1. Duzu ati a menli dɔɔnwo adwenle ɛdu ɛfonyia a?

ƐNƐ, asɔne asɔne dɔɔnwo wɔ ɛkɛ mɔɔ bɛse bɛle Kilisienema na bɛsonle Nyamenle wɔ adenle mɔɔ ɔdie ɔto nu la azo a. Ɛhye ati a menli dɔɔnwo adwenle ɛdu ɛfonyia la! Bɛbiza kɛ, “Asoo nɔhalɛ ɛzonlenlɛ kokye a wɔ ɛkɛ a, anzɛɛ Nyamenle die ɛzonlenlɛ kɔsɔɔti to nu?” Asoo yɛdie yɛto nu kɛ yɛdayɛ Gyihova Alasevolɛ ala a yɛkilehile nɔhalɛ ne a, na adenle mɔɔ yɛdua zo yɛsonle Nyamenle la angomekye a ɔdie ɔto nu ɔ? Asoo yɛbahola yɛanyia anwodozo ɛhye? Maa yɛzuzu daselɛ mɔɔ yɛlɛ la anwo.

2. Kɛ mɔɔ 1 Tɛsalonaekama 1:5 kile la, duzu ati a ɛnee ɛzoanvolɛ Pɔɔlo lɛ anwodozo kɛ mɔɔ ɔdie ɔdi la a le nɔhalɛ ne a?

² Ɛzoanvolɛ Pɔɔlo nyianle anwodozo bɔkɔɔ kɛ yenwu nɔhalɛ ne. (Kenga 1 Tɛsalonaekama 1:5.) Tɛ kɛ ɛnee nɔhalɛ ne maa ɔ nye die la ati a ɔliele ɔlile a. Emomu ɛnee Pɔɔlo sukoa Nyamenle Edwɛkɛ ne kpalɛ. Ɔliele ɔlile kɛ “Ngɛlɛlera ne amuala vi Nyamenle sunsum nu.” (2 Tim. 3:16) Duzu a ɔnwunle ye a? Pɔɔlo nwunle daselɛ dɔɔnwo mɔɔ kile kɛ Gyisɛse a le Mɛzaya ne mɔɔ bɛbɔ ɔ nwo ɛwɔkɛ la wɔ Ngɛlɛlera ne anu—daselɛ mɔɔ Dwuu ɛzonlenlɛ nu mgbanyima bule bɛ nye guale zolɛ la. Ɛnee menli ɛhye mɔ le nabalabama, bɛhanle kɛ bɛkilehile menli Nyamenle mɛla ne, noko ɛnee bɛyɛ ninyɛne mɔɔ Nyamenle kyi la. (Tae. 1:16) Pɔɔlo anyɛ kɛ menli ɛhye mɔ la, yeamkpa  Nyamenle Edwɛkɛ ne anu ɛleka mɔɔ ɔkulo kɛ ɔdie ɔdi la. Ɛnee yeziezie ɔ nwo kɛ ɔbayɛ “Nyamenle ɛhulolɛdeɛ” na yeava yeahilehile awie mɔ.—Gyi. 20:27.

3. Asoo ɔwɔ kɛ yɛnyia yɛ kpuya ne mɔ amuala anwo mualɛ na yɛalie yɛali kɛ yɛnwu nɔhalɛ ne ɔ? (Eza nea ɛlɛka, “ Gyihova Gyima Nee Ye Adwenle—‘Bɛzonle Somaa Mɔɔ Yɛnrɛhola Bɛ Tia A.’”)

³ Bie mɔ te nganeɛ kɛ ɔwɔ kɛ nɔhalɛ ɛzonlenlɛ kola bua kpuya biala mɔɔ bɛlɛ la, saa zɔhane kpuya ne mɔ anwo edwɛkɛ fɔɔnwo ɛnle Baebolo ne anu bɔbɔ a. Ɔbahola yeayɛ boɛ ɔ? Suzu Pɔɔlo neazo ne anwo. Ɔmaanle ɔ mediema anwosesebɛ kɛ “bɛzɔ ninyɛne kɔsɔɔti bɛnlea,” noko eza ɔliele ɔdole nu kɛ ninyɛne dɔɔnwo wɔ ɛkɛ mɔɔ ɔnde ɔ bo a. (1 Tɛs. 5:21) Ɔhɛlɛle kɛ: “Yɛ ndelebɛbo ɛnli munli,” yɛɛ ɔdoale zolɛ kɛ, “yɛnwu ninyɛne monzomonzo kɛ asɛɛ yɛlɛnea bulalɛ neanleɛ nu la.” (1 Kɔl. 13:9, 12) Pɔɔlo ande debie biala abo; na zɔhane ala a yɛdayɛ noko yɛnrɛde debie biala abo a. Noko Pɔɔlo dele Gyihova bodane ne mɔ anwo nɔhalɛ titili ne abo. Mɔɔ ɔnwunle ye bɔbɔ la maanle ɔliele ɔlile kɛ yenwu nɔhalɛ ne!

