avinli la,+
19 menvale mɛlɛbɛnwoaze kpole*+ nee ɛzunlɛ yɛɛ sɔnea mɔɔ Dwuuma adwenle ɛtane ti ɔdole me la menzonlenle Awulae,
20 na meanva ninyɛne mɔɔ nvasoɛ wɔ zo* mɔɔ ɔwɔ kɛ meka mekile bɛ anzɛɛ ɔwɔ kɛ mekilehile bɛ bagua nu+ nee azua nu+ la meanvea bɛ.
21 Na menlile Dwuuma nee Gilikima daselɛ bɔkɔɔ kɛ bɛnlu bɛ nwo,+ bɛzonle Nyamenle na bɛnyia yɛ Awulae Gyisɛse anu diedi.+
22 Noko bɛnlea! kɛkala melɛkɔ Gyɛlusalɛm kɛ mɔɔ sunsum ne ɛhile me la, menze mɔɔ bado me wɔ ɛkɛ ne la ɛdeɛ,
23 noko sunsum nwuanzanwuanza ne kɔ zo bɔ me kɔkɔ wɔ suakpole biala azo kɛ efiadelalɛ nee anwongyelelɛ a ɛlɛkendɛ me a.+
24 Noko membu me ngoane* kɛ ɔsonle bolɛ, amaa meahola meawie ɛnriandilɛ ne+ nee ɛzonlenlɛ gyima mɔɔ menyianle menvile Awulae Gyisɛse ɛkɛ ne kɛ menli Nyamenle ɛlolɛ kpole ne anwo edwɛkpa ne anwo daselɛ bɔkɔɔ la.
25 “Noko bɛnlea! meze kɛ bɛdabɛ mɔɔ menganle Belemgbunlililɛ ne anwo edwɛkɛ mengilele bɛ la anu biala ɛnrɛnwu me nyunlu bieko.
26 Yemɔti mevɛlɛ bɛ ɛnɛ kenle ye kɛ bɛli me daselɛ kɛ menli awie biala mogya nwo ɛzonle,+
27 ɔluakɛ meanva Nyamenle ɛhulolɛdeɛ* ne mɔɔ ɔwɔ kɛ meka nwolɛ edwɛkɛ mekile bɛ la amuala meanvea bɛ.+
28 Bɛnlea bɛ nwo boɛ+ na bɛnlea mboane ne mɔ mɔɔ sunsum nwuanzanwuanza ne ɛyɛ bɛ neavolɛma wɔ bɛ avinli la amuala anwo zo, na bɛnlea Nyamenle asafo ne+ mɔɔ ɔvale ɔ Ra ne mogya ɔdɔle la boɛ.+
29 Meze kɛ saa mekɔ a, bedi anwo ɛzulolɛ bara bɛ avinli+ na bɛ nee mboane ne mɔ bali ye atisesebɛ nu,
30 na menli badwazo wɔ bɛ avinli na bɛaha adalɛ edwɛkɛ bɛava bɛahwe ɛdoavolɛma ne bɛali bɛ nzi.+
31 “Ɛhye ati bɛmaa bɛ nye ɛla ɛkɛ na bɛhakye kɛ ɛvolɛ nsa ɛne,+ alehyenlɛ nee aledwolɛ, meangyakyi ye ɛlɛ kɛ mebava ɛzunlɛ meadu bɛ nuhua ko biala folɛ.
32 Akee mefa bɛ meawula Nyamenle nee ye ɛlolɛ kpole ne anwo edwɛkɛ ne asa anu, edwɛkɛ mɔɔ kola maa bɛ anwosesebɛ na ɔmaa bɛnyia agyapadeɛ wɔ nwuanzanwuanzama kɔsɔɔti avinli la.+
33 Me nye ambolo awie biala dwɛtɛ fufule anzɛɛ nvutuke anzɛɛ ɛdanlɛ.+
34 Bɛdabɛ bɛze kɛ me sa anloa gyima mɔɔ meyɛ la a meva menlea me nwo+ nee menli mɔɔ me nee bɛ lua la a.
35 Mehile bɛ wɔ ninyɛne muala anu kɛ ɔwɔ kɛ bɛyɛ gyima ɛsesebɛ zɛhae+ bɛfa bɛboa bɛdabɛ mɔɔ bɛle bɛtɛɛ la, na ɔwɔ kɛ bɛkakye Awulae Gyisɛse edwɛkɛ ne mɔɔ ɔhanle la, ɔse: ‘Anyelielɛ dɔɔnwo wɔ ɛmaanlɛ nu+ tɛla ɛlielɛ.’”
36 Na mɔɔ ɔhanle edwɛkɛ ɛhye mɔ ɔwiele la, ɔ nee bɛ muala bɛhotole na bɛyɛle asɔne.
37 Nɔhalɛ nu, bɛ muala bɛzunle kpole, bɛyɛle Pɔɔlo atuu* na bɛvole ɔ nloa anwo,
38 ɔluakɛ edwɛkɛ ne mɔɔ ɔhanle kɛ bɛnrɛnwu ɔ nyunlu bieko bɔbɔ la yɛle bɛ nyane kpole.+ Akee bɛhɔzɔhonle ye wɔ meli ne anwo.
Ɔbodwɛkɛ
^ Giliki aneɛ nu, “ɔbubule paano.”
^ Anzɛɛ “mɛlɛbɛnwoaze adwenle.”
^ Anzɛɛ “ɔbaboa bɛ.”
^ Anzɛɛ “ɛkɛla.”
^ Anzɛɛ “bodane ne anwo edwɛkɛ.”
^ Giliki aneɛ nu, “bɛvale bɛ sa bɛbɛkale Pɔɔlo akɔme.”
