Duzu A Baebolo Ne Ka Ye Wɔ Ɛhɔne Mɔɔ Ɛra La Anwo A?

BƆ

“Yɛye ɛhɔne yɛavi ɛkɛ.” Edwɛkɛ ɛhye maa yɛnwu kɛ ewiade mgbanyima anye la kɛ bɛbahola bɛaye ɛhɔne bɛavi ɛkɛ amaa awie biala anyia aleɛ ali wɔ ewiade ye anu, na bɛali ɛhɔne mɔɔ le alesama ngyegyelɛ kpole la anwo gyima. a Noko asoo ɛhɔne bavi ewiade ye anu ɔ? Duzu a Baebolo ne ka a?

Baebolo ne hanle kɛ ɛhɔne bara

Baebolo ne hanle dole ɛkɛ ne kɛ ɛhɔne bara wɔ “mekɛ mɔɔ li awieleɛ,” mɔɔ le yɛ mekɛ ye la anu. (2 Timote 3:1) Tɛ Nyamenle a ɛmaa ɛhɔne ɛra a, noko ɔbɔle yɛ nwolɛ kɔkɔ. (Gyemise 1:13) Yɛ Baebolo ngapezo nwiɔ ɛhye mɔ nzonlɛ.

“Ɛhɔne . . . bara ɛleka ngakyile.” (Mateyu 24:7) Baebolo ngapezo ɛhye maa yɛnwu kɛ ɛhɔne bara ɛleka dɔɔnwo. Mgbonda mɔɔ menli mɔɔ sukoa kɛzi bɛdua aleɛ nee kɛzi bɛkyehyɛ la anwo debie la ɛva ɛdo gua kenlensa ye la kile kɛ: “Ɛhɔne ku menli dɔɔnwo yɛɛ bɛnnyia aleɛ kpalɛ bɛnli.” b Menli mgbe dɔɔnwo mɔɔ wɔ maanle dɔɔnwo anu la ɛnnyia aleɛ mɔɔ sa bɛ la ɛnli. Ɔyɛ alɔbɔlɛ kɛ ɛhye ati bɛ nuhua dɔɔnwo ɛwu.

“Nea! ɛkpɔnwɔ bile bie, na ahenle mɔɔ de zo la lɛ tone wɔ ɔ sa nu.” (Yekile 6:5) Wɔ ngapezo ɛhye anu, sɛkɛlɛneɛ adenle zo ɛkpɔnwɔ ne nee ahenle mɔɔ de zo la gyi ɛkɛ ne maa ɛhɔne mɔɔ bara wɔ awieleɛ mekɛ ne anu la. c Bɛbava tone ne mɔɔ ahenle mɔɔ de zo lɛ wɔ ɔ sa nu la bɛazuzu aleɛ amaa awie biala anyia ekyi. Mɔɔ ahenle ɛlɛka ɛkpɔnwɔ ne la, ɛnelɛ bie hanle kɛ aleɛ bolɛ bayɛ se kpalɛ ɔti, menli mmasɛkye debie mɔɔ anwo hyia la. (Yekile 6:6) Edwɛkɛ ɛhye fale ɛhɔne mɔɔ ɛra ewiade amuala mɔɔ yemaa aleɛ bolɛ ɛyɛ se na menli mgbe dɔɔnwo ɛnnyia aleɛ kpalɛ ɛnli la anwo.

Kɛzi ɛhɔne bavi ɛkɛ ne la

Mbɔlɔba bie mɔ ka kɛ, bɛbahola bɛalua aleɛ dɔɔnwo wɔ azɛlɛ ye azo mɔɔ baza awie biala a. Ɛnee duzu ati a ɛhɔne ɛra a? Na duzu a Baebolo ne ka kɛ yɛ Bɔvolɛ Gyihova d bayɛ amaa yeaye ngyegyelɛ ɛhye mɔ yeavi ɛkɛ a?

Ngyegyelɛ: Arane ne mɔ ɛngola ɛnye ehyia nee nzisi mɔɔ maa ɛhɔne ku menli la ɛnvi ɛkɛ.

Sɔbelɛ: Bɛbava Nyamenle Belemgbunlililɛ ne mɔɔ di munli la bazie alesama arane ne mɔ mɔɔ ɛnli munli la agyakɛ anu. (Daneɛle 2:44; Mateyu 6:10) Ɛnɛ ɔyɛ se ɔmaa ehyianvolɛma dɔɔnwo kɛ bɛbanyia ezukoa badɔ aleɛ, noko Nyamenle Belemgbunlililɛ ne baye ɛhye avi ɛkɛ. Baebolo ne ka Gyisɛse Kelaese mɔɔ le Nyamenle Belemgbunlililɛ ne azo Belemgbunli la anwo edwɛkɛ kɛ: “Ɔbalie ehyianli mɔɔ su kpondɛ moalɛ, koahweabane nee mɔɔ ɛnlɛ boavolɛ la noko. . . . Aleɛ babu azɛlɛ ne azo; ɔbabu awoka ne mɔ azo.”—Edwɛne 72:12, 16.

