Duzu ati a ɔwɔ kɛ ɛfi wɔ ahonle nu ɛ nee wɔ awovolɛ di adwelie a? (Mrɛ 23:26) Ɔluakɛ Gyihova se bɛnlea wɔ na bɛhile wɔ adenle. (Ed 127:3, 4) Saa wɔanga mɔɔ ɛdwenle nwo nee mɔɔ gyegye wɔ la anwo edwɛkɛ wɔangile bɛ a, ɔbayɛ se kɛ bɛbahola bɛaboa wɔ. Ɛnrɛnyia anwubielɛ mɔɔ bɛnyia ye wɔ ɛbɛlabɔlɛ nu la azo nvasoɛ. Asoo ɔwɔ kɛ ɛka debie biala ɛkile bɛ ɔ? Tɛ dahuu a nwolɛ hyia a, noko nea boɛ na wɔambɛlɛbɛla wɔ awovolɛ.​—Mrɛ 3:32.

Kɛ ɔkɛyɛ na ɛ nee wɔ awovolɛ adendɛ ɛ? Kpa mekɛ mɔɔ ɔle kpalɛ ɔmaa ɛdawɔ nee bɛdabɛ la. Saa ɛhye bayɛ ngyegyelɛ a, kɛlɛ kɛzi ɛte nganeɛ la maa bɛ nuhua ko. Na saa bɛkulo kɛ bɛ nee wɔ suzu debie mɔɔ ɛ nye ɛnlie nwo kɛ ɛbaha nwolɛ edwɛkɛ la ɛ? Kakye kɛ bɛkulo kɛ bɛboa wɔ. Nwu wɔ awovolɛ kɛ ɛ gɔnwo mɔ na tɛ wɔ agbɔvolɛ. Ɛbanyia mɔdenle mɔɔ ɛbabɔ wɔavi wɔ ahonle nu ɛ nee wɔ awovolɛ ali adwelie la azo nvasoɛ dahuu.​—Mrɛ 4:10-12.

NEA MƆƆ MELE KAKULA LA​—KƐZI ME NEE ME AWOVOLƐ BADENDƐ Ɛ? VIDIO NE NA BUA KPUYA ƐHYE MƆ:

• Duzu a Esther nee Foaik ranwunle ye wɔ bɛ nwo a?

• Duzu a ɛbahola wɔazukoa wɔavi Gyisɛse neazo ne anu a?

• Kɛzi wɔ awovolɛ ɛhile kɛ bɛdwenle ɛ nwo ɛ?

• Baebolo ngyinlazo boni a bahola aboa wɔ yeamaa ɛ nee wɔ awovolɛ ali adwelie a?