1-3. (a) Kɛzi Kilisienema da ye ali kɛ bɛkulo debiezukoalɛ ɛhɔlɛ ɛ? (Nea mɔlebɛbo nvoninli ne.) (b) Duzu a yɛbazuzu nwo wɔ edwɛkɛ ɛhye anu a?

MEKƐ mɔ Corinna lile ɛvolɛ 17 la, bɛdole ye mame efiade wɔ moamoa ɛleka bie. Nzinlii bɛhyele Corinna noko bɛhɔle Siberia mɔɔ ɛnee ɔ nee ye sua zo wale la. Ɔyɛle ɛya bie anu gyima na bɛyɛle ye kɛ akɛlɛ la. Ɔdwu mekɛ ne bie a bɛmaa ɔkɔyɛ gyima wɔ alie nwo wɔ ɛyɛlɛ kpole ne anu mɔɔ ɔnwula adɛladeɛ mɔɔ ɔbava yeazɔ ɛyɛlɛ ne a. Noko ɛnee Corinna nee adiema raalɛ ko ɛbɔ kpɔkɛ kɛ bɛbayɛ biala mɔɔ bɛbahola la bɛavi ɛya ne anu bɛahɔ debiezukoalɛ.

² Corinna hanle kɛ: “Yɛfi ɛya ne anu nɔsolɛ nu na yɛtia kilomita 25 (mayɛlɛ 15) yɛkɔ keteke agyinlaleɛ. Keteke ne tu aleɛbahye dɔne nwiɔ, yɛdi dɔnehwele nsia wɔ keteke ne anu kolaa na yeadwu aze na akee yɛadia kilomita bulu (mayɛlɛ nsia) yɛahɔ ɛleka mɔɔ yɛyia la.” Saa Corinna kɔdwu debiezukoalɛ bo biala a, ɔ nye die kɛ ɔholale ɔhɔle la. Ɔhanle kɛ: “Yɛsukoa Ɛzinzalɛ Arane ne na yɛto Belemgbunlililɛ edwɛne wɔ debiezukoalɛ bo. Ɔmaanle yɛ anwosesebɛ yɛɛ yɛ diedi nu mianle.” Mediema mraalɛ nwiɔ ne di kenle nsa na bɛazia bɛara ɛya ne anu, noko ɛya menle ne ɛnnwu ye bɔbɔ kɛ bɛnle ɛkɛ.

 ³ Gyihova menli anye la dahuu kɛ bɛ nee bɛ mediema bayia. Kɛ neazo la, ɛnee alimoa Kilisienema anye la kɛ bɛbayia nu bɛazonle Gyihova na bɛazukoa ɔ nwo debie. (Gyima ne 2:42) Nɔhalɛ nu, ɛdawɔ noko ɛ nye la kɛ ɛbahɔ debiezukoalɛ. Noko kɛ mɔɔ ɔde wɔ ɛ mediema afoa nu la, bie a ɔbayɛ se kɛ ɛbahɔ debiezukoalɛ dahuu. Bie a ɔwɔ kɛ ɛfa mekɛ dɔɔnwo ɛyɛ gyima anzɛɛ ɛlɛ ninyɛne dɔɔnwo ɛyɛ anzɛɛ dahuu ɛfɛ. Yemɔti duzu a baboa yɛ yeamaa yɛayɛ biala mɔɔ yɛbahola la amaa yɛahɔ debiezukoalɛ ɛ? ^[1] (Nea awieleɛ edwɛkɛ ne.) Kɛ ɔkɛyɛ na yɛamaa yɛ Baebolo sukoavoma nee awie mɔ anwosesebɛ yɛamaa bɛahɔ debiezukoalɛ dahuu ɛ? Edwɛkɛ ɛhye bahilehile deɛmɔti debiezukoalɛ ɛhɔlɛ (1) boa yɛ la, (2) boa awie mɔ, nee (3) sɔ Gyihova anye la anu. ^[2]—Nea awieleɛ edwɛkɛ ne.

