Ɛvolɛ 1920 pɛle nu la, yɛɛ me awovolɛ zukoale nɔhalɛ ne a, bɛrale nɔhalɛ ne anu kolaa na bɛgya. Bɛwole me wɔ 1939. Mɔɔ ɛnee me le kakula la, ɛnee me nee me awovolɛ de England na ɛnee me nee bɛ kɔ debiezukoalɛ. Nzinlii, menvale me nwo menwulale Teokelase Ɛzonlenlɛ Sukulu ne anu. Metɛkakye mekɛ mɔɔ menyɛle me gyimalilɛ mɔɔ limoa la, ɛnee ɔwɔ kɛ megyinla ɛlɛka bie azo wɔ ɛkponle ne mɔɔ tendɛvolɛma gyinla nwolɛ la anwo amaa meanwu tievolɛma anyunlu. Ɛnee meli ɛvolɛ nsia na mɔɔ menwunle mgbanyinli mɔɔ dede ɛkɛ la, me ahonle dule kpalɛ.

Ɛnee me papa kɛlɛ edwɛkɛ ekyi mɔɔ mebahola meava meali daselɛ wɔ daselɛlilɛ nu la wɔ kɛlata zo maa me. Mekɛ mɔɔ limoa mɔɔ me ngomekye menlile awie daselɛ la, ɛnee meli ɛvolɛ mɔtwɛ. Mɔɔ suamenle ne gengale edwɛkɛ mɔɔ wɔ me kɛlata ne azo na ɛkɛ ne ala ɔliele “Let God Be True”! buluku ne ko la, me nye liele kpalɛ. Menriandile mengɔnganle mengilele me papa. Daselɛlilɛ nee debiezukoalɛ ɛhɔlɛ maanle me nye liele na ɔmaanle menyiale ɛhulolɛ kɛ mebayɛ dahuu ɛzonlenlɛ gyima ne bie.

Mɔɔ me papa bɔle ɔ bo kɛ ɔkɛla Ɛzinzalɛ Arane ne bie yeamaa me la, ɔmaanle Baebolo nu nɔhalɛ ne hanle me ahonle kpalɛ. Menvale anyelielɛ mengengale ko biala mɔɔ me sa hanle ye la kpalɛ. Menyianle Gyihova anu anwodozo kpole na ɛhye maanle menyilale me zo memaanle ye.

Yɛ abusua ne hɔle Theocracy’s Increase Nyianu ne mɔɔ bɛyɛle wɔ New York wɔ 1950 la bie. Wɔ Kule, August 3, ɛnee nyianu edwɛkɛtile ne se “Missionary Day.” Kenle zɔhane, Adiema Carey Barber, mɔɔ nzinlii rabokale Neazo Eku ne anwo la a maanle ɛzɔnenlɛ ɛdendɛlɛ ne a. Mɔɔ ɔbizale menli mɔɔ bɛkazɔne bɛ la kpuya nwiɔ ne ɔwiele la,  mendwazole mengyinlanle na mengale kɛ, “Ɛhɛe!” Ɛnee meli ɛvolɛ 11 noko menwunle kɛ mezi kpɔkɛ mɔɔ anwo hyia la. Noko ɛnee mesulo kɛ mebadwu azule ne anu ɔluakɛ ɛnee menze azule weɛ. Me papa adiema nrenyia kakula vale me hɔle azule ne anloa na ɔmaanle menwunle kɛ ɛhwee ɛnrɛyɛ me. Bɛangyɛ nwolɛ fee, ɔti me gyakɛ bɔbɔ anga azule ne abo. Adiema nrenyia ko zɔnenle me yɛɛ ko noko maanle me zo vile nzule ne anu. Ɔvi kenle titili zɔhane, Gyihova ɛhɔ zo ɛmaa me ndenle ɛdenrɛ fɔɔnwo.

