1-2. (a) Duzu ati a ɔyɛ se ɔmaa menli dɔɔnwo kɛ bɛbava bɛ nwo bɛado menli mɔɔ lɛ tumi la anwo zo a? (b) Duzu a yɛbazuzu nwo wɔ edwɛkɛ ɛhye anu a?

ƐNƐ, ɔyɛ se ɔmaa menli dɔɔnwo kɛ bɛbava bɛ nwo bɛado awie biala mɔɔ lɛ tumi la anwo zo. Bɛnwu ye kɛ, mɛla nee arane ne ta bɔ azukoavolɛ nee menli mɔ lɛ tumi la anwo bane na bɛnli pɛlepɛle bɛmmaa ehyianvolɛma. Baebolo ne ka ye wienyi kɛ: “Sonla di sonla nwo zo tumi maa ɔnwu amaneɛ.” (Nol. 8:9) Eza ɛzonlenlɛ nu mgbanyima bie mɔ yɛ ninyɛndane, na ɛhye ati ɔmmaa menli bie mɔ ɛnva bɛ nwo ɛndo Nyamenle anwo zo bieko. Ɔti saa awie die to nu kɛ yɛ nee ye ɛzukoa Baebolo ne a, ɔwɔ kɛ yɛboa ye yɛmaa ɔnyia anwodozo wɔ Gyihova nee menli mɔɔ gyi Ɔ gyakɛ anu wɔ azɛlɛ ye azo la anu.

² Nɔhalɛ nu, tɛ Baebolo sukoavoma angomekye a ɔwɔ kɛ bɛsukoa kɛ bɛbava bɛ nwo bɛado Gyihova nee ye ahyehyɛdeɛ ne anwo zo a. Ɔnle kɛ yɛdayɛ mɔɔ yɛrale nɔhalɛ ne anu la ɛhyɛ bɔbɔ la maa yɛ rɛle fi ye ɛlɛ kɛ kɛzi Gyihova yɛ ninyɛne la le kpalɛ dahuu. Ɔdwu mekɛ ne bie a, tɛnlabelɛ mɔɔ yɛkɔ nu la sɔ anwodozo mɔɔ yɛlɛ wɔ Gyihova anu la nea. Wɔ edwɛkɛ ɛhye anu, yɛbazuzu tɛnlabelɛ nsa mɔɔ bahola azɔ yɛ diedi anlea la anwo: (1) mekɛ mɔɔ yɛbagenga Baebolo ne anu edwɛkɛ bie, (2) mekɛ mɔɔ yɛbanyia adehilelɛ bie yɛavi Gyihova ahyehyɛdeɛ  ne ɛkɛ la, yɛɛ (3) saa yɛyia ngyegyelɛ bie kenle bie a.

3. Kɛzi Baebolo ne anu edwɛkɛ bie mɔ bahola azɔ anwodozo mɔɔ yɛlɛ wɔ Gyihova anu la anlea ɛ?

 ³ Saa yɛlɛkenga Nyamenle Edwɛkɛ ne a, bie a yɛnrɛde deɛmɔti Gyihova nee menli bie mɔ lile wɔ adenle bie azo anzɛɛ kpɔkɛ bie mɔ mɔɔ ɔsisile la abo. Kɛ neazo la, yɛkenga ye wɔ Nɔmbɛse buluku ne anu kɛ Gyihova buale Yizilayɛnli bie mɔɔ hɔsesale ɛyɛne wɔ Ɛnwomenlelielɛ kenle ne la ewule fɔlɛ. Yɛnwu ye wɔ Samoɛle buluku ne mɔɔ tɔ zo nwiɔ la anu kɛ, wɔ ɛvoya dɔɔnwo anzi, Gyihova vale Belemgbunli Devidi mɔɔ zɛkyele agyalɛ na ɔhunle awie la ɛtane ɔhyɛle ye. (Nɔm. 15:32, 35; 2 Sa. 12:9, 13) Bie a yɛbabiza kɛ, ‘Duzu ati a Gyihova vale Devidi mɔɔ ɔhunle awie na ɔzɛkyele agyalɛ la ɛtane hyɛle ye na ɔbuale nrenyia ɛhendeɛ ne mɔɔ ɔyɛle ɛtane ekyi bie la ewule fɔlɛ a?’ Amaa yɛabua kpuya ɛhye la, suzu ninyɛne nsa mɔɔ yɛlɛkenga Baebolo ne a ɔwɔ kɛ yɛmaa ɔtɛnla yɛ adwenle nu la anwo.