4. Kɛzi yɛyia a ɔboa yɛ ɔmaa yɛsukoa Gyihova anwo debie ɛ?

⁴ Debiezukoalɛ ne mɔ tete yɛ. Debiezukoalɛ biala boa yɛ maa yɛsukoa Gyihova anwo ninyɛne dɔɔnwo. Kɛ neazo la, mekɛ mɔɔ yɛzukoale “Bɛzie Bɛ Nwo Wɔ Nyamenle Ɛhulolɛ Ne Anu” buluku ne wɔ Asafo Baebolo Ɛzukoalɛ bo la, asoo Gyihova subane ngakyile ne mɔ mɔɔ ɛnwunle bɛ nee ɛ mediema mualɛ mɔɔ vi ahonle nu la ammaa ɛlɔlɛ mɔɔ ɛlɛ ɛmaa Gyihova la anyɛ kpole ɔ? Wɔ debiezukoalɛ ne mɔ abo, yɛsukoa Baebolo ne anu ninyɛne dɔɔnwo ɔlua ɛdendɛlɛ nee yɛkile ne mɔ mɔɔ yɛfa yɛ adwenle yɛsie zo yɛɛ Baebolo ne mɔɔ bɛlɛkenga a yɛtie ye kpalɛ la azo. (Nihɛmaya 8:8) Akee dwenle ninyɛne dɔɔnwo mɔɔ yɛnwu ye dapɛne biala wɔ mekɛ mɔɔ yɛbaziezie yɛ nwo yɛamaa dapɛne Baebolo ɛgengalɛ ne na yɛade mɔɔ yɛ mediema zukoale vile nu la.

5. Kɛzi debiezukoalɛ ne mɔ ɛmaa wɔnwu kɛzi ɛbava mɔɔ wɔzukoa wɔ Baebolo ne anu la wɔali gyima nee kɛzi ɛbanyia anyuhɔlɛ wɔ wɔ daselɛlilɛ nu la ɛ?

⁵ Debiezukoalɛ ne mɔ kilehile yɛ ɔmaa yɛfa mɔɔ yɛzukoa wɔ Baebolo ne anu la yɛbɔ yɛ ɛbɛla. (1 Tɛsalonaekama 4:9, 10) Asoo Ɛzinzalɛ Arane Ɛzukoalɛ bie ɛmaa wɔnyia ɛhulolɛ kɛ ɛbayɛ dɔɔnwo wɔ Gyihova ɛzonlenlɛ nu, ɛbanyia anyuhɔlɛ wɔ wɔ asɔneyɛlɛ nu, anzɛɛ ɛbava ɛ diema bie ɛtane wɔahyɛ ye ɔ? Dapɛne ne anu debiezukoalɛ ne mɔ maa yɛnwu kɛzi yɛbabɔ edwɛkpa ne nolo yɛɛ kɛzi yɛbaboa awie mɔ yɛamaa bɛade Baebolo nu nɔhalɛ ne abo la.​—Mateyu 28:19, 20.

6. Kɛzi yɛ debiezukoalɛ ne mɔ maa yɛ anwosesebɛ ɛ?

⁶ Bɛmaa yɛ anwosesebɛ. Seetan ewiade ne bɔ mɔdenle kɛ ɔmaa yɛ diedi aha aze, adwenleadwenle adɔ yɛ nwo na yɛ sa nu ado. Noko yɛ debiezukoalɛ ne mɔ maa yɛ anwosesebɛ na bɛboa yɛ  bɛmaa yɛkɔ zo yɛsonle Gyihova. (Kenga Gyima ne 15:30-32.) Yɛta yɛsuzu kɛzi Baebolo ngapezo ɛra nu la anwo. Ɛhye kola boa yɛ maa yɛnyia anwodozo bɔkɔɔ kɛ kenle bie nwo ɛwɔkɛ mɔɔ Gyihova ɛbɔ la bara nu. Tɛ mekɛ mɔɔ yɛ mediema bɛayɛ gyimalilɛ bie la ala a bɛmaa yɛ anwosesebɛ a, bɛ mualɛ ɛmaanlɛ nee ahonle nu mɔɔ bɛfi bɛto edwɛne bɛmaa Gyihova la noko maa yɛ anwosesebɛ. (1 Kɔlentema 14:26) Saa yɛ nee bɛ bɔ adawu kolaa na debiezukoalɛ ne abɔ ɔ bo anzɛɛ mekɛ mɔɔ yɛkpɔne la a, ɔmaa yɛ nwo tɔ yɛ ɔluakɛ yɛlɛ agɔnwolɛma dɔɔnwo mɔɔ dwenle yɛ nwo a.​—1 Kɔlentema 16:17, 18.