Mɔɔ menwiele sukulu la, ɛnee mekulo kɛ meyɛ adekpakyelɛ gyima ne bie, noko me kilehilevolɛma maanle me anwosesebɛ kɛ mengɔ yunivɛsiti. Mendiele mɔɔ bɛhanle la na mengɔle yunivɛsiti noko yeangyɛ menwunle kɛ menrɛhola menrɛdɛnla nɔhalɛ ne anu na mekɛ ko ne ala meava me adwenle meazie me nwomazukoalɛ ne azo, ɔti menzile kpɔkɛ kɛ mengyakyi. Menvale edwɛkɛ ne mendole Gyihova anyunlu na mengɛlɛle kɛlata mengɔmaanle me kilehilevolɛma kɛ mekulo kɛ megyakyi sukulu. Mengɔle sukulu ne ɛvolɛ ko ala. Menyianle Gyihova anu anwodozo na membɔle adekpakyelɛ gyima ne abo ɛkɛ ne ala.

Wɔ July 1957 membɔle dahuu ɛzonlenlɛ gyima ne abo wɔ sua Wellingborough azo. Menganle mengilele mediema mɔɔ wɔ London Bɛtɛle la kɛ bɛkpondɛ adiema nrenyia mɔɔ le adekpakyelɛnli mɔɔ bɔ mɔdenle mɔɔ mebahola me nee ye ayɛ gyima la bɛmaa me. Adiema Bert Vaisey hilehilele me ninyɛne dɔɔnwo, ɛnee ɔbɔ mɔdenle wɔ daselɛlilɛ nu ɔti ɔboale me ɔmaanle menyɛle daselɛlilɛ ɛhɔlɛ nwo ngyehyɛleɛ kpalɛ. Ɛnee mediema mraalɛ mgbanyinli nsia, Adiema Vaisey yɛɛ medame a yɛwɔ asafo ne anu a. Kɛ mɔɔ mesiezie me nwo memaa debiezukoalɛ ne amuala na mefa me nwo mewula nu la ati, ɔmaanle menyianle Gyihova anu anwodozo kpole na menganle me diedi ne anwo edwɛkɛ mengilele awie mɔ.

Kɛ mɔɔ meangɔ sogya la ati bɛdole me efiade, na mɔɔ bɛyele me la, yeangyɛ menyiale Barbara mɔɔ ɛnee le adekpakyelɛ titili la. Yɛgyale wɔ 1959, na ɛnee yɛlɛ ɛhulolɛ kɛ yɛbahɔ ɛleka biala mɔɔ bɛbazoa yɛ la. Alimoa ne bɛvale yɛ bɛhɔle Lancashire mɔɔ wɔ England sɔlɔ adɔleɛ la. Akee wɔ January 1961, bɛmaanle mengɔle Belemgbunlililɛ Gyima Sukulu mɔɔ bɛvale siane ko bɛyɛle ye wɔ London Bɛtɛle la bie. Mɔɔ yɛwiele sukulu ne la, ɔzinle me nwo kɛ bɛhanle kɛ mengɔnyɛ neavolɛ adenduvo gyima la. Maangyebakyi zo neavolɛ bie mɔɔ bɔ mɔdenle la tetele me dapɛne nwiɔ wɔ suakpole Birmingham azo, na bɛmaanle Barbara rabokale me nwo. Akee yɛhɔbɔle yɛdayɛ mumua ne yɛ gyimalilɛ ne abo wɔ Lancashire yɛɛ Cheshire.

Wɔ August 1962, yɛdule adenle kɛ yɛkalie yɛ menle ekyi, na yɛ sa hanle kɛlata bie mɔɔ Bɛtɛle hɛlɛle yɛ la. Ɛnee Geleade Sukulu ademizalɛ kɛlata vea nu! Mɔɔ me nee Barbara vale asɔneyɛlɛ zuzule nwolɛ wiele la, yɛhyehyɛle ademizalɛ kɛlata ne ndɛndɛ na yɛvale yɛnwanle Bɛtɛle. Siane nnu anzi, yɛhɔle Geleade Sukulu ne mɔɔ tɔ zo 38 mɔɔ bɛvale siane bulu bɛyɛle ye wɔ Brooklyn, New York la bie.

