1, 2. Wɔ ewiade ɛhye anu, duzu ati a yɛ nee ehyianvolɛma badɛnla dahuu ɛ?

ƐNƐ ewiade ɛhye anu gualilɛ ngyehyɛleɛ ne ɛzɛkye bɔkɔɔ. Mgbavolɛ ɛnnyia gyima ɛnyɛ. Menli dɔɔnwo fa bɛ ngoane to esiane nu kɔ maanle mɔɔ bɛdi boɛ la anu. Ehyia wɔ maanle mɔɔ bɛdi boɛ bɔbɔ la anu. Sukoavolɛma ɛlɛnyia bɛ nwo yɛɛ ehyiavolɛma noko tɛdi ehyia. Mgbonda bie mɔɔ bɛbu ye kenle nsa ye la kile kɛ, menli ɛya ngyɛnu 1 ɛnyia bɛ nwo kpole kɛ menli ɛya ngyɛnu 99 ne mɔɔ ɛha la. Menli bie mɔ lɛ ezukoa dɔɔnwo mɔɔ bahola anlea bɛ bo zo amra wɔ awolɛndoazo dɔɔnwo anu a, noko menli mgbe mgbe dɔɔnwo di ehyia. Gyisɛse hanle kɛ: “Bɛ nee ehyiavolɛma de dahuu.” (Maake 14:7) Duzu ati a tɛnlabelɛ ɛhye mɔɔ ɛnle kpalɛ la ɛlɛkɔ zo a?

² Gyisɛse nwunle kɛ ewiade ɛhye ezukoa gyinlabelɛ ne ɛnrɛhakyi kɔkpula kɛ Nyamenle Belemgbunlililɛ ne bara. Atisesebɛ gualilɛ ngyehyɛleɛ, maanyɛlɛ nee ɛzonlenlɛ ngakyile ne mɔɔ Yekile 18:3 ka bɛ nwo edwɛkɛ kɛ “gualilɛma” la boka Seetan ewiade ne anwo. Nyamenle menli kola twe bɛ nwo bɔkɔɔ fi maanyɛlɛ nee adalɛ ɛzonlenlɛ nwo, noko bɛ nuhua dɔɔnwo ɛngola ɛndwe bɛ nwo ɛnvi Seetan ewiade gualilɛ ngyehyɛleɛ ne anwo.

3. Kpuya boni mɔ a yɛbazuzu nwo a?

³ Kɛ Kilisienema la, ɔwɔ kɛ yɛbiza yɛ nwo kpuya ɛhye mɔ amaa  yɛanwu kɛzi yɛbu ɛnɛ gualilɛ ngyehyɛleɛ ne la: ‘Kɛzi mebava me anwonyia meali gyima meahile kɛ medi nɔhalɛ memaa Nyamenle ɛ? Kɛ ɔkɛyɛ na meanva me nwo meanwula ewiade ye anu gualilɛ nu somaa ɛ? Anwubielɛ boni mɔ a kile kɛ Nyamenle menli fa bɛ nwo to ɔ nwo zo bɔkɔɔ wɔ ewiade ɛhye mɔɔ anu yɛ se la anu ɛ?’

4, 5. (a) Tɛnlabelɛ boni a sonvolɛ ne mɔɔ wɔ Gyisɛse ndonwo ne anu la hɔle nu a? (b) Folɛ boni a Gyisɛse dule ye ɛdoavolɛma a?

⁴ Kenga Luku 16:1-9. Gyisɛse ndonwo ne mɔɔ fale sonvolɛ sɛkyeravolɛ ne anwo la ka ahonle. Mɔɔ bɛdole sonvolɛ ne ɛzonle kɛ ɔlɛsɛkye ɔ menle ninyɛne la anzi, ɔvale ye “adwenle ɔlile gyima” ɔvale “agɔnwolɛ” amaa saa ye gyima ne fi ɔ sa a bɛaboa ye. * Nɔhalɛ nu, Gyisɛse anga edwɛkɛ ɛhye amaa ye ɛdoavolɛma alua adenle ɛtane zo anlea bɛ nwo wɔ ewiade ɛhye anu. Ɔhanle kɛ, kɛ “ewiade ɛhye anu menli” yɛ bɛ nyɛleɛ la ɛne, noko Gyisɛse yɛle ndonwo ɛhye vale hilele ɛzukoalɛdeɛ mɔɔ wɔ nu la.