4. Kɛ ɔkɛyɛ na yɛamaa anwodozo mɔɔ yɛlɛ kɛ yɛnwu nɔhalɛ ne la ayɛ kpole ɛ, na duzu a yɛbazuzu nwo wɔ nɔhalɛ Kilisienema anwo a?

⁴ Adenle ko mɔɔ ɔbamaa anwodozo mɔɔ yɛlɛ kɛ yɛnwu nɔhalɛ ne la ayɛ kpole la a le kɛ yɛbava mɔɔ Gyihova Alasevolɛ ɛlɛyɛ ye ɛnɛ la yɛatoto nɔhalɛ ɛzonlenlɛ nwo neazo mɔɔ Gyisɛse yɛle la anwo. Wɔ edwɛkɛ ɛhye anu yɛbanwu kɛ nɔhalɛ Kilisienema (1) kpo awozonle ɛzonlenlɛ, (2) bu Gyihova duma ne, (3) bu nɔhalɛ ne, yɛɛ (4) kulo bɛ nwo ngoko kpalɛ.

5. Kɛzi Gyisɛse hilele yɛ adenle kpalɛ mɔɔ bɛdua zo bɛsonle Nyamenle la ɛ, na kɛ ɔkɛyɛ na yɛava mɔɔ ɔhilehilele la yɛali gyima ɛ?

⁵ Kɛmɔ ɛnee Gyisɛse kulo Gyihova kpole kpalɛ la ati, ɔzonlenle ɔ ngomekye wɔ mekɛ  mɔɔ ɛnee ɔwɔ anwuma nee mekɛ mɔɔ ɛnee ɔwɔ azɛlɛ ye azo la. (Luku 4:8) Ɔhilehilele ye ɛdoavolɛma ne kɛ bɛdabɛ noko bɛyɛ ye zɔhane ala. Gyisɛse nee ye ɛdoavolɛ nɔhavoma ne anu biala anva ananze anli gyima wɔ ɛzonlenlɛ nu ɛlɛ. Kɛmɔ Nyamenle le sunsum la ati, debie biala ɛnle ɛkɛ mɔɔ sonla bahola ava ye adwenle abu mɔɔ ɔbazɔho Gyihova anyunlunyia ne bɔbɔ a! (Aye. 46:5) Na menli mɔɔ bɛsuzu kɛ bɛle anwodelɛma mɔɔ bɛyɛ bɛ ananze na bɛdua zo bɛyɛ asɔne la noko ɛ? Mɛla mɔɔ tɔ zo nwiɔ wɔ Gyihova Mɛla Bulu ne anu la se: ‘Mmayɛ ananze anzɛɛ debie biala mɔɔ wɔ anwuma anzɛɛ aze la ɛsaso ɛmaa ɛ nwo. Mmabɔ ɛ ti aze ɛmaa bɛ.’ (Ɛzɛ. 20:4, 5) Edwɛkɛ ɛhye anu la ɛkɛ ne kpalɛ maa menli mɔɔ bɛkulo kɛ bɛsɔ Nyamenle anye la.