7. Duzu ati a ɔhyia kɛ yɛbahɔ debiezukoalɛ ɛ?

⁷ Saa yɛkɔ debiezukoalɛ a, Nyamenle sunsum nwuanzanwuanza ne boa yɛ. Gyisɛse dua sunsum nwuanzanwuanza ɛhye azo kile asafo ne mɔ adenle. Nɔhalɛ nu, yeha yehile yɛ kɛ ɔwɔ kɛ ‘yɛtie mɔɔ Sunsum ne ka kile asafo ne amuala la.’ (Yekile 2:7) Sunsum nwuanzanwuanza ne kola boa yɛ maa yɛkoati sɔnea na yɛka edwɛkɛ ne akɛnrasesebɛ zo. Eza ɔkola ɔboa yɛ ɔmaa yɛsi kpɔkɛ kpalɛ. Ɛhye ati a ɔwɔ kɛ yɛyɛ biala mɔɔ yɛbahola la yɛkɔ debiezukoalɛ na yɛmaa Nyamenle sunsum nwuanzanwuanza ne boa yɛ la.

8. Saa yɛ mediema nwu yɛ wɔ debiezukoalɛ bo na bɛte kɛ yɛmaa muala na yɛlɛto edwɛne a, kɛzi ɔboa bɛ ɛ? (Eza nea ɛlɛka “ Ɔkɔ Debiezukoalɛ Ɔba Biala A Ɔ Nwo Tɔ Ye.”)

⁸ Saa yɛkɔ debiezukoalɛ a, ɔmaa yɛ mediema nwu kɛ yɛkulo bɛ. Yɛ asafo ne mɔ anu amra dɔɔnwo ɛlɛyia ngyegyelɛ mɔɔ anu yɛ se la. Ɛzoanvolɛ Pɔɔlo hɛlɛle kɛ: “Bɛmaa yɛdwenle . . . yɛ nwo ngoko ngoko.” (Hibuluma 10:24, 25) Saa yɛ nee yɛ mediema yia yɛmaa yɛ nwo anwosesebɛ a, ɔkile kɛ yɛkulo bɛ. Saa yɛkɔ debiezukoalɛ a, ɔmaa yɛ mediema nwu kɛ yɛkulo kɛ yɛ nee bɛ bɔ nu na yɛ nee bɛ tendɛ, eza yɛdwenle kɛzi bɛte nganeɛ la anwo. Eza yɛ mualɛ ɛmaanlɛ nee edwɛne mɔɔ yɛfi ahonle  nu yɛto la maa bɛ anwosesebɛ.​—Kɔlɔsaema 3:16.

9, 10. (a) Kilehile kɛzi Gyisɛse edwɛkɛ mɔɔ wɔ Dwɔn 10:16 la boa yɛ maa yɛte deɛmɔti ɔhyia kɛ yɛ nee yɛ mediema yia la anu. (b) Saa yɛkɔ debiezukoalɛ dahuu a, kɛzi ɔbaboa menli mɔɔ bɛ abusua ne ɛkpo bɛ la ɛ?

⁹ Saa yɛkɔ debiezukoalɛ a, yɛmaa koyɛlɛ ba asafo ne anu. (Kenga Dwɔn 10:16.) Gyisɛse vale ɔ nwo totole mboaneneavolɛ nwo yɛɛ ɔvale ye ɛdoavolɛma ne ɔtotole mboane ekpunli nwo. Dwenle ɛhye anwo nea: Saa mboane nwiɔ gyi boka zo, nwiɔ noko gyi bɔnza nu na ko gyi ɛleka gyɛne a, asoo mboane nnu ɛhye mɔ le ekpunli ɔ? Kyɛkyɛ, ɔluakɛ mboane ekpunli bɔ nu na bɛdi mboaneneavolɛ ko anzi. Zɔhane ala a ɔnle kɛ yɛtwe ye nwo yɛfi yɛ mediema nwo ɔlua debiezukoalɛ mɔɔ yɛbamaa yeakpa yɛ ti la azo a. Ɔwɔ kɛ yɛyia nu amaa yɛayɛ “mboane ekpunli ko” na yɛadoa “neavolɛ ko.”

¹⁰ Yɛ debiezukoalɛ ne mɔ boa yɛ maa yɛyɛ ko kɛ abusua mɔɔ ɛlɔlɛ wɔ nu. (Edwɛndolɛ 133:1) Menli mɔɔ wɔ yɛ asafo ne anu la bie mɔ mbusuafoɔ ɛkpo bɛ. Noko Gyisɛse ɛbɔ ɛwɔkɛ kɛ ɔbamaa bɛanyia abusua mɔɔ bɛbahulo bɛ na bɛanlea bɛ a. (Maake 10:29, 30) Saa ɛkɔ debiezukoalɛ dahuu a, ɛbayɛ kɛ papa, mame, adiema nrenyia anzɛɛ adiema raalɛ wɔamaa awie wɔ asafo ne anu. Saa yɛdwenle yemɔ anwo a, yɛbabɔ mɔdenle yɛahɔ debiezukoalɛ biala.