⁵ Ɛnee Gyisɛse ze kɛ, kɛmɔ sonvolɛ ne mɔɔ hɔle ngyegyelɛ nu yɛle la, zɔhane ala a ɔwɔ kɛ ye ɛdoavolɛma nea bɛ nwo wɔ ewiade ɛhye mɔɔ ye gualilɛ ngyehyɛleɛ ɛnle kpalɛ la anu a. Ɔti ɔdule bɛ folɛ kɛ: “Bɛlua ɛtane ewiade ɛhye anwonyia zo bɛva agɔnwolɛ, amaa mekɛ mɔɔ ɛhye mɔ kɛminli la [Gyihova nee Gyisɛse alie bɛ ahɔ] ɛleka mɔɔ bɛbadɛnla ye dahuu la.” Duzu a yɛsukoa yɛfi Gyisɛse folɛdulɛ ne anu a?

6. Kɛzi yɛkola yɛnwu ye kɛ ewiade gualilɛ ngyehyɛleɛ ne ɛmboka Nyamenle bodane nwo ɛ?

⁶ Gyisɛse angile deɛmɔti ɔhanle kɛ anwonyia le “ɛtane ewiade ɛhye” debie la anu, noko Baebolo ne kile kɛ gualilɛ ɛmboka Nyamenle bodane nwo. Gyihova vale Adam nee Yive ngyianlɛdeɛ kɔsɔɔti maanle bɛ wɔ Yidɛn tola ne anu. (Mɔl. 2:15, 16) Nzinlii mɔɔ sunsum nwuanzanwuanza ne ɛlɛkile ɛvoya mɔɔ limoa asafo ne mɔɔ bɛkpokpa nuhua amra adenle la, “bɛ nuhua ko bɔbɔ anga kɛ ninyɛne mɔɔ ɔlɛ la le ɔ ngome ye ɛdeɛ, emomu bɛhyɛle debie biala mɔɔ bɛlɛ la.” (Gyi. 4:32) Ngapezonli Ayezaya hanle kɛ, mekɛ ɛlɛba mɔɔ alesama asa baha bɛ nwonane afoa ngyianlɛ kɔsɔɔti. (Aye. 25:6-9; 65:21, 22) Noko kɛkala, ɔwɔ kɛ Gyisɛse ɛdoavolɛma fa bɛ ‘adwenle di gyima,’ dua “ɛtane ewiade ɛhye anwonyia” zo nea bɛ nwo wɔ mekɛ mɔɔ bɛlɛbɔ mɔdenle kɛ bɛyɛ Nyamenle ɛhulolɛdeɛ la.

7. Folɛdulɛ boni a wɔ Luku 16:10-13 a?

⁷ Kenga Luku 16:10-13. Sonvolɛ ne mɔɔ wɔ Gyisɛse ndonwo ne anu la vale agɔnwolɛ ɔlua ɔ ngome ye boɛyɛlɛ ti. Noko Gyisɛse dule ye ɛdoavolɛma folɛ kɛ bɛvi bɛ ahonle muala anu bɛva agɔnwolɛ wɔ anwuma. Ngyɛnu mɔɔ doa ndonwo ne la fa kɛzi yɛfa “ɛtane ewiade ɛhye anu anwonyia” yɛdi gyima la toto nɔhalɛ mɔɔ yɛdi yɛmaa Nyamenle la anwo. Ɛnee Gyisɛse ɛlɛkile kɛ kɛzi yɛfa yɛ anwonyia yɛdi gyima la kola kile kɛ ‘yɛdi nɔhalɛ’ anzɛɛ yɛnyɛ zɔ. Adenle boni azo?