 Yɛzukoale Nyamenle Edwɛkɛ ne, ye ahyehyɛdeɛ ne yɛɛ yɛ mediema mɔɔ wɔ ewiade amuala la anwo debie dɔɔnwo wɔ Geleade Sukulu ne anu. Ɛnee meli ɛvolɛ 24 yɛɛ me ye ɛli ɛvolɛ 23, na yɛzukoale ninyɛne dɔɔnwo yɛvile mediema gyɛne mɔɔ yɛ nee bɛ hɔle sukulu ne la ɛkɛ. Ɔle nwolɛ adenle kpole kɛ me nee Adiema Fred Rusk mɔɔ le yɛ kilehilevolɛma ne anu ko yɛle gyima alehyenlɛ biala la. Ɛzukoalɛdeɛ titili ko mɔɔ ɛnee ɔta ɔka nwolɛ edwɛkɛ la a le kɛ, mekɛ biala mɔɔ yɛlɛtu folɛ la ɔwɔ kɛ yɛmaa ɔgyinla Ngɛlɛlera ne azo. Mediema mɔɔ lɛ anwubielɛ mɔɔ ramaanle ɛdendɛlɛ wɔ sukulu ne anu la bie mɔ a le Nathan Knorr, Frederick Franz yɛɛ Karl Klein. Na yɛdayɛ sukoavoma ne zukoale ninyɛne dɔɔnwo vile Adiema A. H. Macmillan mɛlɛbɛnwoaze nwo neazo ne anu. Ɔmaanle yɛnwunle kɛzi Gyihova boale ye menli wɔ mekɛ mɔɔ ɛnee yɛ mediema ne mɔ ɛlɛyia ngyegyelɛ ɔvi 1914 kɔdwu 1919 mɔlebɛbo la!

Mɔɔ ɔka ekyi yɛwie sukulu ne la, Adiema Knorr hanle hilele me nee Barbara kɛ bɛbava yɛ bɛahɔ Burundi mɔɔ wɔ Africa la. Ndɛndɛ ne ala yɛhɔle Bɛtɛle mbulukuzielɛleka ne kɛ yɛkanlea Yearbook ne anu kɛ nolobɔlɛma nyɛ a ɛlɛsonle wɔ Burundi wɔ zɔhane mekɛ ne anu a. Ɔzinle yɛ nwo kɛ yɛanwu nolobɔlɛma mɔɔ ɛlɛsonle wɔ Burundi la anwo edwɛkɛ wɔ Yearbook ne anu la! Ɛnee yɛlɛkɔ ɛleka mɔɔ bɛtɛyɛle edwɛkɛhanlɛ gyima ne wɔ ɛkɛ ɛlɛ la. Ɛnee yɛlɛkɔ Africa mɔɔ yɛnze ɛkɛ ne edwɛkɛ dɔɔnwo la. Adwenleadwenle dɔle yɛ nwo! Na mɔɔ yɛvale asɔneyɛlɛ yɛdole Gyihova anyunlu la ɔmaanle yɛ adwenle gyinlanle.

Mɔɔ yɛhɔdwule ɛkɛ ne la ɛnee debie biala le ngakyile fi mɔɔ yɛze ye la anwo​—kɛzi maanle nu tɛnlabelɛ ne de, bɛ amaamuo yɛɛ bɛ aneɛ ne le ngakyile. Ɛnee ɔwɔ kɛ yɛsukoa Fenlanze. Ɛnee eza ɔwɔ kɛ yɛkpondɛ ɛleka mɔɔ yɛbadɛnla la. Mɔɔ yɛhɔdwule la, ye kenle nwiɔ anzi, Harry Arnott mɔɔ yɛ nee ye hɔle Geleade la rakpɔlale yɛ, ɛnee ɔlɛsia yeahɔ Zambia, ɛleka mɔɔ ɔlɛsonle la. Ɔboale yɛ ɔmaanle yɛnyianle sua, ɛkɛ ne rayɛle yɛ edwɛkpatɛlɛvolɛma sua mɔɔ limoa. Noko yeangyɛ, mgbanyima mɔɔ wɔ ɛkɛ mɔɔ ɛnze Gyihova Alasevolɛ anwo edwɛkɛ fee la dwazole tiale yɛ. Mɔɔ yɛ nye bɔle ɔ bo kɛ ɔdie yɛ gyima ne anwo la, mgbanyima mɔɔ wɔ ɛkɛ la bɔle yɛ amaneɛ kɛ saa yɛnlɛ tumi kɛlata mɔɔ kile kɛ yɛbahola yɛayɛ yɛ gyima ne a yɛvi maanle ne anu. Ɔyɛ alɔbɔlɛ kɛ ɛnee ɔwɔ kɛ yɛfi ɛkɛ ne na yɛkɔtɛnla maanle fofolɛ nu la, ɔti yɛhɔle Uganda.