11. Kɛzi debiezukoalɛ ɛhɔlɛ boa yɛ ɔmaa yɛfa mɔɔ fɛta Gyihova la yɛmaa ye ɛ?

¹¹ Yɛfa ninyɛne mɔɔ fɛta Gyihova  la yɛmaa ye wɔ debiezukoalɛ bo. Kɛmɔ ɔdaye a ɔle yɛ Bɔvolɛ la ati, ɔwɔ kɛ yɛyɛ ye mo, yɛdi ye eni na yɛye ye ayɛlɛ. (Kenga Yekile 7:12.) Yɛbahola yɛalua asɔneyɛlɛ, edwɛnedolɛ nee ɔ nwo edwɛkɛ mɔɔ yɛbaha la azo yɛayɛ ɛhye wɔ debiezukoalɛ bo. Nea nwolɛ adenle kpole mɔɔ yɛlɛ ye dapɛne biala yɛsonle Gyihova a!

12. Saa yɛtie Gyihova na yɛdi ye mɛla zo yɛkɔ debiezukoalɛ a, kɛzi ɔte nganeɛ ɛ?

¹² Gyihova a bɔle yɛ a, yemɔti ɔwɔ kɛ yɛtie ye. Yemaa yɛ mɛla kɛ yɛyia nu dahuu, titili wɔ mekɛ mɔɔ yɛlɛbikye awieleɛ ne la. Yemɔti saa yɛdi zɔhane mɛla ne azo a, Gyihova anye die. (1 Dwɔn 3:22) Ɔnwu ye kɛ amgba yɛkulo kɛ yɛkɔ debiezukoalɛ yɛɛ ɔ nye sɔ mɔdenle mɔɔ yɛbɔ yɛkɔ la.​—Hibuluma 6:10.

13, 14. Kɛzi yɛbikye Gyihova nee Gyisɛse wɔ debiezukoalɛ ne mɔ abo ɛ?

¹³ Saa yɛkɔ debiezukoalɛ a, ɛnee yɛlɛmaa Gyihova anwu kɛ yɛkulo kɛ yɛbikye ɔ nee ɔ Ra ne. Wɔ yɛ debiezukoalɛ bo, yɛsukoa Baebolo ne na yɛsukoa ninyɛne mɔɔ ɔwɔ kɛ yɛyɛ nee kɛzi ɔwɔ kɛ yɛbɔ yɛ ɛbɛla la yɛfi Gyihova ɛkɛ. (Ayezaya 30:20, 21) Saa menli mɔɔ bɛnzonle Gyihova bɔbɔ la ba debiezukoalɛ ne bie a, bɛkola bɛnwu ye kɛ Nyamenle ɛlɛkile yɛ adenle. (1 Kɔlentema 14:23-25) Gyihova fa ye sunsum nwuanzanwuanza ne kile yɛ debiezukoalɛ ne adenle yɛɛ ninyɛne mɔɔ yɛsukoa la vi ye ɛkɛ. Yemɔti saa yɛkɔ debiezukoalɛ a, yɛtie mɔɔ Gyihova ka la, yɛnwu kɛzi ɔkulo yɛ la na yɛbikye ye.

¹⁴ Gyisɛse mɔɔ le asafo ne Ati la hanle kɛ: “Ɛleka biala mɔɔ menli nwiɔ anzɛɛ nsa kɛyia nu wɔ me duma nu la, ɛnee mewɔ bɛ avinli ɛkɛ ne bie.” (Mateyu 18:20) Eza Baebolo ne ka kɛ Gyisɛse ‘luolua’ asafo ne mɔ avinli. (Yekile 1:20–2:1) Ɔda ali wienyi kɛ Gyihova nee Gyisɛse nee yɛ lua yɛɛ bɛlɛmaa yɛ anwosesebɛ wɔ debiezukoalɛ ne mɔ abo. Saa Gyihova nwu kɛ ɛlɛbɔ mɔdenle wɔabikye ɔ nee ɔ Ra ne a, kɛzi ɔte nganeɛ ɛ?

