1. Sunsum nu bodane boni mɔ a yɛbahola yɛava yɛazie yɛ nye zo a?

 KƐMƆ yɛle nɔhalɛ Kilisienema la ati, yɛkulo Gyihova kpalɛ. Yɛkulo kɛ yɛyɛ biala mɔɔ yɛbahola la wɔ yɛ ɛzonlenlɛ nu. Noko saa yɛbahola yɛayɛ biala mɔɔ ɔhyia kɛ yɛyɛ la a, ɔwɔ kɛ yɛfa sunsum nu bodane le kɛ yɛbanyia Kilisiene subane, yɛazukoa ninyɛne ngakyile ɛyɛlɛ yɛɛ kɛ ɔkɛyɛ na yɛakpondɛ ndenle yɛalua zo yɛazonle awie mɔ la yɛsie yɛ nye zo. b

2. Duzu ati a ɔwɔ kɛ yɛfa sunsum nu bodane yɛsie yɛ nye zo na yɛbɔ mɔdenle kɛ yɛbadwu nwo a?

² Duzu ati a ɔwɔ kɛ yɛbɔ mɔdenle kɛ yɛbanyia anyuhɔlɛ wɔ sunsum nu a? Ye titili ne a le kɛ yɛkulo kɛ yɛyɛ mɔɔ sɔ yɛ anwuma Selɛ ne mɔɔ lɛ ɛlɔlɛ la anye. Saa Gyihova nwu kɛ yɛlɛfa yɛ ɛlolɛ ahyɛlɛdeɛ ne mɔ yɛali gyima kpalɛ wɔ ye ɛzonlenlɛ nu a, ɔ nye die. Bieko, yɛkulo kɛ yɛnyia anyuhɔlɛ wɔ sunsum nu amaa yɛahola yɛaboa yɛ mediema kpalɛ. (1 Tɛs. 4:9, 10) Ɔnva nwo mekɛ tendenle mɔɔ yɛva yɛdɛnla nɔhalɛ ne anu la, yɛ muala yɛbahola yɛanyia anyuhɔlɛ wɔ sunsum nu. Maa yɛnlea kɛzi yɛbahola yɛayɛ ye zɔ la.

3. Kɛ mɔɔ bɛhɛlɛ ye wɔ 1 Timote 4:12-16 la, duzu a ɛzoanvolɛ Pɔɔlo maanle Timote anwosesebɛ kɛ ɔyɛ a?

³ Mɔɔ ɛzoanvolɛ Pɔɔlo hɛlɛle ye kɛlata mɔɔ limoa hɔmaanle Timote la, ɛnee ɔle asafo nu kpanyinli mɔɔ bɔ mɔdenle dɛba. Noko Pɔɔlo maanle ye anwosesebɛ kɛ ɔhɔ zo ɔnyia anyuhɔlɛ wɔ sunsum nu. (Kenga 1 Timote 4:12-16.) Saa ɛdwenle Pɔɔlo folɛdulɛ ne anwo a, ɛbanwu kɛ ɛnee ɔkulo kɛ Timote nyia  anyuhɔlɛ wɔ ndenle nwiɔ azo: ɛnee ɔkulo kɛ ɔnyia Kilisiene subane le kɛ ɛlɔlɛ, diedi na ɔmaa ɔ nwo te na ɔnyia anyuhɔlɛ wɔ bagua nu ɛgengalɛ, folɛdulɛ nee ngilehilelɛ nu. Mɔɔ Timote neazo ne wɔ yɛ adwenle nu la, bɛmaa yɛnlea kɛzi yɛfa bodane mɔɔ yɛbahola yɛadwu nwo la yɛsie yɛ nye zo a ɔbaboa yɛ yeamaa yɛanyia anyuhɔlɛ wɔ sunsum nu la. Eza yɛbazuzu ndenle bie mɔ mɔɔ yɛbalua zo yɛadɛlɛ yɛ ɛzonlenlɛ gyima ne anu la anwo.

