Ngakyelɛlilɛ ne maa yɛnyia adenle yɛdwenle kenle bie nyilalɛ mɔɔ ɔlua ɛkpɔnedeɛ ne azo yɛbahola yɛanyia ye la anwo. Nuhua ko a le ewudwazo ne. Gyihova ambɔ yɛ kɛ yɛwu. Ɛhye ati a yɛ kulovolɛ bie wu a yɛdi nyane kpalɛ la. (1Kɔ 15:26) Mɔɔ Gyisɛse nwunle kɛ ye ɛdoavolɛma ne ɛlɛsu Lazalɛse mɔɔ ɛwu la ɔlile nyane. (Dwn 11:33-35) Kɛmɔ Gyisɛse zukoale ɔ Ze pɛpɛɛpɛ la ati, yɛze kɛ Gyihova noko di nyane wɔ mekɛ mɔɔ ɔkɛnwu kɛ yɛlɛdi yɛ kulovolɛ bie ewule nwo nyane la. (Dwn 14:7) Gyihova anye la mekɛ mɔɔ ɔbadwazo ye azonvolɛ mɔɔ bɛwu la, ɔwɔ kɛ yɛdayɛ noko yɛ nye da ye ade.—Dwb 14:14, 15.

Kɛmɔ Gyihova le ngyehyɛleɛ Nyamenle la ati, yɛkola yɛdie yɛdi kɛ ewudwazo ne bahɔ zo pɛpɛɛpɛ. (1Kɔ 14:33, 40) Kɛ anrɛɛ yɛbayɛ ɛzɛne la, yɛbalie menli mɔɔ bɛbadwazo bɛ la. Saa ɛlɛdi nyane kpalɛ a, asoo ɛdwenle ewudwazo ne anwo? (2Kɔ 4:17, 18) Asoo ɛyɛ Gyihova mo kɛ yeva ɛkpɔnedeɛ ne yemaa yɛ na yemaa yɛnwu ye wɔ Ngɛlɛlera ne anu kɛ mowuamra badɛnla aze bieko la ɔ?—Kɔl 3:15.

• Ɛ gɔnwo mɔ nee ɛ nwo amra boni a ɛ nye la kɛ ɛbanwu bɛ bieko a?

• Baebolo nu menli boni mɔ a ɛkulo kɛ ɛnwu bɛ na ɛ nee bɛ tendɛ a?