Gyihova Alasevolɛ ɛva ɛvolɛ mɔɔ bo 130 la ɛyɛ nyianu ɛvolɛ biala. Ɛnɛ, ɛdendɛlɛ mɔɔ bo 40, edwɛne ɛdolɛ, edwɛkɛbizebizalɛ yɛɛ vidio boka nyianu ɛhye mɔ anwo. Amaa menli mɔɔ kɔ nyianu ne mɔ abo anyia zolɛ nvasoɛ la ɔwɔ kɛ ‘bɛte na bɛnwu’ mɔɔ ɛlɛkɔ zo la kpalɛ. (Luku 2:20) Duzu a bɛfa wɔ ndoboa ne bɛyɛ amaa menli mɔɔ kɔ nyianu ɛhye mɔ la anyia zolɛ nvasoɛ ɔnva nwo ɛleka mɔɔ bɛwɔ la ɛ?

 Nwɔhoalilɛ ɛleka dɔɔnwo mɔɔ wɔ abolokyi la lɛ ɔdio/vidio ninyɛne. Ɔti saa yɛhaye ɛleka zɛhae mɔ kɛ yɛfa yɛayɛ nyianu a, duzu ati a yɛfa yɛ ninyɛne yɛdi gyima a? David mɔɔ yɛ gyima wɔ World Headquarters Broadcasting Department ne la kilehile nu kɛ: “Ɛleka ɛhye mɔ anu ekyi bie ala a bɛlɛ ninyɛne mɔɔ maa menli kola tie edwɛkɛ too dɔnehwele nsia a. Kɛ neazo la, nwɔhoalilɛleka ne mɔ fa bɛ milahyinli ne mɔ bɔ nolo anzɛɛ edwɛne sikalɛ bie ala. Bɛfa bɛ screen ne mɔ bɛkile kɛzi nwɔhoa ne ɛlɛkɔ zo, bɛfa bɛyɛ advert na bɛfa bɛye nwɔhoa ne foa bie bieko. Noko yɛmɛ, yɛkulo kɛ menli mɔɔ kɔ nyianu ne la nea vidio mɔɔ wale la na bɛte edwɛkɛ biala mɔɔ bɛbaha ye wɔ bama ne azo la abo kpalɛ.”

 Ɛleka mɔɔ bɛyɛ nyianu ne mɔ la ɛnle ko, ɔti yɛnea ɔdio/vidio ninyɛne mɔɔ ɔwɔ kɛ yɛfa yɛdi gyima wɔ ɛleka ko biala la. Saa bɛnwu ɛleka mɔɔ bɛbayɛ nyianu bie la a, yɛ ɔfese ne mɔ maa Broadcasting Department ne nea kɛzi ɛleka ne kpole de, menli dodo mɔɔ bɛbahɔ yɛɛ ɛleka mɔɔ bɛbadɛnla la. Akee mediema ne mɔ kile ɛleka mɔɔ bɛbava speakers nee screen ne mɔ bɛazie, bɛnea kɛzi bɛbali nwolɛ gyima la, na bɛkɛlɛ ninyɛne mɔɔ bɛbahyia nwo amaa awie biala ade na yeanwu gyimalilɛ ne kpalɛ la.

  Wɔ nyianu mɔɔ bɛbayɛ ye wɔ aneɛ ngakyile nu la abo, ɔdio/vidio ninyɛne ne mɔ anwo gyimayɛlɛ ɛnla aze. Saa bɛbahile ɛdendɛlɛ ne abo bahɔ aneɛ gyɛne nu a, ɔwɔ kɛ menli mɔɔ bɛbahile ɔ bo la nwu vidio ne na bɛte edwɛkɛ ne na akee balua debie gyɛne zo bamaa menli mɔɔ te aneɛ zɔhane la ade edwɛkɛ ne. Ɔlua ninyɛne mɔɔ boa mɔɔ bɛfa bɛdi gyima la ati, bɛkola bɛmaa menli mɔɔ wɔ nyianu ne abo la kɔsɔɔti nwu vidio ko ne ala, saa bɔbɔ bɛlɛtie gyimalilɛ ne wɔ aneɛ mɔɔ bo mɔtwɛ la anu a. David ka kɛ, “Ɔnla aze kɛ yɛbava ninyɛne ɛhye mɔ yɛali gyima yɛɛ ɔwɔ kɛ yɛtete mediema mɔɔ banlea zolɛ la kpalɛ.”

 Ɔfese dɔɔnwo lɛ ɔdio/vidio ninyɛne mɔɔ bɛfa bɛyɛ nyianu ɛvolɛ biala a. Wɔ ɛleka zɛhae mɔ, mediema ne mɔ yɛ ngyehyɛleɛ fa ninyɛne ne kɔ ɛleka ko biala mɔɔ bɛbayɛ nyianu ne bie la. United States ɔfese ne angomekye bɔ kakɛ $200,000 a ɛvolɛ biala amaa bava ninyɛne ne mɔ bahɔ. Noko saa yɛka kɛ yɛtɔ fofolɛ a ye bolɛ bayɛ se adɛla zɔ. Steven mɔɔ nleanle ɔdio/vidio ninyɛne zo wɔ Canada nyianu bie abo la ka kɛ, “Mediema mɔɔ nea ɔdio/vidio ninyɛne ne azo la ɛlɛfa ahɔ ɛleka gyɛne a, bɛnea bɛhyehyɛ nwolɛ mbulalɛ ne pɛpɛɛpɛ amaa bie amminli na bahola bava bayɛ nyianu fofolɛ.”