 Kɛ mɔɔ ɛnee yɛnlɛ ngɛlata mɔɔ kile kɛ yɛbahola yɛadɛnla Uganda la ati yɛ ahonle dule, noko yɛvale yɛ nwo yɛdole Gyihova anwo zo na yɛhɔle. Adiema nrenyia bie mɔɔ vi Canada mɔɔ ɛlɛsonle wɔ ɛleka mɔɔ bɛhyia moalɛ dɔɔnwo wɔ Uganda la hilehilele yɛ edwɛkɛ ne anu hilele arane kpanyinli bie, na arane kpanyinli ne hanle kɛ yɛbahola yɛadɛnla ɛkɛ ne mekɛ ekyi yɛava yɛakpondɛ ngɛlata mɔɔ bamaa yɛ adenle yeamaa yɛadɛnla maanle ne anu la. Yemɔ maanle yɛnwunle kɛ Gyihova ɛlɛboa yɛ.

Kɛzi ninyɛne de wɔ Uganda la le ngakyile kolaa fi kɛzi ɔde wɔ Burundi la anwo. Ɛnee bɛbɔ edwɛkɛhanlɛ gyima ne abo dɛbadɛba wɔ Uganda, ɔnva nwo kɛ ɛnee Alasevolɛ 28 ala a wɔ maanle ne anu la. Yɛyiale menli dɔɔnwo mɔɔ ka Nrelenza la wɔ azɛlɛsinli ne anu. Noko yeangyɛ, yɛnwunle kɛ amaa yɛaboa yɛ sukoavoma yeamaa bɛanyia anyuhɔlɛ la, yeanyɛ boɛ fee la, ɔwɔ kɛ yɛsukoa aneɛ mɔɔ bɛka ye wɔ ɛkɛ la ko. Ɛnee yɛlɛka edwɛkɛ ne wɔ Kampala, ɛleka mɔɔ menli dɔɔnwo ka Luganda la ɔti yɛyɛle kɛ yɛsukoa zɔhane aneɛ ne. Ɔlile ɛvolɛ dɔɔnwo na yeanwu aneɛ ne ka kpalɛ noko ɔmaanle yɛ edwɛkɛhanlɛ gyima ne nyianle anyuhɔlɛ kpalɛ! Akee yɛnwunle ninyɛne mɔɔ ɔwɔ kɛ yɛ nee yɛ Baebolo sukoavoma sukoa na yeaboa bɛ kpalɛ la. Bɛdabɛ noko bɛvile bɛ ahonle nu bɛhanle kɛzi bɛte nganeɛ wɔ mɔɔ bɛlɛsukoa la anwo la bɛhilele yɛ.

Yɛ nye liele kpalɛ wɔ mekɛ mɔɔ yɛboale awie mɔ yɛmaanle bɛzukoale nɔhalɛ ne la, noko yɛ nye liele kpole kpalɛ wɔ mekɛ mɔɔ bɛhanle kɛ yɛhɔyɛ neavolɛ adenduvo gyima wɔ maanle ne anu amuala la. Kenya Bɛtɛle a ɛnee nea yɛ gyima ne azo a, na yɛdule adenle yɛhɔle maanle ne anu ɛleka ngakyile yɛkpondɛle ɛleka mɔɔ bɛbahyia adekpakyelɛ titilima anwo kpalɛ la. Fane dɔɔnwo ne ala, yɛyia menli mɔɔ ɛtɛtele Gyihova Alasevolɛ anwo edwɛkɛ fee la na bɛyɛ yɛ nyele. Bɛdie yɛ kɛnlɛma na ɔyɛ bɔbɔ a bɛto aleɛ bɛmaa yɛ.

