“MA ƐDELƐ gyima ne le kpole, noko gyimayɛvoma ne le ekyi. Yemɔti bɛzɛlɛ ma ɛdelɛ gyima ne Amenle kɛ ɔmaa gyimayɛvoma ɛrɛla ye ma ɛdelɛ gyima ne anu.” (Luku 10:2) Gyisɛse edwɛkɛ ɛhye mɔɔ ɛbo kɛyɛ ɛvolɛ 2,000 la fale Myanmar anwo. Duzu ati ɔ? Nolobɔlɛma kɛyɛ 4,200 ala a ɛlɛbɔ edwɛkpa ne nolo ahile menli mgbe 55 wɔ Myanmar a.

Noko, Gyihova, “ma ɛdelɛ gyima ne Amenle” ne ɛha mediema dɔɔnwo mɔɔ wɔ maanle ngakyile zo la ahonle na bɛra Ehyea Nyiakɛ Aduduleɛ kɛ bɛbahilehile menli Nyamenle anwo debie. Duzu a maanle bɛvile bɛ maanle nu a? Moalɛ boni a bɛnyianle amaa bɛavi bɛ maanle nu bɛara Myanmar ɛ? Na nyilalɛ boni a bɛlɛnyia a? Maa yɛnlea.

Mekɛ bie mɔɔ ɛpɛ nu la, Kazuhiro, adekpakyelɛnli bie mɔɔ wɔ Japan la pɛle mgbutike, ɔ nye zo bulule ye na bɛ nee ye hɔle asopiti. Dɔketa ne zele ye kɛ ɔmmaka kale too ɛvolɛ nwiɔ. Ɔzinle Kazuhiro anwo. Ɔbizale kɛ: ‘Kɛ ɔkɛyɛ na meahɔ zo meayɛ adekpakyelɛ gyima ne mɔɔ me nye die nwo la ɛ?’ Ɔvile ahonle nu ɔzɛlɛle Gyihova kɛ ɔboa ye ɔmaa ɔhɔ zo ɔzonle kɛ adekpakyelɛnli.

Kazuhiro ka kɛ: “Ye siane ko anzi, me gɔnwo bie mɔɔ ɛlɛsonle wɔ Myanmar la dele me edwɛkɛ ne. Ɔvɛlɛle me na ɔhanle kɛ: ‘Bɔɔso ala a bɛfa bɛtu adenle wɔ Myanmar ɛke a. Saa ɛba ɛke a, ɛbahola wɔahɔ daselɛlilɛ mɔɔ ɛnrɛhyia kale nwo a!’ Membizale me dɔketa ne saa me tɛnlabelɛ ne bamaa meahola meahɔ Myanmar a. Ɔzinle me nwo kɛ dɔketa ne hanle kɛ: ‘Dɔketa bie mɔɔ ɛbe na ɔyɛ adwenle nu ayile la vi Myanmar ɛlɛba Japan kɛkala. Mebava wɔ meahile ye. Saa wɔ ewule ne ba bieko a, ɔbahola yeayɛ wɔ ayile.’ Menvale dɔketa ne edwɛkɛ ne kɛ Gyihova ɛlɛbua me asɔneyɛlɛ.”

Ndɛndɛ ne ala, Kazuhiro hɛlɛle Myanmar Bɛtɛle ne kɛ, ɔ nee ɔ ye kulo kɛ bɛsonle wɔ maanle ne anu kɛ adekpakyelɛma. Kenle nnu pɛ anzi, Bɛtɛle buale kɛ, “Bɛrɛla, yɛhyia adekpakyelɛma dɔɔnwo!” Kazuhiro nee ɔ ye Mari dɔnenle bɛ ahale, bɛnyianle bɛ visa, na bɛdɔle tikiti mɔɔ bɛbava bɛavo alopile la. Kɛkala, bɛlɛfa anyelielɛ bɛazonle wɔ mumule ekpunli bie mɔɔ wɔ Mandalay la anu. Kazuhiro ka kɛ: “Anwubielɛ ɛhye maa yɛte nganeɛ kɛ diedi mɔɔ yɛlɛ wɔ Nyamenle ɛwɔkɛ mɔɔ wɔ Edwɛndolɛ 37:5 anu la ɛmia kpalɛ:  ‘Fa ɛ nwo maa [Gyihova]; fa ɛ rɛle wula ye nu, ɔbali yeamaa wɔ.’”