4. Kɛzi Gyɛnɛsese 18:20, 21 yɛɛ Ditilɔnomi 10:17 maa anwodozo mɔɔ yɛlɛ wɔ Gyihova kpɔkɛzilɛ ne mɔ anu la yɛ kpole ɛ?

⁴Tɛ mekɛ ne amuala a Baebolo ne ka debie bie mɔɔ zile la anwo edwɛkɛ kɔsɔɔti a. Kɛ neazo la, yɛze kɛ Devidi nlunle ɔ nwo nɔhalɛ nu wɔ mɔɔ ɔyɛle la anwo. (Edw. 51:2-4) Noko duzu a nrenyia ne mɔɔ yeanli Ɛnwomenlelielɛ kenle nwo mɛla ne azo la yɛle a? Asoo ɔnlunle ɔ nwo wɔ mɔɔ ɔyɛle la anwo? Yeanli Gyihova mɛla ne mɔ azo wɔ mekɛ bie mɔɔ ɛze ɛhɔ la anu ɔ? Asoo ɛnee bɛlimoa bɛbɔ ye kɔkɔ yɛɛ ɔbule ɔ nye ɔguale zo anzɛɛ yeandie ɔ? Baebolo ne anga. Noko, yɛze ye bɔkɔɔ kɛ: Gyihova ɛdeɛ, “ɔnli mɔguazo.” (Dit. 32:4) Gyihova gyinla nɔhalɛ kɔsɔɔti mɔɔ wɔ edwɛkɛ bie anu la azo a ɔsi kpɔkɛ a, ɔngyinla mɔɔ menli ka, menli nu nyeyenu anzɛɛ debie gyɛne mɔɔ ɔmmaa alesama ɛnnyia tɛnlabelɛ bie anwo adwenle kpalɛ la azo a ɔsi kpɔkɛ a. (Kenga Gyɛnɛsese 18:20, 21; Ditilɔnomi 10:17.) Saa yɛsukoa Gyihova nee ye ngyinlazo ne mɔ anwo ninyɛne dɔɔnwo a, ɔbamaa anwodozo mɔɔ yɛlɛ wɔ ye ndɛnebualɛ ne mɔ anu la ayɛ kpole. Saa yɛnde Baebolo ne anu edwɛkɛ bie abo kɛkala bɔbɔ a, yɛze kɛ yɛ Nyamenle ne “le tenlenenli wɔ ye ndenle kɔsɔɔti anu.”​—Edw. 145:17.

5. Kɛzi yɛ sinlidɔlɛ ka adwenle mɔɔ yɛlɛ wɔ pɛlepɛlelilɛ nwo la ɛ? (Eza nea ɛlɛka, “ Yɛ Sinlidɔlɛ Ɛmmaa Yɛnde Pɛlepɛlelilɛ Bo Kpalɛ.”)

