Sunsum ne maanle ɛzoanvolɛ Pɔɔlo hanle subane ngɔnla mɔɔ sunsum nwuanzanwuanza ne so la anwo edwɛkɛ. (Gal. 5:22, 23) Ɔhanle kɛ subane mgbalɛ ɛhye mɔ bɔ nu yɛ “sunsum ne ma.” * Ma ɛhye kile “subane fofolɛ ne.” (Kɔl. 3:10) Kɛmɔ baka mɔɔ bɛgugua ɔ bo nzule kpalɛ so ma la, zɔhane ala a saa sunsum nwuanzanwuanza ne yɛ gyima wɔ awie ɛbɛlabɔlɛ nu a, ɔda sunsum ne ma ali a.​—Edw. 1:1-3.

Sunsum ne ma ne foa mɔɔ limoa mɔɔ Pɔɔlo hanle kɛ ɔsonle bolɛ la a le ɛlɔlɛ. Kɛzi ɔsonle bolɛ ɛ? Pɔɔlo hanle kɛ, saa ɔnlɛ ɛlɔlɛ a, ɔnzɔho “ɛhwee.” (1 Kɔl. 13:2) Duzu a le ɛlɔlɛ, na kɛ ɔkɛyɛ na yɛanyia ye na yɛala ye ali dahuu ɛ?

Yɛnrɛhola yɛnrɛhilehile ɛlɔlɛ nu, noko Baebolo ne kile kɛzi bɛda ye ali la. Kɛ neazo la, yɛkenga kɛ ɛlɔlɛ lɛ “abotane yɛɛ ɔ ti akunlu le kɛnlɛma.” Eza “ɔdi fɛlɛko wɔ nɔhalɛ ne anwo,” yɛɛ “ɔto ɔ rɛle aze wɔ debie biala anu, ɔdie debie biala ɔdi, ɔlɛ debie biala anu anyelazo, ɔgyinla debie biala anloa.” Eza ɔkile ɛlɔlɛ kpole mɔɔ yɛbanyia yɛamaa awie mɔ, yɛadwenle bɛ nwo kpalɛ, na yɛava bɛ agɔnwolɛ la. Noko, saa awie ɛnlɛ ɛlɔlɛ a, ɔtwe nungule, ɔmemaa ɔ nwo zo, ɔbɔ nla nu ɛbɛla ɛtane, ɔle angomedi, ɔfa ɛya kpole yɛɛ ɔnva ɛtane ɔngyɛ. Kɛ anrɛɛ yɛbala subane ɛtane zɛhae bie ali la, yɛkulo kɛ yɛda ɛlɔlɛ mɔɔ “angomedi” ɛnle nu la ali yɛkile awie mɔ.​—1 Kɔl. 13:4-8.

“Nyamenle le ɛlɔlɛ.” Nɔhalɛ nu, Gyihova mumua ne le ɛlɔlɛ. (1 Dwɔn 4:8) Ye gyima nee ye nyɛleɛ kɔsɔɔti kile kɛ ɔle ɛlɔlɛ. Ɛlɔlɛ kpole mɔɔ ɔlale ye ali ɔhilele alesama la a le Gyisɛse mɔɔ ɔmaanle ɔnwunle amaneɛ na ɔwule ɔmaanle yɛ la. Ɛzoanvolɛ Dwɔn hanle kɛ: “Ɛhye azo a bɛluale bɛlale Nyamenle ɛlɔlɛ ne ali wɔ yɛ nwo a, Nyamenle zoanle ɔ Ra kokye ne wɔ ewiade amaa ɔlua ɔ nwo zo yɛanyia ngoane. Ɛhye anu a ɛlɔlɛ ne wɔ a, tɛ yɛdayɛ a yɛhulole Nyamenle a, emomu yemɔ a ɔhulole yɛ na ɔzoanle ɔ Ra ne kɛ ɔrabɔ yɛ ɛtane nwo mgbɔdalɛ afɔle a.” (1 Dwɔn 4:9, 10) Nyamenle ɛlɔlɛ ne ati, yɛkola yɛnyia ɛtanefakyɛ, anyelazo nee ngoane.