Wɔ 2014, Gyihova Alasevolɛ mɔɔ wɔ Myanmar la nyianle adenle yɛle nyianu titili bie. Ayiama mɔɔ vi maanle gyɛne zo la hɔle bie. Bɛ nuhua ko mɔɔ bɛfɛlɛ ye Monique, mɔɔ wɔ ye ɛvolɛ 30 anu, mɔɔ ɔvi United States la ka kɛ: “Mɔɔ bɛkpɔnenle nyianu ne la, menzɛlɛle Gyihova wɔ debie bieko mɔɔ ɔwɔ kɛ meyɛ wɔ me ɛbɛlabɔlɛ nu la anwo. Eza me nee me awovolɛ hanle sunsum nu bodane mɔɔ gyi me nye zo la anwo edwɛkɛ. Yɛ muala yɛdele nganeɛ kɛ ɔwɔ kɛ mesia mekɔ Myanmar, noko ɔhyɛle ekyi yɛɛ menyɛle asɔne dɔɔnwo kolaa na meazi kpɔkɛ.” Monique hilele deɛmɔti ɔhyɛle la.

“Gyisɛse maanle ye ɛdoavolɛma anwosesebɛ kɛ, bɛlimoa ‘bɛbu mgbonda.’ Ɔti, membizale me nwo kɛ: ‘Mebahola meadu adenle ɛhye ɔ? Mebahola meanlea me nwo wɔ maanle zɔhane anu amaa meanva mekɛ dɔɔnwo meanyɛ nwonane afoa nu gyima ɔ?’” Ɔka kɛ: “Menwunle ye ndɛndɛ kɛ menlɛ ezukoa dodo mɔɔ mebava meadu adenle meahɔ maanle gyɛne zo a.” Ɔti kɛ ɔyɛle mɔɔ ɔholale ɔhɔle ɛ?​—Luku 14:28.

Monique ka kɛ: “Kenle ko bie, me gyimamenle dole ɛsalɛ vɛlɛle me. Me ahonle dule, ɛnee mesuzu kɛ ɔbaye me gyima nu. Noko, me gyimamenle ne lale me ase wɔ me gyima kpalɛ ne anwo. Akee ɔzele me kɛ yeyɛ ngyehyɛleɛ kɛ bɛva ezukoa bie bɛboka me ahatualɛ ne anwo, na ɛnee ɔle ezukoa mɔɔ mehyia nwo na meahola meadua me nwo kakɛ la pɛpɛɛpɛ!”

Ɔvi December 2014, Monique tɛsonle wɔ Myanmar. Kɛzi ɔte nganeɛ wɔ ɛzonlenlɛ gyima ne mɔɔ ɔlɛyɛ ye wɔ ɛkɛ la anwo ɛ? Ɔka kɛ: “Ɔyɛ me fɛ kpole kpalɛ kɛ mewɔ ɛke la. Me nee menli nsa sukoa Baebolo ne. Bɛ nuhua ko ɛnyia ɛvolɛ 67. Dahuu ɔfa anyelielɛ ɔbiza me ahye na ɔyɛ me atuu. Mɔɔ ɔnwunle kɛ Nyamenle duma a le Gyihova la, ɔzunle. Ɔhanle kɛ: ‘Mekɛ mɔɔ limoa mɔɔ mede kɛ Nyamenle duma a le Gyihova la ɛne. Metɛla wɔ kpanyinli wɔ ɛbɛlabɔlɛ nu, noko wɔhile me debie mɔɔ anwo hyia kpalɛ mɔɔ ɛnee menze a.’ Mɔɔ mendiele ye la, medame noko menzunle. Anwubielɛ zɛhae maa ɛleka mɔɔ bɛhyia moalɛ dɔɔnwo mɔɔ ɛbahɔzonle la yɛ ahunlundwolɛ kpole.” Monique ɛnyia nwolɛ adenle ɛhɔ Belemgbunlililɛ Edwɛkpakavolɛma Sukulu ne bie kenle nsa ye.