 ⁵Kɛ mɔɔ yɛnli munli la ati yɛngola yɛmbua ndɛne fɔɔnwo. Nyamenle bɔle yɛ kɛ ye ɛsaso, ɔti yɛkulo kɛ yɛnwu kɛ bɛ nee menli ɛlɛdi ye boɛ. (Gyn. 1:26) Noko kɛ mɔɔ yɛnli munli la ati, saa bɔbɔ yɛsuzu kɛ yɛze edwɛkɛ bie anu nɔhalɛ ne amuala bɔbɔ a, yɛbahola yɛabua mgbɔvodɛne. Kɛ neazo la, kakye kɛ mekɛ mɔɔ Gyihova zile kpɔkɛ kɛ ɔse Nenɛvɛma anwunvɔne la, Dwona anye anlie nwo. (Dwona 3:10–4:1) Noko nea mɔɔ zile a. Bɛliele Nenɛvɛma 120,000 mɔɔ nlunle bɛ nwo la ngoane! Awieleɛ bɔkɔɔ ne, Dwona yɛɛ ɛnee ɔhyia kɛ bɛtenrɛ ye a, na tɛ Gyihova ɔ.

6. Duzu ati a Gyihova si kpɔkɛ bie a ɔnle kɛ ɔkilehile nu ɔkile yɛ a?

⁶Gyihova si kpɔkɛ a ɔngyia kɛ ɔkilehile nuhua ɔkile alesama. Gyihova maanle ye azonvolɛ hilele bɛ adwenle wɔ kpɔkɛ bie mɔɔ ɔzile anzɛɛ ɔlɛba yearazi la anwo wɔ tete ne. (Gyn. 18:25; Dwona 4:2, 3) Ɔdwu mekɛ ne bie a ɔkilehile ye kpɔkɛzilɛ ne anu ɔkile bɛ. (Dwona 4:10, 11) Noko mɛla ɛnkyekye ye kɛ ɔbahilehile ninyɛne bie mɔ anu yeahile yɛ. Kɛmɔ ɔle yɛ Bɔvolɛ la ati, ɔngyia kɛ yɛdayɛ yɛmaa ye adenle kolaa na yeayɛ debie anzɛɛ saa ɔwie a ɔkilehile nuhua ɔkile yɛ.​—Aye. 40:13, 14; 55:9.

7. Ngyegyelɛ boni a yɛbahola yɛayia a, na duzu ati ɔ?

⁷ Yɛdie yɛto nu bɔkɔɔ kɛ Gyihova yɛ mɔɔ le kpalɛ la dahuu. Noko ngyegyelɛ ne a le kɛ ɔkɛyɛ na yɛanyia menli mɔɔ gyi ɔ gyakɛ anu la anu anwodozo la. Bie a yɛ adwenle nu bayɛ yɛ kesee kɛ saa menli mɔɔ lɛ tumi wɔ Gyihova ahyehyɛdeɛ ne anu la fa Gyihova adehilelɛ di gyima anzɛɛ bɛdi bɛ ti anwo a. Ɔbahola yeara ye kɛ menli mɔɔ dɛnlanle aze wɔ tete ne la bie mɔ nyianle adwenle ɛhye bie. Suzu neazo ne mɔɔ wɔ  ɛdendɛkpunli 3 la anwo. Bie a nrenyia ne mɔɔ yeanli Ɛnwomenlelielɛ kenle nwo mɛla ne azo la busuanli bie adwenle nu bayɛ ye kesee kɛ saa amgba Mosisi bizale Gyihova yɛɛ ɔhanle kɛ bɛhu nrenyia ne a. Bie a Hɛtenli Yulaya mɔɔ ɔ ye a Devidi vale ye la agɔnwo bie baha kɛ, kɛmɔ Devidi le belemgbunli na ɔlɛ tumi la ati a yeammaa bɛangu ye a. Nɔhalɛ ne a le kɛ saa yɛnlɛ menli mɔɔ Gyihova lɛ bɛ nu anwodozo mɔɔ bɛgyi ɔ gyakɛ anu wɔ azɛlɛ ye azo la anu anwodozo a, yɛnrɛhola yɛnrɛha kɛ yɛlɛ Gyihova anu anwodozo.