4. Kɛ mɔɔ Felepaema 2:19-22 kile la, duzu a maanle Timote rayɛle Gyihova sonvolɛ mɔɔ ɔ nwo hyia kpalɛ a?

⁴ Duzu a maanle Timote rayɛle Gyihova sonvolɛ mɔɔ ɔ nwo hyia kpalɛ a? Ye Kilisiene subane ngɛnlɛma ne mɔ ɔ. (Kenga Felepaema 2:19-22.) Mɔɔ Pɔɔlo hanle ye wɔ Timote anwo la maa yɛnwu kɛ ɛnee ɔbɛlɛ ɔ nwo aze, ɔdi nɔhalɛ, ɔyɛ gyima ɛsesebɛ yɛɛ bɛkola bɛfa bɛ nwo bɛto ɔ nwo zo. Ɛnee ɔlɛ subane ngɛnlɛma yɛɛ ɔdwenle mediema ne mɔ anwo kpalɛ. Ɛhye ati ɛnee Pɔɔlo kulo Timote edwɛkɛ kpalɛ na yeammaa yeanyɛ se kɛ ɔbava gyimalilɛ mɔɔ ɔyɛ se la yeawula ɔ sa. (1 Kɔl. 4:17) Zɔhane ala a saa yɛnyia subane mɔɔ Gyihova anye die nwo la a, ɔbamaa yeahulo yɛ na yɛahola yɛaboa asafo ne kpalɛ a.​—Edw. 25:9; 138:6.

5. (a) Kɛ ɔkɛyɛ na wɔanwu Kilisiene subane mɔɔ ɛkulo kɛ ɛnyia la ɛ? (b) Kɛ mɔɔ yɛnwu ye wɔ nvoninli ne anu la, kɛzi adiema bɛlɛra ne ɛlɛdi bodane mɔɔ yeva yɛzie ɔ nye zo kɛ ɔbade awie mɔ nyane bo la anwo gyima ɛ?

⁵ Kpa bodane fɔɔnwo bie. Fa asɔneyɛlɛ suzu subane mɔɔ ɔhyia kɛ ɛnyia anyuhɔlɛ wɔ nu la anwo. Kpa subane fɔɔnwo bie mɔɔ ɛkulo kɛ ɛfa wɔ adwenle ɛsie zolɛ la. Kɛ neazo la, ɛkulo kɛ ɛte awie mɔ nyane bo kpalɛ anzɛɛ ɛnyia ɛhulolɛ kpole kɛ ɛbaboa ɛ mediema diedima ɔ? Ɔhyia kɛ ɛbɔ mɔdenle ɛkpondɛ anzodwolɛ na ɛfa ɛtane ɛkyɛ ɔ? Ɔbayɛ kpalɛ kɛ ɛbabiza ɛ gɔnwo kpalɛ bie wɔamaa yeaha mɔɔ ɛyɛ a ɛbanyia anyuhɔlɛ la yeahile wɔ.​—Mrɛ. 27:6.