Ngyegyelɛ: Konle sɛkye ninyɛne nee maanle bie ezukoa gyinlabelɛ, na ɔmaa ɔyɛ se kɛ menli banyia aleɛ mɔɔ bɛhyia nwo la.

Sɔbelɛ: “[Gyihova maa] bɛgyakyi konle wɔ azɛlɛ ye kɔsɔɔti azo. Ɔbubu ɛda nu na ɔsɛkye atwɛ ne mɔ; ɔfa senle ɔyela konle ehwili ne mɔ.” (Edwɛne 46:9) Nyamenle bazɛkye konle ninyɛne nee menli mɔɔ kulo konle la. Ɔti ɔnrɛyɛ se kɛ awie biala banyia aleɛ. Baebolo ne bɔ ɛwɔkɛ kɛ: ‘Tenlenema bakpazi, na anzodwolɛ bara ɛleka biala.’—Edwɛne 72:7.

Ngyegyelɛ: Maanle nu tɛnlabelɛ mɔɔ ɛnle kpalɛ yɛɛ esiane mɔɔ sɛkye aleɛ mɔɔ bɛdua na ɔku nyɛmoa la.

Sɔbelɛ: Nyamenle bamaa maanle nu tɛnlabelɛ ayɛ kpalɛ amaa bɛdua aleɛ a yeayɛ boɛ. Baebolo ne ka kɛ: “[Gyihova maa] ahumu ne gua dii; nyevile azɛlɛkye ne mɔ yɛ ngungoonwu. . . . Ɔmaa ɛsɛlɛ kakyi nzubula dɔɔnwo, yɛɛ ɔmaa azɛlɛ resee kakyi nzule ɛvileka. Ɔmaa bɛdabɛ mɔɔ ɛhɔne ku bɛ la tɛnla ɛkɛ . . . Bɛdua ma wɔ ɛya nu na bɛyɛ vanye egyinli mɔɔ so ma dɔɔnwo la.”—Edwɛne 107:29, 35-37.

Ngyegyelɛ: Menli mɔɔ le anyebolo na bɛkulo ezukoa la ɛnva adenle kpalɛ zo ɛnlua aleɛ yɛɛ bɛmmaa menli mɔɔ hyia nwo la asa ɛnga bie.

Sɔbelɛ: Nyamenle Belemgbunli ne baye menli mɔɔ le nzisi na bɛnli nɔhalɛ la avi ɛkɛ. (Edwɛne 37:10, 11; Ayezaya 61:8) Baebolo ne ka Gyihova Nyamenle anwo edwɛkɛ kɛ ‘ɔdi pɛlepɛle ɔmaa menli mɔɔ bɛsisi bɛ, ɔmaa mɔɔ ɛhɔne ku ye la aleɛ.’—Edwɛne 146:7.

Ngyegyelɛ: Saa ɛkyɛ aleɛ mɔɔ bɛnyia ye wɔ ewiade ye anu la anu nsa a, nuhua ko sɛkye anzɛɛ minli ɛvolɛ biala.

Sɔbelɛ: Wɔ Nyamenle Belemgbunlililɛ ne anu bɛbayɛ aleɛ nwo ngyehyɛleɛ kpalɛ. Mɔɔ Gyisɛse wɔ azɛlɛ ye azo la, yeammaa bɛanzɛkye aleɛ. Kɛ neazo la, mekɛ bie ɔluale nwanwane adenle zo ɔmaanle menli mɔɔ bo 5,000 la aleɛ. Nzinlii, ɔhanle ɔhilele ye ɛdoavolɛma ne kɛ: “Bɛsesa ɔ bo zo ne mɔɔ ɛha la, amaa debie biala anzɛkye mgbane.”—Dwɔn 6:5-13.

Kɛmɔ Nyamenle Belemgbunlililɛ ne baye ninyɛne mɔɔ fa ɛhɔne ba la avi ɛkɛ ne la ati, alesama banyia aleɛ kpalɛ dɔɔnwo ali. (Ayezaya 25:6) Amaa wɔanwu mekɛ mɔɔ Nyamenle Belemgbunlililɛ ne bayɛ ɛhye la, kenga edwɛkɛ “Mekɛ Boni A Nyamenle Belemgbunlililɛ Ne Bali Tumi Wɔ Azɛlɛ Ye Azo A?”

a Maanle mɔɔ boka United Nations ne anwo la liele 2030 Agenda for Sustainable Development ne dole nu wɔ 2015.

b Amaneɛbɔlɛ mɔɔ Food and Agriculture Organization, International Fund for Agricultural Development, United Nations Children’s Fund, United Nations World Food Programme, yɛɛ World Health Organization mɔɔ wɔ United Nations abo vale dole gua la.

c Amaa wɔazukoa mgbɔnwɔkavoma nna ne mɔɔ wɔ Yekile anwo debie la, kenga “Mgbɔnwɔkavoma Nna Ne—Bɛmɛ A Le Nwane Mɔ?”

d Nyamenle duma a le Gyihova. (Edwɛne 83:18) Nea edwɛkɛ, “Gyihova A Le Nwane?”