Akee yɛhɔle maanle fofolɛ nu. Menvale keteke mendule adenle kenle nwiɔ menvile Kampala mengɔle Kenya meli agyinlaleɛ ne mɔɔ wɔ suakpole Mombasa la azo. Akee menvale meli wɔ ɛkɛ mengɔle bɔra bie mɔɔ bɛfɛlɛ ye Seychelles la azo. Na nzinlii, ɔvi 1965 kɔdwu 1972, ɛnee saa melɛkɔ Seychelles biala a me nee Barbara a kɔ a. Alimoa ne ɛnee nolobɔlɛma nwiɔ pɛ a wɔ ɛkɛ a, na nzinlii bɛrayɛle ekpunli, akee bɛrayɛle asafo. Eza mendule adenle bieko mengɔkpɔlale mediema mɔɔ wɔ Eritrea, Ethiopia yɛɛ Sudan la.

Sogyama ekpunli bie dule Uganda arane ne vile zo na ɔmaanle bɛ maanyɛlɛ ngyehyɛleɛ ne hakyile. Wɔ ɛvolɛ mɔɔ doa zo mɔɔ ɛnee basabasayɛlɛ ɛlɛkɔ zo la anu, ɔmaanle menwunle nrɛlɛbɛ mɔɔ wɔ nu kɛ mebali Baebolo nu edwɛkɛ mɔɔ se “bɛva Siza ɛdeɛ bɛmaa Siza” la azo. (Maake 12:17) Ɔdwule mekɛ bie la, bɛhanle kɛ ɛyɛvolɛ biala mɔɔ wɔ maanle ne anu la ɛmaa bɛhɛlɛ ye duma wɔ kpolisitehyɛne mɔɔ bikye ɛleka mɔɔ ɔde la. Yɛangyinlegyinla nwolɛ fee. Kenle ekyi pɛle nu mɔɔ ɛnee me nee edwɛkpatɛlɛvolɛ bie de kale nu yɛlua Kampala la, kpolisima bie rale yɛ nwo ɛkɛ. Ɛnee yɛ ahonle ɛlɛsi kukukuku zɛhae! Bɛhanle kɛ yɛle busiama na bɛ nee hɔle kpolisitehyɛne kpole mɔɔ wɔ ɛkɛ ne la anu na yɛmaanle bɛnwunle kɛ yɛle edwɛkpatɛlɛvolɛma mɔɔ yɛnyɛ basabasa. Yɛhanle yɛhilele bɛ kɛ yɛmaa kpolisima ne ɛhɛlɛ yɛ duma dɛbadɛba noko bɛandie yɛ. Bɛvale yɛ bɛhɔle kpolisitehyɛne mɔɔ bikye ɛleka mɔɔ ɛnee yɛde la. Mɔɔ yɛhɔdwule ɛkɛ ne la, kpolisinli ne mɔɔ ɛnee wɔ ɛkɛ ne la hanle hilele kpolisima mɔɔ nee yɛ hɔle la kɛ  yɛrahɛlɛ yɛ duma dɛbadɛba ɔti bɛgyakyi yɛ. Ɛhye maanle yɛ nye liele kpalɛ!

Mekɛ zɔhane, ɛnee yɛta yɛyia sogyama wɔ adenle nu na yɛ ahonle tu kpalɛ. Na saa yɛkɔto nuhua ne mɔɔ bɛnlo nza kpalɛ la a, yemɔ bɛnga. Mekɛ biala mɔɔ yɛbayia bɛ la, yɛyɛ asɔne na bɛmaa yɛpɛ nu mɔɔ bɛnyɛ yɛ ɛhwee a, ɛhye maa yɛ ahonle tɔ yɛ azule nu. Ɔyɛ alɔbɔlɛ kɛ wɔ 1973, bɛhanle kɛ ɛyɛvolɛ biala mɔɔ ɔle edwɛkpatɛlɛvolɛ wɔ Uganda la ɛvi ɛkɛ la.

Eza yɛnyianle gyimalilɛ fofolɛ, mekɛ ɛhye anu bɛmaanle yɛhɔle Côte d’Ivoire mɔɔ wɔ West Africa la. Ɛnee ɔwɔ kɛ yɛyɛ nzenzaleɛ kpole bieko: Ɛnee ɔwɔ kɛ yɛsukoa amaamuo fofolɛ, yɛka Fenlanze bieko dahuu na yɛsukoa kɛ yɛ nee edwɛkpatɛlɛvolɛma mɔɔ vi maanle ngakyile zo la badɛnla! Yɛnwunle ye bieko kɛ, Gyihova ɛlɛkile yɛ adenle wɔ mekɛ mɔɔ ahonlekpalɛma mɔɔ bɛlɛ bɛ nwo aze la diele edwɛkpa ne ndɛndɛ la. Me nee Barbara nwunle kɛ Gyihova anu anwodozo mɔɔ yɛlɛ la maanle yɛ ndenle denrɛle fɔɔnwo.