6. Adenle boni a Gyihova Alasevolɛ dua zo sonle Nyamenle ɛnɛ a?

⁶ Tetedwɛkɛ kɛlɛvoma ɛha kɛ alimoa Kilisienema zonlenle Nyamenle angomekye. Kɛ neazo la, History of the Christian Church buluku ne hanle kɛ, “saa bɛhanle bɛhilele alimoa Kilisienema kɛ bɛva ananze bɛziezie ɛleka mɔɔ bɛsonle la a, anrɛɛ bɛ nye ɛnrɛlie nwolɛ fee.” Ɛnɛ, Gyihova Alasevolɛ di neazo mɔɔ alimoa Kilisienema yɛle la anzi. Yɛnva yɛ asɔneyɛlɛ yɛndo “anwodelɛma” anzɛɛ “anwumabɔvolɛma” anyunlu; yɛnva yɛndo Gyisɛse bɔbɔ anyunlu. Yɛɛ yɛnyɛ debie biala mɔɔ kile kɛ yɛlɛfa ɛzonlenlɛ yɛamaa maanle ne sɛkɛlɛneɛ ne la. Ɔnva nwo mɔɔ bazi biala la, yɛbɔ kpɔkɛ kɛ yɛbali Gyisɛse edwɛkɛ ɛhye azo: “Gyihova wɔ Nyamenle ne a ɔwɔ kɛ ɛsonle ye a.”—Mat. 4:10.

7. Ngakyile kpole boni a wɔ Gyihova Alasevolɛ nee ɛzonlenlɛ mɔɔ ɛha la anu a?

⁷ Ɛnɛ, menli dɔɔnwo anye die nwo kɛ bɛbadie ɛsɔfoma mɔɔ ɛlie duma la. Bɛ nye die bɛ nwo too bɛmaa ɔyɛ kɛ asɛɛ bɛlɛsonle bɛ bɔbɔ. Menli dɔɔnwo kɔ bɛ asɔne ne bie, bɛtotɔ bɛ mbuluku na bɛye ezukoa mgbole bɛboa eku ngakyile mɔɔ bɛtete la. Menli bie mɔ die edwɛkɛ biala mɔɔ bɛka la di. Saa bɛnwu ɛsɔfoma ne mɔ a, kɛzi bɛ nye die la ɛbaha kɛ bɛnwu Gyisɛse mumua ne. Noko Gyihova nɔhalɛ azonvolɛ ɛnlɛ ɛsɔfoma. Yɛbu menli mɔɔ li yɛ nyunlu la ɛdeɛ, noko yɛdie Gyisɛse ngilehilelɛ ɛhye mɔɔ nuhua la ɛkɛ la yɛto nu: “Bɛ muala bɛle mediema.” (Mat. 23:8-10) Yɛnzonle menli, saa bɛle ɛzonlenlɛ nu mgbanyima anzɛɛ maanyɛlɛ nu menli bɔbɔ a. Yɛɛ yɛmboa eku ngakyile mɔɔ bɛtete la. Yɛngyinla afoa biala yɛɛ yɛtwe yɛ nwo yɛfi ewiade ne anwo. Saa ɔba ye wɔ ninyɛne ɛhye mɔ anwo a, yɛle ngakyile kolaa yɛfi ekpunli ngakyile dɔɔnwo mɔɔ bɛse bɛle Kilisienema la anwo.—Dwɔn 18:36.  

8. Kɛzi yɛkola yɛnwu kɛ, Gyihova kulo kɛ bɛwula ye duma ne anyunlunyia na bɛmaa awie biala nwu ye ɛ?

⁸ Mekɛ bie Gyisɛse yɛle asɔne kɛ: “Egya, wula wɔ duma anyunlunyia.” Gyihova mumua ne vale ɛnelɛ kpole liele zo wɔ anwuma na ɔbɔle ɛwɔkɛ kɛ ɔbawula ye duma ne anyunlunyia. (Dwɔn 12:28) Gyisɛse wulale ɔ Ze duma ne anyunlunyia wɔ ye ɛzonlenlɛ gyima ne amuala anu. (Dwɔn 17:26) Ɔti nɔhalɛ Kilisienema te nganeɛ kɛ, ɔle nwolɛ adenle kpole mɔɔ bɛnyia kɛ bɛbava Nyamenle duma ne bɛali gyima na bɛamaa awie mɔ anwu ye a.  

