BOLƐ bie mɔɔ bɛhɛlɛle zolɛ wɔ kɛyɛ ɛvolɛ 700-600 K.Y.M. la wɔ Bible Lands Museum mɔɔ wɔ Gyɛlusalɛm la anu. Bɛvale bolɛ ne wɔ bolɛ bɔne bie mɔɔ bɛsie menli wɔ nu mɔɔ bikye Hibulɔn mɔɔ wɔ Yizilayɛ la anu. Mɔɔ bɛhɛlɛ ye wɔ zolɛ la ɛne: “Yahweh Sabaot se bɛmaa munzule ɛdo Hagav ara Hagaf.” Kɛzi edwɛkɛ ɛhye si mɔɔ Baebolo ne ka la azo ɛ? Ɔkile kɛ wɔ tete ne, ɛnee menli ze Nyamenle duma Gyihova ne mɔɔ bɛva Hibulu ngɛlɛleramgbɔkɛ YHWH bɛhɛlɛ la na bɛfa bɛdi gyima wɔ bɛ ɛbɛlabɔlɛ nu. Nɔhalɛ nu, bɛnwu ngɛlɛlera gyɛne mɔɔ kile kɛ, ɛnee menli mɔɔ kɔyia bolɛ bɔne ɛhye mɔ anu anzɛɛ kɔfea ɛkɛ ne la ta kɛlɛ Nyamenle duma ne anzɛɛ aluma bie mɔ mɔɔ Nyamenle duma ne foa bie wɔ nu la wɔ bane ne mɔ anwo.

Mɔɔ Dr. Rachel Nabulsi mɔɔ ɔkile debie wɔ University of Georgia la ka ngɛlɛlera ɛhye anwo edwɛkɛ la, ɔhanle kɛ: “Duma YHWH ne mɔɔ bɛvale bɛlile gyima fane dɔɔnwo la anwo hyia kpalɛ. . . . Edwɛkɛ ne nee ngɛlɛlera ɛhye mɔ maa yɛnwu kɛzi ɛnee duma YHWH ne anwo hyia wɔ Yizilayɛma nee Dwudama ɛbɛlabɔlɛ nu la.” Ɛhye si mɔɔ Baebolo ka la azo. Baebolo ne anu a Nyamenle duma ne mɔɔ bɛva Hibulu ngɛlɛleramgbɔkɛ YHWH bɛhɛlɛ la finde apenle dɔɔnwo a. Fane dɔɔnwo ne ala, awie mɔ fa Nyamenle duma ne foa bie boka bɛ aluma nwo.

Edwɛkɛ “Yahweh Sabaot” mɔɔ bɛhɛlɛ ye wɔ bolɛ ne azo la abo kile “ɛlɔne Gyihova.” Ɛhye kile kɛ, tɛ Nyamenle duma ne angomekye a ɛnee bɛfa bɛdi gyima wɔ tete ne a, emomu ɛnee bɛfa edwɛkɛ “ɛlɔne Gyihova” noko bɛdi gyima. Ɛhye noko si edwɛkɛ “ɛlɔne Gyihova” mɔɔ Baebolo ne fa di gyima mɔɔ ɔfinde fane 283 wɔ Hibulu Ngɛlɛlera ne anu, mɔɔ nuhua dɔɔnwo wɔ Ayezaya, Gyɛlɛmaya yɛɛ Zɛkalaya mbuluku ne mɔ anu la azo.