Debie bieko mɔɔ ɛmaa bie mɔ ɛra Myanmar la a le 2013 Yearbook of Jehovah’s Witnesses mɔɔ hanle maanle zɔhane anwo edwɛkɛ la. Ɛnee adiema raalɛ Li mɔɔ yebo ɛvolɛ 30 la de Ehyea Aduduleɛ Nyiakɛ. Ɔfa ye mekɛ kɔsɔɔti ɔyɛ gyima, noko Yearbook ne anu edwɛkɛ ne maanle ɔzuzule Myanmar mɔɔ ɔbahɔzonle la anwo. Mɔɔ mengɔle nyianu titili ne wɔ Yangon wɔ 2014 la, menyiale agyalɛma bie mɔɔ bɛlɛboa menli mɔɔ ka Chinese wɔ Myanmar la. Kɛmɔ mete Chinese la ati, menzile kpɔkɛ kɛ mebahɔ Myanmar meaboa Chinese ekpunli ne. Mengɔmbokale Monique anwo na yɛdule yɛhɔle Mandalay. Gyihova yilale yɛ maanle yɛnyianle sukulu bie mɔɔ yɛfa mekɛ foa yɛkile debie wɔ ɛkɛ la, eza yɛnyianle sua mɔɔ bikye ɛkɛ la. Ɛkɛ ne yɛ wuluwulu yɛɛ yɛ nwo kyele yɛ, noko me nye die me ɛzonlenlɛ gyima ne anwo. Myanmar amra ɛtete ninyɛne zo wɔ bɛ ɛbɛlabɔlɛ nu, noko bɛbu debie yɛɛ bɛnyia mekɛ bɛtie edwɛkpa ne. Ɔyɛ anyelielɛ kɛ Gyihova ɛlɛmaa gyima ne anyia anyuhɔlɛ la. Medie medi bɔkɔɔ kɛ ɔle Gyihova ɛhulolɛdeɛ kɛ mewɔ Mandalay ɛke la.”

Mediema dɔɔnwo mɔɔ ɛlɛboa wɔ ɛleka mɔɔ bɛhyia moalɛ la ɛnwu kɛ Gyihova ɛdie bɛ asɔneyɛlɛ. Fa Jumpei nee ɔ ye Nao mɔɔ bɛ mu nwiɔ bɛwɔ bɛ ɛvolɛ 30 anu la kɛ neazo. Ɛnee bɛlɛsonle wɔ mumule asafo bie anu wɔ Japan. Duzu ati a bɛhɔle Myanmar a?  Jumpei ka kɛ: “Ɛnee ɔle me nee me ye bodane kɛ yɛbahɔboa wɔ ɛleka mɔɔ bɛhyia moalɛ dɔɔnwo wɔ maanle gyɛne zo la. Adiema nrenyia bie mɔɔ wɔ yɛ mumule asafo ne anu wɔ Japan la dule hɔle Myanmar. Ɛnee ezukoa mɔɔ yɛziezie la anzo, noko wɔ May 2010, yɛdayɛ noko yɛdule yɛhɔle. Mediema mɔɔ wɔ Myanmar la liele yɛ kɛnlɛma!” Kɛzi ɔte nganeɛ wɔ Myanmar mumule azɛlɛsinli ne anwo ɛ? “Anyelielɛ ne le kpole. Saa yɛye vidio ne mɔ wɔ mumule aneɛ nu a, ɔsi suamenlema mɔɔ bɛle anzondilira la anwo. Ɔyɛ yɛ fɛ kpole kɛ yɛzile kpɔkɛ kɛ yɛba yɛazonle Gyihova wɔ ɛke la!”

Kɛzi Jumpei nee Nao ɛhola ɛnlea bɛ nwo wɔ ezukoa afoa nu ɛ? “Yɛlile yɛ ezukoa dɔɔnwo mɔɔ yɛzie la wɔ ɛvolɛ nsa anzi, na ɛnee mɔɔ ɛha la ɛnrɛza ɛvolɛ bieko sua kakɛ tua. Me nee me ye vile ahonle nu yɛle asɔne ɛsesebɛ. Bɛtɛle ne hɛlɛle yɛ kɛ yɛhɔyɛ mekɛ ezinra nu adekpakyelɛ titili gyima, na ɛnee yɛ nye ɛnla! Yɛnyianle Gyihova anu anwodozo, eza yɛnwunle kɛ yɛamkpo yɛ. Ɔlɛnea yɛ wɔ ndenle ngakyile zo.” Jumpei nee Nao eza ɛnyia nwolɛ adenle ɛhɔ Belemgbunlililɛ Edwɛkpakavolɛma Sukulu ne bie kenle nsa ye.

