Arane nu nzisi le ngyegyelɛ mɔɔ kɔ zo wɔ ewiade ɛleka biala na mɔɔ fi nu ba la ɛnle kpalɛ fee. a Kɛ neazo la, wɔ COVID-19 ewulenzane ne anu, bɛbɔle arane nu mgbanyima mɔɔ bɛwɔ maanle dɔɔnwo anu la somolɛ kɛ bɛli ezukoa mɔɔ anrɛɛ ɔwɔ kɛ bɛfa bɛboa menli mɔɔ bɛ nwo ɛhyele bɛ wɔ ewulenzane ne anu la. Nzisi nyɛleɛ ɛhye maanle menli dɔɔnwo nwunle amaneɛ na bɛwule ɔluakɛ bɛannyia ayileyɛlɛ mɔɔ ɔwɔ kɛ bɛnyia ye la.

 Ngyegyelɛ mɔɔ arane nu nzisi fa ba la ka menli dɔɔnwo. David Cameron, mɔɔ ɛnee ɔle United Kingdom maanle ne anu kpanyinli la hanle kɛ: “Nzisi le kɛ ɛhane kpole ko mɔɔ yehye maanle maanle kɔsɔɔti a.”

 Noko akee, yɛbahola yɛazi ye pi kɛ ɔnrɛhyɛ biala arane nu nzisi kɔsɔɔti abo bapɛ. Duzu ati a yɛkola yɛka ye zɔ a? Yɛ mɔɔ Baebolo ne ka kɛ Nyamenle bayɛ la nzonlɛ.

 Nyamenle ɛha ye wɔ Baebolo ne anu kɛ: “Medame Gyihova, mekulo pɛlepɛlelilɛ; mekyi awule nee ninyɛndane.” b (Ayezaya 61:8) Saa menli ɛlɛnwu amaneɛ ɔlua nzisi ti a, Nyamenle nwu ye. (Mrɛlɛbulɛ 14:31) Yebɔ ɛwɔkɛ kɛ: ‘Ɔluakɛ bɛsisi mɔɔ nyane ɛha ye la ati, mebadwazo meayɛ nwolɛ debie.’—Edwɛne 12:5.

 Duzu a Nyamenle bayɛ a? Kɛ anrɛɛ ɔbayɛ arane mɔɔ bɛwɔ ɛkɛ ne boɛ la, ɔbava ye anwuma arane ɛdeɛ ne mɔɔ bɛfɛlɛ ye “Nyamenle Belemgbunlililɛ” la yeazie bɛ gyakɛ anu. (Maake 1:14, 15; Mateyu 6:10) Baebolo ne ka kɛ: ‘Anwuma Nyamenle ne bava belemgbunlililɛ bie azie ɛkɛ mɔɔ ɔbabubu arelemgbunlililɛ ɛhye mɔ amuala na yeabɔ bɛ bo zo, na ɔ ngomekye a ɔbagyinla ɛkɛ ne dahuu a.’ (Daneɛle 2:44) Nyamenle balua adenle ɛhye azo aye nzisi avi ɛkɛ.

 Kɛzi yɛkola yɛnwu ye kɛ nzisi biala ɛnrɛra Nyamenle Belemgbunlililɛ ne anu a? Suzu ɛhye mɔ anwo.

1.  1. Tumi. Belemgbunlililɛ ɛhye tumi ne vi Nyamenle Tumivolɛ Bedevinli ne ɛkɛ.—Yekile 11:15.

    Deɛmɔti ɔhyia la: Saa alesama arane bahola ayɛ bɛ gyima a, kyesɛ bɛdielie ezukoa bɛfi bɛ maanlema ne ɛkɛ. Fane dɔɔnwo ne ala, ɛhye fa belaebo ɛlielɛ, awule nee nzisi ba. Noko akee, kɛmɔ Nyamenle Tumivolɛ Bedevinli ne a banlea ye maanlema ne anwo zo la ati, ɔbamaa bɛ sa aha mɔɔ bɛhyia nwo la kɔsɔɔti.—Edwɛne 145:16.

2.  2. Tumivolɛ. Nyamenle ɛkpa Gyisɛse Kelaese kɛ yemɔ a ɔbanlea Belemgbunlililɛ ne azo a.—Daneɛle 7:13, 14.

    Deɛmɔti ɔhyia la: Alesama arane mɔɔ bɛbɔ mɔdenle bɔbɔ la, menli kola nyia bɛ nwo zo tumi maa bɛyɛ ninyɛndane. (Nolobɔvo 7:20) Noko akee, Gyisɛse ɛmaa yela ali kɛ awie ɛnrɛhola ɛnrɛmaa ye belaebo. (Mateyu 4:8-11) Bieko, ɛlɔlɛ mɔɔ ɔlɛ ɔmaa ye maanlema la ka ye maa ɔfa bɛ ngyianlɛdeɛ ɔdimoa.—Edwɛne 72:12-14.

3.  3. Mɛla. Nyamenle mɛla di munli, ɔmaa menli mɔɔ di zo la anye die.—Edwɛne 19:7, 8.

    Deɛmɔti ɔhyia la: Sonla mɛla ta yɛ kpomgbondee, ɔle adesoa yɛɛ bɛnva bɛnli gyima kpalɛ na ɛhye fa nzisi ba. Noko akee, nvasoɛ wɔ Nyamenle mɛla zo yɛɛ ɔnyɛ se. (Ayezaya 48:17, 18) Bieko, tɛ mɔɔ yɛyɛ la ala a mɛla ɛhye mɔ ka nwolɛ edwɛkɛ a, emomu deɛmɔti yɛyɛ la. (Mateyu 22:37, 39) Nyamenle nwu ahonle nu na anwunvɔnezelɛ nu a ɔfi ɔmaa yɛ mɛla a.—Gyɛlɛmaya 17:10.

 Yɛto ɛsalɛ yɛavɛlɛ wɔ kɛ sukoa kenle bie arane mɔɔ nzisi ɛnle nu mɔɔ Baebolo ne ɛbɔ nwolɛ ɛwɔkɛ la anwo debie.

•   Kenga “Nyamenle Belemgbunlililɛ—Arane Mɔɔ Nzisi Ɛnle Nu” na ɛbanwu ndelebɛbo nsa bieko mɔɔ maa yɛnwu kɛ nzisi biala ɛnrɛra Nyamenle Belemgbunlililɛ ne anu la.

•   Nea Duzu A Le Nyamenle Belemgbunlililɛ Ne? vidio ne amaa wɔanwu Nyamenle Belemgbunlililɛ ne nee mɔɔ ɔbayɛ yeamaa alesama la.

•   Biza Baebolo ɛzukoalɛ mɔɔ bɛnlie ɛhwee la anwo adenle na sukoa kɛzi Baebolo nu ɛwɔkɛ ne mɔ baboa wɔ la.