8. Kɛzi edwɛkɛ mɔɔ wɔ Gyima ne 16:4, 5 nee mɔɔ bɛyɛ ye wɔ Kilisiene asafo ne anu ɛnɛ la le ko ɛ?

⁸ Ɛnɛ, Gyihova dua “akɛlɛ nɔhavo nee badwema” ne anwo zo kile ye ahyehyɛdeɛ ne foa mɔɔ wɔ azɛlɛ ye azo la adenle. (Mat. 24:45) Kɛ mɔɔ ɛvoya mɔɔ limoa la anu neazo eku ne yɛle la, zɔhane ala a akɛlɛ ɛhye nea Nyamenle menli mɔɔ wɔ ewiade amuala la anwo zo na bɛfa adehilelɛ bɛmaa asafo nu mgbanyima a. (Kenga Gyima ne 16:4, 5.) Akee mgbanyima ne mɔ noko fa adehilelɛ ne di gyima wɔ asafo ne mɔ anu. Saa yɛfa adehilelɛ mɔɔ ahyehyɛdeɛ ne nee mgbanyima ne mɔ fa maa la yɛdi gyima a, ɛnee yɛlɛkile kɛ yɛlɛ adenle mɔɔ Gyihova dua zo yɛ ye ninyɛne la anu anwodozo.

9. Mekɛ boni a ɔbahola yeayɛ se kɛ yɛbalie kpɔkɛ bie mɔɔ asafo nu mgbanyima ɛzi la yɛado nu a, na duzu ati ɔ?

⁹ Ɔdwu mekɛ ne bie a, ɔbahola yeayɛ se kɛ yɛbalie kpɔkɛ bie mɔɔ asafo nu mgbanyima basisi la yɛado nu. Kɛ neazo la, kenlensa ye bɛhyehyɛ asafo nee maangyebakyi dɔɔnwo fofolɛ. Wɔ ɛleka bie mɔ, mgbanyima ne mɔ ɛha ɛhile nolobɔlɛma bie mɔ kɛ bɛhɔboka asafo gyɛne nwo amaa saa bɛkɔ debiezukoalɛ a bɛ nwo anyɛ ekyi somaa. Saa bɛka kɛ yɛhɔboka asafo fofolɛ nwo a, bie a ɔbayɛ se kɛ yɛbagyakyi yɛ gɔnwo mɔ nee yɛ abusua ne ɛkɛ. Asoo mgbanyima ne mɔ nyianle adehilelɛ vile anwuma mɔɔ maanle bɛnwunle ɛleka mɔɔ ɔwɔ  kɛ nolobɔlɛnli biala kɔ la ɔ? Kyɛkyɛ. Na ɛhye bahola amaa yeayɛ se kɛ yɛbali adehilelɛ mɔɔ bɛbava bɛamaa yɛ la azo. Noko Gyihova lɛ mgbanyima ne mɔ anu anwodozo kɛ bɛbahola bɛazi kpɔkɛ ɛhye mɔ, na ɔwɔ kɛ yɛdayɛ noko yɛnyia bɛ nu anwodozo. *

10. Kɛ mɔɔ Hibuluma 13:17 kile la, duzu ati a ɔwɔ kɛ yɛtie asafo nu mgbanyima ne mɔ a?

¹⁰ Saa mgbanyima ne mɔ kpɔkɛzilɛ nee yɛ ɛdeɛ ne ɛnle ko bɔbɔ a, duzu ati a ɔwɔ kɛ ɛtie bɛ a? Yɛyɛ ye zɔ a yɛbamaa koyɛlɛ mɔɔ wɔ Nyamenle menli ne avinli la adɛnla ɛkɛ. (Ɛfɛ. 4:2, 3) Saa yɛ muala yɛbɛlɛ yɛ nwo aze yɛdie mgbanyima ne mɔ kpɔkɛzilɛ yɛto nu a, ɔmaa asafo ne mɔ nyia anyuhɔlɛ. (Kenga Hibuluma 13:17.) Mɔɔ hyia kpalɛ la, yɛmaa Gyihova nwu kɛ yɛlɛ ye nu anwodozo ɔlua menli mɔɔ yekpa bɛ kɛ bɛnlea yɛ nwo zo mɔɔ yɛbadie bɛ la azo.​—Gyi. 20:28.