Gyisɛse hilele kɛ ɔkulo alesama ɔlua ye ɛhulolɛ nu mɔɔ vile ɔyɛle Nyamenle ɛhulolɛdeɛ la azo. Pɔɔlo hɛlɛle kɛ: “[Gyisɛse] hanle kɛ: ‘Nea! mera kɛ mebayɛ wɔ ɛhulolɛdeɛ.’ Ɔlua “ɛhulolɛdeɛ” ɛhye ati, bɛlua Gyisɛse Kelaese sonlabaka ne mɔɔ ɔvale ɔbɔle afɔle kokye la azo bɛde yɛ nwo.” (Hib. 10:9, 10) Dasanli biala ɛnrɛhola ɛnrɛla ɛlɔlɛ kpole ali. Gyisɛse hanle kɛ: “Awie biala ɛnlɛ ɛlɔlɛ kpole ɛndɛla ɛhye, kɛ awie kɛva ye ngoane kɛbɔ afɔle kɛmaa ɔ gɔnwo mɔ.” (Dwɔn 15:13) Alesama mɔɔ ɛnli munli la bahola ala ɛlɔlɛ mɔɔ  Gyihova nee Gyisɛse ɛla ye ali ɛhile yɛ la bie ali ɔ? Ɛhɛe! Bɛmaa yɛzuzu kɛzi yɛbahola yɛayɛ zɔ la anwo.

Pɔɔlo dule yɛ folɛ kɛ: “Bɛzukoa Nyamenle kɛ mralɛ kulovolɛma, na bɛhɔ zo bɛbɔ bɛ ɛbɛla wɔ ɛlɔlɛ nu kɛ mɔɔ Kelaese noko hulole yɛ na ɔvale ɔ nwo ɔmaanle yɛ” la. (Ɛfɛ. 5:1, 2) Saa yɛda subane ɛhye ali dahuu a, ɛnee ‘yɛlɛkɔ zo yɛabɔ yɛ ɛbɛla wɔ ɛlɔlɛ nu.’ Yɛfa yɛ nyɛleɛ a yɛda ɛlɔlɛ ɛhye ali a, tɛ mɔɔ yɛka la ala. Dwɔn hɛlɛle kɛ: “Ngakula, bɛmmamaa yɛfa yɛ edwɛkɛhanlɛ anzɛɛ yɛ nloa mgbane yɛkulo menli, emomu bɛmaa yɛyɛ ye wɔ nyɛleɛ nee nɔhalɛ nu.” (1 Dwɔn 3:18) Kɛ neazo la, saa yɛkulo Nyamenle nee yɛ gɔnwo mɔ a, ɔbamaa yɛaha “Belemgbunlililɛ ne anwo edwɛkpa” ne yɛahile bɛ. (Mat. 24:14; Luku 10:27) Saa yɛlɛ abotane, yɛda atiakunlukɛnlɛma ali na yɛfa ɛtane yɛkyɛ a, ɔkile kɛ yɛlɛ ɛlɔlɛ. Ɛhye ati, Baebolo ne tu yɛ folɛ kɛ: “Kɛ mɔɔ Gyihova ɛva bɛ ɛtane ɛhyɛ bɛ la, bɛdabɛ noko bɛyɛ ye zɔhane ala.”​—Kɔl. 3:13.

Noko zɛhae nɔhalɛ ɛlɔlɛ ne ɛnle nganeɛdelɛ ala. Kɛ neazo la, awovolɛ bie mɔ yɛ debie biala mɔɔ bɛ mra kpondɛ la maa bɛ amaa bɛanzu. Noko awovolɛ mɔɔ kulo ɔ ra kpalɛ la bazi ɔ gyakɛ aze wɔ mekɛ mɔɔ fɛta la. Zɔhane ala a Nyamenle le ɛlɔlɛ a, noko “Gyihova tea bɛdabɛ mɔɔ ɔkulo bɛ la.” (Hib. 12:6) Saa yɛda ɛlɔlɛ ali a, yɛdayɛ noko yɛbava ndeanlɛ mɔɔ fɛta la yɛamaa. (Mrɛ. 3:11, 12) Nɔhalɛ nu, mekɛ mɔɔ yɛlɛyɛ ɛhye la, ɔwɔ kɛ yɛkakye kɛ yɛdayɛ noko yɛnli munli na ɔyɛ a yɛnla ɛlɔlɛ ali. Ɔti, yɛ muala yɛbahola yɛanyia anyuhɔlɛ wɔ kɛzi yɛda ɛlɔlɛ ali la anu. Kɛzi yɛbayɛ ɛhye ɛ? Bɛmaa yɛzuzu ndenle nsa anwo.

