Yɛ muala yɛ nye la kɛ ninyɛne bahɔ boɛ amaa yɛ nee yɛ mbusuafoɔ wɔ mekɛ mɔɔ yɛlɛbɔ ɛvolɛ 2023 abo la. Duzu ati a yɛkola yɛnyia anyelazo a?

 Baebolo ne maa yɛnwu kɛ ɔnrɛhyɛ ngyegyelɛ mɔɔ yɛyia ye ɛnɛ la amuala bavi ɛkɛ. Nɔhalɛ nu, edwɛkɛ biala mɔɔ wɔ Baebolo ne anu la “bɛhɛlɛ bɛmaa yɛ ɛhilehilelɛ, amaa yɛalua. . . Ngɛlɛlera ne anu arɛlekyekyelɛ zo yɛanyia anyelazo.”​​—Wulomuma 15:4.

•   Amaa wɔanwu Baebolo ne anu ɛwɔkɛ ne mɔ anwo edwɛkɛ dɔɔnwo la kenga “Ninyɛne Bayɛ Kpalɛ Kenle Bie.”

 Baebolo ne anu anyelazo ne le kɛ “sɛkɛ maa yɛ ngoane.” (Hibuluma 6:19, ɔbodwɛkɛ) Zɔhane anyelazo ne kola maa yɛgyinla kpundii. Ɔbahola yeaboa yɛ yeamaa yɛagyinla ngyegyelɛ mɔɔ yɛyia bɛ ɛnɛ la anloa, yɛanyia adwenle kpalɛ na yɛanyia anyelielɛ dahuu. Kɛ neazo la:

•   Nea kɛzi Baebolo ne anu anyelazo ne boale nrenyia bie mɔɔ ɛnee subane ɛtane ɛha ɔ nwo la. Nea ‘Ɛbɛlabɔlɛ Vonlenle Me’ vidio ne.

•   Nea kɛzi saa yɛ dɔvolɛ bie wu a, Baebolo ne anu anyelazo ne bahola aboa yɛ la. Nea Arɛlekyekyelɛ Maa Bɛdabɛ Mɔɔ Bɛlɛdi Alɔbɔlɛ La vidio ne.

 Menli dɔɔnwo anye la kɛ bɛbanyia ninyɛne mgbalɛ noko bɛngola bɛnnwu ye saa bɛ anyelazo ne bara nu a. Ɛwɔkɛ mɔɔ wɔ Baebolo ne anu la le ngakyile. Duzu ati ɔ? Ɔluakɛ Baebolo ne anu ɛwɔkɛ ne mɔ vi Gyihova a Nyamenle mɔɔ “ɔngola ɔmbɔ adalɛ la” ɛkɛ. (Taetɛse 1:2) Gyihova angomekye a lɛ tumi mɔɔ ɔkola ɔmaa ye ɛwɔkɛ kɔsɔɔti ba nu a; ɔkola ɔyɛ “debie biala mɔɔ ɔkulo la.”​​—Edwɛne 135:5, 6.

 Yɛsɛlɛ wɔ bɔ mɔdenle kɛ ɛbanyia anyelazo kpalɛ mɔɔ wɔ Baebolo ne anu la azo nvasoɛ. Saa ‘ɛneɛnlea Ngɛlɛlera ne anu kpalɛ a’ ɔbamaa anwodozo mɔɔ ɛlɛ la anu amia. (Gyima ne 17:11) Dua yɛ Baebolo ɛzukoalɛ ngyehyɛleɛ ne mɔɔ bɛndua ɛhwee la azo yɛ ɛhye. Nyia anyelazo wɔ mekɛ mɔɔ ɛlɛbɔ 2023 abo la!