Duzu a maanle Simone, adiema nrenyia mɔɔ wɔ ye ɛvolɛ 40 anu, na ɔvi Italy yɛɛ ɔ ye, Anna mɔɔ wɔ ye ɛvolɛ 30 anu na ɔvi New Zealand la dule hɔle Myanmar a? Anna ka kɛ: “2013 Yearbook ne anu edwɛkɛ mɔɔ fale Myanmar anwo la ɔ!” Simone ka kɛ: “Ɔle nwolɛ adenle kpole kɛ yɛwɔ Myanmar ɛke la. Ɛke asetɛnla ne anu ɛnyɛ se kpalɛ yɛɛ mekola mefa mekɛ dɔɔnwo meyɛ Gyihova gyima ne. Ɔyɛ anyelielɛ kɛ ɛbanwu kɛzi Gyihova boa yɛ wɔ mekɛ mɔɔ yɛlɛsonle wɔ ɛleka mɔɔ bɛhyia moalɛ dɔɔnwo la. (Edw. 121:5) Anna ka kɛ: “Me nye ɛlie ɛdɛla mekɛ biala. Yɛtete ninyɛne zo wɔ ɛbɛlabɔlɛ nu. Menyia mekɛ dɔɔnwo memaa me hu yɛɛ yɛbikye yɛ nwo kpalɛ. Yɛnyia agɔnwolɛma fofolɛ mgbalɛ dɔɔnwo. Menli ɛnlɛ Alasevolɛ nwo adwenletane yɛɛ menli kile edwɛkɛ ne anwo anyelielɛ kpalɛ!” Ndenle boni mɔ azo?

Anna ka kɛ: “Kenle ko bie, menlile yunivɛsiti sukoavo bie daselɛ wɔ gua nu, na yɛyɛle ngyehyɛleɛ kɛ yɛbayia bieko. Mɔɔ mengɔle la, ɔ nee ɔ gɔnwo ko rale. Kenle fofolɛ noko, ɔ nee menli ekyi rale. Nzinlii, ɔ nee dɔɔnwo bɔbɔ rale. Kɛkala, me nee bɛ nuhua nnu ɛlɛsukoa.” Simone ka kɛ: “Menli mɔɔ wɔ azɛlɛsinli ne anu la kulo menli yɛɛ bɛkulo kɛ bɛsukoa debie. Bɛ nuhua dɔɔnwo anye die edwɛkɛ ne anwo. Yɛnnyia mekɛ dɔɔnwo bɔbɔ yɛmmaa anyelielɛma ne amuala.”

Na ninyɛne mgbalɛ boni mɔ a yɛyɛle amaa yɛazi kpɔkɛ kɛ yɛba Myanmar a? Mizuho mɔɔ vi Japan la ka kɛ: “Ɛnee me nee me hu Sachio kulo kɛ yɛkɔboa wɔ maanle mɔɔ bɛhyia moalɛ dɔɔnwo la anu​—noko nienwu? Mɔɔ yɛgengale Myanmar anwo edwɛkɛ wɔ  2013 Yearbook ne anu la, anwubielɛ ngɛnlɛma mɔɔ wɔ nu la hanle yɛ ahonle kpalɛ, ɔti, yɛbɔle ɔ bo kɛ yɛsuzu nwo saa yɛbahola yɛahɔ Myanmar a.” Sachio toa zo kɛ: “Yɛzile kpɔkɛ kɛ yɛfa dapɛne ko yɛahɔnlea kɛzi Myanmar suakpole Yangon azo de la. Mekɛ ezinra nu adendulɛ ne maanle yɛnwunle kɛ ɔwɔ kɛ yɛba ɛke.”