6. Kɛ ɔkɛyɛ na wɔadwu bodane mɔɔ wɔva wɔzie ɛ nye zo kɛ ɛnyia subane kpalɛ bie la anwo ɛ?

⁶ Bɔ mɔdenle dwu wɔ bodane ne anwo. Kɛ ɔkɛyɛ na wɔayɛ ye zɔ ɛ? Adenle ko a le kɛ ɛbazukoa subane mɔɔ ɛkulo kɛ ɛnyia anyuhɔlɛ wɔ nu la anwo debie kpalɛ. Fa ye kɛ wɔzi kpɔkɛ kɛ ɛkulo kɛ ɛfa awie mɔ ɛtane ɛkyɛ bɛ. Ɛbahola wɔalimoa wɔazukoa menli mɔɔ vale ɛtane hyɛle bɔkɔɔ nee bɛdabɛ mɔɔ bɛanyɛ zɔ la anwo neazo mɔɔ wɔ Baebolo ne anu la anwo debie na wɔadwenledwenle nwolɛ. Suzu Gyisɛse neazo ne anwo. Ɔvile ye ɛhulolɛ nu ɔvale awie mɔ ɛtane ɔhyɛle bɛ. (Luku 7:47, 48) Eza yeanva ye adwenle yeanzie bɛ nvonleɛ ne mɔ  azo, emomu mɔɔ bɛbahola bɛayɛ la azo. Noko ɛnee Falasiima mɔɔ wɔ Gyisɛse mekɛ zo la ‘ɛmbu awie mɔ.’ (Luku 18:9) Saa ɛdwenledwenle neazo ɛhye mɔ anwo ɛwie a, biza ɛ nwo kɛ: ‘Duzu a menwu ye wɔ awie mɔ anu a? Bɛ subane ne mɔ boni a mekpa kɛ mebava me adwenle meazie zo a?’ Saa ɔyɛ se kɛ ɛbava awie ɛtane wɔahyɛ ye a, bɔ mɔdenle kɛ ɛbahɛlɛ ahenle ne subane kpalɛ dodo biala mɔɔ ɛze la. Akee biza ɛ nwo kɛ: ‘Kɛzi Gyisɛse bu sonla ɛhye ɛ? Ɔdaye a anrɛɛ ɔbava yeahyɛ ye ɔ?’ Saa yɛyɛ ye zɔ a ɔbaboa yɛ yeamaa yɛahakyi yɛ adwenle. Mɔlebɛbo ne, bie a ɔwɔ kɛ yɛbɔ mɔdenle kpalɛ na yɛava awie mɔɔ ɛvo yɛ la ɛtane yɛahyɛ ye. Noko saa yɛbɔ mɔdenle kɛ yɛbanyia anyuhɔlɛ a, ɔnrɛhyɛ yɛbanyia ɛhulolɛ kpole kɛ yɛbava ɛtane yɛahyɛ.

7. Kɛ mɔɔ Mrɛlɛbulɛ 22:29 kile la, kɛzi Gyihova fa menli mɔɔ ze bɛ gyima nye zo la di gyima ɛnɛ ɛ?

⁷ Bodane bieko mɔɔ ɛbahola wɔava wɔazie ɛ nye zo la a le kɛ ɛbazukoa gyima bie mɔ ɛyɛlɛ. Suzu gyimayɛvoma dodo mɔɔ bɛhyia bɛ nwo amaa bɛahola bɛazi Bɛtɛle azua, Nyianu Asalo nee Belemgbunlililɛ Asalo ngakyile la anwo nea. Bɛ nuhua dɔɔnwo zukoale gyima ɛhye mɔ wɔ mekɛ mɔɔ bɛ nee mediema mɔɔ ze gyima ɛhye mɔ anye zo ɛlɛyɛ gyima la. Kɛ mɔɔ yɛnwu ye wɔ nvoninli ne anu la, mediema mrenyia nee mraalɛ ɛlɛsukoa kɛzi bɛbaboa bɛamaa bɛaziezie Nyianu Asalo nee Belemgbunlililɛ Asalo ne mɔ la. Gyihova Nyamenle, “dahuu Belemgbunli ne” nee Kelaese Gyisɛse, “arelemgbunli Belemgbunli” ne ɛlɛdua ndenle ɛhye mɔ nee ndenle gyɛne zo ava gyimayɛvoma mɔɔ bɔ mɔdenle la ali gyima bɛamaa bɛayɛ ninyɛne mgbole. (1 Tim. 1:17; 6:15; kenga Mrɛlɛbulɛ 22:29.) Yɛkulo kɛ yɛyɛ gyima ɛsesebɛ yɛfa ninyɛne mɔɔ yɛkola ye yɛ la yɛwula Gyihova anyunlunyia na tɛ yɛ nwo.​—Dwɔn 8:54.

8. Kɛ ɔkɛyɛ na wɔanwu debie mɔɔ ɛkulo kɛ ɛsukoa ye ɛyɛlɛ la ɛ?

⁸ Kpa bodane fɔɔnwo bie. Duzu a ɛkulo kɛ ɛsukoa ye ɛyɛlɛ a? Biza wɔ asafo nu mgbanyima anzɛɛ bie a maangyebakyi zo neavolɛ ne kɛ duzu a bɛnea a ɛbahola wɔazukoa ye ɛyɛlɛ a. Kɛ neazo la, saa bɛka kɛ ɔwɔ kɛ ɛnyia anyuhɔlɛ wɔ wɔ ɛdendɛlɛ nee wɔ ngilehilelɛ nu a, biza bɛ maa bɛha ɛdendɛlɛ nu subane fɔɔnwo mɔɔ ɔhyia kɛ ɛdi nwolɛ gyima la bɛhile wɔ. Akee bɔ mɔdenle kɛ ɛbanyia anyuhɔlɛ. Kɛ ɔkɛyɛ na wɔahola wɔayɛ ɛhye ɛ?