11. Duzu a baboa yɛ amaa yɛamia anwodozo mɔɔ yɛlɛ wɔ adehilelɛ mɔɔ yɛnyia yɛfi mgbanyima ne mɔ ɛkɛ la anu a?

¹¹ Saa yɛkakye kɛ mgbanyima ne mɔ ɛlɛsi kpɔkɛ mɔɔ fale asafo ne anwo la a bɛsɛlɛ sunsum nwuanzanwuanza ne a, ɔbamaa yɛamia anwodozo mɔɔ yɛlɛ wɔ adehilelɛ mɔɔ yɛnyia yɛfi bɛ ɛkɛ la anu. Eza bɛsuzu Baebolo nu ngyinlazo mɔɔ fale edwɛkɛ ne anwo la anwo kpalɛ na bɛneɛnlea adehilelɛ mɔɔ Gyihova ahyehyɛdeɛ ne ɛva ɛmaa bɛ la anu. Mɔɔ bɛkpondɛ la a le kɛ bɛbayɛ mɔɔ sɔ Gyihova anye la na bɛanlea ye menli ne kpalɛ. Mrenyia nɔhavoma ɛhye mɔ ze kɛ bɛbabu kɛzi bɛyɛ bɛ gyima ne la anwo mgbonda bɛahile Nyamenle. (1 Pita 5:2, 3) Suzu ɛhye anwo: Wɔ ewiade mɔɔ kɛzi menli anwo nane de, ɛzonlenlɛ nee maanyɛlɛ ɛkpakyekpakye bɛ nu la anu, Gyihova menli bɔ nu sonle nɔhalɛ Nyamenle ne wɔ koyɛlɛ nu. Kɛmɔ Gyihova ɛlɛyila ye ahyehyɛdeɛ ne ati a ɛhye ɛhola ɛyɛ zɔ a!

12. Amaa mgbanyima ne mɔ anwu kɛ awie ɛnlu ɔ nwo la, ninyɛne boni mɔ a ɔwɔ kɛ bɛsuzu nwo a?

¹² Gyihova ɛva ɛzonlelilɛ kpole ɛwula mgbanyima ne mɔ asa kɛ bɛnlea bɛmaa asafo ne anwo ɛde. Saa Kilisienenli bie yɛ ɛtane kpole a, Gyihova kulo kɛ mgbanyima ne mɔ nea saa ahenle bahola ahɔ zo adɛnla asafo ne anu a. Eza ɔkulo kɛ mgbanyima ne mɔ nea saa ahenle ɛnlu ɔ nwo nɔhalɛ nu wɔ mɔɔ ɔyɛle la anwo a. Bie a ɔbaha kɛ yenlu ɔ nwo, noko asoo amgba ɔ nye ɛnlie mɔɔ ɔyɛle la anwo ɔ? Asoo yebɔ kpɔkɛ kɛ ɔnrɛyɛ ɛtane zɔhane bieko ɔ? Saa agɔnwolɛ ɛtane a maanle ɔyɛle zɔhane ɛtane ne a, asoo ɔlɛ ɛhulolɛ kɛ ɔbapɛ zɔhane agɔnwolɛvalɛ ne anu ɔ? Mgbanyima ne mɔ yɛ asɔne na bɛsuzu mɔɔ Ngɛlɛlera ne ka ye wɔ edwɛkɛ zɔhane anwo la anwo na bɛnea kɛzi ɛtanevolɛ ne te nganeɛ wɔ mɔɔ yeyɛ la anwo la. Akee bɛnea saa ɔwɔ kɛ ɛtanevolɛ ne kɔ zo tɛnla asafo ne anu a. Wɔ tɛnlabelɛ bie mɔ anu, ɔwɔ kɛ bɛtu ahenle ne.​—1 Kɔl. 5:11-13.

