Mary nee ɔ hu John a de maanle mɔɔ ɛbahola wɔaha edwɛkpa ne wɔahile gyimayɛvoma dɔɔnwo mɔɔ vi Philippines la. Wɔ COVID-19 ewulenzane mekɛ ne anu, Mary nee menli mɔɔ de ye maanle ne anu nee maanle gyɛne nu la bɔle ɔ bo kɛ bɛsukoa Baebolo ne. Kɛzi ɔyɛle ye ɛ?

Mary biza ye Baebolo sukoavoma ne kɛ: “Ɛze awie gyɛne mɔɔ ɔ nye balie nwo kɛ ɔbazukoa Baebolo ne ɔ?” Saa bɛka kɛ ɛhɛe a, ɔka ɔkile bɛ kɛ bɛboa ye bɛmaa ɔ sa ɛha bɛ. Dahuu debie kpalɛ fi kpuya sikalɛ ɛhye anu ba. Duzu ati ɔ? Ɔluakɛ menli mɔɔ anye die Nyamenle Edwɛkɛ ne anwo la kulo kɛ bɛka mɔɔ bɛzukoa la bie bɛkile bɛ mbusuafoɔ nee bɛ gɔnwo mɔ mɔɔ bɛdwenle bɛ nwo la. Duzu a ɛvi kpuya ɛhye mɔɔ Mary biza la anu ɛra a?

Mary Baebolo sukoavo bie mɔɔ bɛfɛlɛ ye Jasmin la boale ye maanle ɔ sa hanle menli gyɛne nna mɔɔ bɛkulo kɛ bɛsukoa Baebolo ne la. Bɛ nuhua ko mɔɔ bɛfɛlɛ ye Kristine la anye liele mɔɔ ɔlɛsukoa la anwo kpalɛ, ɔti ɔhanle ɔhilele Mary kɛ ɔ nee ye ɛzukoa fane nwiɔ dapɛne biala. Mɔɔ Mary bizale Kristine saa ɔze awie gyɛne mɔɔ ɔdaye noko ɔkulo kɛ ɔsukoa Baebolo ne la, ɔhanle kɛ, “Ɛhɛe, mebaha ɛ nwo edwɛkɛ meahile me gɔnwo mɔ.” Wɔ dapɛne ekyii anu, Kristine maanle Mary asa hanle ɔ gɔnwo mɔ nna mɔɔ bɛkulo kɛ bɛsukoa Baebolo ne la. Nzinlii, Kristine vale ɔ gɔnwo mɔ gyɛne rabokale nwolɛ yɛɛ bɛ nuhua bie mɔ noko vale awie mɔ gyɛne rabokale nwolɛ.

Ɛnee eza Kristine kulo kɛ ye mbusuafoɔ mɔɔ wɔ Philippines la sukoa Baebolo ne. Ɔti ɔhanle nwolɛ edwɛkɛ ɔhilele ɔ ra raalɛ Andrea. Mɔlebɛbo ne Andrea hanle wɔ ye adwenle nu kɛ, ‘Alasevolɛ ne mɔ le eku anwo ɛzulolɛ bie, bɛnlie Gyisɛse bɛnli yɛɛ Old Testament ne ala a bɛdi zo a.’ Noko mekɛ mɔɔ bɛzukoale debie ko pɛ bɛwiele la, adwenle mɔɔ ɛnee ɔlɛ wɔ Alasevolɛ ne mɔ anwo la hakyile. Mekɛ biala mɔɔ ɔbazukoa debie fofolɛ la ɔka kɛ, “Ɛhye wɔ Baebolo ne anu, ɔti ɔbayɛ nɔhalɛ!”

Nzinlii, Andrea maanle Mary asa hanle ɔ gɔnwo mɔ nwiɔ yɛɛ awie bie mɔɔ ɔ nee yɛ gyima la na bɛdabɛ noko bɛbɔle ɔ bo bɛzukoale Baebolo ne. Eza mekɛ biala mɔɔ Mary nee Andrea ɛlɛsukoa debie la, Andrea ɛ papa adiema raalɛ bie mɔɔ bɛfɛlɛ ye Angela mɔɔ ɔ nye ɛzi la tie bie, noko ɛnee Mary ɛnze. Akee kenle ko bie, Angela hanle hilele Andrea kɛ ɔha ɔhile Mary ɔmaa ɔ nee ɔdaye noko ɛzukoa Baebolo ne. Angela anye liele mɔɔ ɛnee ɔlɛsukoa la anwo. Wɔ siane ko anu, ɔholale ɔhyele ngɛlɛlera dɔɔnwo ɔguale ɔ ti anu na ɛnee ɔkulo kɛ ɔsukoa debie fane nna wɔ dapɛne ne anu! Andrea boale Angela maanle ɔbɔle ɔ bo kɛ ɔdua videoconferencing zo yeadie debiezukoalɛ ne bie.

 Mɔɔ Mary nwunle kɛ mekɛ biala mɔɔ ɔ nee Kristine ɛlɛsukoa debie la, ɛnee ɔ hu Joshua de ahane ɔlɛtie bie la, Mary bizale ye kɛ saa ɔbamaa bɛ nee ye azukoa Baebolo ne a. Joshua hanle kɛ, “Mebadie bie ala, ɔti nea na wɔambiza me kpuya; saa ɛbiza me kpuya a, mebavinde meahɔ.” Mɔɔ bɛzukoale debie mitini nnu pɛ la, akee ɔdaye mumua ne ɔbizale kpuya dɔɔnwo ɔdɛlale mɔɔ Kristine bizale la, na ɛnee ɔkulo kɛ ɔtoa zo ɔsukoa Baebolo ne.

Kpuya sikalɛ mɔɔ Mary bizale la maanle ɔnyianle Baebolo sukoavoma dɔɔnwo. Ɔyɛle ngyehyɛleɛ ɔmaanle mediema gyɛne nee bɛ nuhua dɔɔnwo zukoale debie. Saa ɛka bɛ muala ɛbɔ nu a, Mary nee menli 28 bɔle Baebolo ɛzukoalɛ bo wɔ maanle ngakyile nna anu.

Bɛzɔnenle Jasmin, Baebolo sukoavo mɔɔ bɛlimoale bɛbɔle ye duma wɔ anwubielɛ ɛhye anu la wɔ April 2021. Bɛzɔnenle Kristine wɔ May 2022 na yezia yehɔ ye abusua ne anwo ɛkɛ wɔ Philippines. Eza bɛzɔnenle sukoavoma nwiɔ mɔɔ Kristine vale bɛ maanle Mary la. Yeangyɛ biala, bɛzɔnenle Angela noko, na kɛkala ɔle dahuu adekpakyelɛnli. Kristine ahu Joshua nee bɛ ra raalɛ Andrea, yɛɛ Baebolo sukoavoma gyɛne dɔɔnwo ɛlɛnyia anyuhɔlɛ kpalɛ.

Wɔ alimoa Kilisienema mekɛ zo, menli dɔɔnwo hanle edwɛkpa ne bie hilele bɛ mbusuafoɔ nee bɛ gɔnwo mɔ. (Dwɔn 1:​41, 42a; Gyi. 10:​24, 27, 48; 16:​25-33) Biza wɔ Baebolo sukoavoma nee anyelielɛma gyɛne kɛ, “Ɛze awie gyɛne mɔɔ ɔ nye balie nwo kɛ ɔbazukoa Baebolo ne ɔ?” Saa ɛbiza kpuya sikalɛ ɛhye mɔɔ awie biala bahola abiza la a, nwane a ze Baebolo sukoavoma dodo mɔɔ ɛbahola wɔanyia la a?