1-2. Tɛnlabelɛ boni a Gyihova Alasevolɛ dɔɔnwo yia a, na kɛzi ɔka bɛ ɛ?

SUZU tɛnlabelɛ nsa ɛhye mɔ anwo: Dɔketa ɛha ɛhile adiema nrenyia kpavolɛ bie kɛ yenyia ewule ɛzulolɛ bie. Adiema nrenyia kpanyinli bie mɔɔ ɔkulo gyima kpalɛ la gyima ɛvi ɔ sa, yekpondɛ bie dedee ɔnnyia bie. Adiema raalɛ kpanyinli bie mɔɔ ɔdi nɔhalɛ la tɛnlabelɛ ne ɛlɛsɛkye bɔkɔɔ, na ɔngola ɔnyɛ dɔɔnwo wɔ Gyihova ɛzonlenlɛ nu kɛ mɔɔ ɔkpondɛ la.

² Saa ɛlɛyia tɛnlabelɛ ɛhye mɔ mɔɔ yɛha nwolɛ edwɛkɛ la bie a, bie a ɛbade nganeɛ kɛ bɛfa wɔ bɛyɛ debie biala a ɔnyɛ boɛ bieko. Tɛnlabelɛ ɛhye mɔ bahola amaa wɔali nyane na wɔade nganeɛ kɛ nvasoɛ biala ɛnle ɛ nwo zo yɛɛ ɔbahola yeamaa ɛ nee awie mɔ avinli azɛkye.

3. Kɛzi Seetan nee menli mɔɔ ɔdi bɛ nwo zo tumi la bu sonla ngoane ɛ?

³ Ewiade ɛhye da adwenle mɔɔ Seetan lɛ ye wɔ sonla ngoane nwo la bie ali. Dahuu Seetan kulo kɛ alesama te nganeɛ kɛ bɛ nwo ɛngyia. Ɔvale adwenle ɛtane ɔzele Yive kɛ saa ɔyɛ Nyamenle anwo anzosesebɛ a, ɔbanyia fanwodi wɔ mekɛ mɔɔ ɛnee ɔze kɛ ɔyɛ zɔ a ɔbawu la. Ɔvi tete ne amuala, Seetan a di ewiade ɛhye anu gualilɛ, maanyɛlɛ yɛɛ ɛzonlenlɛ zo tumi a. Yemɔti ɔnyɛ azibɛnwo kɛ gualilɛma, maanyɛlɛma yɛɛ ɛzonlenlɛ nu mgbanyima ɛnlɛ ɛbulɛ ɛmmaa sonla ngoane la.

4. Duzu a yɛbazuzu nwo wɔ edwɛkɛ ɛhye anu a?

⁴ Noko Gyihova kulo kɛ yɛte nganeɛ kɛ yɛ nwo hyia, na saa yɛyia tɛnlabelɛ mɔɔ ɛnle kpalɛ la a, ɔboa yɛ. (Edw. 136:23; Wlo. 12:3) Wɔ edwɛkɛ ɛhye anu, yɛbanwu kɛzi Gyihova boa yɛ wɔ tɛnlabelɛ ɛhye mɔ anu la: (1) Mekɛ mɔɔ yɛnde kpɔkɛ, (2) mekɛ mɔɔ yɛlɛyia ezukoa nwo ngyegyelɛ yɛɛ (3) mekɛ mɔɔ kpanyinliyɛlɛ ɛmmaa yɛngola dɔɔnwo yɛ wɔ  Gyihova ɛzonlenlɛ nu la. Noko mɔɔ limoa, bɛmaa yɛnlea deɛmɔti yɛbahola yɛanyia anwodozo kɛ yɛ nuhua ko biala sonle bolɛ maa Gyihova la.

5. Duzu a maa ɛnwu ye kɛ alesama sonle bolɛ maa Gyihova a?

⁵ Ɔwɔ nu kɛ bɛvale ndɛtɛlɛ a bɛbɔle yɛ a, noko akee yɛsonle bolɛ kpalɛ. (Gyn. 2:7) Suzu deɛmɔti yɛka kɛ yɛsonle bolɛ yɛmaa Gyihova la anwo. Ɔvale ye subane ne mɔ bie ɔbɔle sonla. (Gyn. 1:27) Ɔyɛle ɛhye ɔvale ɔhilele kɛ, ɔdi yɛ eni ɔtɛla abɔdeɛ biala mɔɔ wɔ azɛlɛ ye azo la, na ɔhanle kɛ yɛnlea azɛlɛ ne yɛɛ nane ne mɔ anwo zo.​—Edw. 8:4-8.