8, 9. Maa neazo mɔɔ kile kɛzi bie mɔ ɛlɛfa bɛ anwonyia ali gyima ahile kɛ bɛdi nɔhalɛ la.

⁸ Adenle titili ko mɔɔ yɛbalua zo yɛava yɛ anwonyia yɛali gyima yɛahile kɛ yɛdi nɔhalɛ la a le kɛ yɛbaye ndoboa yɛaboa ewiade amuala edwɛkɛhanlɛ gyima ne  mɔɔ Gyisɛse hanle nwolɛ edwɛkɛ la. (Mat. 24:14) Kakula raalɛ ekyi bie mɔɔ wɔ India la gyakyile toy mɔɔ ɛnee ɔtɔ la vale ezukoa ne guale ɛlɛka bie mɔɔ ɔbobɔle la anu ngyikyi ngyikyi. Mɔɔ ɛlɛka ne yile la ɔvale ezukoa ne ɔmaanle kɛ bɛva bɛboa ewiade amuala edwɛkɛhanlɛ gyima ne. Adiema bie mɔɔ wɔ India mɔɔ lɛ kukue ɛya la vale kukue dɔma dɔɔnwo hɔmaanle Malayalam edwɛkɛbohilelɛ ɔfese ne, ɔdwenlenle nwo kɛ, kɛmɔ ɔfese ne tɔ kukue la ati, saa ɔfa bie ɔmaa bɛ a, ɔbaboa kpalɛ yeadɛla ezukoa mɔɔ ɔbava yeaye ndoboa la. Ɔvale ye adwenle ɔlile gyima. Mediema mɔɔ wɔ Greece la noko fa ɔlivi nwole, kyiisi nee aleɛ gyɛne kɔmaa Bɛtɛle abusua ne dahuu.

⁹ Adiema bie mɔɔ vi Sri Lanka na kɛkala ɔwɔ abolokyi la ɛva sua mɔɔ yezi wɔ ye sua zo la yemaa kɛ bɛva bɛyɛ debiezukoalɛ nee nyianu na menli mɔɔ yɛ dahuu ɛzonlenlɛ gyima ne bie la ɛdɛnla ɛkɛ. Adiema ne ɛva ye ezukoa ɛbɔ afɔle, noko ɔbaboa nolobɔlɛma mɔɔ bɛnlɛ ezukoa dɔɔnwo wɔ ɛkɛ la kpole kpalɛ. Wɔ maanle mɔɔ bɛva bɛ sa bɛdo yɛ gyima ne azo la anu, mediema fa bɛ awuke maa kɛ bɛva bɛyɛ Belemgbunlililɛ Asalo, amaa adekpakyelɛma nee mediema gyɛne mɔɔ bɛnlɛ bie la anyia ɛleka ayɛ debiezukoalɛ na bɛ nwo angyele bɛ wɔ ezukoa afoa nu.

10. Saa yɛyɛ nyele a nyilalɛ boni mɔ a yɛnyia a?

¹⁰ Neazo ɛhye mɔ maa yɛnwu kɛ Nyamenle menli “di nɔhalɛ wɔ debie ekyi” nu. Bɛfa bɛ anwonyia bɛboa awie mɔ. (Luku 16:10) Kɛzi Gyihova agɔnwo mɔ te nganeɛ wɔ afɔlebɔlɛ zɛhae anwo ɛ? Bɛte ɔ bo kɛ nyeleyɛlɛ maa bɛnyia “nɔhalɛ” anwonyia. (Luku 16:11) Adiema raalɛ ko mɔɔ dahuu ye ndoboa boa Belemgbunlililɛ gyima ne la ka nyilalɛ mɔɔ yenyia ye la anwo edwɛkɛ kɛ: “Me anwonyia mɔɔ mefa meboa la maa me nye die kpalɛ. Menwu kɛ saa meboa awie mɔ a, ɔmaa menyia bɛ nwo adwenle kpalɛ. Ɔmaa mefa ɛtane mekyɛ, menyia awie mɔ anwo abotane, megyinla arɛlebɔlɛ nloa yɛɛ medie folɛdulɛ meto nu.” Menli dɔɔnwo ɛnwu kɛ saa bɛyɛ nyele a, ɔboa bɛdabɛ mumua ne.​—Edw. 112:5; Mrɛ. 22:9.

