Maanyɛlɛ nwo basabasayɛlɛ ɛlɛkɔ zo wɔ ewiade ɛleka dɔɔnwo.

•   Maanyɛlɛma 39 mɔɔ bɛhu bɛ wɔ Mexico nee maanyɛlɛ nwo basabasayɛlɛ gyɛne ɛmaa ɛzulolɛ ɛha menli na yezɛkye ɛra mɔɔ bɛdole wɔ 2023-2024 la.

•   Maanyɛlɛ nwo basabasayɛlɛ dɔɔnwo ɛra Europe kenlensa ye, bie a le Slovakia maanle kpanyinli ne mɔɔ anrɛɛ bɛku ye wɔ May 15, 2024 la.

•   Ɔzinle menli mɔɔ wɔ United States la anwo kɛ bɛbɔle mɔdenle bieko kɛ bɛku Donald Trump mɔɔ ɛnee le maanle kpanyinli la wɔ September 15, 2024.

 Duzu ati a menli yɛ basabasa wɔ maanyɛlɛ nwo a? Asoo ɔbara awieleɛ? Duzu a Baebolo ne ka a?

 Baebolo ne hanle kɛ wɔ yɛ mekɛ ye, mɔɔ le “mekɛ mɔɔ li awieleɛ” la anu, menli dɔɔnwo subane bava basabasayɛlɛ nee mgbakyemgbakyenu ara.

•   ‘Wɔ mekɛ mɔɔ li awieleɛ la anu, mekɛ mɔɔ anu yɛ se la bara. Ɔluakɛ menli bayɛ boniayɛma, bɛnrɛli nɔhalɛ, bɛbayɛ menli mɔɔ bɛ nee bɛ ɛnyɛ ngyehyɛleɛ, menli mɔɔ anwo yɛ ɛzulolɛ, menli mɔɔ ye awie mɔ maa, menli mɔɔ le tufoande, menli mɔɔ tu bɛ nloa anu.’​—2 Timote 3:1-4.

 Eza Baebolo ne hanle kɛ atuadelɛ nee maanyɛlɛ nwo basabasayɛlɛ dɔɔnwo bara wɔ mekɛ ɛhye anu. (Luku 21:9) Noko, maanyɛlɛ nwo basabasayɛlɛ nee mgbakyemgbakyenu bavi ɛkɛ.

 Baebolo ne ka kɛ Nyamenle balua ye anwuma arane ne azo yeaye alesama arane kɔsɔɔti yeavi ɛkɛ.

•   “Anwuma Nyamenle ne bava belemgbunlililɛ bie azie ɛkɛ mɔɔ . . . ɔbabubu arelemgbunlililɛ ɛhye mɔ amuala na yeabɔ bɛ bo zo, na ɔ ngomekye a ɔbagyinla ɛkɛ ne dahuu a.”​—Daneɛle 2:44.

 Nyamenle Belemgbunlililɛ ne bamaa koyɛlɛ adɛnla menli avinli na anzodwolɛ ara ewiade amuala.

•   Bɛfɛlɛ Gyisɛse Kelaese mɔɔ le zolɛ Belemgbunli la “Anzodwolɛ Belemgbunli,” na ɔbamaa “anzodwolɛ mɔɔ ɛnlɛ awieleɛ” la ara.​—Ayezaya 9:6, 7.

•   Ɛnɛ bɔbɔ ye maanlema ɛlɛsukoa kɛ bɛbadɛnla anzodwolɛ nu. Ɛhye ati, Baebolo ne ka kɛ: “Bɛbabolo bɛ konle dadeɛ ne mɔ bɛayɛ funduazɛlɛ na bɛabolo bɛ atwɛ ne mɔ bɛayɛ ɛyazonlɛ mbulalɛ. Maanle bie ɛnrɛva konle dadeɛ ɛnrɛra maanle gyɛne nwo zo, yɛɛ bɛnrɛzukoa konle ɛhonlɛ bieko.”​—Ayezaya 2:3, 4.

 Amaa wɔazukoa nwolɛ edwɛkɛ dɔɔnwo la, kenga edwɛkɛ “Duzu A Nyamenle Belemgbunlililɛ Ne Bayɛ A?” na nea Duzu A Le Nyamenle Belemgbunlililɛ Ne? vidio ne.