9. Kɛ ɔkɛyɛ na wɔadwu bodane mɔɔ wɔva wɔzie ɛ nye zo kɛ ɛsukoa debie bie ɛyɛlɛ la anwo ɛ?

⁹ Bɔ mɔdenle dwu wɔ bodane ne anwo. Fa ye kɛ ɛkulo kɛ ɛnyia anyuhɔlɛ wɔ wɔ ngilehilelɛ nu. Ɛbahola wɔazukoa Maa Ɛ Nye Ɛbolo Ɛgengalɛ Nee Ngilehilelɛ Nwo brohyua ne kpalɛ. Saa bɛmaa wɔ gyimalilɛ wɔ dapɛne avinli debiezukoalɛ ne abo a, ɛbahola wɔaha wɔahile adiema bie mɔɔ bɔ mɔdenle la kɛ ɛkulo kɛ ɛdimoa ɛyɛ wɔ gyimalilɛ ne ɛmaa ɔnea na ɔkile wɔ ɛleka mɔɔ ɔhyia kɛ ɛnyia anyuhɔlɛ la. Mmamaa bɛnwu kɛ ɛze gyima bie yɛ ala, emomu eza maa bɛnwu kɛ ɛ nye bolo wɔ gyima nwo yɛɛ bɛkola bɛfa bɛ nwo bɛto ɛ nwo zo.​—Mrɛ. 21:5; 2 Kɔl. 8:22.

10. Maa kɛzi yɛbahola yɛanyia anyuhɔlɛ wɔ debie bie ɛyɛlɛ nu la anwo neazo.

¹⁰ Na saa ɛnze debie bie mɔɔ ɛkulo kɛ ɛsukoa ye ɛyɛlɛ la anwo ɛhwee noko ɛ? Mmamaa ɛ sa nu to! Ɛnee adiema nrenyia bie mɔɔ bɛfɛlɛ ye Garry la ɛnze kenga kpalɛ. Ɔkakye kɛzi ɔ ti zile aze wɔ mekɛ bie mɔɔ ɔbɔle mɔdenle kɛ ɔkenga debie wɔ debiezukoalɛ bo la. Noko ɔhɔle zo ɔbɔle mɔdenle kɛ ɔbanyia anyuhɔlɛ. Kɛkala ɔse ɔlua ndetelɛ mɔɔ ɔnyianle la ati, ɔkola ɔmaa ɛdendɛlɛ wɔ Belemgbunlililɛ Asalo, maangyebakyi nee maanzinli nyianu bo!

11. Duzu a baboa yɛ yeamaa yɛayɛ dɔɔnwo kɛ Timote a?

 ¹¹ Asoo Timote rayɛle tendɛvolɛ anzɛɛ kilehilevolɛ mɔɔ bɔ mɔdenle kpalɛ? Baebolo ne anga. Noko ɔda ali kɛ kɛmɔ Timote lile Pɔɔlo folɛdulɛ ne azo la ati, ɔnyianle anyuhɔlɛ na ɔbɔle mɔdenle ɔyɛle gyima biala mɔɔ bɛvale bɛmaanle ye la kpalɛ. (2 Tim. 3:10) Yɛdayɛ noko, saa yɛsukoa kɛzi bɛyɛ gyima bie la kpalɛ a, yɛbahola yɛayɛ dɔɔnwo wɔ Gyihova ɛzonlenlɛ nu.