11. (a) Kɛzi ahonle nu mɔɔ yɛfi yɛye ndoboa la kile kɛ yɛfa yɛ ‘adwenle yɛdi gyima’ ɛ? (b) Duzu a ɛlɛkɔ zo wɔ Nyamenle menli avinli a? (Nea mɔlebɛbo nvoninli ne.)

¹¹ Saa yɛfa yɛ anwonyia yɛboa Belemgbunlililɛ gyima ne a ɔkile kɛ yɛlɛfa yɛ ‘adwenle yɛali gyima’ wɔ adenle fofolɛ zo. Ɔmaa yɛfa nwolɛ adenle mɔɔ yɛnyia la yɛboa awie mɔ. Menli mɔɔ di boɛ noko bɛngola dahuu ɛzonlenlɛ gyima ne bie yɛ anzɛɛ ɛngɔ maanle gyɛne zo la anye die, ɔluakɛ bɛze kɛ bɛ ndoboa boa awie mɔ wɔ ɛzonlenlɛ gyima ne anu. (Mrɛ. 19:17) Ndoboa mɔɔ bɛfi ahonle nu bɛye la boa maa bɛnyia mbuluku na bɛka edwɛkɛ ne wɔ azɛlɛsinli mɔɔ bɛdi ehyia noko ɛzonlenlɛ gyima ne so ma dɔɔnwo wɔ ɛkɛ la azo. Wɔ ɛvolɛ dɔɔnwo anu, ɛnee Baebolo bolɛ yɛ se wɔ maanle le kɛ Congo, Madagascar, nee Rwanda, na fane dɔɔnwo ne ala ɔwɔ kɛ mediema ne mɔ kpa kɛ bɛbava bɛ dapɛne anzɛɛ siane ahatualɛ bɛadɔ aleɛ anzɛɛ  Baebolo bɛamaa bɛ mbusua. Amaa ‘moalɛ ne ayɛ sɛsɛ’ la, Gyihova ahyehyɛdeɛ ne fa ndoboa mɔɔ menli dɔɔnwo ye la boa edwɛkɛbohilelɛ gyima ne nee Baebolo mɔɔ bɛmaa abusua ne anu sonla ko biala nee Baebolo sukoavoma mɔɔ sunsum nu ɛhɔne ɛlɛku bɛ noko asa ka bie la anwo gyima. (Kenga 2 Kɔlentema 8:13-15.) Ɔti menli mɔɔ ye ndoboa nee menli mɔɔ nyia zolɛ nvasoɛ la amuala bayɛ Gyihova agɔnwo mɔ.

