Ɛnɛ, Gyihova Alasevolɛ nyia sunsum nu aleɛ wɔ fonu, tabelɛte nee yintanɛte zo tɛla mekɛ biala. Noko wɔ ewiade ɛleka dɔɔnwo, yɛ mediema ne mɔ ɛngola Yintanɛte nwo kakɛ tua. Bie mɔ noko de ɛleka mɔɔ bɛta bɛnua kɛnlaneɛ, Yintanɛte ɛnyɛ gyima ndɛndɛ anzɛɛ Yintanɛte ɛnle ɛkɛ fee la.

 Noko kɛkala, yɛ mediema dɔɔnwo kola twe mbuluku nee vidio wɔ bɛ fonu nee bɛ tabelɛte ne mɔ azo mɔɔ bɛngyia Yintanɛte nwo a! Kɛzi bɛkola bɛyɛ ɛhye ɛ?

 JW Box le ɛlɛka ekyi bie mɔɔ bɛfa bɛmaa asafo mɔɔ wɔ ɛleka mɔɔ Yintanɛte ɛnyɛ gyima kpalɛ la. Bɛva router mɔɔ bɛdɔ bɛvi kɔmpɛlɛ bie ɛkɛ nee kɔmpita zo gyimalilɛ bie mɔɔ Bɛtɛle ɛyɛ la a bɛhyehyɛ a, yɛɛ bɛfa mbuluku nee vidio mɔɔ bɛhwe ye wɔ jw.org azo la noko bɛboka nwo. Ko biala bolɛ le kɛyɛ U.S. $75.

 Saa yɛ mediema ne mɔ kɔ Belemgbunlililɛ Asalo a, bɛdua JW Box ne azo bɛtwe mbuluku nee vidio bɛgua bɛ fonu ne mɔ azo. Bɛdabɛ mɔɔ bɛ fonu ne mɔ ɛyɛ dɛba anzɛɛ bɛ bolɛ ɛnyɛ se bɔbɔ la kola twe bie. Na saa asafo bie wɔ ɛleka mɔɔ Yintanɛte ɛnle la a, kɛ ɔkɛyɛ na bɛanyia ninyɛne fofolɛ mɔɔ ɛra la wɔ JW Box ne azo ɛ? Ɔyɛ a Bɛtɛle twe ninyɛne fofolɛ mɔɔ ɛra jw.org azo la gua pen-drive, mɔɔ ko biala bolɛ le kɛyɛ U.S. $4 la azo kɔmaa asafo ne mɔ amaa bɛava bɛawula JW Box ne anu na mediema ne mɔ ahwe bie.

 Kɛzi JW Box ne ɛboa yɛ mediema ne mɔ ɛ? Nathan Adruandra, selɛ bie mɔɔ de Democratic Republic of Congo la hanle kɛ: “Membɔle mɔdenle mekɛ tendenle kɛ metwe ‘O Gyihova, . . . Me Rɛle Wɔ Wɔ Nu’ nee Bɛhakye Lɔɔto Aye Ne vidio ne mɔ noko yeanyɛ boɛ ɛlɛ, na ɔmaanle me sa nu dole. Kɛkala mekola metwe vidio ɛhye mɔ megua me fonu ne azo, na ɛhye boa yɛ maa yɛkilehile yɛ mra ne mɔ kpalɛ.”

 Adiema nrenyia bie mɔɔ boa asafo ne mɔ mɔɔ wɔ Nigeria ɔmaa bɛnwu kɛzi bɛfa JW Box ne bɛdi gyima la hanle kɛ: “Mediema ne mɔ nwu JW Box ne kɛ ɔle ahyɛlɛdeɛ titili bie mɔɔ vi Gyihova ɛkɛ. Ɔyɛ bɛ fɛ kɛ kɛkala bɛkola bɛtwe mbuluku nee vidio mɔɔ wɔ Ninyɛne Titili Mɔɔ Yɛfa Yɛkilehile foa ne la.”

 Bɛva JW Box ne mɔɔ bo 1,700 la bɛhɔmaa yɛ mediema mɔɔ wɔ Africa, Oceania, nee South America la, na bɛlɛyɛ ngyehyɛleɛ bɛava bie bɛahɔmaa asafo dɔɔnwo noko. Kɛzi bɛtua ɛhye anwo kakɛ ɛ? Bɛfa ndoboa mɔɔ bɛye bɛboa ewiade amuala gyima ne, mɔɔ menli dɔɔnwo dua donate.dan124.com azo ye la bie a bɛtua nwolɛ kakɛ a. Yɛyɛ bɛ mo kɛ bɛfi bɛ ahonle nu bɛye ndoboa la.