12. Duzu nvasoɛ a wɔnyia wɔvi mɔɔ awie mɔ yɛ maa wɔ la anu a?

¹² Yɛ muala yɛnyia mɔɔ awie mɔ yɛ la azo nvasoɛ. Saa yɛla asopiti na asafo nu mgbanyima mɔɔ boka Asopiti Ngitanwolilɛ Kɔmatii ne nee Wuliravolɛ Ɛkpɔlalɛ Eku ne anwo la bakpɔla yɛ a, yɛ nye die nwo kpalɛ. Saa yɛlɛyia ngyegyelɛ wɔ yɛ ɛbɛlabɔlɛ nu na asafo nu kpanyinli bie nyia mekɛ tie yɛ edwɛkɛ na ɔkyekye yɛ rɛle a, yɛ nye die nwolɛ kpalɛ. Saa yɛhyia moalɛ wɔ kɛzi yɛbayɛ Baebolo ɛzukoalɛ kpalɛ la anu, na adekpakyelɛnli bie mɔɔ bɔ mɔdenle la ka kɛ ɔ nee yɛ bahɔ na ɔkile yɛ mɔɔ yɛyɛ a yɛbanyia anyuhɔlɛ la a, yɛ nye die nwo kpalɛ. Mediema ɛhye mɔ amuala anye die nwo kɛ bɛbaboa yɛ. Saa yɛdayɛ noko yɛtu yɛ nwo yɛmaa yɛboa yɛ mediema a, yɛ nye balie. Gyisɛse hanle kɛ: “Anyelielɛ dɔɔnwo wɔ ɛmaanlɛ nu tɛla ɛlielɛ.” (Gyi. 20:35) Saa ɛkulo kɛ ɛdua ndenle ɛhye mɔ anzɛɛ ndenle gyɛne zo ɛtɛlɛ wɔ ɛzonlenlɛ gyima ne anu a, duzu a baboa wɔ yeamaa wɔadwu zɔhane bodane ne mɔ anwo a?

13. Saa yɛlɛfa bodane bie yɛazie yɛ nye zo a, duzu a ɔwɔ kɛ yɛkakye a?

¹³ Mmafa bodane biala mɔɔ bara wɔ adwenle nu la ɛsie ɛ nye zo. Kɛ neazo la, bie a ɛbanyia adwenle kɛ, ‘Mekulo kɛ meyɛ dɔɔnwo wɔ asafo ne anu.’ Noko bie a saa ɛyɛ ye zɔ a ɔbamaa yeayɛ se kɛ ɛbadwu zɔhane bodane ne anwo, yɛɛ saa ɛdwu nwo bɔbɔ a, wɔannea a ɛnrɛnwu ye. Ɔti fa bodane fɔɔnwo bie sie ɛ nye zo. Ɛbahola wɔahɛlɛ bodane ne nee mɔɔ ɛyɛ a ɛbadwu nwolɛ la.

14. Duzu ati a ɔwɔ kɛ yɛnyia ɛhulolɛ kɛ yɛbayɛ nzenzaleɛ wɔ mekɛ mɔɔ yɛlɛfa bodane yɛazie yɛ nye zo la ɛ?

¹⁴ Eza ɔwɔ kɛ yɛnyia ɛhulolɛ kɛ yɛbayɛ nzenzaleɛ wɔ mekɛ mɔɔ yɛlɛfa bodane yɛazie yɛ nye zo la. Duzu ati ɔ? Ɔluakɛ yɛnrɛhola yɛnrɛyɛ mɔɔ bazi yɛ ɛbɛlabɔlɛ nu la anwo ɛhwee. Kɛ neazo la: Ɛnee ɛzoanvolɛ Pɔɔlo ɛboa ɛmaa bɛde asafo fofolɛ wɔ Tɛsalonaeka. Na ɛnee  ɔkulo kɛ ɔtɛnla ɛkɛ ɔboa zɔhane Kilisienema fofolɛ ne. Noko dwazotiama ammaa Pɔɔlo andɛnla ɛkɛ. (Gyi. 17:1-5, 10) Saa Pɔɔlo dɛnlanle ɛkɛ a, anrɛɛ ɔbahola yeava ɔ mediema ne mɔ ngoane yeado esiane nu. Noko Pɔɔlo ammaa ɔ sa nu ando. Emomu, ɔyɛle mɔɔ ɔbahola la wɔ tɛnlabelɛ mɔɔ ɔhɔle nu la anu. Nzinlii, ɔzoanle Timote wɔ Tɛsalonaeka ɔmaanle ɔhɔboale diedima fofolɛ ɛhye mɔ wɔ sunsum nu. ( Tɛs. 3:1-3) Mɔɔ Tɛsalonaekama nwunle kɛ Timote lɛ ɛhulolɛ kɛ ɔbahɔ ɛleka biala mɔɔ bɛbazoa ye la, nea kɛzi bɛ nye liele a!