9. Kɛzi alimoa Kilisienema hilele kɛ bɛbu Nyamenle duma ne ɛ?

⁹ Mɔɔ bɛhyehyɛle Kilisiene asafo ne wɔ ɛvoya mɔɔ limoa la anu la, yeangyɛ, Gyihova “hakyile ɔ nye wɔ maanle maanle ne anu na ɔyele menli bie wɔ bɛ avinli ɔmaanle ye duma ne.” (Gyi. 15:14) Ɛnee alimoa Kilisienema anye die nwo kɛ bɛbava Nyamenle duma ne bɛali gyima  na bɛamaa awie mɔ noko anwu ye. Bɛvale Nyamenle duma ne bɛlile gyima fane dɔɔnwo wɔ bɛ ɛzonlenlɛ gyima ne nee Baebolo mbuluku mɔɔ bɛhɛlɛle la anu. * Bɛlale ye ali kɛ bɛdabɛ ala a bɛmaa menli nwu Nyamenle duma ne a.—Gyi. 2:14, 21.

10. Daselɛ boni a kile kɛ Gyihova Alasevolɛ ala a maa menli nwu Gyihova duma ne a?

¹⁰ Asoo Gyihova Alasevolɛ ala a maa menli nwu Gyihova duma ne a? Nea daselɛ mɔɔ kile zɔ la. Ɛnɛ, ɛzonlenlɛ nu mgbanyima dɔɔnwo ɛyɛ biala mɔɔ bɛbahola la kɛ bɛnrɛmaa menli ɛnrɛnwu Nyamenle duma ne. Bɛye duma ne bɛvi bɛ Baebolo ngilebɛbo ne mɔ anu, yɛɛ ɔyɛ a bɛmmaa bɛnva duma ne bɛnli gyima wɔ bɛ asɔne ne mɔ anu. * Asoo ɛhye ɛngile kɛ Gyihova Alasevolɛ ala a bu Gyihova duma ne na bɛdi ye eni kɛ mɔɔ ɔfɛta la ɔ? Yɛdayɛ ala a yɛmaa menli nwu Nyamenle duma ne wɔ ewiade amuala a, na tɛ ɛzonlenlɛ gyɛne mɔɔ ɛha la ɔ! Ɛhye ati, yɛlɛbɔ mɔdenle biala mɔɔ yɛbahola la kɛ yɛbabɔ yɛ duma Gyihova Alasevolɛ ne anwo ɛbɛla. (Aye. 43:10-12) Yɛpelente Ngɛlɛlera Nwuanzanwuanza—Ewiade Fofolɛ Ngilebɛbo ne mɔɔ bo mgbe 240, na yɛfa Gyihova duma ne yɛwula ɛleka mɔɔ menli gyɛne mɔɔ kile Baebolo ne abo ɛye ɛvi la. Eza yɛyɛ mbuluku mɔɔ gyi Baebolo ne azo mɔɔ yɛfa Gyihova duma ne yɛdi gyima wɔ nu la wɔ aneɛ mɔɔ bo 1,000 la anu!

11. Kɛzi alimoa Kilisienema hilele kɛ bɛkulo nɔhalɛ ne ɛ?

¹¹ Ɛnee Gyisɛse kulo nɔhalɛ ne mɔɔ fale Nyamenle nee Ye bodane ne mɔ anwo la. Kɛzi Gyisɛse bɔle ye ɛbɛla la lale ye ali kɛ ɛnee ɔkulo zɔhane nɔhalɛ ne, na ɔmaanle awie mɔ nwunle zɔhane nɔhalɛ ne. (Dwɔn 18:37) Ɛnee Gyisɛse nɔhalɛ ɛdoavolɛma noko kulo nɔhalɛ ne kpalɛ. (Dwɔn 4:23, 24) Ɛzoanvolɛ Pita bɔbɔ hanle kɛ Kilisiene ɛzonlenlɛ a le “nɔhalɛ adenle ne” a. (2 Pita 2:2) Kɛmɔ ɛnee alimoa Kilisienema kulo nɔhalɛ ne kpalɛ la ati, bɛkpole ɛzonlenlɛ nu ngilehilelɛ, amaamuo yɛɛ adwenle nzuzulɛ mɔɔ ɔ nee nɔhalɛ ne ɛnle ko la. (Kɔl. 2:8) Zɔhane ala a ɛnɛ noko, nɔhalɛ Kilisienema bɔ mɔdenle nea kɛ bɛbamaa bɛ diedi nee bɛ ɛbɛlabɔlɛ kɔsɔɔti agyinla Gyihova Edwɛkɛ ne azo amaa bɛahɔ zo ‘bɛalua nɔhalɛ ne anu a.’—3 Dwɔn 3, 4.