Mɔɔ limoa, sɛlɛ Nyamenle sunsum ne mɔɔ maa bɛnyia ɛlɔlɛ la. Gyisɛse hanle kɛ Gyihova fa ‘sunsum nwuanzanwuanza ne maa bɛdabɛ mɔɔ bɛbiza ye la.’ (Luku 11:13) Saa yɛsɛlɛ sunsum nwuanzanwuanza ne na ‘yɛkɔ zo yɛmaa sunsum ne kile yɛ adenle’ a, yɛbala ɛlɔlɛ ali wɔ yɛ nyɛleɛ nu. (Gal. 5:16) Kɛ neazo la, saa ɛle asafo nu kpanyinli a, ɛbahola wɔazɛlɛ sunsum nwuanzanwuanza ne kɛ ɔboa wɔ ɔmaa ɛva Ngɛlɛlera ne ɛdu awie mɔ folɛ wɔ ɛlɔlɛ nu. Anzɛɛ saa ɛle wovolɛ a, sɛlɛ Nyamenle sunsum ne maa ɔboa wɔ na ɛdea ɛ mra, tɛ ɛya zo ɔ, emomu wɔ ɛlɔlɛ nu.

Mɔɔ tɔ zo nwiɔ, dwenledwenle kɛzi Gyisɛse lale ɛlɔlɛ ali wɔ mekɛ bɔbɔ mɔɔ bɛhanle ye ɛya la anwo. (1 Pita 2:21, 23) Ɔwɔ kɛ yɛdwenle Kelaese neazo ne anwo, titili wɔ mekɛ mɔɔ bɛha yɛ ɛya anzɛɛ bɛlɛsisi yɛ la. Saa ɔba ye zɔ a, ɔwɔ kɛ yɛbiza yɛ nwo kɛ, ‘Duzu a anrɛɛ Gyisɛse bayɛ a?’ Adiema raalɛ ko mɔɔ bɛfɛlɛ ye Leigh la nwunle kɛ kpuya ɛhye mɔɔ ɔzuzule nwo la maanle ɔdwenlenle kolaa na yeayɛ debie. Ɔka kɛ: “Kenle ko bie, me gɔnwo gyimayɛvo bie hɛlɛle me nwo nee me gyima mɔɔ meyɛ la anwo edwɛkɛ ɛtane nwanle me gɔnwo mɔ. Ɔgyegyele me kpalɛ. Noko membizale me nwo kɛ, ‘Kɛ ɔkɛyɛ na meazukoa Gyisɛse wɔ kɛzi me nee sonla ɛhye bali la anu ɛ?’ Mɔɔ mendwenlenle mɔɔ anrɛɛ Gyisɛse bayɛ anwo la, menzile kpɔkɛ kɛ menrɛdɛne ɔ nwo zo. Nzinlii menwunle kɛ ewule bie mɔɔ anu yɛ se la ɛlɛgyegye ye yɛɛ adwenleadwenle ɛdɔ ɔ nwo. Menganle kɛ, bie a ɔnle ye anyebolo edwɛkɛ. Kɛzi Gyisɛse lale ɛlɔlɛ ali wɔ mekɛ bɔbɔ mɔɔ bɛhanle ye ɛya mɔɔ mendwenlenle nwolɛ la boale me maanle menlale ɛlɔlɛ ali mengilele me gɔnwo gyimayɛvo ne.” Nɔhalɛ nu, saa yɛsukoa Gyisɛse a, yɛbala ɛlɔlɛ ali dahuu.