 Ɔdio/vidio ninyɛne mɔɔ bɛfa bɛhaye la bolɛ yɛ se yɛɛ bie mɔ ɛnle kpalɛ anzɛɛ bɛnnea zo boɛ. Ɔti yɛta yɛtɔ ninyɛne mɔɔ yɛhyia nwo la. Kɛkala, LED screen mɔɔ ye kpole le (16 by 10 ft) la bolɛ le $24,000, yɛɛ microhpone nyɛma ko mɔɔ ye tendenle le mita 15 (fuutu 50) la bolɛ bayɛ kɛ $20. Ɔti, Broadcasting nee Purchasing Department ne ‘sese bolɛ ne’ kolaa na badɔ ninyɛne ne. (Luku 14:28) Kɛ neazo la, menli nyɛ a banyia ninyɛne ne azo nvasoɛ a? Saa yɛtɔ milahyinli fofolɛ a yemɔ baboa kpalɛ ɔ? Asoo yɛbanyia ɛleka kpalɛ mɔɔ yɛbava ninyɛne ne mɔ yeazie ɔ, yɛlɛ nwolɛ mbulalɛ mɔɔ bɛbava bɛali nwolɛ gyima anzɛɛ menli mɔɔ bɛtete bɛ mɔɔ bɛbahola banlea zo amaa yeahyɛ ɔ?

 Amaa ɔdio/vidio ninyɛne ne mɔ ahyɛ na yɛava ndoboa ne bie yeayɛ debie gyɛne mɔɔ hyia la, yɛta yɛyɛ ninyɛne mɔɔ ɛzɛkye la boɛ. Eza yɛfa milahyinli ne mɔ yɛgua debie mɔɔ kola bɔ nwolɛ bane kpalɛ la anu wɔ mekɛ mɔɔ yɛlɛfa yɛahɔ ɛleka gyɛne la yɛɛ eza yɛyɛ debie mɔɔ yɛfa yɛgua nu la boɛ.

 Menli mɔɔ bɛnle Alasevolɛ la anye ɛlie yɛ nyianu ɔdio nee vidio ne mɔ anwo. Kɛ neazo la, wɔ nyianu ko abo, awie bie mɔɔ yɛ gyima wɔ TV gyimalilɛleka mɔɔ ɛlie duma kpalɛ la hanle kɛ yɛ ɔdio nee vidio ne mɔ le kpalɛ. Jonathan mɔɔ yɛ gyima wɔ ɔdio/vidio ɛleka ne wɔ nyianu bo la ka kɛ, “Ɔzinle nrenyia ne anwo wɔ mekɛ mɔɔ ɔnwunle kɛ menli mɔɔ yɛ ɔdio/vidio gyima wɔ nyianu bo la ɛtɛkɔle nwolɛ sukulu biala, emomu bɛle menli mɔɔ bɛdu bɛ nwo bɛmaa ala la. Ɔhanle kɛ ye gyima nu amra fa kenle nnu a hyehyɛ milahyinli mɔɔ yɛfa kenle ko nee foa yɛhyehyɛ la.” Wɔ nyianu ko noko abo, nrenyia bie mɔɔ nea ɛkɛ ne la hanle kɛ, “Menli dɔɔnwo mɔɔ ɛbe edwɛne nee vidio nu la dɔɔnwo ɛra ɛke, noko bɛ nuhua biala ɛnze gyima ɛhye anye zo kɛ bɛdabɛ la!”

 Nyianu bo ɔdio/vidio ninyɛne ne mɔ ɛboa wɔ ɔ? Bie a ɛte nganeɛ kɛ David mɔɔ wɔ England la. Ɔka kɛ: “Menyia ɛvolɛ 88, yɛɛ mehɔ nyianu wɔ me ngoane mekɛ kɔsɔɔti anu. Noko, kɛkala ɔnyɛ se kɛ mebava me adwenle amuala meazie gyimalilɛ ne azo. Kɛmɔ vidio ne mɔ le ngɛnlɛma la ati, ɛnnwu ye bɔbɔ kɛ mekɛ ɛlɛkɔ fee yɛɛ edwɛkɛ ne anu la ɛkɛ.” Micheal mɔɔ wɔ Nigeria la ka kɛ, “Kɛmɔ mediema ne mɔ te mɔɔ tendɛvolɛ ne ɛlɛka anzɛɛ bɛnea vidio ne mɔ la ati, bɛkola bɛfa bɛ adwenle bɛsie gyimalilɛ ne azo yɛɛ ɔnyɛ bɛ ɛvɛlɛ.”

 Mekɛ mɔɔ ɛlɛkɔ ɛvolɛ ɛhye “Bɛbɔ Edwɛkpa Ne Nolo”! Maanzinli nee Nyianu Titili ne la, fa mekɛ ekyi suzu gyima mɔɔ bɛyɛle amaa wɔade gyimalilɛ ne na wɔanlea vidio ne mɔ la anwo. Yɛ nye sɔ ndoboa mɔɔ bɛye nee mɔɔ bɛdua donate.dan124.com azo bɛye mɔɔ boa maa yɛkola yɛyɛ gyima ɛhye la. Yɛda bɛ ase.