12. Saa menli mɔɔ li yɛ nyunlu la nwu kɛ ɔwɔ kɛ bɛyɛ nzenzaleɛ wɔ kɛzi yɛte ninyɛne bie mɔ abo la anu a, duzu a bɛyɛ a, na duzu ati a bɛyɛ zɔ a?

¹² Nyamenle menli mɔɔ wɔ ɛkɛ ne ɛnɛ la ɛnga kɛ bɛte nɔhalɛ ne abo bɔkɔɔ anzɛɛ bɛlɛ nwolɛ ndelebɛbo mɔɔ di munli. Ɔdwu mekɛ ne bie a bɛyɛ nvonleɛ wɔ kɛzi bɛkile Baebolo nu edwɛkɛ bie anu nee adehilelɛ mɔɔ bɛfa bɛmaa ahyehyɛdeɛ ne la anu. Ɔnle kɛ ɛhye si yɛ nwo. Ngɛlɛlera ne maa ɔda ali wienyi kɛ nɔhalɛ ndelebɛbo finde ngyikyingyikyi. (Kɔl. 1:9, 10) Gyihova da nɔhalɛ ne ali ngyikyingyikyi, na ɔwɔ kɛ yɛnyia ɛhulolɛ kɛ yɛbazi abotane yɛahendɛ yɛamaa nɔhalɛ wienyi ne ada kpole. (Mrɛ. 4:18) Saa menli mɔɔ li yɛ nyunlu la nwu kɛ ɔwɔ kɛ bɛyɛ nzenzaleɛ wɔ nɔhalɛ ne anwo ndelebɛbo bie mɔɔ yɛlɛ la anu a, bɛngyinlegyinla nwolɛ fee. Saa asɔne asɔne dɔɔnwo ɛlɛyɛ nzenzaleɛ a, bɛyɛ kɛ bɛmaa bɛ menli ne anye alie bɛ nwo, anzɛɛ bɛyɛ bɛamaa ewiade ne alie bɛ ado nu, noko Gyihova ahyehyɛdeɛ ne yɛ nzenzaleɛ amaa yɛabikye Nyamenle kpalɛ na yɛali ɛzonlenlɛ nwo neazo ne mɔɔ Gyisɛse yɛle la anzi kpalɛ. (Gye. 4:4) Tɛ kɛ adwenle mɔɔ menli lɛ ye wɔ ewiade ne anu la ɛhakyi la ati a yɛyɛ nzenzaleɛ a, emomu kɛ mɔɔ yɛde Ngɛlɛlera ne abo kpalɛ la ati ɔ. Yɛkulo nɔhalɛ ne!—1 Tɛs. 2:3, 4.

13. Subane mɔɔ hyia kpole kpalɛ la boni a nɔhalɛ Kilisienema da ye ali a, na kɛzi Gyihova Alasevolɛ da subane ɛhye ali ɛnɛ ɛ?

¹³ Ɛnee bɛze alimoa Kilisienema kɛ bɛda subane ngɛnlɛma ali, na nuhua titili ne a le ɛlɔlɛ. Gyisɛse hanle kɛ: “Saa bɛkulo bɛ nwo a—menli kɔsɔɔti banwu kɛ bɛle me ɛdoavolɛma.” (Dwɔn 13:34, 35) Ɛnɛ, ɛlɔlɛ nee koyɛlɛ wɔ Gyihova Alasevolɛ mɔɔ wɔ ewiade amuala la avinli. Yɛle ngakyile yɛfi ɛzonlenlɛ gyɛne mɔɔ ɛha la amuala anwo, ɔluakɛ yɛle kɛ abusua ɔnva kɛ asolo maanle mɔɔ yɛvi nu, yɛ nwonane nee yɛ amaamuo la. Saa yɛkɔ debiezukoalɛ nee yɛ nyianu ngakyile ne mɔ a yɛnwu ɛhye kpalɛ. Yemɔ maa yɛnyia anwodozo kpole kɛ yɛlɛsonle Gyihova wɔ adenle mɔɔ ɔdie ɔto nu la azo.

14. Kɛ mɔɔ Kɔlɔsaema 3:12-14 kile la, adenle titili mɔɔ yɛbahola yɛalua zo yɛala ɛlɔlɛ ali yɛahile yɛ nwo ngoko la a le boni?

