Asoo wɔli ɛvolɛ 23 mɔɔ kɔ 65 ɔ? Ɛwɔ dahuu ɛzonlenlɛ gyima ne anu ɔ? Ɛlɛ kpɔkɛdelɛ kpalɛ mɔɔ ɛbahola wɔazonle wɔ ɛleka biala mɔɔ moalɛ nwo hyia la ɔ? Saa ɛbuale kpuya ɛhye mɔ kɛ ɛhɛe a, asoo wɔdwenle nwolɛ ɛlɛ kɛ ɛbahola wɔahɔ Belemgbunlililɛ Edwɛkpakavolɛma Sukulu ne bie ɔ? Ɔvi mekɛ mɔɔ bɛbɔle ɔ bo la, agyalɛma yɛɛ mediema mrenyia nee mraalɛ mɔɔ bɛtɛgyale la apenle dɔɔnwo ɛhɔ bie. Noko akee, yɛhyia mediema mrenyia mɔɔ bɛtɛgyale la dɔɔnwo anwo. Sɛlɛ Gyihova kɛ ɔmaa ɛnyia ɛhulolɛ kpole kɛ ɛbayɛ ye ɛhulolɛdeɛ na wɔazukoa ɔ Ra ne. (Ed 40:8; Mt 20:28; Hi 10:7) Akee suzu kɛzi ɛbahola wɔatete ninyɛne zo amaa wɔafɛta la anwo.

Ndenle boni mɔ azo yɛɛ nienwu a mediema mɔɔ ɛnyia ndetelɛ ɛhye la sonle a? Bie mɔ kɔsonle wɔ ɛleka mɔɔ bɛka aneɛ gyɛne la yɛɛ bie mɔ yɛ azuamgbole zo daselɛlilɛ titili ne bie. Nzinlii bie mɔ noko sonle kɛ maangyebakyi zo neavolɛma agyakɛnugyinlavolɛ, maangyebakyi zo neavolɛma anzɛɛ edwɛkpatɛlɛvolɛma. Mekɛ mɔɔ ɛlɛdwenle ninyɛne mɔɔ ɛbahola wɔayɛ ye wɔ Gyihova ɛzonlenlɛ nu anwo la, ɔrɛla ye kɛ ɛbanyia ngapezonli Ayezaya mɔɔ hanle kɛ: “Mewɔ ɛke! Soa me!” la subane ne bie.​—Ay 6:8.

NEA EDWƐKPATƐLƐVOLƐMA YƐ MA ƐDELƐ GYIMA NE BIE VIDIO NE NA BUA KPUYA ƐHYE MƆ:

• Kɛzi bɛkpa edwɛkpatɛlɛvolɛma ɛ?

• Gyima kpalɛ boni a bɛyɛ a?

• Nyilalɛ boni a edwɛkpatɛlɛvolɛma nyia a?