13. Saa bɛtu yɛ gɔnwo anzɛɛ yɛ busuanli bie a, adwenle boni a bahola ara yɛ ti anu a?

¹³ Duzu a bahola azɔ anwodozo mɔɔ yɛlɛ wɔ mgbanyima ne mɔ anu la yeanlea a? Saa ahenle mɔɔ bɛdule ye la ɛnle yɛ gɔnwo anzɛɛ yɛ busuanli mɔɔ ɔbikye yɛ kpalɛ la a, bie a yɛbalie mgbanyima ne mɔ kpɔkɛzilɛ ne yɛado nu ndɛndɛ. Noko fa ye kɛ ahenle mɔ bɛdule ye la bikye yɛ kpalɛ. Bie a yɛbaha kɛ mgbanyima ne mɔ annwu nɔhalɛ mɔɔ wɔ edwɛkɛ ne anu la amuala anzɛɛ yɛ adwenle nu bayɛ yɛ kesee kɛ saa mgbanyima ne mɔ buale ndɛne fɔɔnwo kɛ Gyihova la a. Duzu a baboa yɛ yeamaa yɛanyia adwenle kpalɛ wɔ kpɔkɛzilɛ ne anwo a?

14. Saa mgbanyima ne mɔ si kpɔkɛ kɛ ɔwɔ kɛ bɛtu yɛ gɔnwo anzɛɛ yɛ busuanli bie a, duzu a baboa yɛ a?

¹⁴ Ɔwɔ kɛ yɛkakye kɛ menli mɔɔ bɛtu bɛ la le  Gyihova ngyehyɛleɛ na ɔboa asafo ne yɛɛ bie a ɔbaboa ɛtanevolɛ ne. Saa bɛmaa ɛtanevolɛ mɔɔ yeannu ɔ nwo la kɔ zo tɛnla asafo ne anu a, ɔbahola yeali awie mɔ adwenle yeamaa bɛdabɛ noko bɛayɛ ɛtane. (Gal. 5:9) Bieko, wɔannea a ɔnrɛmaa ɔnrɛnwu anyebolo mɔɔ wɔ ye ɛtane ne anu la, yɛɛ bie a ɔnrɛnyia ɛhulolɛ kɛ ɔkakyi ye adwenle nee ye nyɛleɛ amaa yeanyia Gyihova anyunlu ɛlolɛ bieko. (Nol. 8:11) Yɛbahola yɛanyia anwodozo kɛ saa mgbanyima ne mɔ ɛlɛsi kpɔkɛ kɛ ɔwɔ kɛ bɛtu awie a, bɛfa bɛ ɛzonlelilɛ ɛhye anyebolo zo. Bɛze kɛ, kɛ mɔɔ tete Yizilayɛ ndɛnebuavolɛma ne yɛle la, “bɛmbua ndɛne bɛmmaa sonla emomu Gyihova.”​—2 Ek. 19:6, 7.