6. Daselɛ boni bieko a yɛlɛ mɔɔ maa yɛnwu kɛ alesama mɔɔ ɛnli munli sonle bolɛ maa Gyihova a?

⁶ Mɔɔ Adam yɛle ɛtane bɔbɔ la anzi, Gyihova hilele kɛ alesama tɛsonle bolɛ tɛmaa ye. Yɛsonle bolɛ yɛmaa ye somaa, ɔti ɔvale ɔ Ra mɔɔ ɔkulo ye kpalɛ la, Gyisɛse ɔmaanle kɛ ɛkpɔnedeɛ ɔlua yɛ ɛtane ti. (1 Dwɔn 4:9, 10) Gyihova balua ɛkpɔnedeɛ ne azo yeadwazo menli mɔɔ ɔlua Adam ɛtane ne ati bɛwu la​—menli mɔɔ bɛle “tenlenema nee bɛdabɛ mɔɔ bɛnle tenlenema la” yeara ngoane nu bieko. (Gyi. 24:15) Ye Edwɛkɛ ne maa yɛnwu kɛ yɛsonle bolɛ yɛmaa ye ɔnva nwo kɛ yɛnde kpɔkɛ, yɛnlɛ ezukoa anzɛɛ yɛyɛ mgbanyinli la.​—Gyi. 10:34, 35.

7. Ndelebɛbo boni bieko ati a Nyamenle azonvolɛ die di kɛ bɛsonle bolɛ bɛmaa Gyihova a?

⁷ Yɛlɛ ndelebɛbo bieko mɔɔ ɔti yɛka kɛ yɛsonle bolɛ yɛmaa Gyihova a. Yehwe yɛ yebikye ɔ nwo, ɔlua subane mɔɔ yɛlale ye ali wɔ edwɛkpa ne anwo la ati. (Dwɔn 6:44) Mɔɔ yɛbɔle ɔ bo kɛ yɛtwe yɛabikye Gyihova la, ɔhwenle ɔbikyele yɛ. (Gye. 4:8) Eza Gyihova ɛnyia yɛ nwo mekɛ ɔlɛkilehile yɛ yeamaa yɛanwu kɛ yɛsonle bolɛ yɛmaa ye. Ɔze sonla holɛ mɔɔ yɛde ye ɛnɛ yɛɛ mɔɔ yɛbahola yɛayɛ la. Yɛɛ ɔtea yɛ ɔluakɛ ɔkulo yɛ la ati. (Mrɛ. 3:11, 12) Ɛhye le daselɛ kpole mɔɔ kile kɛ yɛsonle bolɛ yɛmaa Gyihova a!

8. Kɛzi edwɛkɛ mɔɔ wɔ Edwɛne 18:27-29 la bahola amaa yɛanyia yɛ ngyegyelɛ nwo adwenle kpalɛ ɛ?

⁸ Ɛnee menli bie mɔ bu Belemgbunli Devidi kɛ ɔ nwo ɛngyia, noko ɛnee ɔze kɛ Gyihova kulo ye yɛɛ ɔboa ye. Ɛhye maanle Devidi nyianle ye tɛnlabelɛ ne anwo adwenle kpalɛ. (2 Sa. 16:5-7) Saa yɛ nwo bɛlɛ yɛ anzɛɛ yɛlɛyia ngyegyelɛ a, Gyihova bahola aboa yɛ amaa yɛanwu ninyɛne wɔ adenle ngakyile zo na yɛahola yɛagyinla ngyegyelɛ ne anloa. (Kenga Edwɛne 18:27-29.) Saa Gyihova gyi yɛ nzi a, debie biala ɛnle ɛkɛ mɔɔ bahola azɛkye anyelielɛ mɔɔ yɛlɛfa yɛazonle ye la a. (Wlo. 8:31) Akee bɛmaa yɛzuzu tɛnlabelɛ titili nsa zɔhane mɔ mɔɔ yɛkɔ nu a ɔwɔ kɛ yɛkakye kɛ Gyihova kulo yɛ na yɛsonle bolɛ yɛmaa ye la anwo.