12. Kɛzi Ebileham hilele kɛ ɔlɛ anwodozo wɔ Nyamenle anu ɛ?

¹² Adenle bieko mɔɔ yɛdua zo yɛfa Gyihova agɔnwolɛ la a le kɛ yɛbava nwolɛ adenle mɔɔ yɛlɛ la yɛakpondɛ “nɔhalɛ” anwonyia yɛɛ yɛnrɛva yɛ nwo yɛnrɛwula ewiade ye anu gualilɛ nu somaa. Ebileham mɔɔ ɔlɛ diedi na ɔdɛnlanle aze tete ne la yɛle tieyɛ vile suakpole Yule azo, ɔhɔdɛnlanle tɛnte nu na yeamia ɔ nee Gyihova agɔnwolɛvalɛ ne anu. (Hib. 11:8-10) Ɔnyianle Nyamenle mɔɔ ɔle nɔhalɛ anwonyia Ɛvileka la anu anwodozo, na yeamkpondɛ anwonyia mɔɔ bahile kɛ ɔnlɛ ye nu anwodozo la. (Mɔl. 14:22, 23) Gyisɛse maanle kpavolɛ sukoavolɛ ne anwosesebɛ kɛ: “Saa ɛkulo kɛ ɛdi munli a, ɛnee kɔdɔne ninyɛne mɔɔ ɛlɛ la na fa ezukoa ne maa ehyiavolɛma, na ɛbanyia anwonyia wɔ anwuma; na bɛla badoa me.” (Mat. 19:21) Nrenyia zɔhane annyia Ebileham diedi ne bie, noko awie mɔ ɛhile kɛ bɛlɛ Nyamenle anu anwodozo bɔkɔɔ.

13. (a) Folɛ boni a Pɔɔlo dule Timote a? (b) Kɛzi yɛbahola yɛava Pɔɔlo folɛdulɛ ne yɛali gyima ɛnɛ a?

¹³ Ɛnee Timote le awie mɔɔ ɔlɛ diedi. Mɔɔ Pɔɔlo hanle kɛ Timote le “Kelaese Gyisɛse sogyanli kpalɛ” la, ɔzele ye kɛ: “Awie biala mɔɔ ɛlɛyɛ sogya gyima la ɛnva ɔ nwo ɛnwulowula gualilɛ nu amaa yeazɔ ahenle mɔɔ vale ye kɛ sogyanli la anye.” (2 Tim. 2: 3, 4) Ɛnɛ, Gyisɛse ɛdoavolɛma mɔɔ mekɛ kɔsɔɔti azonvolɛ mɔɔ bɛbo mgbe ko boka nwo la ɛlɛbɔ mɔdenle ava Pɔɔlo folɛdulɛ ne ali gyima kɛ mɔɔ bɛ tɛnlabelɛ ne bamaa bɛ adenle la. Kɛmɔ bɛmkpondɛ kɛ ninyɛne mɔɔ wɔ ewiade ne anu mɔɔ bɛbɔ nwolɛ nolo la nyia bɛ nwo zo tumi la ati, bɛkakye ngyinlazo ɛhye: “Mɔɔ biza bosea la le sonla mɔɔ bɔ ye bosea la kanranli.” (Mrɛ. 22:7) Mɔɔ Seetan kpondɛ a le kɛ yɛbava yɛ mekɛ nee yɛ anwosesebɛ kɔsɔɔti yɛali ye ewiade ne gualilɛ ngyehyɛleɛ nzi. Kpɔkɛzilɛ bie mɔ bamaa yeahwe kakɛ yeamaa yɛ nwo mɔɔ kyesɛ yɛfa ɛvolɛ dɔɔnwo yɛtua a. Bosea mɔɔ bɛbɔ bɛtɔ sua, bɛkɔ sukulu, kale mɔɔ ye bolɛ yɛ se, bɔbɔ atɔfolɛlielɛ mgbole bahola ahwe kakɛ kpole amaa yɛ. Saa yɛtete ninyɛne zo wɔ ɛbɛlabɔlɛ nu, yɛandwe kakɛ yɛamaa yɛ nwo, na yɛnyia mekɛ yɛsonle Nyamenle na yɛanyɛ akɛlɛ yɛammaa ewiade gualilɛ ngyehyɛleɛ ne a, ɔkile kɛ yɛlɛfa yɛ adwenle yɛali gyima.​—1 Tim. 6:10.