15. Kɛzi tɛnlabelɛ mɔɔ yɛngola yɛnyɛ nwolɛ ɛhwee la bahola aha bodane mɔ gyi yɛ nye zo la ɛ? Maa neazo.

¹⁵ Yɛbahola yɛazukoa debie yɛavi mɔɔ dole Pɔɔlo wɔ Tɛsalonaeka la anu. Bie a ɛnee yɛkulo kɛ yɛnyia ɛzonlenlɛ nwo adenle bie, noko tɛnlabelɛ mɔɔ yɛnrɛhola yɛnrɛyɛ nwolɛ ɛhwee la ɛnrɛmaa yɛ sa ɛnrɛha ye. (Nol. 9:11) Saa zɔhane a ɔde wɔ wɔ afoa nu a, nyia ɛhulolɛ kɛ ɛbakpa bodane fofolɛ mɔɔ ɛbahola wɔadwu nwolɛ la. Ɛhye a agyalɛma bie mɔɔ bɛfɛlɛ bɛ Ted nee Hiedi la yɛle a. Ɔlua anwodolɛ ti, ɛnee ɔwɔ kɛ bɛfi Bɛtɛle. Noko Gyihova anwo ɛlɔlɛ mɔɔ bɛlɛ la hanle bɛ maanle bɛkpondɛle ndenle gyɛne bɛluale zo bɛdɛlɛle bɛ ɛzonlenlɛ gyima ne anu. Mɔɔ limoa, bɛyɛle dahuu adekpakyelɛma. Nzinlii, bɛkpale bɛ kɛ adekpakyelɛ titilima, na bɛtetele Ted kɛ ɔyɛ maangyebakyi zo neavolɛ ne agyakɛnugyinlavolɛ. Akee ɔrale ye kɛ saa awie di ɛvolɛ bie a ɔngola ɔnyɛ maangyebakyi zo neavolɛ bieko. Ted nee Hiedi nwunle kɛ bɛnrɛhola bɛnrɛdoa ɛzonlenlɛ nwo adenle ɛhye mɔɔ bɛnyia ye la azo bieko. Bɛ rɛle bɔle ɛdeɛ, noko bɛnwunle kɛ bɛbahola bɛalua ndenle gyɛne zo bɛazonle Gyihova. Ted hanle kɛ: “Yɛzukoale kɛ yɛnrɛva yɛ adwenle yɛnrɛzie ɛzonlenlɛ nwo adenle ko ala azo.”

16. Duzu a yɛsukoa yɛfi Galeehyeama 6:4 anu a?

¹⁶ Tɛ debie biala mɔɔ bazi yɛ ɛbɛlabɔlɛ nu la a yɛbahola yɛayɛ nwolɛ debie a. Ɛhye ati ɔnle kɛ yɛgyinla ɛzonlenlɛ nwo adenle mɔɔ yɛlɛ la azo yɛbu yɛ nwo kɛ yɛ nwo hyia anzɛɛ yɛfa nwolɛ adenle mɔɔ yɛlɛ la yɛtoto awie mɔ ɛdeɛ nwo. Hiedi hanle kɛ, “Saa ɛfa wɔ ɛbɛlabɔlɛ ɛtoto mɔɔ ɔlɛkɔ zo wɔ awie mɔ ɛbɛlabɔlɛ nu la anwo a, ɛnrɛnyia anzodwolɛ.” (Kenga Galeehyeama 6:4.) Nwolɛ hyia kɛ yɛbakpondɛ ndenle mɔɔ yɛbahola yɛalua zo yɛaboa awie mɔ na yɛazonle Gyihova la. c