9. Kɛzi anwodolɛ bahola aha kɛzi yɛnwu yɛ nwo la ɛ?

⁹ Anwodolɛ bahola amaa yɛayɛ basaa na yɛade nganeɛ kɛ yɛ nwo ɛngyia bieko. Bie a saa awie mɔ nwu yɛ anwodolɛ ne anzɛɛ saa ɔwɔ kɛ bɛboa yɛ a, yɛ ti bazi aze. Saa awie mɔ ɛnze ewule mɔɔ wɔ yɛ nwo bɔbɔ la a, bie a nyiane nee kɛzi yɛngola dɔɔnwo yɛ la anwo adwenleadwenle badɔ yɛ nwo. Wɔ mekɛ zɛhae mɔ anu, Gyihova maa yɛ anwosesebɛ. Adenle boni azo?

10. Kɛ mɔɔ Mrɛlɛbulɛ 12:25 kile la, saa yɛnde kpɔkɛ a, duzu a bahola aboa yɛ a?

¹⁰ Saa yɛnde kpɔkɛ a, “edwɛkɛ kpalɛ” kola maa yɛ anwosesebɛ. (Kenga Mrɛlɛbulɛ 12:25.) Edwɛkɛ fɛlɛko mɔɔ maa yɛnwu kɛ saa  yɛnde kpɔkɛ bɔbɔ a yɛ nwo hyia Gyihova la wɔ Baebolo ne anu. (Edw. 31:19; 41:3) Saa yɛkenga edwɛkɛ zɔhane mɔ mɔɔ vi Nyamenle ɛkɛ la fane dɔɔnwo a, Gyihova balua zo amaa yɛagyinla nganeɛ ɛtane mɔɔ anwodolɛ maa yɛte la anloa.

11. Kɛzi adiema nrenyia ko nwunle kɛ Gyihova ɛlɛboa ye ɛ?

¹¹ Suzu Jorge mɔɔ ɛnee le kpavolɛ la anwubielɛ ne anwo. Ɔnyianle ewule ɛzulolɛ bie, na anwodolɛ ne hɔle ɔ nyunlu ndɛndɛ, ɛhye maanle ɔdele nganeɛ kɛ nvasoɛ ɛnle ɔ nwo zo. Jorge ka kɛ: “Ɛnee metɛsieziele me nwo metɛmaanle nyane mɔɔ ewule ne maanle menlile la yɛɛ me ti zile aze ɔluakɛ ɛnee ɔmaa menli nea me. Mekɛ ɛlɛkɔ na ewule ne ɛlɛyɛ kpole la, mendwenlenle kɛzi ninyɛne bahɔ ye la anwo. Menyɛle basaa na menzɛlɛle Gyihova kɛ ɔboa me.” Kɛzi Gyihova boale ye ɛ? Ɔka kɛ: “Kɛ mɔɔ ɛnee mengola menye me adwenle menvi me ngyegyelɛ ne azo la ati, bɛmaanle me anwosesebɛ kɛ mengenga Edwɛne buluku ne foa mɔɔ maa yɛnwu kɛzi Gyihova dwenle ye azonvolɛ nwo la. Mengengale ngɛlɛlera ne foa zɔhane fane dɔɔnwo na ɔkyekyele me rɛle. Yeangyɛ, menli nwunle kɛ meta mesele. Bɛhanle bɔbɔ kɛ, subane mɔɔ meda ye ali la ɛlɛmaa bɛ anwosesebɛ. Menwunle kɛ Gyihova ɛdie me asɔneyɛlɛ! Yeboa me yemaa menyia adwenle kpalɛ wɔ me nwo. Membɔle ɔ bo kɛ mefa me adwenle meazie kɛzi Gyihova nwu me la azo kɛ mɔɔ ye Edwɛkɛ ne ka la.”

12. Saa anwodolɛ ɛlɛgyegye wɔ a, kɛzi Gyihova bahola aboa wɔ ɛ?

¹² Saa anwodolɛ ɛlɛgyegye wɔ a, nyia anwodozo kɛ Gyihova ze tɛnlabelɛ mɔɔ ɛwɔ nu la. Sɛlɛ ye ɛkɛ ne moalɛ amaa wɔanyia  wɔ tɛnlabelɛ ne anwo adwenle kpalɛ. Akee dua Baebolo ne azo kpondɛ edwɛkɛ kpalɛ mɔɔ Gyihova kulo kɛ ɛte la. Fa wɔ adwenle sie foa mɔɔ ka kɛzi Gyihova azonvolɛ sonle bolɛ maa ye la azo. Mekɛ mɔɔ ɛlɛyɛ ɛhye la, ɛbanwu kɛ Gyihova le kpalɛ maa menli kɔsɔɔti mɔɔ fa nɔhalɛlilɛ sonle ye la.​—Edw. 84:11.