Mɔɔ tɔ zo nsa, sukoa kɛ ɛbala tunwomaa ɛlɔlɛ mɔɔ maa bɛnwu nɔhalɛ Kilisienema la ali. (Dwɔn 13:34, 35) Ɔti, Ngɛlɛlera ne tu yɛ folɛ kɛ yɛnyia “adwenle ɛhye” mɔɔ ɛnee Gyisɛse lɛ la bie. “Ɔgyakyile debie biala mɔɔ ɔlɛ la,” wɔ anwuma na “ɔwule” ɔmaanle yɛ. (Fel.  2:5-8) Saa yɛsukoa ye tunwomaa ɛlɔlɛ ne a, yɛbadwenle na yɛayɛ yɛ nyɛleɛ kɛ Kelaese la, na ɔbamaa yɛava awie mɔ ngyianlɛ yɛalimoa yɛ ɛdeɛ nyunlu. Saa yɛda ɛlɔlɛ ali a, nvasoɛ boni bieko a vi nu ba a?

Saa yɛda ɛlɔlɛ ali a, zolɛ nvasoɛ ne zonle. Suzu neazo nwiɔ anwo:

• EWIADE AMUALA MEDIEMAYƐLƐ NE: Kɛmɔ yɛkulo yɛ nwo ngoko la ati, yɛze kɛ asafo biala mɔɔ yɛbahɔ nu wɔ ewiade amuala la, mediema mɔɔ wɔ ɛkɛ la balie yɛ kɛnlɛma. Nea kɛzi ɔyɛ anyelielɛ kɛ yɛ “mediema mɔɔ wɔ ewiade amuala la” kulo yɛ a! (1 Pita 5:9) Yɛnrɛnwu ɛlɔlɛ ɛhye wɔ ɛleka biala kɛ Nyamenle menli avinli ala.

• ANZODWOLƐ: ‘Yɛ nee yɛ gɔnwo mɔ tɛnla wɔ ɛlɔlɛ nu’ a, ɔboa yɛ ɔmaa ‘yɛfa anzodwolɛ mɔɔ ka yɛ bɔ nu la yɛtɛnla.’ (Ɛfɛ. 4:2, 3) Yɛnwu ɛlɔlɛ ɛhye wɔ yɛ asafo ne mɔ anu, nyianu ngyikyi nee mgbole bo. Ɛnlie ɛndo nu kɛ anzodwolɛ ɛhye le ngakyile kolaa fi ewiade ɛhye mɔɔ mgbakyemgbakyenu ɛbu zo la anu ɔ? (Edw. 119:165; Aye. 54:13) Saa yɛ nee awie mɔ tɛnla anzodwolɛ nu a, ɛnee yɛlɛkile kɛ yɛkulo bɛ na yɛ anwuma Selɛ ne anye die ɛhye anwo.​—Edw. 133:1-3; Mat. 5:9.

Pɔɔlo hɛlɛle kɛ: “Ɛlɔlɛ maa ngɔzo.” (1 Kɔl. 8:1) Kɛzi ɛlɔlɛ yɛ ɛhye ɛ? Wɔ ɛzoanvolɛ Pɔɔlo kɛlata mɔɔ ɔlimoa ɔhɛlɛle Kɔlentema tile 13 anu la, ɔhilele kɛzi ɛlɔlɛ maa ngɔzo la anu. Debie ko a le kɛ, ɔfa awie mɔ ngyianlɛ ɔdimoa. (1 Kɔl. 10:24; 13:5) Bieko, kɛ mɔɔ ɛlɔlɛ ɛnle angomedi, ɔdwenle menli nwo, ɔlɛ abotane nee atiakunlukɛnlɛma la ati, ɔmaa anyelielɛ ba mbusua nu yɛɛ koyɛlɛ noko ba asafo ne mɔ anu.​—Kɔl. 3:14.

Ɛlɔlɛ mɔɔ yɛlɛ yɛmaa Nyamenle la a le ɛlɔlɛ mɔɔ sonle bolɛ na ɔmaa yɛ muala yɛnyia ngɔzo a. Ɛlɔlɛ zɛhae ka menli mɔɔ vi maanle nee aneɛ ngakyile kɔsɔɔti anu la ɔmaa bɛfa anyelielɛ ‘bɛbɔ nu’ bɛsonle Gyihova. (Zɛf. 3:9) Bɛmaa yɛbɔ kpɔkɛ kɛ, yɛbala Nyamenle sunsum nwuanzanwuanza ne ma ɛhye mɔɔ sonle bolɛ la ali wɔ yɛ ɛbɛlabɔlɛ nu.