¹⁴ Ngɛlɛlera ne ka kile yɛ kɛ ‘yɛva ɛlɔlɛ mɔɔ anu yɛ se la yɛhulo yɛ nwo ngoko.’ (1 Pita 4:8) Adenle ko mɔɔ yɛdua zo yɛda ɛhye ali la a le kɛ yɛbava yɛ mediema ɛtane yɛahyɛ bɛ na yɛanyia bɛ nwo abotane wɔ bɛ sinlidɔlɛ ne mɔ anwo. Eza yɛkpondɛ ndenle yɛdua zo yɛyɛ nyele na yɛdie asafo ne anu amra amuala ɛyɛvolɛ, bɔbɔ bɛdabɛ mɔɔ bie a bɛvo yɛ la. (Kenga Kɔlɔsaema 3:12-14.) Saa yɛkulo yɛ nwo ngoko wɔ adenle ɛhye azo a, ɛnee yɛlɛda ye ali kɛ yɛle nɔhalɛ Kilisienema.

15. Ndenle gyɛne boni bieko a yɛdua zo yɛdi ɛzonlenlɛ nwo neazo mɔɔ alimoa Kilisienema yɛle la anzi a?

¹⁵ Eza yɛdi ɛzonlenlɛ nwo neazo mɔɔ alimoa Kilisienema yɛle la anzi wɔ ndenle gyɛne zo. Kɛ neazo la, yɛ ahyehyɛdeɛ ne le kɛ alimoa Kilisienema ɛdeɛ ne ala la, yɛlɛ neavolɛ adenduvoma, asafo nu mgbanyima yɛɛ asafo nu azonvolɛ kɛ mɔɔ ɛnee bɛlɛ ye ala la. (Fel. 1:1; Tae. 1:5) Adwenle mɔ yɛlɛ wɔ nla nee agyalɛ nwo, kɛzi yɛbu mogya kɛ ɔle nwuanzanwuanza yɛɛ ɛhulolɛ mɔɔ yɛlɛ kɛ yɛbɔ asafo ne anwo bane yɛavi ɛtanevolɛma mɔɔ bɛnnu bɛ nwo anwo la amuala gyi neazo mɔɔ alimoa Kilisienema yɛle la azo.—Gyi. 15:28, 29; 1 Kɔl. 5:11-13; 6:9, 10; Hib. 13:4.

16. Duzu a yɛsukoa yɛfi edwɛkɛ mɔɔ wɔ Ɛfɛsɛsema 4:4-6 la anu a?

¹⁶ Gyisɛse hanle kɛ menli dɔɔnwo baha kɛ bɛle ye ɛdoavolɛma, noko tɛ bɛ muala a bɛbali nɔhalɛ a. (Mat. 7:21-23) Eza Ngɛlɛlera ne bɔle yɛ kɔkɔ kɛ wɔ mekɛ mɔɔ li awieleɛ la anu, menli dɔɔnwo bayɛ bɛ nwo kɛ “bɛzɔ nyamenlezonlenlɛ nu.” (2 Tim. 3:1, 5) Noko Baebolo ne ka ye wienyi kile yɛ kɛ, “diedi ko” ala a wɔ ɛkɛ mɔɔ Nyamenle die to nu a.—Kenga Ɛfɛsɛsema 4:4-6.

17. Nwane mɔ a li Gyisɛse anzi ɛnɛ na bɛwɔ nɔhalɛ diedi ko ne anu a?

¹⁷ Nwane mɔ wɔ nɔhalɛ diedi ko ne anu ɛnɛ a? Yɛnleɛnlea daselɛ mɔɔ wɔ ɛkɛ la anu. Yɛnlea ɛzonlenlɛ nwo neazo mɔɔ Gyisɛse yɛle mɔɔ alimoa Kilisienema lile ɔ nzi la. Mualɛ ne le kokye, Gyihova Alasevolɛ. Ɔle nwolɛ adenle kpole kɛ yɛboka Gyihova menli ne anwo na yɛnwu nɔhalɛ ne mɔɔ fale Gyihova nee ye bodane ne mɔ anwo la! Bɛmaa yɛhɔ zo yɛva anwodozo kpole yɛzɔ nɔhalɛ ne anu kpundii.