14. Mɔdenlebɔlɛ boni a hyia a? Maa neazo bie mɔ.

¹⁴ Amaa yɛatete ninyɛne zo wɔ yɛ ɛbɛlabɔlɛ nu la, ɔwɔ kɛ yɛfa Nyamenle Belemgbunlililɛ ne yɛdimoa. Ɛnee agyalɛma bie lɛ gyima kpole bie mɔɔ bɛyɛ ninyɛne wɔ ɛkɛ. Noko, dahuu ɛzonlenlɛ gyima ne mɔɔ bɛkulo kɛ bɛyɛ ye bieko la ati, ɔmaanle bɛdɔnenle bɛ gyima, bɛ ɛlɛne nee ninyɛne gyɛne. Akee bɛdule bɛ nwo bɛmaanle kɛ bɛbayɛ suazilɛ gyima ne mɔɔ hɔle zo wɔ ewiade amuala gyima ne ati mɔɔ wɔ Warwick, New York la bie. Bɛ nye liele kpole kɛ bɛ nee bɛ ra ralɛ ne nee ɔ hu nee ye awovolɛ vale dapɛne ekyi bie yɛle Warwick Bɛtɛle suazilɛ gyima ne bie la. Adiema raalɛ bie mɔɔ ɔle adekpakyelɛnli la nyianle gyima mɔɔ bɛfa mekɛ foa bɛyɛ la wɔ bange bie mɔɔ wɔ Colorado, U.S.A la. Menli mɔɔ vale ye gyima nu la anye liele ye  gyima nwo, na bɛbɔle ye ɛwɔkɛ kɛ bɛbamaa ye gyima mɔɔ bamaa bɛabɔ ye ahatualɛ ne anwo fane nsa la. Noko, kɛmɔ gyima ne ɛnrɛmaa ɔnrɛva ye adwenle ɔnrɛzie ɛzonlenlɛ gyima ne azo la ati, ɔkpole. Afɔle mɔɔ Gyihova azonvolɛ bie mɔ ɛbɔ la anu ekyi bie ɛne. Mɔdenle mɔɔ yɛbɔ yɛfa Belemgbunlililɛ ne yɛdimoa la kile kɛ yɛbu yɛ nee Nyamenle agɔnwolɛvalɛ ne nee sunsum nu anwonyia kɛ ɔsonle bolɛ ɔtɛla mɔɔ ewiade gualilɛ ngyehyɛleɛ ne bamaa yɛanyia la.

15. Anwonyia boni a maa yɛ nye die kpole a?

¹⁵ Anwonyia ɛngile kɛ Nyamenle ɛyila awie. Gyihova yila bɛdabɛ mɔɔ bɛle “sukoavolɛma wɔ gyima kpalɛ” ɛyɛlɛ nu la. (Kenga 1 Timote 6:17-19.) Kɛ neazo la, mekɛ mɔɔ Lucia * nwunle kɛ bɛhyia azonvolɛ nwo wɔ Albania la, ɔvale ɔ nwo ɔdole Gyihova anwo zo na ɔdule ɔvile Italy wɔ 1993, mɔɔ ɛnee ɔnlɛ debie mɔɔ ɔbava yeanlea ɔ nwo a. Ɔzukoale Albania aneɛ ne, na yeboa menli mɔɔ bo 60 mɔɔ ɔka ekyii bɛyila bɛ nwo zo la. Nyamenle menli dɔɔnwo ɛnga edwɛkɛ ne wɔ azɛlɛsinli zɛhae mɔɔ so ma la azo, noko debie biala mɔɔ yɛbayɛ yɛaboa awie mɔ yɛamaa bɛanwu ngoane adenle ne na bɛalua zo la le debie mɔɔ yɛ nee bɛ yɛ nye die nwo dahuu a.​—Mat. 6:20.

16. (a) Duzu a bado ɛnɛ mekɛ ye gualilɛ ngyehyɛleɛ ne a? (b) Kɛzi ɔwɔ kɛ ɛhye maa yɛbu anwonyia ɛ?

