Hozia 7:1-16
7 “Mekɛ mɔɔ mebayɛ Yizilayɛ ayile la,Yifelaem ɛtane ne,Yɛɛ Samɛlea amumuyɛyɛlɛ ne noko bala ali.+
Ɔluakɛ bɛle mɛlɛbɛla;+Nwule bubu azua na bɛwua, yɛɛ nwule ekpunli wua alienwo.+
2 Noko bɛnga ye wɔ bɛ ahonle nu kɛ mebahakye bɛ amumuyɛyɛlɛ ne kɔsɔɔti.+
Akee bɛ nyɛleɛ kɔsɔɔti ɛbɔ bɛ ɛyia;Ɔ muala gua me nyunlu.
3 Bɛmaa belemgbunli ne di fɛlɛko wɔ bɛ amumuyɛyɛlɛ ne anwo,Na mgbanyima anye die bɛ mɛlɛbɛla ne anwo.
4 Bɛ muala bɛle agyalɛzɛkyelɛma,Bɛsɔ kɛ fonlomo mɔɔ awie mɔɔ to paano ɛdo senle wɔ nu la,Saa ɔfete esamo ne ɔwie a, ɔnga senle ne anu bieko kɔkpula kɛ esamo ne kɛwie tu la.
5 Yɛ belemgbunli ɛvoyialilɛ kenle ne, mgbanyima anwo dole bɛ—Bɛvale ɛya ɔlua nwanye ti.+
Yeva agolobɛnwoma agɔnwolɛ.
6 Ɔluakɛ bɛfa ahonle mɔɔ ɛlɛsɔ kɛ fonlomo la a bɛba a.*
Nɔe ne amuala, ahenle mɔɔ to paano ne la da;Nwonlomɔ nu, fonlomo ne sɔ kɛ sendɔlɔra.
7 Bɛ muala bɛlɔ kɛ fonlomo la,Yɛɛ bɛkye bɛ tumivolɛma* bɛdi.
Bɛ arelemgbunli kɔsɔɔti ɛdɔ aze;+Bɛ nuhua ko bɔbɔ ɛnzu ɛnvɛlɛ me.+
8 Yifelaem nee maanle maanle ne ɛli afonla.+
Yifelaem le kɛ keeki kunguma mɔɔ bɛangakyi ɔ nzi la.
9 Nyɛvolɛ ɛzɛkye ye anwosesebɛ,+ noko ɔnze.
Yɛɛ ye egyɛne ne ɛyɛ fufule nwohyee, noko ɔnnwu ye.
10 Yizilayɛ anwomemaazo ne ɛli daselɛ ɛtia ye,+Noko bɛtɛsiale bɛtɛbale Gyihova bɛ Nyamenle ne ɛkɛ,+Yɛɛ ɛhye mɔ amuala anzi bɛtɛkpondɛle ye.
11 Yifelaem le kɛ abubule koasea mɔɔ ɔnlɛ adwenle* la.+
Bɛzu bɛvɛlɛ Yigyibiti;+ bɛhɔ Aselea.+
12 Ɛleka biala mɔɔ bɛkɛhɔ la, mebadɛlɛ me asawu ne anu meagua bɛ nwo zo.
Mebahwe bɛ meara aze kɛ anwomanyunlu nloma.
Mebahwe bɛ nzo kɛ mɔɔ membɔle bɛ kɔkɔ wɔ mekɛ mɔɔ bɛyiale la.+
13 Bɛ gyakɔ, ɔluakɛ bɛnriandi bɛvi me nwo!
Ɛzɛkyelɛ bara bɛ nwo zo, ɔluakɛ bɛyɛ ɛtane bɛtia me!
Ɛnee meziezie me nwo kɛ medie bɛ, noko bɛbɔ adalɛ bɛtia me.+
14 Bɛanvi bɛ ahonle nu bɛanzu bɛanvɛlɛ me bɛamkpondɛ moalɛ,+Wɔ mekɛ bɔbɔ mɔɔ bɛla bɛ ɛkpa ne mɔ azo bɛlɛye awolɛ la.
Bɛ ma nee nwanye fofolɛ ti bɛbodɛboda bɛ nwo;Bɛdwazo bɛtia me.
15 Mentetele bɛ na memaanle bɛ sa nu mianle,Noko bɛdwazole bɛtiale me, na bɛbɔle kpɔkɛ ɛtane.
16 Bɛgyakyile mɔɔ bɛlɛyɛ la, noko bɛamba nɔhalɛ ɛzonlenlɛ nwo;Ɛnee bɛle kɛ ɛda mɔɔ nuhua ɛdo la, ɛfa ɛ nwo ɛto bɛ nwo zo a ɔnyɛ boɛ.+
Bɛ mgbanyima badɔ dadeɛ nloa ɔluakɛ bɛfa bɛ tafinlima bɛka munzule edwɛkɛ.
Ɛhye ati bɛbagolo bɛ nwo wɔ Yigyibiti.”+
Ɔbodwɛkɛ
^ Anzɛɛ ɔkola ɔkile, “Ɔluakɛ bɛ nee bɛ adwenle ɛtane ne ɛlɛba a, bɛ ahonle le kɛ fonlomo.”
^ Hibulu aneɛ nu, “ndɛnebuavolɛma.”
^ Hibulu aneɛ nu, “ɔnlɛ ahonle.”