15. Duzu ati a ɔhyia kɛ yɛfa yɛ nwo yɛto Gyihova adehilelɛ zo kpalɛ kɛkala a?

¹⁵ Kɛmɔ ewiade ɛhye awieleɛ ne ɛlɛbikye kpalɛ la ati, ɔhyia kɛ yɛfa yɛ nwo yɛto adenle mɔɔ Gyihova dua zo yɛ ninyɛne la azo kpalɛ kɛkala. Duzu ati ɔ? Wɔ anwongyelelɛ kpole ne anu, bie a yɛbanyia adehilelɛ mɔɔ ɔzɔho kɛ ɔ bo ɛdelɛ ɛnla aze, yɛnrɛhola yɛnrɛva yɛnrɛli gyima anzɛɛ nrɛlɛbɛ ɛnle nu la. Nɔhalɛ nu, Gyihova ɛnrɛdendɛ ɛnrɛhile yɛ nuhua ko biala. Bie a ɔbava adehilelɛ ne yealua ɔ gyakɛ anu gyinlavolɛma mɔɔ yekpa bɛ la anwo zo. Tɛ mekɛ zɔhane anu a ɔwɔ kɛ yɛsu adehilelɛ ne anwo kpolera anzɛɛ ɔwɔ kɛ yɛ adwenle nu yɛ yɛ kesee na yɛbiza kɛ, ‘Asoo amgba adehilelɛ ɛhye vi Gyihova ɛkɛ anzɛɛ mgbanyima ne mɔ a ɛlɛbɔ bɛ ti anu aha a?’ Ɛbava ɛ nwo wɔado Gyihova nee ye ahyehyɛdeɛ ne anwo zo wɔ mekɛ titili zɔhane anu ɔ? Kɛzi yɛbu adehilelɛ mɔɔ vi Nyamenle agyakɛnugyinlavolɛma ne ɛkɛ ɛnɛ la baboa yɛ yeamaa yɛabua zɔhane kpuya ne. Saa ɛfa ɛ nwo ɛto adehilelɛ mɔɔ yɛnyia ye ɛnɛ la azo na ɛyɛ ye ndɛ ɛdi zo a, ɛbahola wɔayɛ ye zɔ wɔ anwongyelelɛ kpole ne anu.​—Luku 16:10.

16. Duzu a ɔnrɛhyɛ ɔbazɔ anwodozo mɔɔ yɛlɛ wɔ Gyihova ndɛnebualɛ nu la yeanlea a?

¹⁶ Debie bieko wɔ ɛkɛ mɔɔ ɔwɔ kɛ yɛsuzu nwo a, ndɛne mɔɔ Gyihova babua wɔ ewiade ɛhye awieleɛ ne la. Kɛkala, yɛlɛ anyelazo kɛ menli dɔɔnwo mɔɔ yɛ mbusuafoɔ mɔɔ bɛnzonle Gyihova boka nwo la barazonle Gyihova kolaa na awieleɛ ne ara. Noko wɔ Amagɛdɔn, Gyihova balua Gyisɛse anwo zo ahile mɔɔ ɔwɔ kɛ bɛfa bɛyɛ bɛ la. (Mat. 25:31-33; 2 Tɛs. 1:7-9) Tɛ yɛdayɛ a yɛbazi awie mɔɔ Gyihova baze ye anwunvɔne nee mɔɔ ɔnrɛze ye anwunvɔne la anwo kpɔkɛ a. (Mat. 25:34, 41, 46) Yɛbahola yɛava yɛ nwo yɛado Gyihova ndɛnebualɛ ne mɔ azo ɔ, anzɛɛ bɛbadenda yɛ gyakɛ anu? Ɔda ali wienyi kɛ, ɔhyia kɛ yɛmia anwodozo  mɔɔ yɛlɛ wɔ Gyihova anu la anu kɛkala amaa yɛahola yɛava yɛ nwo yɛado ɔ nwo zo bɔkɔɔ kenle bie.