13. Saa abusua tile bie gyima fi ɔ sa a, kɛzi ɔbahola yeade nganeɛ ɛ?

¹³ Abusua tile biala kulo kɛ ɔfa mɔɔ ye abusua ne hyia nwo la ɔmaa bɛ. Noko fa ye kɛ adiema nrenyia bie gyima ɛvi ɔ sa wɔ mekɛ mɔɔ nvonleɛ ne ɛnvi ye la. Ɔbɔ mɔdenle biala kɛ ɔkpondɛ gyima fofolɛ noko nzule lua bolɛ nwo. Tɛnlabelɛ ɛhye bamaa yeade nganeɛ kɛ nvasoɛ ɛnle ɔ nwo zo. Kɛzi Gyihova ɛwɔkɛ ne mɔ mɔɔ ɔbava ye adwenle yeazie zo la bahola aboa ye ɛ?

14. Ndelebɛbo boni mɔ ati a Gyihova di ye ɛwɔkɛ zo a?

¹⁴ Gyihova di ye ɛwɔkɛ zo dahuu. (Dwɔh. 21:45; 23:14) Ndelebɛbo kpalɛ bie ati a ɔyɛ zɔ a. Mɔɔ limoa, ɔyɛ zɔ ɔfa ɔte ye duma nwo. Gyihova mumua ne ɛha kɛ, ɔbanlea ye azonvolɛ mɔɔ di nɔhalɛ la, na ɔte nganeɛ kɛ ɔle ye ɛzonlelilɛ kɛ ɔbali ye ɛwɔkɛ zo. (Edw. 31:1-3) Bieko, Gyihova ze kɛ, saa yeamboa menli mɔɔ boka ye abusua ne anwo la a, bɛ rɛle babɔ. Yebɔ ɛwɔkɛ kɛ ɔbali yɛ nwonane nee sunsum afoa nu ngyianlɛ nwo gyima na debie biala ɛnrɛzi ye adenle wɔ adenle biala azo!​—Mat. 6:30-33; 24:45.

15. (a) Ngyegyelɛ boni a ɛvoya mɔɔ limoa Kilisienema yiale a? (b) Anwodozo boni a Edwɛne 37:18, 19 maa yɛnyia a?

¹⁵ Saa yɛkakye deɛmɔti Gyihova di ye ɛwɔkɛ zo la a, ɔbamaa yɛ anwosesebɛ amaa  yɛagyinla ezukoa nwo ngyegyelɛ nloa. Suzu ɛvoya mɔɔ limoa Kilisienema neazo ne anwo. Mɔɔ ɛkpɔlɛ kpole rale asafo ne mɔɔ wɔ Gyɛlusalɛm anwo zo la, “bɛ muala bɛbɔle asande, . . . na ɔhale ɛzoanvolɛma ne ala.” (Gyi. 8:1) Suzu mɔɔ ɛhye vale rale la anwo. Ezukoa nwo ngyegyelɛ! Bie a Kilisienema bie mɔ azua nee bɛ gyima vile bɛ sa. Noko Gyihova amkpo bɛ yɛɛ tɛnlabelɛ ne anzɛkye bɛ anyelielɛ. (Gyi. 8:4; Hib. 13:5, 6; Gye. 1:2, 3) Gyihova boale Kilisienema zɔhane mɔ mɔɔ di nɔhalɛ la, na ɔbaboa yɛdayɛ noko.​—Kenga Edwɛne 37:18, 19.

16. Tɛnlabelɛ boni a bahola amaa yɛ adwenle nu ayɛ yɛ kesee na yɛade nganeɛ kɛ yɛ ɛzonlenlɛ ɛnzɔ Gyihova anye a?

¹⁶ Saa yɛlɛyɛ mgbanyinli a, yɛte nganeɛ kɛ yɛnrɛhola yɛnrɛyɛ dɔɔnwo yɛnrɛmaa Gyihova. Bie a Belemgbunli Devidi dele nganeɛ ɛhye bie wɔ mekɛ mɔɔ ɔlɛnyi la. (Edw. 71:9) Kɛzi Gyihova bahola aboa yɛ ɛ?

