Saa yɛkenga Baebolo ne a, yɛbahola yɛayɛ neɛnleanu yɛakpondɛ Baebolo nu ndelebɛbo. Noko kɛ ɔkɛyɛ na yɛanyia zolɛ nvasoɛ kpalɛ ɛ?

Fedefede Baebolo kɛlɛtokɛ nu. Kɛ neazo la, kpondɛ ahenle mɔɔ hɛlɛle edwɛkɛ ne, menli mɔɔ ɔhɛlɛle ɔhɔmaanle bɛ nee mekɛ mɔɔ ɔhɛlɛle la. Tɛnlabelɛ boni a ɛnee bɛwɔ nu a, edwɛkɛ boni a limoale zile a yɛɛ duzu a zile wɔ yemɔ anzi a?

Dua kpuya ɛhye mɔ azo kpondɛ ɛzukoalɛdeɛ ne mɔɔ wɔ nu la: ‘Kɛzi menli mɔɔ boka nwo la dele nganeɛ ɛ? Subane boni a bɛlale ye ali a? Duzu ati a ɔwɔ kɛ mesukoa zɔhane subane ne mɔ anzɛɛ ɔnle kɛ mesukoa a?’

Fa ɛzukoalɛdeɛ mɔɔ wɔnyia wɔvi nu la di gyima, bie a wɔ wɔ ɛzonlenlɛ gyima ne anzɛɛ kɛzi ɛ nee awie mɔ di la anu. Saa ɛyɛ ye zɔ a ɛnee ɛlɛda Nyamenle nrɛlɛbɛ ne ali kɛ mɔɔ Baebolo ne hanle la: “Awie biala mɔɔ ze nrɛlɛbɛ la bayɛ ninyɛne ɛhye mɔ nzonlɛ.”—Edw. 107:43.

• Nzuzulɛ: Nea kɛzi edwɛkɛ mɔɔ wɔ dapɛne avinli debiezukoalɛ ne foa mɔɔ se Nyamenle Edwɛkɛ Ne Azo Nvasoɛ anu la boa yɛ maa yɛfa yɛ adwenle yɛsie kɛzi yɛbava edwɛkɛ ne yɛali gyima la azo la. Kpuya mɔɔ yɛbahola yɛabiza yɛ nwo, edwɛkɛ mɔɔ yɛbahola yɛadwenledwenle nwolɛ nee nvoninli wɔ foa ɛhye anu.