17. Kɛzi ndɛne mɔɔ Gyihova babua ye wɔ ewiade ɛhye awieleɛ la baboa yɛ ɛ?

¹⁷ Nea kɛzi yɛbade nganeɛ wɔ Nyamenle ewiade fofolɛ ne anu wɔ mekɛ mɔɔ yɛbanwu mɔɔ ɛvi Gyihova ndɛnebualɛ ne anu ɛra la. Adalɛ ɛzonlenlɛ bavi ɛkɛ, zɔhane ala a gualilɛma mɔɔ bɛle anyebolo nee maanyɛlɛ ngyehyɛleɛ mɔɔ bɛsisi menli bɛmaa bɛnwu amaneɛ wɔ ɛvolɛ dɔɔnwo anu la noko bavi ɛkɛ a. Yɛnrɛde anwodolɛ, ɛrelera ɛyɛlɛ nee yɛ alɔvolɛ mɔɔ bɛwu la anwo edwɛkɛ bieko wɔ yɛ ɛbɛlabɔlɛ nu. Bɛbagua Seetan nee ye sunsum ɛtane ne mɔ efiade ɛvolɛ apenle ko. Mɔɔ vile bɛ atuadelɛ ne anu rale la bavi ɛkɛ. (Yek. 20:2, 3) Nea kɛzi yɛ nye balie kɛ yɛvale yɛ nwo yɛdole adenle mɔɔ Gyihova dua zo di ninyɛne nwo gyima la azo a!

18. Duzu a yɛsukoa yɛfi Yizilayɛma neazo ne mɔɔ wɔ Nɔmbɛse 11:4-6 nee 21:5 la anu a?

¹⁸ Ngyegyelɛ boni mɔ a bie a yɛbayia wɔ Nyamenle ewiade fofolɛ ne anu mɔɔ ɔbahola yɛazɔ anwodozo mɔɔ yɛlɛ wɔ adenle mɔɔ Gyihova dua zo yɛ ninyɛne anu la yeanlea a? Kɛ neazo la, suzu mɔɔ yeangyɛ ɔzile wɔ mekɛ mɔɔ Yizilayɛma vile Yigyibiti akɛlɛzonlenlɛ nu rale la anwo nea. Bie mɔ bɔle ɔ bo dendɛle bɛ nzo abo ɔluakɛ ɛnee bɛnnyia aleɛ mɔɔ ɛnee bɛdi wɔ Yigyibiti la bie bɛnli, na bɛ nye anzɔ mana ne mɔɔ Gyihova vale maanle bɛ la. (Kenga Nɔmbɛse 11:4-6; 21:5.) Saa anwongyelelɛ kpole ne kɔ ye awieleɛ a, asoo yɛbayɛ mɔɔ bɛyɛle la bie? Saa bɛsɛkye ewiade ne bɛwie a, yɛnze gyima dodo mɔɔ yɛbayɛ yɛaziezie azɛlɛ ne azo na yɛayɛ ye ngyikyingyikyi yɛamaa azɛlɛ ne ayɛ paladaese a. Ɔbayɛ kɛ yɛbayɛ gyima dɔɔnwo yɛɛ ninyɛne nu bayɛ se wɔ mɔlebɛbo ne. Asoo yɛbadendɛ yɛ nzo abo wɔ mɔɔ Gyihova bava amaa yɛ wɔ zɔhane mekɛ ne la anwo ɔ? Nɔhalɛ ne a le kɛ: Saa yɛmaa yɛ nye sɔ mɔɔ Gyihova fa maa yɛ kɛkala la a, yɛbayɛ zɔ wɔ zɔhane mekɛ ne.

19. Edwɛkɛ titili boni mɔ a wɔ edwɛkɛ mɔɔ yɛzukoa ye kɛkala la anu a?

¹⁹ Kɛzi Gyihova yɛ ye ninyɛne la le kpalɛ dahuu. Ɔwɔ kɛ yɛdie ɛhye yɛdi. Eza ɔwɔ kɛ yɛnyia anwodozo wɔ menli mɔɔ Gyihova ɛva bɛ ɛzie ɛkɛ kɛ bɛva ye adehilelɛ bɛmaa yɛ la anu. Mmamaa ɛ rɛle fi edwɛkɛ mɔɔ Gyihova luale ye ngapezonli Ayezaya anwo zo hanle la ɛlɛ: “Saa bɛsie bɛ nwo dii na bɛnyia anwodozo a, bɛbanyia anwosesebɛ.”​—Aye. 30:15.