Rodney nee ɔ ye Jane, mɔɔ bɛvi Australia, mɔɔ bɛ mu nwiɔ bɛwɔ bɛ ɛvolɛ 50 anu la nee bɛ ra nrenyia Jordan yɛɛ raalɛ Danica, ɛlɛboa wɔ Myanmar ɔvi 2010. Rodney ka kɛ: “Yɛ nye liele kpalɛ kɛ yɛnwunle kɛ menli kulo kɛ bɛsukoa Nyamenle anwo debie la. Memaa mbusua gyɛne anwosesebɛ kɛ bɛbɔ mɔdenle bɛrazonle wɔ ɛleka le kɛ Myanmar.” Duzu ati ɔ? “Kɛzi anwubielɛ ɛhye ɛmaa yɛbikye Gyihova la yɛ nwanwane! Ngakula dɔɔnwo fonu, ahale, gyima nee ninyɛne gyɛne ɛlie bɛ mekɛ. Yɛ mra ne mɔ anye ɛbolo ɛlɛsukoa edwɛkɛ agbɔkɛ fofolɛ mɔɔ bɛbava bɛali daselɛ la. Bɛbɔ mɔdenle bɛsukoa kɛzi bɛ nee menli mɔɔ bɛnze Baebolo ne anu la bazuzu edwɛkɛ nwo, nee kɛzi bɛbamaa mualɛ wɔ debiezukoalɛ bo wɔ ɛkɛ ne asafo ne anu la, eza bɛlɛyɛ asafo gyima gyɛne mɔɔ yɛ anyelielɛ la bie.”

Oliver, adiema nrenyia bie mɔɔ wɔ ye ɛvolɛ 30 anu na ɔvi United States la, kilehile deɛmɔti ɔkanvo ɛzonlenlɛ nwo adenle ɛhye ɔkile la: “Gyihova mɔɔ melɛsonle ye wɔ ɛleka mɔɔ ɛnee menze ɛkɛ ne tɛnlabelɛ la ɛboa me dɔɔnwo. Sua nu mɔɔ menvile la ɛmaa menyia Gyihova anu diedi nee anwodozo ɔnva nwo tɛnlabelɛ biala mɔɔ mebahɔ nu la. Menli mɔɔ ɛnee menze bɛ noko yɛ muala yɛlɛ diedi ko na yɛlɛbɔ nu yɛazonle la ɛmaa menwu kɛ, debie biala ɛnle ewiade mɔɔ hyia tɛla Nyamenle Belemgbunlililɛ ne a.” Ɛnɛ, Oliver nee ɔ ye Anna, ɛlɛkɔ zo ava anyelielɛ azonle wɔ Chinese azɛlɛsinli ne anu.

Ɔvi 2004, adiema raalɛ Trazel mɔɔ wɔ ye ɛvolɛ 50 mɔlebɛbo anu, na ɔvi Australia la ɛzonle wɔ Myanmar. Ɔka kɛ: “Mekanvo meahile bɛdabɛ mɔɔ bɛ tɛnlabelɛ ne bamaa bɛ adenle la kɛ bɛhɔzonle wɔ ɛleka mɔɔ bɛhyia moalɛ dɔɔnwo la. Menwu kɛ, saa ɛlɛ ɛhulolɛ kɛ ɛbazonle a, Gyihova yila wɔ mɔdenlebɔlɛ zo. Meandwenle nwolɛ ɛlɛ kɛ me ɛbɛlabɔlɛ bayɛ zɛhae. Ɔle gyima mɔɔ anyelielɛ nee ahunlundwolɛ wɔ nu mɔɔ menyia a.”

Maa menli mɔɔ ɛlɛboa wɔ Myanmar la anwubielɛ ne ɛmaa wɔ anwosesebɛ na suzu menli mɔɔ wɔ azɛlɛsinli mɔɔ bɛtɛyɛle nuhua gyima ɛlɛ mɔɔ ɛbahɔboa bɛ la anwo. Ɛhɛe, menli mɔɔ ɛlɛboa wɔ ɛleka mɔɔ bɛhyia moalɛ dɔɔnwo la ɛlɛtea nu kɛ, “Yɛsɛlɛ bɛ, bɛrɛla Myanmar bɛraboa yɛ!”