15. Kɛzi yɛkɔ debiezukoalɛ a ɔmaa Nyamenle nwu kɛ yɛkulo kɛ yɛtie ye ɛ?

¹⁵ Saa yɛkɔ debiezukoalɛ a yɛmaa Gyihova nwu kɛ yɛkpondɛ kɛ yɛtie ye. Gyihova ɛntinlitinli yɛ kɛ yɛli mɔɔ ɔka la azo. (Ayezaya 43:23) Yemɔti saa yɛtie ye mɛla ne mɔɔ se yɛhɔ debiezukoalɛ la azo a, yɛmaa ɔnwu kɛ yɛkulo ye yɛɛ yɛdie yɛdi kɛ ɔdaye ala a ɔwɔ kɛ ɔkile yɛ mɔɔ ɔwɔ kɛ yɛyɛ a. (Wulomuma 6:17) Kɛ neazo la, saa yɛ gyima menle kpondɛ kɛ yɛyɛ gyima too mɔɔ yɛnrɛhola yɛnrɛhɔ debiezukoalɛ dahuu a, duzu a yɛbayɛ a? Anzɛɛ bie noko a arane ne se saa awie mɔ yia nu sonle Gyihova a, bɛbadua ezukoa bie, bɛbagua bɛ efiade anzɛɛ bɛbahwe bɛ nzo atisesebɛ nu. Anzɛɛ ɔdwu mekɛ ne bie a yɛkulo kɛ yɛfa debiezukoalɛ ɛhɔlɛ  yɛsie ahane na yɛyɛ yɛ ti anwo debie. Wɔ tɛnlabelɛ ɛhye mɔ amuala anu, ɔwɔ kɛ yɛsi mɔɔ yɛbayɛ la anwo kpɔkɛ. (Gyima ne 5:29) Noko mekɛ biala mɔɔ yɛbakpa kɛ yɛtie Gyihova la, yɛmaa ɔ nye die.​—Mrɛlɛbulɛ 27:11.

16, 17. (a) Kɛzi yɛkola yɛnwu kɛ ɛnee debiezukoalɛ hyia alimoa Kilisienema ne ɛ? (b) Kɛzi Adiema George Gangas dele nganeɛ wɔ debiezukoalɛ ne mɔ anwo ɛ?

¹⁶ Kilisienema ne yiale nu wɔ ɛvolɛ 33 Pɛntekɔso ne anzi yɛɛ ɛnee bɛyia dahuu bɛsonle Gyihova. “Bɛdule bɛ nwo bɛmanle ɛzoanvolɛma ne ngilehilelɛ ne, [na] bɛ nee bɛ zonlenle.” (Gyima ne 2:42) Mɔɔ Wulomu arane ne nee Dwuuma mgbanyima kpɔ bɛ bɔbɔ la, ɛnee bɛkɔ zo bɛyia. Ɛnee ɔnla aze ɛdeɛ noko bɛyiale dahuu.

¹⁷ Ɛnɛ noko, Gyihova azonvolɛ anye die kɛ bɛbabɔ nu bɛayia. Adiema George Gangas mɔɔ vale ɛvolɛ 22 zonlenle wɔ Neazo Eku ne anu la hanle kɛ: “Wɔ me afoa nu, ninyɛne mɔɔ maa me nye die kpole na ɔmaa me anwosesebɛ la anu ko a le kɛ me nee mediema bayia. Me nye die nwo kpalɛ kɛ mebalimoa meadwu Belemgbunlililɛ Asalo ɛkɛ na saa yɛkpɔne debiezukoalɛ na ɔbayɛ boɛ a, menrɛvi ɛkɛ ne ndɛ. Saa me nee Nyamenle menli ɛlɛbɔ adawu a, me nye die kpole wɔ me ahonle nu. Saa me nee bɛ wɔ a, me ahonle tɔ me azule nu kpalɛ kɛ me nee me abusua ne wɔ sunsum nu paladaese la.” Ɔdoale zolɛ kɛ: “Me nye die nwo kpalɛ kɛ mebahɔ debiezukoalɛ.”

18. Kɛzi ɛte nganeɛ wɔ yɛ debiezukoalɛ ne mɔ anwo ɛ, na duzu a wɔzi kpɔkɛ kɛ ɛbayɛ a?

¹⁸ Asoo kɛ ɛte nganeɛ wɔ Gyihova ɛzonlenlɛ nwo la ɛne? Saa ɔle zɔ a, ɛnee bɔ mɔdenle kɛ ɛ nee ɛ mediema bɛahɔ debiezukoalɛ dahuu, saa bɔbɔ tɛnlabelɛ ne yɛ se a. Maa Gyihova ɛnwu kɛ ɛte nganeɛ kɛ Belemgbunli Devidi mɔɔ hanle kɛ: “O [Gyihova], mekulo wɔ sua ne mɔɔ ɛde nu la.”​—Edwɛndolɛ 26:8.