Wɔ Molɛ, November 20, 2022, yɛɛ Maamgbole Koyɛlɛ Eku ne vale COP27 ayia mɔɔ ɔfale maanle nu tɛnlabelɛ mɔɔ ɔlɛsɛkye anwo la rale awieleɛ a. Mgbanyima ne mɔ liele dole nu kɛ bɛbava ezukoa bɛaboa maanle mɔɔ bɛdi ehyia la bɛamaa bɛava bɛali ngyegyelɛ mɔɔ maanle nu tɛnlabelɛ mɔɔ ɔlɛsɛkye ɛva ɛra bɛ nwo zo la anwo gyima. Noko akee, menli dɔɔnwo ɛnwu kɛ ɛhye ɛnrɛye ngyegyelɛ mumua ne ɛnrɛvi ɛkɛ.

•   António Guterres, Maamgbole Koyɛlɛ Eku ne kɛlɛvolɛ kpanyinli ne hanle ye wɔ November 19, 2022 kɛ, “Ɔyɛ me anyelielɛ kɛ yɛzi kpɔkɛ kɛ yɛbaye ezukoa yɛado ahane amaa yɛava yɛaboa bɛdabɛ mɔɔ maanle nu tɛnlabelɛ mɔɔ ɛlɛsɛkye la ɛha bɛ la. Noko akee ɛhye angome ɛnrɛhola ɛnrɛli tɛnlabelɛ ne anwo gyima . . . Tɛnlabelɛ mɔɔ azɛlɛ ne wɔ nu kɛkala la, saa yɛanyɛ nwolɛ debie ndɛndɛ a, ɔbazɛkye bɔkɔɔ mɔɔ yɛnrɛhola yɛnrɛyɛ nwolɛ ɛhwee a.”

•   “Wɔannea a ɔnrɛhyɛ biala maanle nu tɛnlabelɛ bahakyi kpole mɔɔ ɔbava ngyegyelɛ yeara menli kɔsɔɔti anwo zo a.”​—Mary Robinson, ɛnee ɔle Ireland maanle kpanyinli yɛɛ Maamgbole Koyɛlɛ Eku ne foa mɔɔ nea Sonla Fanwodi Zo La Agyakɛ Anu Gyinlavolɛ, November 20, 2022.

 Mgbavolɛ nee mbɛlɛra dwenle kɛzi yɛ pelanet ne bayɛ wɔ kenle bie la anwo kpalɛ na ɔgyegye bɛ. Noko, asoo maanle maanle ne mɔ bahola abɔ nu ali ɛwɔkɛ mɔɔ bɛbɔ kɛ bɛbayɛ maanle nu tɛnlabelɛ mɔɔ ɔlɛsɛkye la boɛ la azo ɔ? Duzu a Baebolo ne ka a?

 Baebolo ne ka kɛ saa arane ne mɔ bɔ mɔdenle yɛ maanle nu tɛnlabelɛ mɔɔ ɔlɛsɛkye la anwo debie kɛ nzɔne bɔbɔ a, bɛnrɛhola bɛnrɛdu ngyegyelɛ ne abo. Yɛ ninyɛne nwiɔ ɛhye mɔ nzonlɛ:

•   “Debie mɔɔ ɛhyea la, bɛngola bɛndenrɛ ye.”​—Nolobɔvo 1:15.

   Mɔɔ ɔkile la: Arane mgbanyima ɛnli munli yɛɛ bɛambɔ sonla kɛ ɔnlea ɔ gɔnwo sonla nwo zo. (Gyɛlɛmaya 10:23) Saa maanle maanle ne mɔ bɔ nu yɛ gyima ɛsesebɛ kɛ nzɔne bɔbɔ a, bɛnrɛhola bɛnrɛli ngyegyelɛ mɔɔ wɔ ewiade la anwo gyima.

•   ‘Menli bahulo bɛ ngome bɛ nwo, bɛbahulo ezukoa yɛɛ bɛbayɛ menli mɔɔ bɛ nee bɛ ɛnyɛ ngyehyɛleɛ a.’​—2 Timote 3:2, 3.

   Mɔɔ ɔkile la: Baebolo ne hanle yɛ mekɛ ye anwo edwɛkɛ dole ɛkɛ ne kɛ menli dɔɔnwo bayɛ angomedi yɛɛ bɛnrɛnyia ɛhulolɛ kɛ bɛbɔ nu bayɛ gyima mɔɔ baboa awie mɔ a.

 Saa yɛ pelanet ne bayɛ boɛ kenle bie a, ɔngyi ɛwɔkɛ mgbole mɔɔ alesama arane ne mɔ ɛbɔ la azo. Nyamenle ɛkpa Gyisɛse Kelaese kɛ Belemgbunli mɔɔ ɔfɛta kɛ ɔdi ewiade amuala azo tumi a. Baebolo ne ka ɔ nwo edwɛkɛ kɛ:

•   “Tumililɛ ne bala ɔ bati. Bɛbavɛlɛ ye Nwanwane Folɛtuvolɛ, Nyamenle Tumivolɛ, Dahuu Selɛ, Anzodwolɛ Belemgbunli.”​—Ayezaya 9:6.

 Gyisɛse a le Nyamenle Belemgbunlililɛ ne anzɛɛ anwuma arane ne azo Belemgbunli a. (Mateyu 6:10) Ɔlɛ tumi, nrɛlɛbɛ yɛɛ ɛhulolɛ kɛ ɔbayɛ yɛ pelanet ne boɛ na yeanlea menli mɔɔ de azɛlɛ ne azo la. (Edwɛne 72:12, 16) Anwuma arane ɛhye bazɛkye “bɛdabɛ mɔɔ bɛlɛsɛkye azɛlɛ ne la” na yeayɛ azɛlɛ ne boɛ bieko.​—Yekile 11:18; Ayezaya 35:1, 7.

 Saa ɛkulo kɛ ɛnwu maanle nu tɛnlabelɛ mɔɔ ɔlɛsɛkye la anwo sɔbelɛ bɔkɔɔ a, kenga edwɛkɛ mɔɔ ɔse, “Climate Change and Our Future​—What the Bible Says” la.