17. Duzu a yɛsukoa yɛfi adiema raalɛ ne mɔɔ bɛfɛlɛ ye Jheri la anwubielɛ ne anu a?

¹⁷ Suzu adiema raalɛ bie mɔɔ bɛfɛlɛ ye Jheri la anwubielɛ ne anwo nea. Bɛdole ɛsalɛ bɛvɛlɛle ye kɛ ɔrɛla gyimalilɛ bie mɔɔ bɛdua zo bɛahile mediema bie mɔ kɛzi bɛbayɛ ninyɛne mɔɔ kɛzɛkye la boɛ la, ɛnee ɛhye bahɔ zo wɔ Belemgbunlililɛ Asalo ɛkɛ. Noko ɛnee ɔngulo kɛ ɔkɔ. Ɔhanle kɛ: “Meyɛ kpanyinli, mele kunlavolɛ yɛɛ menlɛ me sa anloa gyima biala mɔɔ Gyihova hyia nwo a. Nvasoɛ biala ɛnle me nwo zo.” Nɔe ne mɔɔ aleɛ kye a gyimalilɛ ne bahɔ zo la, ɔyɛle asɔne ɛsesebɛ ɔhilele Gyihova. Mɔɔ aleɛ hyenle na ɔhɔdwule Belemgbunlililɛ Asalo ɛkɛ ne la, ɛnee ye adwenle nu tɛyɛ ye kesee. Wɔ  gyimalilɛ ne abo, tendɛvolɛma ne anu ko zile zo kɛ, debie mɔɔ Gyihova hyia nwo la a le kɛ, yɛbanyia ɛhulolɛ kɛ ɔtete yɛ. Jheri ka kɛ: “Medie medi kɛ melɛ ɛhulolɛ ne! Mɔɔ menwunle kɛ Gyihova ɛlɛtie me asɔneyɛlɛ la, menzunle. Ɔmaanle menyianle anwodozo kɛ, melɛ debie mɔɔ anwo hyia mɔɔ mebahola meava meamaa ye a, na yeziezie ɔ nwo kɛ ɔbahilehile me!” Kɛkala, Jheri ka kɛ: “Mekɔ gyimalilɛ ne abo la ɛnee mesulo yɛɛ ɛnee menlɛ anwodozo. Noko yɛkakpɔne la, ɛnee menyia anwodozo yɛɛ anwosesebɛ!”

18. Kɛzi Baebolo ne maa yɛnwu kɛ ɛzonlenlɛ mɔɔ yɛfa yɛmaa Gyihova la sonle bolɛ maa ye wɔ mekɛ mɔɔ yɛlɛyɛ mgbanyinli la ɛ?

¹⁸ Saa yɛlɛyɛ mgbanyinli bɔbɔ a, yɛbahola yɛanyia anwodozo kɛ Gyihova lɛ gyima maa yɛ. (Edw. 92:12-15) Gyisɛse hilehilele yɛ kɛ, ɔnva nwo kɛzi yɛ tɛnlabelɛ nee yɛ anwosesebɛ de biala la, Gyihova anye sɔ biala mɔɔ yɛkola yɛyɛ wɔ ye ɛzonlenlɛ nu la. (Luku 21:2-4) Yemɔti fa wɔ adwenle sie mɔɔ ɛkola ɛyɛ la azo. Kɛ neazo la, ɛbahola wɔaha Gyihova anwo edwɛkɛ, wɔayɛ asɔne wɔamaa ɛ mediema na wɔamaa awie mɔ anwosesebɛ kɛ bɛhɔ zo bɛli nɔhalɛ. Gyihova bu wɔ kɛ ɛle ɔ gɔnwo gyimayɛvo, tɛ mɔɔ ɛkola ɛyɛ la ati ɔ, emomu ɔluakɛ ɛfi wɔ ɛhulolɛ nu ɛyɛ tieyɛ la ati ɔ.​—1 Kɔl. 3:5-9.

19. Anwodozo boni a Wulomuma 8:38, 39 maa yɛnyia a?

¹⁹ Nea kɛzi yɛ nye die kpole kɛ yɛlɛsonle Gyihova, Nyamenle mɔɔ ye azonvolɛ sonle bolɛ kpole maa ye la a! Ɔbɔle yɛ kɛ yɛyɛ ye ɛhulolɛdeɛ, na amgba nɔhalɛ ɛzonlenlɛ maa yɛnyia ɛbɛlabɔlɛ kpalɛ. (Yek. 4:11) Ewiade ne bu yɛ kɛ yɛ nwo ɛngyia, noko Gyihova anye die yɛ nwo. (Hib. 11:16, 38) Saa anwodolɛ, ezukoa nwo ngyegyelɛ nee kpanyinliyɛlɛ maa yɛ nwo bɛlɛ yɛ a, bɛmaa yɛhakye kɛ debie biala ɛnle ɛkɛ mɔɔ bahola ahwe yɛ avi yɛ ɛlɔlɛ Selɛ ne anwo a.​—Kenga Wulomuma 8:38, 39.