¹⁶ Gyisɛse hanle kɛ: “Mekɛ mɔɔ ɛhye mɔ [ɛtane ewiade ɛhye anwonyia] kɛminli la,” tɛ kɛ ‘saa bɛminli a.’ (Luku 16:9) Wɔ awieleɛ mekɛ ɛhye anu bange bie mɔ ɛgu, yɛɛ maanle dɔɔnwo ezukoa gyinlabelɛ ɛzɛkye. Noko kenle bie ninyɛne bazɛkye bɔkɔɔ. Seetan ewiade ne amuala​—maanyɛlɛ, ɛzonlenlɛ nee gualilɛ ngyehyɛleɛ ne bazɛkye. Ngapezonli Yizikeɛle nee Zɛfanaya hanle dole ɛkɛ ne kɛ nvutuke nee dwɛtɛ fufule nee gualilɛ ngyehyɛleɛ mɔɔ ɛhɔ zo ɛvolɛ dɔɔnwo anu la amuala bayɛ mgbane. (Yiz. 7:19; Zɛf. 1:18) Saa yɛyɛ mrelera na yɛnwu ye kɛ yɛvale nɔhalɛ anwonyia yɛbɔle afɔle yɛkpondɛle “ɛtane ewiade ɛhye anwonyia” dɔɔnwo a, kɛzi yɛbade nganeɛ ɛ? Yɛbade nganeɛ kɛ awie mɔɔ vale ye mekɛ kɔsɔɔti boɔboale ezukoa nloa na awieleɛ bɔkɔɔ ne ɔnwunle kɛ ɔ muala ɛnle kpalɛ la. (Mrɛ. 18:11) Nɔhalɛ nu, anwonyia ɛhye mɔ kɔsɔɔti baminli, yemɔti mmamaa nwolɛ adenle mɔɔ ɛlɛ kɛ “ɛbanyia agɔnwolɛ wɔ anwuma” la fi ɛ sa. Debie biala mɔɔ yɛbayɛ yɛaboa Gyihova Belemgbunlililɛ ne la maa yɛyɛ sukoavolɛma wɔ sunsum nu.

17, 18. Duzu a Nyamenle agɔnwo mɔ banyia a?

¹⁷ Saa Nyamenle Belemgbunlililɛ ne ba a, sua mɔɔ bɛhaye nee bosea mɔɔ bɛbɔ bɛtɔ sua la bapɛ nu, aleɛ babu mɔɔ yɛnrɛndɔ a yɛɛ yɛnrɛbɔ kakɛ wɔ ayileyɛlɛ nwo bieko. Gyihova agɔnwo mɔ bali ninyɛne mgbalɛ mɔɔ azɛlɛ ne bazo la. Yɛbava ezukoa nvutuke, dwɛtɛ fufule nee agudeɛ gyɛne yɛaziezie yɛ nwo, yɛnrɛva yɛnrɛli gua anzɛɛ yɛnrɛva yɛnrɛzie. Awie biala banyia mbaka kpalɛ, awolɛ, nee mbulalɛ azi azua ngɛnlɛma mɔɔ yɛnrɛdɔ a. Agɔnwolɛma bavi bɛ ɛhulolɛ nu aboa yɛ, tɛ kɛ yɛtua bɛ kakɛ la ati ɔ. Yɛbahyɛ ninyɛne kɔsɔɔti mɔɔ azɛlɛ ne bamaa yɛ sa aha ye la.

¹⁸ Agyadeɛ mɔɔ sonle bolɛ mɔɔ menli mɔɔ fa agɔnwolɛ wɔ anwuma banyia la, nuhua ekyi bie ɛne. Gyihova azonvolɛ mɔɔ bɛwɔ azɛlɛ ye azo la anyelielɛ bayɛ kpole wɔ mekɛ mɔɔ bɛbade Gyisɛse edwɛkɛ mɔɔ se: “Bɛrɛla, bɛmɛ mɔɔ Egya ɛyila bɛ a, bɛva Belemgbunlililɛ ne mɔɔ bɛziezie bɛmaa bɛ ɔvi ewiade mɔlebɛbo ne la.”​—Mat. 25:34.