Arɛlevilɛ nu ala bɛnwunle kɛ Barbara ɛnyia kansa. Yɛdule adenle yɛhɔle maanle ngakyile zo kɛ yɛmaa bɛayɛ ye ayile, noko ɔkadwu 1983 la, yɛnwunle ye wienyi kɛ yɛnrɛhola yɛnrɛdoa yɛ gyimalilɛ ne azo wɔ Africa. Ɛhye maanle yɛ sa nu dole kpalɛ!

Mɔɔ yɛwɔ London Bɛtɛle la, Barbara anwodolɛ ne yɛle kpole na ɔwule. Bɛtɛle abusua ne boale me kpalɛ. Agyalɛma bie boale me maanle mengyinlanle tɛnlabelɛ ne anloa na mengɔle zo menvale me nwo mendole Gyihova anwo zo. Nzinlii menyiale Ann, adekpakyelɛ titili bie mɔɔ bɔ mɔdenle mɔɔ ɛnee ɔyɛ a ɔbayɛ gyima wɔ Bɛtɛle la, na ɛnee ɔkulo Gyihova kpalɛ. Mengyale Ann wɔ 1989, na ɔvi mekɛ zɔhane mɔɔ ba la yɛlɛsonle wɔ London Bɛtɛle.

Ɔvi 1995 badwu 2018, menyianle nwolɛ adenle menzonlenle kɛ ewiade amuala gyima ne ati agyakɛnugyinlavolɛ (mɔɔ ɛnee bɛfɛlɛ ye bɛtɛle kpɔlɔkpɔlavolɛ) na mengɔle maanle kɛyɛ 60 azo. Wɔ ɛleka biala mɔɔ mengɔle la, menwunle kɛ Gyihova nea ye azonvolɛ ɔnva nwo tɛnlabelɛ biala mɔɔ bɛwɔ nu la.

Mɔɔ yɛlɛkpɔlɔkpɔla Bɛtɛle bie mɔ wɔ 2017 la, menziale mengɔle Africa. Me nye liele kɛ me nee Ann noko hɔle Burundi la, na mɔɔ yɛnwunle menli dodo mɔɔ ɛra nɔhalɛ ne anu la ɔzinle yɛ nwo! Kɛkala bɛzi Bɛtɛle kɛnlɛma bie mɔɔ boa nolobɔlɛma mɔɔ bo 15,500 mɔɔ wɔ ɛkɛ la, wɔ awɔdenle ne mɔɔ ɛnee meyɛ azua nu daselɛlilɛ wɔ zo wɔ 1964 la azo.

Mɔɔ me sa hanle Bɛtɛle ngakyile mɔɔ mebahɔkpɔla bɛ wɔ 2018 anwo ngyehyɛleɛ la, me nye liele kpalɛ. Ɛnee Côte d’Ivoire boka nwo. Mɔɔ yɛdwule maanle ne suakpole Abidjan azo la, mendele nganeɛ kɛ mezia mera sua nu. Mɔɔ melɛnea buluku mɔɔ Bɛtɛlema ne fonu nɔma wɔ nu la, menwunle kɛ Adiema Sossou mɔɔ meze ye la sua a doa yɛ ɛdeɛ ne a. Mekakye kɛ mɔɔ mewɔ Abidjan la ɛnee ɔdaye a ɔle city overseer a. Noko amuanrɛɛ tɛ ɔdaye ɔ. Ɛnee Sossou ɛhye le ɔ ra.

Gyihova lile ye ɛwɔkɛ zo. Ngyegyelɛ mɔɔ menyiale la ɛmaa menwu kɛ, saa yɛfa yɛ nwo yɛto Gyihova anwo zo a ɔbamaa yɛ ndenle adenrɛ fɔɔnwo. Kɛkala yɛkulo kɛ yɛkɔ zo yɛdua adenle ne mɔɔ zolɛ bayɛ wienyi kpalɛ wɔ ewiade fofolɛ ne anu la anu.​—Mrɛ. 4:18.