17. Duzu a ɛbahola wɔayɛ amaa wɔafɛta wɔamaa ɛzonlenlɛ nwo adenle ngakyile a?

¹⁷ Amaa wɔahola wɔanyia ɛzonlenlɛ nwo adenle ngakyile la, maa wɔ ɛbɛlabɔlɛ ɛyɛ sikalɛ yɛɛ mmatwe kakɛ ɛto ɛ nwo. Fa bodane  ngyikyi mɔɔ ɔbaboa wɔ yeamaa wɔadwu bodane mgbole nwo la sie ɛ nye zo. Kɛ neazo la, saa wɔ bodane a le kɛ ɛbayɛ dahuu adekpakyelɛnli a, kɛkala ɛbahola wɔayɛ adekpakyelɛ boavolɛ mɔɔ ɛntoto ye nu ɔ? Saa wɔ bodane a le kɛ ɛkulo kɛ ɛyɛ asafo nu sonvolɛ a, ɛbahola wɔava mekɛ dɔɔnwo wɔayɛ daselɛlilɛ gyima ne na wɔakpɔlɔkpɔla bɛdabɛ mɔɔ bɛnde kpɔkɛ nee mgbanyinli mɔɔ bɛwɔ wɔ asafo ne anu la ɔ? Anwubielɛ mɔɔ ɛbanyia ye kɛkala la bahola amaa wɔanyia ɛzonlenlɛ nwo adenle kenle bie. Bɔ kpɔkɛ kɛ saa bɛmaa wɔ gyimalilɛ biala a ɛbabɔ ɛ nwo mɔdenle.​—Wlo. 12:11.

18. Kɛ mɔɔ yɛnwu ye wɔ nvoninli ne anu la, duzu a ɛbahola wɔazukoa wɔavi Beverley neazo ne anu a?

¹⁸ Saa yɛyɛ mgbanyinli bɔbɔ a, yɛbahola yɛava sunsum nu bodane yɛazie yɛ nye zo na yɛadwu nwo. Suzu adiema raalɛ bie mɔɔ bɛfɛlɛ ye Beverley mɔɔ yeli ɛvolɛ 75 la neazo ne anwo. Ɛnee anwodolɛ bie mɔɔ wɔ ɔ nwo la maa ɔyɛ se kɛ ɔbadia. Noko ɛnee ɔkulo kɛ ɔfa ɔ nwo ɔwula Ngakyelɛlilɛ ɛsalɛdolɛ ne anu. Ɔti ɔvale bodane fɔɔnwo bie ɔziele ɔ nye zo. Kɛ mɔɔ Beverley vale ziele ɔ nye zo kɛ ɔkulo kɛ ɔyɛ nolobɔlɛ ne bie na ɔholale ɔyɛle bie la ati, ɔ nye liele kpalɛ. Ye mɔdenlebɔlɛ ne hanle awie mɔ maanle bɛmianle bɛ nwo wɔ daselɛlilɛ nu. Saa yɛ mediema mgbanyinli tɛnlabelɛ ɛmmaa bɛngola bɛnyɛ dɔɔnwo bɔbɔ a, mɔɔ bɛyɛ la sonle bolɛ maa Gyihova.​—Edw. 71:17, 18.

19. Sunsum nu bodane mɔɔ yɛbahola yɛava yɛazie yɛ nye zo la bie a le boni mɔ?

¹⁹ Fa bodane mɔɔ ɛbahola wɔadwu nwo la sie ɛ nye zo. Nyia subane mɔɔ ɔbamaa Gyihova anye alie ɛ nwo la. Sukoa kɛzi bɛyɛ gyima bie mɔ la amaa yɛ Nyamenle ne nee ye ahyehyɛdeɛ ne ava wɔ ali gyima dɔɔnwo. Kpondɛ ndenle dua zo sonle ɛ mediema kpalɛ. d Gyihova bayila wɔ kɛ mɔɔ ɔyilale Timote la “amaa menli kɔsɔɔti anwu wɔ anyuhɔlɛ ne wienyi.”​—1 Tim. 4:15.